KISAH PARA RASUL 10 - Allah Wene Fano Wene Hupla Inane

Kornelius nen Petrus ayonggo fesikhemo, oba wagaikhesik hilingitukwa wene

¹ O Kaisarea andoma ap ekhe enu Kornelius welagaikhe. At andi re ap esa hokho logalharek mene enu Italia ikhi lagaukwa andi faget inoe kain welagaikhe.

² At Allah ailorogo logolik againafuri inomen fogerati lagaukwa. Fogerati logolik he, it afuni Yahudi mene omanogo ekhe inenggi lek inelagaik mene hokhorogo leberisikhi logolik, samban kamo igi'lek ugu mondok welagaikhe.

³ A'nogo ugu mondok logolik he, enggi ekhe sambul, o mo hea i lagu kwelek jam 3 hak, abikanggo mel hasikhe. Malaikat Allah nen yonggo pelakfisa wagarek mene omanogo ekhe pi wagaikhesik at oba kwisikhesik he, ”Kornelius,” iluk yagatikhe.

⁴ Yagatikhemo, at Kornelius eilenggen at oba lurogo fikhi logolik, ailo agaikhesik he, ”I, noe. Nenahalok,” iluk isikhemo, aren he, ”Hat samban igik, afuni inenggi lek inelagaik mene leberisigik, ikhi lagen andi re, Allah elu agasik hoba eberek werego.

⁵ Yogondak o Yope andoma ap ekhe enu attak mene Simon. Hobuk mene Petrus, ili'lagwi mene a'naga wesuageluk, ap ekhe at ayonggo lakfisano o.

⁶ At ebe ap pok wagasik he, ap Simon wam agap paik agap nonggolek iringiterek mene a'naga aiba i laut hokho yenggele'ma era'lu andoma werego,” iluk yagatikhe.

⁷ Arat yagatikhesik he, malaikat Allah nen yonggo pelakfisa wagarek mene a'nogo wulifikhesik lagasikhemo re, at Kornelius nen, amingmingengge mene aiba welagaikharek mene inebe pire inom, ap ekhe tentara mene ebe Allah ailorogo logolik Kornelius inom mondok nikhi lagaikhe mene andi inom, wolisasikhe.

⁸ Wolisasikhesik lakfisageluk ikhi logolik, wene abikanggo hasikhe wene a'nogo yagaisasikhesik, o Yope lakfisasikhe.

⁹ Lakfisasikhemo, it a'nogo laga lagaukwasik ohealekwe o Yope horogat kuogeluk lagu kwelek, at Petrus a'nogo linggene jam 12 samban igeluk o tum sabia tale'ma lagagarek oba lagasikhe.

¹⁰ Lagasikhesik samban ikhi logolik were'ma sumburu nele agaikhe. Nele agaikhesik werek kwelek, afuni ekhe nen sumburu noageluk oloba oan weratu kwelek he, abikanggo yi'nogo hasikhe.

¹¹ Pogot healogo re, su kain hangge wurilik mene unggut 4 en hilingik engge porogo kweangma pelakfei wagunem eilenggen hasikhe.

¹² Su andi elonggoma re, yi wam ti wam, yi kisu ti kisu kweangma welagarek mene andi inom, yi rue ti rue pogot kwe tarogo nikherek mene andi inom, mondogat kwalek welagaikhe.

¹³ Were'ma re, Allah ane ka nen heat yagati logolik he, ”Petrus. Hebe menlasimbik he, andoma warogo nan o,” iluk yagatikhe.

¹⁴ A'nogo yagatikhemo, at Petrus nen he, ”Lego. Noe. An wesa mene fenago lek mene endephogo ninggi'legat welagirek,” iluk yagatikhe.

¹⁵ A'nogo yagatikhemo, ane a'nogo nen ekhe inom yagati logolik he, ”Allah nen, Fano nagain, iluk ikhe halok, haren, wesa, nagain lek, iluk hendawimo anggagun o,” iluk yagatikhe.

¹⁶ Enggi pireba a'nogo yagatikhesik, ekhe yaga'luk he, su hangge a'nogo pogoroba nen lisogo wanhikhemo popo lagasikhe.

¹⁷ Lagasikhemo at Petrus nen he, ”Nabikanggo higi andi ebe ninggi'nogo mene heat,” iluk endawimo menenei uan horok ebeti logolik were'ma re, it ap Kornelius nen lakfisasikhe mene omanogo lagaukwasik, afuni ekhe yagaisikhi logolik he, ”Simon aiba ki,” iluk heinok wanhukwama, iren he, ”Aiba ari,” iluk isukwama, kweba arat kwisukwa.

¹⁸ Kwisukwasik inane oloba kwelakfesukwama, inebe wulifukwama mel yagaisasukwa: ”Ap pok mene enu attak mene Simon, hobuk mene Petrus, a'naga ebe yoma hinom welageba? Lega,” iluk heinok wanhukwa.

