KISAH PARA RASUL 16 - Allah Wene Fano Wene Hupla Inane

At Timotius Paulus ombo'ne lagaikhe wene

¹ Paulus lak o andoma nen o Derbe wagaukwasik he, hobuk o Listra wagaukwa. O Listra andoma ap ekhe enu Timotius, Yesus ane wanhikhe mene were'ma wagaukwa. Agaisa a'nogoat Yesus ane eberogoat iluk wanhikhe mene, ebe Yahudi mene. Meneat he, eisena nek he, Yunani mene.

² Allah againafuri o Listra mene inom, o Ikonium mene inom, mondogaren he, ”Timotius obabut fano,” iluk abok fano ikhi lagaukwa.

³ Menere, at Paulus nen Timotius ebe waluk lageluk he, it afuni Yahudi mene o yi awi ti awi andoma welagaukwa mene mondogaren, ”Timotius eisena ebe Yunani mene,” iluk inelu welagaukwa andi nen, agap enggalimo mene palhikhe.

⁴ Agap enggalimo mene a'nogo palhikhesik, ebe emberegat o yi awi ti awi waga logolik he, wene it ap Yesus nen inebe wenagaisogo inayonggo fuluk lakfisasikhe mene inom, Allah againafuri kwelaginarek welagaukwa mene inom, inomen o Yerusalem logolik wene palhukwa mene a'nogo, Allah againafuri nen fisogo logolik higithogo hilingiti logouwageluk yagaisilik wagaukwa.

⁵ Yagaisilik wagaukwama re, it Allah againafuri Yesus ane eberogoat iluk wanhukwa mene inendawinggen wurik agu kwelek, afuni ekhe Yesus ane wanuogeluk hundik-handik wagunem, inebe hokhorogo aga lagaukwa.

At Paulus o Troas nen abikanggo hasikhe wene

⁶ A'nogo hilinglagu kwelek he, Allah Areagun en, ”Wene o propinsi Asia andoma yagaisogoin lek,” iluk inendawimo kagalhikhemo re, it o Frigia Galatia kwe andoma tulemkwe lagakhogo waga lagaukwasik,

⁷ O Misia wagaukwasik andoma nen, o Bitinia louwogeluk isukwa meneat he, Allah Areagun en, ”O andoma logoin lego,” iluk inendawimo kagalhikhe.

⁸ A'nogo inendawimo kagalhikhemo re, o Misia tonggwe o kota Troas wagaukwa.

⁹ Wagaukwasik logolik, hubanggo Paulus abikanggo yi'nogo hasikhe. Ap o Makedonia mene ekhe mendek logolik he, ”Haren nit afuni Makedonia mene yoma lebe'nisa wulibime o,” iluk endawimo kagalogo yagatunem abikanggo hasikhe.

¹⁰ Abikanggo a'nogo hasikhemo, niren he mel isugu: ”Wene fano wene it afuni andoma mene yagaisa loageluk, Allah nen ninayonggo fikhe higi,” iluk isugusik he, o Makedonia wulibi wesuogeluk isugu.

Paulus o kota Filipi logolik, wene he Lidia yagatikhemo wanhikhe wene

¹¹ A'nogo isugusik he, o Troas andoma nen i agum ebene nen e soba pikhirat he, i enggenma o enu Samotrake wulibi wagagusik, ohealekwe i aik yikwe o Neapolis wulibi wagagu.

¹² Wulibi wagagusik o andoma nen he, o kota Filipi wagagu. O propinsi hokho Makedonia andoma ebe huli palek were'ma re, attak inenggi wenati lagaukwaba, o kota Filipi andoma it afuni o Roma mene nen ferinarek logolik wutukwasik welagaukwaba, wagagu andi. O andoma wagagusik he, ninenggi endebat welagagusik,

¹³ ninenggi Allah faget weat logolik, samban uogeluk, o kota kwe ambe pale'ma andoma nen wulifugusik he, i aik oba andoma afuni Yahudi mene samban agarek oba obuluk ekhe logogun iluk lagagusik heratugu. Andoma hemi andogorek were'ma ninebe hu'lagagusik he, ninom wene ane ikhi logolik wene yagaisasugu.

¹⁴ Hemi wene yagaisasugu mene andi, he ekhe aiba o Tiatira mene. Su kain elokhonggen e enggen warek hangge mene it ekhe inoba onggo hokhoat wanhi lagaikhe mene, enu Lidia andi nen Allah ane wanhikhesik Yahudi mene hangge were'ma, wene Paulus nen ugunem fano wanuageluk, Tuhan endawimo kagalhikhemo, wanhikhe.

