KELUARAN 5 - Allah Wene Fano Wene Hupla Inane

Musa Harun emberek raja Firaun oba o Mesir yagasi lagaukwa wene

¹ Hobuk he, it Musa Harun emberek at raja Firaun o Mesir mene a'nogo oba lagaukwasik he, mel yagatukwa: ”Afuni Israel mene Ineisena Tuhan Allah nen he, ’An nagainafuri Israel mene o leimo afuni le'ma andoma lambik An fogetnabuageluk lakfisoagen yagasi lani’, iluk yaganisikhemo nen yagahesi wago o,” iluk yagatukwa.

² A'nogo yagatukwama, aren he, ”Tuhan andi sa nogo?” iluk heinok wogisasikhesik he, ”An nen he, at andi nen fano ikhe, iluk afuni Israel mene loageluk nenahalok At ane holfuluk lani igin? Tuhan andi ebe nonggotma re, afuni Israel mene andi, lani, iluk yagaisagain lego,” iluk yagaisasikhe.

³ A'nogo yagaisasikhemo, it Musa Harun emberegen mel yagatukwa: ”Allah afuni Ibrani mene nineisena nit ninelokhoma menlagama o. Halok nit o leimo afuni le'ma andoma kweba ninenggi hup henagan nogoluk lagaikharesik arat kwi lagaikhare'ma andoma lambik, Nineisena Tuhan obaget, warogo nolesi logoin enggere, lani, iluk yaganisan o. Niren a'nogo hilingiti'lek halok, Allah nen he, nit ninebe wa'lasuageluk ou ninoba figik, athe, weim yafi logolik ninoasuageluk selei mene inenggiba ninobagagik, igin o,” iluk yagatukwa.

⁴ Yagatukwama, at raja nen he, Musa Harun emberek mel yagaisasikhe: ”Hiren afuni Israel mene yabu hilingiri'lagwi mene herakfisoageluk ikhi lagep andi nenahalok? It namingmingengge mene andi yabu hilingiti logouwageluk yagaisa lani o.

⁵ Afuni hit mene andi inebe sik-pik agasik mondok hokhorogo werek. Ma re, hiren it yabu hilingiri'lagwi mene andi ando fouwageluk egep yi ri!” iluk yagaisasikhe.

⁶ O andi sambul he at raja Firaun nen, afuni Israel mene yabu hilingitu kwelek ineyaga logouwageluk inogogwi kaindek menfisasukwama welagaukwa mene inom, nen it afuni Israel mene inagoromi hangge logolik, Yi'nogo hilingisuok, ti'nogo hilingisuok, iluk ikhi logouwageluk menfisasukwa mene inom, wene mel yagaisasikhe:

⁷ ”Helep fano ningsek logouwageluk engga puk engga mene inom werari'lagwi andi, hiren hobuk wogisikhi logogup. We, inonggwaregen heragaisogo werati logouwagen yagaisano o.

⁸ Mene re, attak-attak huli werati lagaikha andi hak werasugun o. Hobuk huli ekhe pelabi wesugun mondok lek, iluk yagaisano. It yabu hilingisu inabiren, An yaganeti logolik, Nineisena Allah obaget warogo nolesi louwogeluk yagahesi wago, iluk yaganetu mondok werek andi.

⁹ Iren yabu mondok hokho hilingiti logolik, weneane we tulemat mene andi inesanggo holugun elo'lek asuagen he, yabu mondok hokhorogo hilingisuageluk ning-nanghogo yagaisano o,” iluk yagaisasikhe.

¹⁰ At raja Firaun nen a'nogo yagaisasikhemo, afuni Israel mene yabu hilingitu kwelek, it kaindek Mesir mene ineyaga logouwageluk menfisasukwa mene inom, nen it afuni Israel mene inagoromi higit logolik, yi'nogo hilingisuok, ti'nogo hilingisuok, iluk ikhi logouwageluk menfisasukwa mene inom, inom wene a'nogo yagaisasikhemo, wulifukwasik he, afuni Israel mene mel yagaisasukwa: ”At kain nen he, hit helep fano ningsek logouwageluk engga puk engga mene inom werati lagep andi, engga afuni nen wogisugu kwelek hilingisugun mondok lego.

