KISAH PARA RASUL 12 - Allah Wene Fano Wene Hupla Inane

Allah againafuri yi enggin ti enggin hokhorogo hilinginafi lagaukwa wene

¹ A'nogo hilingiti lagaukwa andem sambul he, ap enupogot Herodes nen Allah againafuri mene ekhe weagerinabigeluk isikhe.

² A'nogo isikhesik, at Yohanes oe Yakobus wasuageluk agoromi yagaisasikhemo karok oba ebe mondok watukwa.

³ A'nogo watukwama, at Herodes endawimo nen he, ”An a'nogo hilingiti lagi andiba, it ap Yahudi mene inendawimo inagaiyek mondok agaikha o,” iluk, hobuk Petrus enggi hele wasuageluk agoromi yagaisasikhemo, Pesta Roti Fiterek Lek Meneba werago mene nunggu kwelek enggi hele watukwaat.

⁴ A'nogo watukwasik he, o afuni inenggi hele warek fisagarek oba fei lagaukwa. Fei lagaukwasik he, ap tentara mene inebe 16 nen logolik he, attak inebe 4 en kagalek welagik, hobuk inebe 4 enat kagalek welagik, ikhi logouwageluk inayonggo fesikhesik he, at Herodes endawimo nen mel anggasikhe: ”Seni enu Paskah nogoin a'nogo naluk he, Petrus waganogo afuni ineilhanem wene oba fembik wasuogen, enggi hele waregat logouwago,” iluk endawimo anggasikhe.

⁵ At Petrus enggi hele warogo kwelakfesukwasik werek kwelek he, it Allah againafuri nen samban at faget kamo igi'lek hundik-handigat inendawinggen oba nenat mondok ikhi lagaukwa.

Allah nen Petrus enggi hele fikhalogo wulakfesikhe wene

⁶ Samban a'nogo ugu kwelek he, at Herodes nen ohealekwe re Petrus ebe waganogo afuni inenggiba feigeluk endawimo anggasikhesik, oan werek kwelek he, o andi sambul hubanggo, ap tentara mene omanogo, it inebe ekhe kweba kagalek werek kwelek, inebe pire ekhe Petrus enggi fena-fena hele homago nogo ugu kwelek, it abel fena-fena logolik hele elugun inenggiba kelogo welagaukwa.

⁷ A'nogo were'ma re, malaikat Tuhan yonggo pelakfisa wagarek mene omanogo ekhe ka nen heat andoma menlagunem he, o hulu senggele'ma a'nogo mondok selek ombak hokho mene hilinglagaikhe. A'nogo hilinglagaikhemo, at malaikat a'nogo nen he, Petrus eluk asuageluk abelenggen oba enggi nen elelhikhi logolik, mel yagatikhe: ”Weak-weak menlame,” iluk yagatikhemo menlagunem he, posiemanggen a'nogo enggiba nen erabisak lologo pisikhe.

⁸ Pisikhemo re, at malaikat a'nogo nen he, mel yagatikhe: ”Halinggin itik, heisok sepatu labetik, in o,” iluk yagatikhe. A'nogo yagatikhemo labetikhemo re, at malaikat a'nogo nen he, ”Su endakwe mene laberogo re, nombo'ne eme o,” iluk yagatikhemo,

⁹ ombo'neat wulifikhe. Wulifi logolik, at malaikat a'nogo nen eberogoat hilingitikhe meneat he, at Petrus obakhe palek logolik he, ”Nabi hikhi lagi he a,” iluk endawimo anggasikhe.

¹⁰ Ap tentara mene inebe eilemkwe ta'kwe kagalek welagaukwa mene omanogo werek kwelek, inera'lukwe wulifikhesik he, kwe endakwe o silimo wulifarek oba ebe posiemanggen oba hilingik kwe wulibuogeluk ugunem he, kwe abisagat hu'lagaikhemo, wulifukwa. Wulifukwasik he, kwe ebekwe laga logolik, at malaikat a'nogo Petrus herakfuluk ka lagaheat longgosikhe.

¹¹ Longgosikhemo at Petrus obabut hebelagaikhesik he, endawimo mel anggasikhe: ”I. At Herodes omameba fetnarek were'ma, it afuni Yahudi mene mondogaren he, yi'nogo hilingisugun iluk nabok palhu kwelegat he, malaikat Tuhan en eberogoat yonggo pelakfei wagama hele fikhalnafe higi,” iluk futfesikhe.

¹² A'nogo futfesikhesik he, he Maria ap enu Yohanes igik, Markus igik, agarek mene andi agaisa aiba andoma afuni inebe hokhorogoat andogotukwasik he, samban ugunem lagaikhe.

