KELUARAN 9 - Allah Wene Fano Wene Hupla Inane

Inanggo mondogat watikhe wene

¹ A'nogo hilinglagaikhemo, hobuk At Tuhan nen he, Musa mel yagatikhe: ”Hebe at raja Firaun oba lambik he, afuni Ibrani mene inesena Tuhan nen he, mel ikhe ino: An nagainafuri nen An foge'nabi loageluk herakfisano o.

² Mene re, haren he, it logoin lek, nabit iluk fakfisagain halok,

³ ou inailo mene hat hanggo mondogat kuda, keledai, unta, sapi, domba, kambing inom, o leimo were'ma inoba lakfei wesigin.

⁴ An nen he, afuni Israel mene inanggo penegeisogo misigat halok ekhe wati'lek herakfikhi logolik, afuni Mesir mene hinanggo nek he, mondok felelenghogo wasigin o.

⁵ An Tuhan nenat wasigiluk igi andi, o healegat hilingisigiluk igi o, iluk yaga'no,” iluk yagatikhemo yagatikhe.

⁶ A'nogo nen ohealekwe re, At Tuhan nen isikhe hagat hilingitunem, wam afuni Mesir mene inanggo omanogo mondogat wa'lagaikhe. A'nogo meneat he, wam afuni Israel mene inanggo misikhogo ekhe wa'lagi'lek fano welagaikhe.

⁷ A'nogo hilinglagaikhemo, at raja a'nogo nen elalin hilinglagaikhe mene andi faget afuni heinok wogisasikhemo, iren he, ”Wam afuni Israel mene inanggo nek he, misigiluk ogo ekhe wa'lagi'lego,” iluk yagatukwa meneat he, at raja endawinggen mondok haroat logolik afuni Israel mene lakfisagain iluk anggasikhe legat.

Pot inoba hokhorogo fesikhe wene

⁸ A'nogo hilinglagaikhemo hobuk At Tuhan nen he, Musa Harun emberek mel yagaisasikhe: ”Hiren wul endu lolharek oba nen ekhe hinenggim wanimbik he, Musa nen at raja Firaun a'nogo eilhanem yalelogo pogoroba liakfein o.

⁹ A'nogo liakfoumo re, wul andi o Mesir yi awi ti awi andoma mondok wialogo lagain o. Wialogo lambik afuni inebene inom, wam, sue, paik ebene inom, pot weak mene inoba asimbik supukhogo re, kurele hokhorogo wulibigin o,” iluk yagaisasikhe.

¹⁰ A'nogo yagaisasikhemo, Musa Harun emberek wul waluk at raja oba lagaukwasik he, at Musa nen wul a'nogo enggim wanhikhesik he, pogoroba yalelogo liakfesikhemo, pot afuni inebene inom, wam, sue, paik ebene inom, inoba arik lagaikhesik, supukhogo kurele wulibik lagaikhe.

¹¹ It afuni Mesir mene inebe mondogat inoba pot hokhorogo agaikhe andi hak, it ap wesainap elalin hilingiti lagaukwa mene omanogo ogo re, pot inoba mondok hokhorogoat inagap selek ekhe welagaikhe lek andi nen at Musa elokhoma ninggi'nogo menlasu heat hilinglagaikhe.

¹² A'nogo meneat he, At Tuhan nen isikhe hagat, aren at kain endawinggen mondok haro hilingisogo fesikhemo, aren he Musa Harun emberek inane esanggo hologo hilingiti'lek herakfisasikhe.

Meiso sogenggen es mene inoba lakfei wagaikhe wene

¹³ A'nogo hilinglagaikhemo, hobuk Tuhan nen he, Musa mel yagatikhe: ”Hat hebe hobit huberat siakhogo re, raja Firaun a'nogoba lambik he, nit afuni Ibrani mene Tuhan Allah nen he, mel ikhe ino: An nagainafuri nen An foge'nabi loagen he, lakfisan o.

¹⁴ Haren he, Afuni kweangma yoma mondogaren fogeratarek mene at Allah inom walhamo re, elo'lek higi iluk futfeinogen he, An nen yogondak wene it hat hagoromi mene inom, afuni mondogat inom, it enek wene inoba fagain lego. We, hat hebe inomat hinoba fagain o.

¹⁵ An nen ou hinoba lakfei we'lema, hat hebe inom, afuni yoma inebe mondogat inom felelenghogo wa'la'lebo.

¹⁶ A'nogo meneat he, yi mene ti mene inugisagarek andi hak, An nomame hoageluk, An nenu o yi awi ti awi loageluk, hinebe mondok hinoati'lek herakhinobagagi andi o.

¹⁷ A'nogo meneat he, hat hendawimo foget fakhikhi logolik he, An nagainafuri loageluk lakfisigi'lek mondok welagen o.

¹⁸ Hobit hubet ya ha'ma, An nen meiso sogenggen es inailo mene o Mesir yoma endamen huli yogondak huli ekhe ninggerek mondok lek mene hinoba lakfei wesigin o.