¹⁵ Wene a'nogo wanhikhemo re, at ebe inom, it afuni at aiba misi'mo welagaukwa mene inom, ima pelaginafukwa. Pelaginafukwama, at Lidia nen he, ”An faget hit hinendawimo nen, at endawinggen Tuhan oba eberogoat himbiret fikhe higi, iluk hinendawimo anggegep halok he, an ninom logouwogen, ninom louwogo,” iluk ane ninghogo yaganisasikhemo re, ninom lagagu.

At Paulus o Filipi were'ma enggi hele warogo kwelakfesukwa wene

¹⁶ O andoma lagagusik logolik, ninenggi ekhe sambul, o samban ikhi lagaukwaba a'nogo lagunem he, helenggerek afuni inamingmingengge mene ekhe munggwarengge obabut weak mene oba louksek were'ma, heinogengge oba kwikhi lagaukwa mene were'ma ninom ambi agagu. Helenggerek andi, afuni nen heinok oba wanhunem, aren wene hobuk hilinglasigin mene yagaisugunem, onggo wogeti lagaukwa. A'nogo wogetunem, aren ogogwi hokhorogo wogisikhi lagaikhe.

¹⁷ Nit Paulus ninom lagunem, at helenggerek andi ninombo'neat lagaikhe. Laga logolik he, ane hokhorogoat afuni mel yagaisasikhe: ”It ap yi inebe Tuhan Allah amingmingengge welagaikharek mene nen wene hinebe telhinabigin wene yagahisuogeluk wagaikha o,” iluk yagaisasikhe.

¹⁸ At helenggerek andi hobuk hundik-handik ane a'nogoat ikhi lagaikhe. Ikhi logolik, ane Paulus oba hundik-handik yagati lagaikhemo re, at elokhe hebekhogo munggwarengge obabut weak mene andi mel yagatikhe: ”Munggwarengge hobabut weak mene yi. Hele ari endawimo welagen andi, henogo wulibi lanogeluk, Yesus Kristus enu hombuk palogo yagaheti lagi o,” iluk yagatikhemo re, aremnogoat endawimo nen henogo wulifikhe.

¹⁹ A'nogo henogo wulifikhemo, ogogwi omanogo nen ineilenggen hasukwasik he, ”Nit onggo wo'nisikherek a'nogo legaga andi ninabire,” iluk, at Paulus Silas emberek inebe fakfisasukwasik he, inenggi lisogo o silimo afuni andogoti lagaukwaba kaindek pemerintah mene inoba woginarek lagaukwa.

²⁰ Woginarek lagaukwasik he, inebe it ap inogogwi pemerintah mene inenggiba fesukwasigen mel isukwa: ”It ap Yahudi mene yi nen, o nit were'ma yoma elokhonggen weagetfili'lagwi o.

²¹ Nit afuni o Roma mene nen hilingisu lek mene hilingiti logouwageluk yaganisili'lagwi andi nen, wene andi wanugun mondok lego,” iluk yagaisasukwama re,

²² it afuni hokhorogoat omanogo inebe menlagaukwasik he, Paulus lak inoasuogeluk isukwa. A'nogo ugu kwelek, it pemerintah mene nen, at Paulus Silas emberek inasu tilip-talakhogo nonggolhukwasik he, inagoromi nen yei inoasuageluk yagaisasukwa.

²³ A'nogo yagaisasukwama yei hokhorogoat inoatukwasik he, o inenggi hele warogo fisagarek oba kwelakfisasukwa. Kwelakfisikhi logolik he, ap ekhe hele warek ferinarek welagarek mene andi ninghogo ferinarek logouwageluk komoratukwa.

²⁴ A'nogo komoratukwama re, inebe o hulu tulem senggele'ma andoma kwelakfisasukwasik ineisok e hokho meneba hele ninghogo homagaisogo fisasukwa.

²⁵ A'nogo fisasukwasik logolik, o hup tulem it afuni ekhe inenggi hele warek welagaukwa mene inesanggo hologo werek kwelek, Paulus Silas emberegen samban igik, Allah fogerasuogeluk wuni watik, isukwa.

²⁶ A'nogo ugunem, misigamat lugul hokho mene langethugunem he, o hokho wuri'mo welagaukwaba andi o tik warek mene erak-kwerak hikhi logolik, kwe yagarek mene mondogat houwak lambuk igik, afuni mondogat inenggi hele warek welagaukwa mene omanogo fikhalagik, isikhe.

