KISAH PARA RASUL 15 - Allah Wene Fano Wene Hupla Inane

O Yerusalem en wene hokhorogo isukwa wene

¹ Ap ekhe o Yudea nen o Antiokhia wagaukwasik he, Allah againafuri andoma mene wene mel iluk yagaisasukwa: ”Hit he, wene Musa nen, yi'nogo ti'nogo hilingiti logogun iluk yaganisasikhe wene andi higithogo re, hinagap hinenggalimo mene palhinafi'lek halok he, hinebe Allah nen telhinabigin lego,” iluk yagaisasukwa.

² Wene a'nogo yagaisasukwama, at Paulus Barnabas emberegen it ap andi mel yagaisasukwa: ”Hiren egep andi mondok weak egebo,” iluk, inom wene palhik, wene hokhorogoat palhukwa. Wene a'nogo hokhorogo palhukwama re, it andoma mene nen he, Paulus Barnabas emberek, it ekhe inomat o Yerusalem lagaukwasik he, it ap Yesus nen inebe wenagaisogo inayonggo fuluk lakfisasikhe mene omanogo inom, it ap Allah againafuri ferinarek welagaukwa mene inom, inomen wene andi faget haluageluk lakfisuogeluk isukwa.

³ It Allah againafuri nen a'nogo isukwasik lakfisasukwama re, o andoma nen he, Fenisia nen, Samaria nen, laga logolik he, mel yagaisilik lagaukwa: ”It afuni endakwe mene inobabut hebelarik inelokhe Allah wogotama o,” iluk yagaisilik lagunem, it Allah againafuri andoma mene inendawimo inagaiyek hokhorogoat agaukwa.

⁴ It a'nogo o Yerusalem lagaukwama re, it ap Yesus nen inebe wenagaisogo inayonggo fuluk lakfisasikhe mene omanogo inom, it ap Allah againafuri ferinarek welagaukwa mene inom, it Allah againafuri ekhe andoma inebe andogoti lagaukwa mene inom, inomen, hai warogo woginafukwa. Woginafukwama, iren he, ”Nit Allah ninomen yi'nogo hilingito, ti'nogo hilingito,” iluk wene pilingisogo yagaisasukwa.

⁵ Yagaisugunem it ap Farisi mene Yesus ane eberogoat iluk wanhukwa mene ekhe menlagaukwasik he, mel yagaisasukwa: ”Afuni endakwe mene Yesus ane wanha mene andi re, inagap inenggalimo mene palinafik, wene Allah nen Musa ayonggo fesikhesik komotninafikhe wene a'nogo fisogo welagik, ikhi logogun o,” iluk yagaisasukwa.

⁶ Yagaisasukwama re, it ap Yesus nen inebe wenagaisogo inayonggo fuluk lakfisasikhe mene omanogo inom, it ap Allah againafuri kwelaginarek welagaukwa mene omanogo inom, wene andi haluogeluk andogotukwa.

⁷ A'nogo andogotukwasik, wene it ekhe nen igik, it ekhe nen igik, hokhorogoat ikhi lagaukwasik, at Petrus menlagaikhesik he, mel yagaisasikhe: ”Ap yi sani. Nagaila'lak. It afuni endakwe mene nen wene fano wene inesanggo holhik, inendawimo nen eberogoat iluk futfigik, uageluk, an fageat hit ninom were'ma, it andi yagaisa loageluk Allah nen wena'nafikhesik nayonggo fesikhe andi, hinelu o.

⁸ At Allah nen afuni ninendawinggen elu mene a'nogo nenat, yi an nagainafuri o, iluk Areagun nit wo'nisasikhe andi hagat it andi wogisasikheat.

⁹ It hunogoat hilinginafik, nit hunogoat hilingninafik, igi'lego. We, iren Yesus ane eberogoat iluk wanhukwama re, aren inendawimo horinafikhe andi.

¹⁰ Allah nen a'nogo hilingitu kwelegat he, hiren at obabut paluogeluk ikhi lagep andi nenahalok? Wene andi enggin hokho nen he, ninombalak wanu elo'lek welagaukwa. Nen, niren wanugun elo'lek logoligat he, hobuk it Yesus ane wanha mene andi wanuageluk egep andi nenahalok.

¹¹ Tuhan Yesus obabut fano nen he, ninendawinggen at oba eberogoat himbiret fugunem nit telninafik, it telinafik, ninom higithogoat telninaferek andi,” iluk yagaisasikhe.