¹⁹ Heinok wanhu kwelek he, at Petrus a'nogo abikanggo hasikhe mene a'nogo, ”Ebe ninggi'nogo mene higi,” iluk endawimo ebetoat were'ma, Allah Areagun nen he, ”Ap inebe henagan mene herakhabik wagaikhasik werego.

²⁰ Halok, hat hebe siakhogo pimbik, it andi an nenat lakfisa wagimo wagaikha andi nen he, ninom logoin elo'lek iluk, hendawimo menenei ebeti'legat hinom lano o,” iluk yagatikhe.

²¹ Yagatikhemo, at Petrus inoba pisikhesik he, mel yagaisasikhe: ”Nebe hera'nabik wagep andi, nebe yi o. Hit ninggi'nogo nen wagep,” iluk yagaisasikhe.

²² A'nogo yagaisasikhemo, iren he, ”Ap tentara mene esa folharek mene inoe kain enu Kornelius andi nen lakninobagai wagama wago. At andi obabut higithogo hilingitik, Allah ebe ailorogo welagik, ugunem, it afuni Yahudi mene mondogaren obabut palharesik he, a'nogoat abok fano agarek. At andi a'nogo hilingitunem malaikat Allah nen yonggo pelakfisa wagarek mene omanogo ekhe nen he, Petrus andi nen wene hat hesanggo holigin mene yagahesigin werego, iluk hat hayonggo lakninobagai wesuageluk yagatemo, aren lakninobagai wagama hoba wago o,” iluk yagatukwa.

²³ A'nogo yagatukwama, aren he, ”Halok he, an ninom nogo uogen, kwi we'ni o,” iluk yagaisasikhe. Yagaisasikhemo re, nogo isukwasigen, ohealekwe ineluk a'luk he, it Allah againafuri o Yope andoma mene inomat wagaukwa.

²⁴ Waga logolik, ebekhalem inenggi misik nogo iluk he, o Kaisarea wagaukwa. Wagu kwelek, at Kornelius inelokhoma logolik he at ogogwi agoromi inom, erugwi agaila'lak at inom enggawe mene inom, inayonggo fesikhemo re mondogat andogotukwasik were'ma wagaukwa.

²⁵ Wagaukwasik he, at Petrus ebe oloba kwigeluk ugunem, at Kornelius nen at ebe wanhikhesik he, eindep awi yagaisogo Petrus awe a'ma soma isikhesik fogeratikhe.

²⁶ A'nogo fogeratikhe meneat he, at Petrus nen he, ”Noe, menlame. An nebe afuni meneatma, a'nogo fogetnabigin lego,” iluk enggi fagaisogo menfesikhe.

²⁷ Menfesikhesik he, emberegat wene ane ilik-ilik oloba kwisukwasik, afuni hokhorogoat andogosi wagaukwasik were'ma at Petrus eilenggen isasikhe.

²⁸ Eilenggen isasikhesik, mel yagaisasikhe: ”Nit afuni Yahudi mene nen hit afuni endakwe mene ninom hunetik, nit hinoba kwigik, ugun lek iluk wene palek welagarek andi hinelu o. A'nogo meneat he at Allah nen, afuni ekhe mene andi hinom mangosu fuk, it andi wesa mene iluk ugun lego, iluk yaganetemo re,

²⁹ hiren nayonggo lakfisegepma nabit igi'lek wagi o. Wagi mene re, wene ekhe heinok wokhisak. Wene ebe ninggi'nogo nen nayonggo lakfisegep,” iluk yagaisasikhe.

³⁰ A'nogo yagaisasikhemo, at Kornelius nen he, ”O uage, mo hea i lagu kwelek, jam 3 ba o yi'nogo hilinglagunemat an naiba samban igi. Samban a'nogo ugunem he, ap ekhe asu amulit hokho laberek mene an neilhanemat menlasi pi waga.

³¹ Menlasi pi wagasik he, Kornelius. Hat samban ikhi lagen andi, Allah arat esanggo holhemo. Nen, afuni inenggi lek inelagaik mene leberisikhi lagen andi, Allah nen hoba eberek weregaro.

³² O Yope andoma re, ap ebe misik mene enu attak mene Simon. Nen, hobuk mene, Petrus, andi ayonggo loagen ap ekhe lakfisan o. At ebe re, ap pok wagasik he, ap enu Simon, paik agap wam agap nonggolek iringiterek mene a'naga aiba i laut hokho yenggele'ma esanggoma andoma werek a'naga o, iluk yaganete.

³³ Andi nenat, an nenggi ekhe welagi'legat he, ap ekhe hayonggo hoba lakfisigimo, hat hobabut fano nen kamo igi'lek fano wagen, noe. Nit mondogat yogondak Allah eilhanem welago yoma re, Aren wene yagaisano, iluk yagahete mene, wene andi mondogat ninesanggo holuogeluk welago, noe,” iluk yagatikhe.