¹³ Lagaikhesik kweba papaget hugunem, it omanogo nen he, ”Sa nen papaget hili'logo,” iluk helenggerek inamingmingengge mene enu Rode andi ha wulibi wagaikhe.

¹⁴ Eilenggen ha wulibi wagaikhesik, Petrus ane enegat futfesikhesik, endawimo agaiyegen, kwe huthigi'legat herakfisaluk fungusek kwisikhesik he, ”Petrus kweba wagasik werego,” iluk yagaisasikhe.

¹⁵ A'nogo yagaisasikhemo, iren he, ”Eige. Hele yi lugulugwi palhen higi,” iluk yagatukwama, aren he, ”Lego. Eberogoat,” iluk ane ninghogo isikhe. A'nogo isikhemo, iren he, ”Halok he, andi malaikat Allah nen yonggo pelakfisa wagarek mene omanogo, ekhe Petrus faget pelakfei wagama he a,” iluk isukwa.

¹⁶ A'nogo ugu kwelek, at Petrus ebe kweba logolik, enggi kwe papaget hugu mondok kamo isikhe. Papaget hugu mondok kamo isikhemo re, it omanogo nen kwe hurogo ineilenggen wulakhasukwa re, Petrus were'ma hasukwasik, fogeratukwa.

¹⁷ Fogeratunem, aren he, ”Hinane ugubo,” iluk enggi map isikhe. Enggi map isikhesik he, ”Nenggi hele warek were'ma, nineisena Tuhan nen fikhalogo wulaknobagai wagama wagi o,” iluk wene pilingisogo yagaisasikhe. A'nogo yagaisasikhesik, ”Yakobus inom, nerugwi nagaila'lak Allah againafuri ekhe inom, wene yi yagaisa lano o,” iluk yagaisaluk he, at ebe o ekhema lagaikhe.

¹⁸ A'nogo wulifikhemo, nogo iluk ohealekwe, it ap tentara Petrus kagalek welagaukwa mene omanogo nen he, ”Petrus a'nogo ebe ka laga,” iluk inane hokhoat sagalhukwa.

¹⁹ Inane a'nogo sagalhukwama, at kain Herodes a'nogo nen Petrus ebe herasuageluk ap ekhe yagaisasikhemo heratukwa mene, ebe legaren he, it ap tentara kagalek welagaukwa mene omanogo inanema wogisasikhesik he, inebe mondok inoasuageluk agoromi ekhe inayonggo fesikhe. Inayonggo fesikhemo inebe inoatukwama re, at ebe o Yudea nen he, kota Kaisarea lagai wagaikhesik welagaikhe.

At Herodes ebe wa'lagaikhe wene

²⁰ O andoma logolik, it afuni o Tirus inom, Sidon inom, mene faget he, at Herodes a'nogo a'mage hokhorogo lagasikhe. A'mage hokhorogo lagasikhemo, it mondogat inebe lambukhogo nen he, ”O nit were'ma yoma re, sumburu ap kain Herodes were'ma nen onggo palogo fano wanhi lagoba nen,” iluk ap enu Blastus, Herodes amingmingengge logolik yi mene ti mene at aiba mene enggiba welagaikhe mene andi oba lagaukwasik, it inebikhit asuageluk, at tak endawimo kagalhukwa. At tak endawimo kagalhukwasik he, hobuk Herodes inom lambuluogeluk oba kwisukwasik yagatukwa.

²¹ Yagatukwama re, at Herodes nen he, ”Ninenggi yiba nen lambulugun,” iluk wene warisasikhe. Wene warisasikheba higit agaikhemo, aren su ap kaindek labetarek mene labetikhesik, wene elugun wati logolik alele e talek oba hurek welagaikheba hu'lagaikhesik, komorinabigeluk wene ero wulakfesikhe.

^22-23 A'nogo wulakfesikhesik komorinafunem, it afuni hokhorogo omanogo nen he, ”Ap yi re, ane afuni inane hangge ili'logo lek. Athe, we, wene elu mene hangge walhebak welagarek mene ane hangge ili'logo,” iluk fogeratukwa. A'nogo fogeratukwama aremnogoat malaikat Tuhan en yonggo pelakfisa wagarek mene omanogo ekhe pi wagaikhesik, ”At Allah at fogerati'lek onggwarek fogerakhikhe andi,” iluk Herodes ebe watikhemo, wanggo alabutmo kwalagaikhesik ebe mondok wa'lagaikhe.

²⁴ A'nogo hilinglagaikhemo re, Allah aneat wial lagaikhesik hokho agaikhe.

²⁵ A'nogo hokho agu kwelek he, it Barnabas Saulus emberegen, afuni Yerusalem mene arat leberisaluk he, inambotkwe wesuogeluk, ap enu Yohanes igik, Markus igik ikhi lagaukwa mene andi waluk wagaukwa.