¹² A'nogo yagaisasikhemo, it afuni hokhorogoat omanogo inane igi'lek kamo isukwa. A'nogo kamo isukwama, Barnabas Paulus emberegen wene yagaisikhi logolik he, ”It afuni endakwe mene wene yagaisugunem futfouwageluk, niren elalinat hilinginabik nikhi lagosik wago andi, ebe re, Allah nenat hilinginafi laga o,” iluk pilingisogo yagaisugu kwelek, inesanggo hologo welagaukwa.

¹³ Wene arat yagaisasukwama re, at Yakobus nen mel yagaisasikhe: ”Ap yi sani. Nagaila'lak. An wene igin yi hinesanggo holini.

¹⁴ Allah nen it afuni endakwe mene inoba ebet fuluk he, mel isikhe: It ekhe an nagainafuri asuageluk woginabigin o, iluk woginafikhe mene faget, at Simon nen yaganisikhe andi.

¹⁵ A'nogo yaganisikhe andi re, it ap Allah ane yagaisikhi lagaukwa mene omanogo nen isukwa higithogoat yaganisikhe o. Iren iluk lisu palhukwa:

^16-17 Nineisena Tuhan ikhi logolik he, Afuni fena andi mondogat inom, it afuni endakwe mene, an nagainafuri iluk nonggwarek nenu hombuk palogo wenaginafigi mene andi mondogat inom, inom lambukhogo ineisena Tuhan an nebeat heraknabuageluk, an nonggwarek hobuk wesigin o. Wesimbik he, o sa'nok ugunem hobuk ket wutarek andi hak, Daud lak inenu lek aga andi, inenu wereget fagain o. Meisalaga mene andi, an nen hobuk abolok lek mondok wurogo figik, keret figik, igin o, iluk, nineisena Tuhan a'nogo mondogat hilingiterek mene nen

¹⁸ a'nogo ninelu asuageluk fageat yaganisasikhemo, lisu palogo fesukwa andi.

¹⁹ Andi nen he, an nendawimo re, it afuni endakwe mene inobabut hebelogo, inelokhe Allah wogeri'lagwi mene andi re, inendawimo weagetfogoin lek anggikhi lagi.

²⁰ We, niren he, wene mel iluk lisu palogo inoba lakfouwok. Tugwi kembu harenggen oba himbirik logolik anggo waretarek mene kurik nunggunem inebe weaget fakhagarek mene andi nogoin lek. Pailak fakfisogoin legat. Nen, yi mene ti mene alonggop perelogo warek mene ninggik, mep ninggik, ugun legat, iluk komorogo inoba lakfouwogo.

²¹ Wene Allah nen at Musa yagatikhemo, aren komotninafikhe wene a'nogo, huli ninambu ninombalak fageat andoma nen o yi awi ti awi o afuni Yahudi mene samban agarekwe, inenggi Allah faget weat logolik hundik-handik wene andi enu salogo yagaisagarek mene weregaro,” iluk at Yakobus nen yagaisasikhe.

Wene lisu palogo it Allah againafuri o Antiokhia mene inoba lakfei wagaukwa wene

²² Wene a'nogo isukwasik he, it ap Yesus nen inebe wenagaisogo inayonggo fuluk lakfisasikhe mene omanogo inom, it ap Allah againafuri kwelaginarek welagaukwa mene omanogo inom, Allah againafuri ekhe andogorek welagaukwa mene mondogat inom, inomen wene mel iluk palhukwa: ”Ap nit mene ekhe wenagaisogo inayonggo fesukwasik, Paulus Barnabas emberek inom o Antiokhia loagen he, lakfisuogo,” iluk isukwa. A'nogo isukwasik he, it Allah againafuri ekhe nen, at Yudas enu ekhe Barsabas andi inom, Silas andi inom, ”Inobabut fano,” iluk anggikhi lagaukwa mene nen, lisu palek andi inenggim waluk loageluk inayonggo fesukwa.

²³ Wene andiba lisu palogo fikhi logolik, mel isukwa: ”Nit hinerugwi hinagaila'lak Yesus nen ninebe wenagaisogo ninayonggo fuluk lakninobagai wagaikhe mene inom, Allah againafuri kwelaginarek welagorek mene inom, ninomen he, hit o Antiokhia mene, Siria mene, Kilikia mene, hinebe endakwe meneat he, Allah againafuri mene ninerugwi ninagaila'lak, iluk hai wathinafo andi o.