At Petrus nen wene yagaisasikhe wene

³⁴ At Petrus nen wene eroba nen yagaisikhi logolik he, ”At Allah obabut he, afuni inagap oba nek eilenggen isaluk, ekhe elokhoma fisigik, ekhe ambotma fisigik, ikherek lek, iluk yogondagen futfigi.

³⁵ Afuni inunggulenu yi awi ti awi mene at ebe inailo logolik inobabut higithogo hilingitarek mene halok woginaferek enek higi o.

³⁶ Higimo re, nit afuni mondogat ninoe Enupogot Yesus Kristus nen lambukhogo ninobagauwageluk wene fano wene andi, ebe nit afuni Yahudi mene ninoba lakfei wagaikhe andi hinelu o.

^37-38 Wene ebe hilinglagaikhe andi re, at Yohanes nen ima pelaginafi logolik, wene ima pelaginafarek wene andi yagaisikhi lagaikhesi'mo nen, at Yesus aiba Nasaret mene andi, Allah nen Areagun oba pelakfei wagik, omame wogetik, isikhesik, emberek welagaikhe andi nen, attagat o Galilea tonggwe andoma nen, o afuni Yahudi mene inaiba yi awi ti awi andoma laga logolik, yi mene ti mene fanorogo hilingitik, it ekhe Iblis nen ninghogo ferinarek welagaikhe mene higirinafik, ilik nikhi lagaikhe andi hineluaro.

³⁹ Afuni Yahudi mene inaiba o yi awi ti awi andoma inom, o kota Yerusalem wuri'mo andoma inom, nikhi logolik, mondogat hilingiti lagaikhe mene andi, nit nineilenggen hasugu. A'nogo meneat he, at ebe eba menfuluk watukwa andi.

⁴⁰ A'nogo watukwa meneat he, enggi pire warek were'ma re, enggi ekheba, Allah nen eluget fesikhesik he, ebe afuni nen ineilenggen hoageluk weinamet fesikhe andi.

⁴¹ A'nogo weinamet fesikhe meneat he, afuni mondogat ineilenggen higi'lek. We, attagat at Allah nen, it inebe andemat ineilenggen hoago, iluk wena'ninafikhe mene nek, at Yesus ebe warek were'ma Allah nen eluget fesikhemo, nit at ninom logolik sumburu inom, i inom, ninomat nasugu.

⁴² A'nogo logolik he, niren afuni wene yagaisilik laga logolik he, afuni mondogat, wa'lagaukwa mene inom, ineluk werek mene inom, wene inoba figik, kotik, uageluk, Allah nen Yesus at menfesikhe, iluk, furogo yagaisilik laga logouwageluk ninayonggo fesikhe.

⁴³ At Yesus faget, it ap Allah ane yagaisikhi lagaukwa mene omanogo mondogaren he, abok ikhi logolik, mel isukwa: At ebe wagunem he, it afuni weak hilingitarek mene inendawinggen at oba himbiret fogoin mene halok inebe lombok, it weak hilingiri'lagwi mene andi, at Allah nen at Yesus enuba sebelogo legetfisagain o, iluk yagaisikhi lagaukwa,” iluk at Petrus nen yagaisasikhe.

Afuni endakwe mene Allah nen Areagun wogisasikhe wene

⁴⁴ At Petrus nen wene andi oan yagaisugu were'ma, Allah Areagun it afuni wene andi inesanggo holhi lagaukwa mene omanogo inebe mondogat inoba louk i pi wagaikhe.

^45-46 A'nogo pi wagaikhemo, it afuni inagap inenggalimo mene palek logolik wene eberogoat iluk wanhukwa mene ekhe Petrus inom o Yobe nen wagaukwasik were'ma, Allah nen Areagun a'nogo it endakwe mene inoba pelakfei wagaikhemo, helasukwasik, wene it ekhe inane inonggot meneba elalinat igik, Allah fogeratik, ugunem, ineilenggen higik, inesanggo holhik, isukwasik he, mel isukwa: ”Allah nen Areagun it afuni endakwe mene higirat wogisikhemo higi. Nailo e,” iluk fogeratukwa. A'nogo fogeratukwama, at Petrus nen he, mel yagaisasikhe:

⁴⁷ ”Yethani. It yi Allah Areagun nit wo'nisikherek andi hagat, it wogisikhemo helaga andi. Halok he, sa nen, it ima pelaginabugun lek, iluk wene palugun anggegep? Elok pelaginabugun aro,”

⁴⁸ iluk yagaisasikhesik, Yesus Kristus enu hombuk palogo ima pelaginabuageluk, it ekhe yagaisasikhemo pelaginafukwa. A'nogo pelaginafukwama, iren he, at Petrus yagati logolik he, ”Noe. Henggi endebat ekhe ninom logombigen lanogen o,” iluk ebe fakfesukwama inom welagaukwa.