KISAH PARA RASUL 13 - Allah Wene Fano Wene Hupla Inane

Barnabas Saulus emberek wenagaisogo fisasukwasik lakfisasukwa wene

¹ Allah againafuri o Antiokhia andogoti lagaukwa mene omanogo, it ekhe nen Allah ane yagaisigik, it ekhe nen yagaisigik, ikhi lagaukwa mene inebe ap ekhe Barnabas andi, ekhe Simeon enu Ebe muli ikhi lagaukwa mene andi, ekhe Lukius o Kirene mene andi, ekhe Menahem, Herodes kain gubernur agailak emberek ambine kulinafukwa mene andi, ekhe Saulus andi, welagaukwa.

² Logolik he, inenggi ekheba Allah againafuri inom Tuhan Allah awe a'ma kwisukwasik, sumburu ninggi'lek, at fogeratu were'ma, Allah Areagun nen yagaisikhi logolik, ”Barnabas Saulus emberegen an faget hilingiti logouwageluk, inayonggo figimo andi nen he, it inebe minggilogo an faget mennobagaino o,” iluk yagaisasikhe.

³ Yagaisasikhemo re, sumburu ninggi'lek samban ikhi lagaukwasigen, inenggi it Barnabas Saulus emberek inunggul sebelogo lakfisa wagaukwa.

Saulus Barnabas emberegen, it afuni o Siprus mene fano wene yagaisa wagaukwa wene

⁴ It Barnabas Saulus emberek Allah Areagun nen lakfisa wagaikhemo re, o Seleukia pi wagaukwa. Pi wagaukwasik he, o Seleukia andoma nen he, ima kwe i soba o Siprus i alonggenma wagaukwa.

⁵ Wagaukwasik, o Salamis wagaukwasik he, afuni Yahudi mene o samban ikhi lagaukwa kwe kwisukwasik he Allah ane yagaisilik nikhi lagaukwa. Yagaisilik nugu kwelek, at enu Yohanes igik, Markus igik ikhi lagaukwa mene a'nogo nen leberisikhi lagaikhe.

⁶ O Siprus i alonggenma andoma, o sili ebe lombok nikhi lagaukwasigen, hobuk o enu Pafos wagaukwa. Wagaukwasik he, ap Yahudi mene ekhe enu Bar Yesus andi, ebe wesagun logolik he, Allah ane hangge onggwarek ane meneat yagaisikhi lagaikhe mene were'ma wagaukwa.

⁷ O Siprus i alonggenma andoma, ap kain gubernur endawinggen kagalek mene enu Sergius Paulus welagaikheat. At gubernur andi, at wesagun andi agailak. Logolik, at Sergius nen he, ”An Allah ane nesanggo holigin namolo,” iluk, Barnabas Saulus emberegat inayonggo fesikhe.

⁸ A'nogo inayonggo fesikhe meneat he, ap wesagun Bar Yesus andi, it afuni Yunani mene inaneba enu Elimas ikhi lagaukwa mene andi nen he, ap kain gubernur andi wene wanimbik endawinggen Yesus oba himbiret feinogo iluk, Barnabas Saulus emberek inane sebeligeluk isikhe.

⁹ A'nogo sebeligeluk ugunem, at Saulus, enu ekhe Paulus a'nogo nen he, Allah Areagun endawimo peterek logolik eilenggen Bar Yesus oba lurogo fikhi logolik he,

¹⁰ mel yagatikhe: ”Hat hebe Iblis amlogo o. Afuni lalinafik, nongerinafik, ugu mondok logolik, yi mene ti mene higit hilingisuogeluk ugunem he, haren legetfisageluk hilingitu mondok welagen yi ri! Tuhan Allah nen, afuni telninabigeluk kwe higithogo yakninobagasikhe mene, haren kamo igi'lek weaget inobagaigeluk ugu mondok welagen andi nahalok.

¹¹ Yethan! A'nogo hilingiti lagen andi nen, Tuhan Allah nen wene hoba fikhemo welagen o. Andi re, hat hebe yogondak elama faget ya heilenggen mum asimbik he, mo andi heilenggen yethigi'lek logogin o,” iluk yagatu kwelek aremnogoat, eilenggen ohena hangge salogo mum agaikhe. Mum agaikhesik he, ”Sa nen nenggi fagaisogo wo'narek lagain he,” iluk afuni enggi fak heraginabik lagaikhe.

¹² A'nogo hilinglagaikhemo, ap kain gubernur a'nogo eilenggen hasikhesik he, ”Wene Tuhan Yesus ane andi nailo e,” iluk fogeratikhesik he, wene andi eberogoat iluk wanhikhe.

