KELUARAN 7 - Allah Wene Fano Wene Hupla Inane

¹ A'nogo yagatikhemo, At Tuhan nen Musa oba mel yagatikhe: ”An nen at raja Firaun eilhanem he, hat he, An Allah higit hilingisogo hobagagin, nen hoe Harun he nabi higit asimbik hat hane ugu mene at raja Firaun yagati logouwak.

² An nen wene yi'nogo hilingi'no iluk yagaheti mene andi mondogat at Harun yaga'no o. At Harun nen he, raja Firaun yagati logolik, haren he, afuni Israel mene, o Mesir herakfisaluk wulibuageluk yagaisano, iluk yagasuageluk yaga'no o.

³ A'nogo meneat he, An nen at raja endawinggen mondok haro mene hilingisogo fagain o. Hilingisogo fembik, An nen yi enggin ti enggin inailo mene hokhorogo afuni Mesir mene inoba fagain meneat he, at kain nen wene haren yagasigin mene andi esanggo hologo hilingiti'lek herakfisikhi logogin o.

⁴ A'nogo hilingiti logogin andi nen, An nen afuni Mesir mene wene mondok enggin mene inoba fuluk weagerinabimbigen, hobuk Nagainafuri Israel mene andi inebe mondogat o Mesir en herakfisaluk woginarek wulibigin o.

⁵ An nen, afuni Mesir mene wene inoba fembik weagerinafi logolik, afuni Israel mene o Mesir herakfuluk woginarek wulifunem, it afuni Mesir mene nen he, At Allah re, Tuhan higi iluk, inelu asigin o, iluk yagatikhe.

⁶ A'nogo yagatikhemo, at Musa Harun emberegen wene Tuhan nen, Yi'nogo hilingi'no, ti'nogo hilingi'no, iluk yagaisasikhe mene higithogo hilingitukwa.

⁷ At Musa ebe umur 80 tahun, nen at Harun ebe umur 83 tahun logolik oba, wene yagaisasikhe mene andi, at raja yagasuogeluk lagaukwa.

At Harun arige tomuk oba elalin mene hilingiti lagaikhe wene

⁸ At Tuhan nen he, Musa Harun emberek mel yagaisasikhe:

⁹ ”At raja Firaun nen, an wene futfouwageluk elalin mene ekhe hilingi'ni re, iluk yagahisikhe halok, at Harun nen arige tomuk at raja eilhanem kweangma hukhoageluk yaga'no o. A'nogo hukhugunem sige tomuk andi kisu hilinglasigin a'naga o,” iluk yagatikhe.

¹⁰ A'nogo yagaisasikhemo, at Musa Harun emberek at raja oba lagaukwasik he, Allah nen, yi'nogo hilingi'no ti'nogo hilingi'no, iluk yagaisasikhe mene andi hilingitukwa. A'nogo hilingiti logolik, at Harun arige tomuk a'nogo at raja inom, agoromi inom, ineilhanem kweangma hukhugunem hebekhogo kisu hilinglagaikhe.

¹¹ A'nogo hilinglagaikhe andi nen, at raja a'nogo nen agoromi yi wene ti wene inelu mene inom, wesagun elalin hilingitu inelu mene inom, wolisasikhemo wagaukwasik he, wene it inawesa meneba, andi higithogoat hilingitukwa.

¹² Ariginhi logolik, iren he, inarige tomuk kweangma hukhasukwa, hukhugunem he, kisu hilinglagaikheat. Meneat he, a'nogo hilinglagunem at Harun arige tomuk a'nogo nen it inarige tomuk andi haumhogo nasikhe.

¹³ A'nogo hilinglagaikhe meneat he, At Tuhan nen he: ”Hit a'nogo hilingisugun meneat he, at raja endawinggen mondok haro asimbik, hit hinane esanggo holhi'lek herakfisikhi logogin o,” iluk yagaisasikhe higithogoat hilinglagaikhe andi.