²⁷ A'nogo hilinglagaikhemo, at ap hele warek ferinarek welagaikhe mene a'nogo eluk agaikhesik he, o afuni inenggi hele arek fisagarek oba a'nogo kwe mondok hurik were'ma eilenggen hasikhe. Eilenggen hasikhesik he, it inenggi hele warek mene omanogo inebe wulifa iluk, ailo agaikhesik onggwaregen warageluk karok oua'ma mene lisogo wanhikhe.

²⁸ Wanhikhesik onggwaregen warageluk ugunem, at Paulus ane hokhorogoat mel yagatikhe: ”Hebe honggwaregen waragun o. Nit ninebe mondogat welago,” iluk yagatikhe.

²⁹ A'nogo yagatikhemo re, esage kino isikhesik he, fungusek oak lei'leik inoba kwisikhesik he, it Paulus Silas emberek inawe a'ma soma isikhe.

³⁰ Hobuk, at kain a'nogo menlagaikhesik, inebe woginarek wulibi wagaikhesik he, mel yagaisasikhe: ”Nogogwi. An nebe Allah nen telnabuageluk nobabut ninggi'nogo hilingisik,” iluk yagaisasikhemo re,

³¹ iren he, ”Hendawinggen Tuhan Yesus oba himbiret fagain halok he, hat hebe inom, hagainafuri inom, hinebe mondogat telhinabigin o,” iluk yagatukwa.

³² A'nogo yagatukwasik, wene fano wene a'nogo, at ebe inom, againafuri inebe mondogat inom, yagaisasukwa.

³³ Yagaisasukwama re, o hubanggo andi sambulat, inebe woginafikhesik he, yei inoatukwa mene omanogo sobalogo fisasikhemo re, at kain ebe inom, againafuri inom, misigamat ima pelaginafukwa.

³⁴ Ima pelaginafukwama, at Paulus Silas emberek at kain a'nogo nen aiba wogi narek lagaikhesik he, sumburu melagi sasikhe. Melagisasikhesik, at againafuri inom mondogaren inendawinggen Allah oba himbiret fesukwa andi nen, inendawimo inagaiyegetukwa.

³⁵ O ohealekwe re, it kaindek pemerintah mene omanogo nen inagoromi polisi mene inayonggo fikhi logolik, mel yagaisasukwa: ”Ap hele warek ferinarek werek mene a'nogo nen it hele warek mene omanogo hele fikhalogo wulakfisoageluk yagasi lani o,” iluk lakfisasukwa.

³⁶ A'nogo lakfisasukwama lagaukwasik ap hele warek ferinarek welagaikhe mene a'nogo yagatukwama, aren he, Paulus mel yagatikhe: ”It ap kaindek omanogo nen he, hit hele fikhalogo wulak hinobagauwageluk yonggo lakfisa wagaikhama yi o. Halok he, hinebe wilibimbik he, hinendawimo fanorogo lano o,” iluk yagaisasikhe.

³⁷ A'nogo yagaisasikhe meneat he, at Paulus nen mel yagaisasikhe: ”Nit ninebe o Roma mene ninawiwerek meneat he, wene ninoba le'maat, yei ninoatasigen ninenggi hele warogo o inenggi hele warek fisagarek oba afuni hineilhanemat kwelakninobagai wagaikhasigat he, yogondak hinagaisogo wulak ninobagauwageluk aga andi nenahalok. It inonggwarek inebe wesimbigen wulak ninobagauwago,” iluk isikhe.

³⁸ A'nogo yagaisasikhemo, it yonggo wagaukwa mene omanogo nen he, inogogwi kaindek omanogo inoba lagaukwasik mel yagaisasukwa: ”It Paulus lak inebe o Roma mene inawiwerek mene,” iluk yagaisugunem inesanggo holhukwasik inailo agaukwa.

³⁹ Inailo agaukwasik, inebe wagaukwasigen, ”Nagaila'lak. Nit weak hilingitoma,” iluk Paulus Silas emberek hai warogo o inenggi hele warek fisagarek oba nen wulakfisa waga logolik he, mel yagaisasukwa: ”Hinebe o kota yoma logogubo. O ekhema lani o,” iluk inane liokhogo yagaisasukwa.

⁴⁰ A'nogo yagaisasukwama, o inenggi hele warek fisagarek oba andoma nen he, he Lidia aiba lagaukwa. Lagaukwasik, Allah againafuri mene inom ambi agaukwasik he, inendawinggen ago watfisaluk wagaukwa.