¹¹ Nen, hit hinonggwaregen he, engga herasi laluk he, attak werati lagagip mene a'nogo ekhe herakfisigi'lek higithogo werati logoino, iluk ikhe,” iluk yagaisasukwa.

¹² A'nogo yagaisasukwama, it afuni Israel mene omanogo helep werasugun mene engga puk engga mene herarik o Mesir yi awi ti awi mondogat wulifukwa.

¹³ Wulifukwama, afuni Israel mene yabu hilingitu kwelek kwelaginarek welagaukwa mene omanogo nen he, it afuni Israel mene omanogo mel yagaisasukwa: Hinenggi misik oba re, engga puk engga wokhisugunem helep hokhorogo werati lagep hagat werasino o. Endebat werasugun lek, iluk inane ning-nanghogo yagasikhi lagaukwa.

¹⁴ A'nogo yagaisikhi logolik, afuni Israel mene yabu hilingitu kwelek it kaindek Mesir mene ineyaga welagaukwa mene omanogo nen he, it afuni Israel mene inagoromi hangge logolik, Yi'nogo hilingisuok, ti'nogo hilingisuok, iluk ikhi logouwageluk menfisasukwa mene omanogo nen yei inoati logolik he, mel yagaisasukwa: ”Hinagoromi helep attak hokhorogo werati lagaikha andi hak werati'lek endebat werari'lagwi andi nenahalok?” iluk yagaisasukwa.

¹⁵ A'nogo inoati lagaukwama, it ap omanogo raja oba wagaukwasik he, mel yagatukwa: ”Ninoe, haren yi'nogo hilingninafi logouwageluk hagoromi yagaisegen andi nenahalok?

¹⁶ Hat hagoromi nen nit engga puk engga mene ekhe wo'nisigi'legat he, helep ebe ti'nogo wera'no, iluk inane ning-nanghogo yaganisikhi logolik, it weak hilingiti logolik meneat he, nit yei mondok ninoari'lagwi andi!” iluk yagatukwa.

¹⁷ A'nogo yagatukwama at raja Firaun nen he: ”Hit he, eberogoat yabu hinaberali mondok weak andi nen hineisena Tuhan faget warogo nolesi louwogen iluk yaganesi waga lagep andi.

¹⁸ Hit he hinambotkwe yabu hilingisi lano. Afuni nen engga puk engga mene ekhe wokhisigi'lek meneat he, hiren helep hokhorogo werati lagep hagat, werati logoino o,” iluk yagaisasikhe.

¹⁹ A'nogo yagaisasikhemo, it ap Israel mene inogogwi omanogo nen he: ”Helep hokhorogo werati lago hagat werasuageluk aga mene andi hobuk wene enggin mene ninoba fogoin higi,” iluk futfesukwa.

²⁰ It ap omanogo a'nogo inendawimo futfuluk raja Firaun were'ma nen wulibi wagaukwa hak he, Musa Harun emberek it yerinarek were'ma inom ambi agaukwa.

²¹ Ambi agaukwasik he, mel yagaisasukwa: ”Ero hit weak hilingiti lagep oba re, kain agoromi inomen nit ninebe inabiret ninobagagasik ninoa'lep mene. Hit hilingiti lagep andi Tuhan elure'ma re, Aren wene hinoba fouwago,” iluk yagaisasukwa.

Musa endawinggen weak agaikhesik Allah yagatikhe wene

²² It ap omanogo nen Musa lak a'nogo yagaisasukwama, at Musa nen Tuhan hobuk mel yagatikhe: ”Haren afuni Israel mene weak a'nogo hilinginafi lagen andi nenahalok. Nen, Haren an nayonggo fegendik it inoba nenahalok laknobagai wagen?

²³ An at raja Firaun oba wagarik, Hat Henu igirik wene yagasi wagi andi huli nen, aren afuni Israel mene yi enggin ti enggin hilinginafu mondok werek kwelegat he, Haren it telinafi'legat mondok kamo ikhi lagen andi, nenahalok,” iluk yagatikhe.

²⁴ A'nogo yagatikhemo At Tuhan nen Musa mel yagatikhe: ”At Firaun nen An nagainafuri o yoma nen mugisogo wulakfisoageluk An nen at ninghogo yagatunem enggi selanget fembik lologo wulakfisugunem heilenggen hagain aro,” iluk yagatikhe.