It Paulus lak o Pisidia kota Antiokhia sili andoma wagaukwa wene

¹³ At Paulus lak o Pafos andoma nen he, i soba o propinsi enu Pamfilia kota enu Perga andoma wagaukwa. Wagaukwasik he, at enu Yohanes igik, Markus igik agarek mene a'nogo nen, it andoma herakfisaluk he, hobuk ambotkwe o Yerusalem lagaikhe.

¹⁴ Lagaikhemo nen, it omanogo o Perga andoma nen he, o Pisidia tonggwe kota Antiokhia andoma lagai wagaukwa. Lagai wagaukwasik he, inenggi Allah faget weat logolik, o afuni Yahudi mene samban ikhi lagaukwaba kwisukwasik, hu'lagaukwa.

¹⁵ Hu'lagaukwasik were'ma re, it afuni andoma mene nen, wene Allah nen komotninafikhe wene a'nogo enu salhik, wene it ap Allah ane yagaisikhi lagaukwa mene nen lisu palhukwa mene enu salhik, isukwasik he, inogogwi kaindegen Paulus lak yagaisikhi logolik: ”Nagaila'lak. Afuni yoma inendawinggen wurik asuagen he, hiren wene ekhe werek halok he, yaganisobagaigeluk hinayonggo fogo o,” iluk isukwama,

¹⁶ at Paulus ebe menlagaikhesik he, wene yagaisageluk enggi map isikhe. Enggi map isikhesik he, ”Hit afuni Israel mene inom, endakwe mene Allah ane hologo hilingiti lagep mene inom, nerugwi nagaila'lak. Wene igin andi hinesanggo holini o.

¹⁷ Nit afuni Israel mene yoma nineisena Allah nen, ninombalak inebe wenaginafikhesik he, inayonggo fesikhe. Inayonggo fesikhemo, it o Mesir andoma inebe ap pogat were'ma re, aren inebe sik-pikhogo hokhorogo hilinginafikhe. A'nogo hilinginafikhesik he, at enggi omameba woginarek wulibi wagaikhe andi.

¹⁸ Woginarek wulibi wagaikhemo, it o leimo afuni inebe le'ma andoma mo lagagik pigik ugu kwelek, 40 tahun logolik, inobabut weak hilingiti lagaukwa meneat he, at afe morogoat ferinarek welagaikhe.

¹⁹ Ferinarek welagaikhesik he, o Kanaan woginarek kwi wagaikhesik, afuni inunggulenu 7 nen, inebe mondogat inoatikhesik he, it inanggweang mene nit ninombalak eisewerek asuageluk wogisasikhe.

²⁰ Andi re, a'nogo hilinginabik wagu kwelek he, mo lagagik pigik ugu kwelek 450 tahun hangge welagaukwasigen wogisasikhe andi. Wogisasikhesigen, hobuk he, ap ekhe nen inanema wanhik, wene yagaisigik, ikhi logouwageluk, menfisaluk waga lagaikhesik huli, ap Samuel Allah ane yagaisikhi lagaikhe mene a'nogo menfesikhemo welagaikhe.

²¹ Huli andi huli nen he, it afuni omanogo nen he, ninoe kain ekhe menfogoin ninamolo, iluk Allah kino yagatukwama re, aren he, Saul, ap Kis unggulenu Benyamin mene amlogo, menfuluk wogisasikhe. Wogisasikhemo, at ebe mo lagagik, pigik, ugu kwelek 40 tahun kainat welagaikhe.

²² Were'ma re, Allah nen at Saul sebelfuluk he, obali'mo at Daud kain logouwageluk, menfesikhesik wogisasikheat. Wogisasikhesik, wene at faget abok ikhi logolik he, Isai amlogo Daud yi re, an nendawinggen nen hundik mene, an nendawimo nen namolo anggigirek mene hilingisuageluk yagatunem he, mondogat elok hilingiti logogin higi andi nen he, wokhisigi o, iluk yagaisasikhe.

²³ Nen ekhe re, attagat at Allah nen he: Hit afuni Israel mene telhinabuageluk, at Daud en tagongge mene ekhe wokhisagain, iluk wene warisasikhe andi hagat, ebe Yesus menfuluk wogisasikhe andi.

²⁴ At Yesus ebe hobuk wesimbik, yabu oan hilingiti'lek werek kwelek he, elokhoma Yohanes tak wagaikhesik, afuni Israel mene mel yagaisikhi lagaikhe: Hit weak hilingiti lagep mene fakhogo herakfisaluk hinobabut hebelini o. Hebelumo re, an nen ima pelakhinabigin o, iluk inebe mondogat yagaisikhi lagaikhe.