ALLAH NEN AFUNI MESIR MENE INOBA ENGGIN-FENGGIN FESIKHE WENE Attak i eil mep hilingfesikhe wene

¹⁴ Hobuk At Tuhan nen he, Musa mel yagatikhe: ”At raja Firaun andi nen endawinggen mondok haro asimbik, afuni Israel mene lani iluk, yagaisi'lago mondok lek andi o.

¹⁵ Andi nen he, hat hebe ohealek huberat siakhogo at ebe i Nil ima pugunem hemberek ambi asubagaigen he, lano o. Laga logolik, sige tomuk kisu hilinglari'lago mene a'nogo waluk lambik he, at pugunem elokhoma i esanggoma andoma logoino.

¹⁶ Lambik were'ma, at raja ebe pi wagu halok mel yaga'no: Nit afuni Ibrani mene nineisena Tuhan Allah nen, haren At againafuri lakfisugunem o leimo afuni le'ma laluk At fogerati logouwageluk an nayonggo fesikhesik hoba laknobagai wagama yagaheti lagi meneat he, hat huli yogondagen nane hesanggo holu habit mondok welagen andi.

¹⁷ A'nogo hilingiti lagen andi nen, at Tuhan nen yi'nogo ikhe: An nen hobuk hilingisigin mene heilenggen hambik he, At ebe Tuhan higi, iluk futnobagain aro, iluk ikhe. Halok, an yogondak sige tomuk i agum oba fothugunem he, i eil mep mondok hilinglasigin o.

¹⁸ A'nogo hilinglasumo, ikan i elema werek mene mondogat wa'lasimbik he, i amben mondok weak agunem, afuni Mesir mene i yi ninggi logogun mondok lego, iluk yaga'no,” iluk yagatikhe.

¹⁹ A'nogo yagatikhesik, hobuk Tuhan nen he, at Musa ekhe mel yagatikheat: ”At Harun nen arige tomuk a'nogo wanhikhesik he, it afuni o Mesir mene hokhokwe endepkwe mondogat inom, i kalok waganekwe nen wagarek mene inom, mogo yenggelek mene inom, enggi pisarogo i agum oba higithogo lakfugunem he, i o Mesir yi awi ti awi mondogat e kewi hilingisogo i yenggelek mene inom, helep ebene yenggelek mene inom mep agik, uageluk hilingisuagen he, yagasin o,” iluk yagatikhe.

²⁰ A'nogo yagatikhemo, Musa Harun emberek a'nogo Tuhan nen, yi'nogo hilingi'no ti'nogo hilingi'no, iluk yagaisasikhe mene mondogat at kain a'nogo ebe inom, agoromi pegawai inom, ineilhanem hilingiti logolik, at Harun arige tomuk a'nogo wanhikhesik he, i Nil agum oba kwe higit enggi pisarogo lakfesikhemo re, i eil mep mene mondok hilinglarik lagaikhe.

²¹ A'nogo hilinglarik lagaikhemo re, ikan i Nil ima welagaikhe mene mondogat wa'lagaikhesik, amben weak agaikhemo, afuni Mesir mene i nunggu mene mondok elo'lek agaikhe. Agaikhesik o Mesir kweang andoma eil mep mondok agaikhe.

²² A'nogo meneat he, it ap wesainap Mesir mene elalin hilingitu inelu mene omanogo nen inawesa meneba a'nogoat hilingiti lagaukwaat. Andi nen he, kain a'nogo endawinggen mondok haroat logolik at Tuhan nen isikhe hagat Musa Harun emberek inane esanggo holu abirat welagaikhe andi.

²³ Andi nen at a'nogo wene elalin hilinglagaikhe mene a'nogo ebethigi'lek obakhenene herakfuluk ambotkwe aiba stana kwi lagaikhe.

²⁴ It afuni Mesir mene i elesi agai mene na mondok elo'lek agaikhe andi nen, inebe mondogat i esanggokwe andoma i ninggi logogun mene faget mogo hokhorogo habulik lagaukwa.

²⁵ At Tuhan nen i Nil homan fesikheba nen, inenggi 7 nen welagaukwa andi.