¹⁹ Halok haren he, hinanggo inom, hinanggge yi mene ti mene inom, enda'ma welagarek mene mondogat, inawilokwe tegelogo kwelabik loageluk yagaisano o. Afuni inebe inom, inanggo inom, enda'ma logogun halok, meiso sogenggen es mene nen mondok inoasigin o, iluk ikhe, iluk yaga'no o,” iluk Musa yagatikhemo raja a'nogo yagatikhe.

²⁰ A'nogo yagatikhemo, it raja Firaun agoromi ekhe nen Tuhan nen isikhe mene andi inailo agaikhesik he, inamingmingengge wam konharek mene inebe inom, wam inom, meiso nen inoasinogo iluk olokwe woginarek kwilik lagaukwa.

²¹ A'nogo meneat he, it ekhe wene inafe hebelasuageluk yagaisasikhe mene andi inendawinggen seramet fuluk, inamingmingengge wam konharek mene inebe inom, wam inom, olokwe waluk kwigi'lek o leimo andoma herakfesukwa.

²² A'nogo hilingitukwama, At Tuhan nen he, Musa mel yagatikhe: ”Henggi pogoroba higit liakfein. A'nogo liakfugunem he, meiso sogenggen o Mesir yi awi ti awi mondogat pi waga logolik, afuni inebe inom, inanggo inom inoatik, yi mene ti mene yabukwe yago mene mondogat weagetfigik, igin o,” iluk yagatikhe.

²³ A'nogo yagatikhemo, at Musa arige tomuk a'nogo pogoroba higit liakfesikhemo re, Tuhan nen eilabut kweangma kulunghogo lakfei wagik, unggunggu ane hokho mene mondok pakhogo lakfei wagik, ikhi logolik, meiso sogenggen kweangma pelakfei waga logolik he,

²⁴ meiso sogenggen inailo mene inom, eilabut yegelogo lakfigik wakfigik ikherek mene inom, lakfei wagaikhe. Attagen he, o Mesir andoma o meiso sogenggen andi hangge mene hikhi lagaukwa lek mene huli andi sambul lakfei wagaikhemo hasukwa andi.

²⁵ O Mesir yi awi ti awi mondogat meiso sogenggen andi ninggi logolik, afuni inebe inom, inanggo inom, enda'ma welagaikhe mene inoatik, yabukwe yi mene ti mene awi yago mene mondogat weaget fikhi logolik he, e tukhum-takhamhogo mondok fesikhe.

²⁶ A'nogo meneat he, afuni Israel mene welagaukwaba o Gosyen enek he, meiso sogenggen andi ninggi'lek kamo isikhe.

²⁷ A'nogo hilingitikhemo, at raja a'nogo nen he, Musa Harun emberek wolisasikhesik he, mel yagaisasikhe: ”An mondok weak hilingiti o. Hit Tuhan nen andi eberogoat hilingitu kwelek meneat he, an nebe inom, afuni mondogat inom, at eilhanem weak hilingito o.

²⁸ Hit hobuk o yoma logogun lek. Lakhinobagaigen he, nit o meiso sogenggen unggunggu ane pakhogo mondok weakhogo ninoate andi faget Tuhan kino yaga'no o,” iluk yagaisasikhe.

²⁹ A'nogo yagaisasikhemo, at Musa nen at raja yagati logolik: ”Haren he, kweangma yoma eise re, hit hineisena Tuhan andi aro, iluk futfeinogoluk, an weak-weagat o sili hokhoma nen enda'ma wulifi logolik, nenggi liakfembik, Tuhan samban oba yagati halok, meiso sogenggen unggunggu ane pakhogo nili'lago mene andi legasigin o.

³⁰ A'nogo meneat he, hat hebe inom, hagoromi inom, nit nineisena Tuhan Allah hinailo mondok lek hinendawimo seramsek welagebo,” iluk yagatikhe.

³¹ Meiso sogenggen nen a'nogo weaget fikhi logolik, andem sambul yo esi wanharek mene enu rami yago mene ilit sabelhik, nen, nenggarek mene enu jelai yago mene ebe itik, ugunem andi nen he, mondok weagetfesikhe.

³² A'nogo meneat he, gandum inom, enggen iterek mene ekhe inom, enggen oan iti'le'ma andi nen weagetfigi'lek fano welagaikhe.

³³ Musa at raja a'nogo herakfisaluk o kota nen abel enda'ma wulibi wagaikhesik, enggi liabek logolik Tuhan oba samban isikhe. A'nogo samban isikhemo, andi sambul unggunggu ane legagik, meiso es mene inom, meiso sogenggen mene palagik, isikhe.

³⁴ A'nogo hilingitunem, at raja a'nogo eilenggen hasikhesigat he, weak hilingitikheat. Agoromi inomat inendawinggen mondok haroat agaukwasik,

³⁵ At Tuhan nen, it a'nogo hilingisugun mene faget Musa yagatikhe hagat, aren afuni Israel mene loageluk yagaisa abirat agaikhe andi.