²⁵ Yagaisikhi lagaikhesik, aren hilingisu mene arat hilingiti lagaikhesik, wurep oba hilingisigeluk he, mel yagaisasikhe: Hiren an sa anggikhi lagep. Hiren nenangorogo welagep andi, ebe an lego. Hinendawimo eberek logoino. At ebe an nombo'ne wesigin o. Wagunem he, an nebe yenggerek. Kain he, ebe araro. At eisok sepatu laberek mene andi, an nen fikhaligin elo'lego, iluk yagaisasikhe.

²⁶ Halok he, hit afuni Abraham en tagongge mene inom, endakwe mene Allah ane hologo hilingiti lagep mene yoma inom, nerugwi nagaila'lak. Wene telninabigin wene andi Allah nen nirat ninoba lakfei wagama yi.

²⁷ Wene lakfei waga mene andi, it afuni o Yerusalem mene inogogwi kaindek inom enat he, Yesus ebe futfesukwa lek. Futfigi'lek logolik, attagaren it ap Allah ane yagaisikhi lagaukwa mene omanogo nen wene lisu palogo fesukwa mene were'ma, samban hundik-handik ikhi logolik enu salhunem inesanggo holharek meneat he, wene ebe futfikhi lagaukwa lek. A'nogo futfigi'lek logolik, Yesus wene oba fuluk ebe watukwa andiba, wene attagat isukwa mene andi oba tibisikhe andi.

²⁸ Iren he, wene ki mene oba fembik wasuok, iluk ero heratukwa meneat he, wene oba lek agaikhe andi nen he, at Pilatus nen ebe wasuageluk wogetukwa andi.

²⁹ At Yesus fagerat, yi'nogo hilingisugun, iluk lisu palogo fesukwa mene andi higithogo mondogat hilingitukwasik he, ebe warek eba nen pelakfei wagaukwasik he, oumola kwelakfesukwa andi.

³⁰ Warek a'nogo kwelakfesukwa meneat he, hobuk Allah nen eluget

³¹ Eluget fesikhemo re, it Yesus inom o Galilea tonggwe nen o Yerusalem pisukwa mene omanogo ineilenggen hoageluk inelokhoma enggi hokhorogoat menlaga lagaikhe. A'nogo inelokhoma menlaga lagaikhemo, ineilenggen hasukwasik, iren he, Ebe eberogoat nineilenggen yi'nogo hogo, iluk yogondak afuni Israel mene yagaisili'lagwi andi.

^32-33 Andi hagat he, yogondak niren wene fano wene andi, hit yagahisa wago yi. Allah nen he: Yi'nogo wokhisagain, iluk ninombalak wene warisasikhe andi ebe re, o yogondak nit iren tagomangge mene welago yaba Yesus at wo'nisasikhemo watukwama wa'lagaikhemo re, Allah nen eluget fesikhe andi. A'nogo hilingisigeluk wene Mazmur nomor 2 ba, mel isikhe: Hat an namlogo o. Hebe yogondak takhafi, iluk isikhemo re, lisu palogo fesukwa higithogoat hilinglaga o.

³⁴ Yesus ebe wa'lagaikhesik were'ma, Allah nen eluget fesikhemo re, hobuk wa'lasimbik fili asigin lego, iluk wene ekhe mel isikhe: Yi'nogo hilinghabigin, iluk, wene an nonggwaregen imbigen, hobuk munenigin lek mene eberogoat Daud waretigi mene andi harat wokhesigin o, iluk yagatikhe andi.

³⁵ Nen, ekhe re, at Daud en Allah mel yagatikhe: Hat honggwarek hamlogo hane hologo hilingiterek mene andi re, fili asimbik, lek asuageluk herakfisagain lego, iluk yagatikhe.

³⁶ At Daud andi re, agaila'lak ambine ta'lagaukwa mene inom logolik, Allah nen, yi'nogo hilingisuak, iluk endawimo anggasikhe higithogo hilingiti lagaikhesigen, ebe wa'lagaikhe andi. Wa'lagaikhemo re, ombalak warek salinafukwaba inoba loukhogo salhukwama re, fili agaikhesik, lek agaikhe andi.

³⁷ A'nogo meneat he, at Yesus ebe wa'lagaikhesi'mo nen, Allah nen ambotkwe eluget fesikhe mene andi nek he, fili agaikhesik, lek agi'lego.

³⁸ Nerugwi nagaila'lak. Wene yi hinelurogo logoino o. At Yesus Allah nen a'nogo eluget fesikhe andiba, hit weak hilingiti lagep mene andi, aren sebelogo legetfisoageluk yagahisikhi lago andi.