²⁴ Ap nit mene ekhe hit hinoba wagaikhasik he, niren, wene yi'nogo yagaisa lani, iluk lakfisa wagi'lek meneat he, iren hit yagahisikhi logolik, hinendawimo weaget hinafik, nonget hinafik, aga o, iluk afuni nen agama ninesanggo holho o.

^25-27 Ninesanggo holhosik he, ninebe andogorogo nen wene palho. Wene a'nogo palhosik, Barnabas Paulus emberek inebe ninendawi mene, ninebe Tuhan Yesus Kristus faget fisaluk, inoasuogeluk ugu kwelegat he, at faget hilingiri'lagwi mene inom hinoba wesuageluk ap ekhe Yudas Silas emberek inayonggo fogoma wesugun andi. It wesimbik he, wene lisu palogo fogo andi inambeba nen pilingisogo yagahisoak.

²⁸ Nit Allah Areagun ninom logolik he, wene mel iluk palho andi. Wene enggin mene yagahisogoin lek. We, wene yiat hinesanggo holugun ogo.

²⁹ Tugwi kembu harenggen oba himbirik logolik anggo waretarek mene andi kurik nogoin lek. Mep nogoin legat. Yi mene ti mene alonggop perelogo warek mene andi nogoin legat. Pailak fakfisogoin legaro, iluk wene palho. A'nogo hilingiti'legat kamo egep halok he, hit fano hilingiti lagep iluk ugun andi. Wene andiba arat yagahisogo. Nerugwi nagaila'lak,” iluk lisu palogo lakfisa wagaukwa.

³⁰ A'nogo lisu palogo lakfisa wagaukwama, o Antiokhia arat wagaukwasik he, Allah againafuri inebe mondogat andogerinafukwasik wene lisu palek a'nogo wogisasukwa.

³¹ Wogisasukwama, enu salhukwasik he, ”Wene andiba ninendawimo fano aga,” iluk inendawimo inagaiyek hokhorogo agaukwa.

³² Inendawimo inagaiyek agaukwama re, at Yudas Silas emberek Allah ane yagaisikhi lagaukwa mene andi nen he, Allah againafuri omanogo inendawinggen sebelhik, ago warinafik, uogeluk he, wene hokhorogoat yagaisikhi lagaukwa.

³³ A'nogo yagaisikho welagaukwasi'mo nen, it Allah againafuri o Antiokhia mene nen he, it Yudas Silas emberek hai warogo, it inebe lakfisa wagaukwa mene omanogo inoba inambotkwe hobuk lakfisasukwa.

³⁴ [Mene re, at Silas endawimo nen he, ”An kamo igin,” iluk o Antiokhia kamo isikhe.]

³⁵ It Paulus Barnabas emberek ogo re, o Antiokhia andoma kamo isukwasik, it afuni ekhe hokhorogoat inom andoma logolik he, Wene Fano wene andi yagaisigik, komorinafik, ikhi lagaukwa.

Paulus Barnabas emberek wene palhi lagaukwasik, inamu-inamu pugulhukwa wene

³⁶ O andoma inenggi ekhe inom welagaukwasigen he, Paulus nen Barnabas yagati logolik he, ”O yi awi ti awi Wene Fano ane yagaisilik lagoba omanogo hobuk louwok. Laga logolik he, Allah againafuri ninerugwi ninagaila'lak omanogo ninggi'nogo werek iluk, o sili lombok nineilenggen isilik louwok,” iluk yagatikhe.

³⁷ A'nogo yagatikhemo re, at Barnabas nen he, at Yohanes enu ekhe Markus a'nogo waluk lageluk isikhe.

³⁸ A'nogo ugunem, at Paulus nen he, ”Lego. Nit Allah faget ninom hilingirik louwogeluk lagosigen, o Pamfilia nen ambotkwe sugulogo waga a'nogo re, hobuk waluk logoin lego,” iluk yagatikhe.

³⁹ A'nogo yagatikhemo, emberek wene haro weak palhukwasik he, inamu-inamuat pugulhukwa. At Barnabas nen he, Markus waluk he, i agum ebene nen e so warogo o Siprus wagaukwa.

⁴⁰ Wagaukwama re, at Paulus nen Silas ayonggo fesikhesik wesuogeluk ugunem, it Allah againafuri o Antiokhia mene nen he, ”Tuhan obabut fano a'nogo nen wokhinarek loago,” iluk hai warogo lakfisa wagaukwama wagaukwa.

⁴¹ It a'nogo waga logolik he, o propinsi Siria andoma nen pikhit o propinsi Kilikia Allah againafuri inendawinggen ago watfisilik wagaukwa.