³⁹ Yi weak ti weak hilingitunem he, wene Allah nen Musa ayonggo fesikhesik komorinafikhe wene a'nogoba, korogo wokhogoin elo'lek meneat he, ninebe lombok ninendawinggen Yesus oba eberogoat himbiret foumo nek he, elok korogo wokhogoin werego.

^40-41 Mene re, it ap Allah ane yagaisikhi lagaukwa mene omanogo nen he, mel isukwa: Hit o yogondak welagep yaba re, an nen yi mene ti mene hilingitunem, at ekhe nen furogo yagahisugunem he, hiren eberogoat iluk futfigi'lek logolik hinendawimo serametfikhi lagep andi yethani! An nen a'nogo hilingitunem hineilenggen haluk fogerati logolik he, hinebe wa'lakhogoin andi, iluk Allah nen isikhemo lisu palogo fesukwa andi hak, hit hinoba asinogo iluk he, wene hinesanggo furogo holhi logoino o,” iluk yagaisasikhe.

⁴² Wene a'nogo yagaisaluk wulifunem, it afuni omanogo nen he, ”Samban hobuk ugun andiba, wene andi ekhe inom lagakhogo yaganisogoin o,” iluk Paulus Barnabas emberek yagaisasukwa.

⁴³ Yagaisasukwama, it samban ikhi lagaukwaba nen wulifukwasik lagunem he, it afuni Yahudi mene inom, endakwe mene Allah ane wanhukwasik Yahudi mene hak welagaukwa mene inom, inebe hokhorogoat inombo'ne lagaukwa. Lagaukwama, it Paulus Barnabas emberegen he, mel yagaisasukwa: ”Allah obabut fano nen hilingninaferek mene andi, hinendawinggen tulemhogo logolik hilingiti logoino o,” iluk komorinafukwa.

⁴⁴ A'nogo isukwama, afuni inesanggo holhukwasik he, samban hobuk ugunem, afuni o kota andoma welagaukwa mene inebe misiktek enek kamo ugu kwelek, inebe mondogat Allah ane inesanggo holuogeluk andogotukwa.

⁴⁵ Andogotukwama, it ap Yahudi mene omanogo afuni hokhorogoat ineilenggen isasukwasik wene palogo re, ”Wene Paulus nen ili'logo andi hinesanggo holugun lego,” iluk wene palhik, Paulus lak wenagisigik, isukwa.

^46-47 A'nogo isukwa meneat he, it Paulus Barnabas emberegat inailo lek hogoat logolik he, mel isukwa: ”Allah ane andi hit tak yagahisa hagat yagahisa wago meneat he, hit hinabiren herakfisikhi lagep, hinonggwaregen he, nit nabulal-habulal hilingninabigin he, ninabiro, iluk u hagat ikhi lagep andi nen, nit nineisena Allah nen ninayonggo fikhi logolik yaganisasikhe hagat hilingisugun. Aren: An nen he, afuni endakwe mene selegerinafik, o wurep oba werek mene telinafik, igeluk he, esage ibilik hangge, hit hinebe heragaisogo menhinobagagi o, iluk yaganisasikhe higithogo, hebekhogo it afuni endakwe mene yagaisa logoin o,” iluk yagaisasukwa.

⁴⁸ A'nogo yagaisugunem he, it afuni endakwe mene inesanggo holhukwasik, iren he, ”Allah wene andi fano mondok isikhemo higi,” iluk fogeratukwasik inendawimo agaiyek anggasukwa. Inendawimo inagaiyek anggasukwasik he, Allah nen it nabulal-habulal hilinginabigeluk wenaginafikhe mene halok he, ”Wene andi eberogoat,” iluk futfesukwasik wanhukwa.

⁴⁹ A'nogo wanhukwama re, o andoma Tuhan Allah ane andi wialarik wulifikhe.

⁵⁰ A'nogo wialarik wulifunem he, it afuni Yahudi mene nen he, hemi ap endakwe mene inagagwi kaindek mene Allah ane wanhukwa mene inom, it ap o kota andoma inenuwerek kaindek welagaukwa mene inom, inomen Paulus Barnabas emberek mugisoageluk inendawimo kagalhukwa. A'nogo inendawimo kagalhukwama re, iren he, ”Hit nit ninaiba yoma logogun lego,” iluk mugisogo wulakfisasukwa.

⁵¹ Wulakfisugunem inendawimo eberek logouwageluk, it Paulus Barnabas emberegen he, ”Hinoba lombok,” iluk ineisok ologoilong horogo herak fisaluk he, o Ikonium kwi lagaukwa.

⁵² Kwi lagaukwama, afuni o Antiokhia andoma mene Yesus ane wanhukwa mene halok Allah Areagun inendawimo peterogo kwisikhemo inagaiyek hokhorogo agaukwa.