KELUARAN 4 - Allah Wene Fano Wene Hupla Inane

Allah nen Musa elalin mene hilingiti logouwageluk omame wogetikhe wene

¹ A'nogo yagatikhemo, at Musa nen he, Tuhan mel yagatikhe: ”A'nogo egen meneat he, an nen wene a'nogo yagaisugunem, afuni Israel mene nen, eberogoat ili'lago, iluk futfou inabiren he, wene an nen yagaisagain mene andi herakfisugu halok ninggi'nogo hilingisu hak? Iren he, Tuhan hat helokhoma menlagi'lek meneat he, heranen ikhi lagen, iluk ugu halok, an nen nena u hak?” iluk yagatikhe.

² Yagatikhemo, At nineisena Tuhan nen he, Musa mel yagatikhe: ”Hat henggimo fisogo welagen ari nena mene nogo,” iluk heinok wokhasikhemo at Musa nen he: ”Yi sige tomuk fisogo welagi o,” iluk yagatikhe.

³ A'nogo yagatikhemo, At Tuhan nen he, ”Sige tomuk ari kweangma hukhan,” iluk yagatikhemo, at Musa nen sige tomuk a'nogo kweangma huk hasikhemo kisu pololang etikhe, ariginhikhemo at Musa heise ale'ma lagaikhe.

⁴ Heise lagaikhemo, At Tuhan en he, Musa mel yagatikhe: ”Hat hebe kisu oba horokhogo wesimbik he, henggi agenggum fakfein o,” iluk yagatikhemo, Musa ebe horokhogo wagaikhesik he, kisu a'nogo fakfugunem, enggimo nen weak-weak ambotkwe sige tomuk agaikhe.

⁵ A'nogo hilinglagaikhemo, At Tuhan nen he, Musa mel yagatikhe: ”Afuni Israel mene nen he, ninombawi Abraham inom, Ishak inom, Yakub inom, ineisena Tuhan Allah a'nogo eberogoat Musa elokhoma menlagama higi, iluk anggoageluk it inelokhoma a'nogoat hilingisi lano o,” iluk yagatikhe.

⁶ A'nogo yagatikhesik Tuhan nen Musa ekhe mel yagatikheat: ”Hat henggi hasu elekwe kwelakfein o,” iluk yagatikhemo, enggi asu elekwe kwelakfuluk lit hasikhe re, enggibene mondok kut agaikhesik oumo agap ebene inali'lip asu hak mene hilingi'mo hasikhe.

⁷ A'nogo hilinglagaikhemo, Tuhan nen ikhi logolik he, ”Nekhengge henggi hasu elema kwelakfein o,” isikhemo, Musa enggi kwelakfesikhesik lisogo wulakfei wagaikhemo enggibene omanogo mondogat le'ma hasikhe.

⁸ A'nogo hilinglagaikhemo, At Tuhan nen he, ”Haren yagaisagain mene andi eberogoat iluk futfogoin mondok inabit halok he, athe, futfoageluk elalin mene attak-attak hilingisigin mene andi ineilenggen hambigat he, futfigi'lek hilingitu halok inom, futfoageluk elalin mene hobuk hilingisigin andiba nen futfogoin o.

⁹ Meneat he, iren eberogoat iluk futfouwageluk, elalin mene henggi pireba hilingisigin mene ineilenggen hambigen, futfigi'legat inabirat logolik, haren yagaisagain mene andi holhi'legat hilingitu halok he, i Nil mene endebat ekhe hinagaisogo wanimbik he i andi kweangma kweisal hano. A'nogo hilingisu mo re, i andi eilhe mep mene hilinglasigin o,” iluk yagatikhe.

¹⁰ A'nogo yagatikhe meneat he, at Musa nen he, ”Eige, Neisena. An he, o attak huli nen yogondak huli nane higithogo igirek le'ma re, hobuk haren yaganesumo nen nane higithogo u elo'lego. An nane mondok ebet-ebet logolik abiweak hilingi'mo re nambe enggin o,” iluk yagatikhe.

¹¹ A'nogo yagatikhemo, at Tuhan nen ikhi logolik he, ”Sa nen afuni inambe hilingisogo fikherek nogo? Nen, sa nen inane unggut lugulugwit figik, inesanggo tagumet figik, ikherek nogo? Nen, sa nen ineilenggen puget figik, fenggen figik, ikherek nogo? An Hineisena Tuhan nen hilinginafirek lek nogo?

¹² O yogondak yaat weak-weak lano. An nen hat hane ugu mene lebethiigik, yagaisagain mene higithogoat yagahetik, igin o,” iluk yagatikhe.

¹³ A'nogo yagatikhe meneat he, at Musa nen mel yagatikhe: ”Eige, neisena. Haren an nayonggo fembik lak nobagagun o. We, it ekhe mene inayonggo fuluk lakfisan o,” iluk yagatikhe.

¹⁴ A'nogo yagatikhemo, At Tuhan a'mage lagasikhesik he, Musa mel yagatikhe: ”Hat hoe enu Harun ap Lewi mene a'nogo werek lek nogo? At he, wene-ane u re, ane mondok higit andi An nelu o. At he hat hinom ambi asuogeluk weri'logo a'naga o, hemberek ambi asimbik he endawimo agaiyegasigin a'naga o.

¹⁵ Hat oba lambik, hemberek wene ane ikhi logolik, aren ugu mene yaga'no. An nen he, hit hemberek lebethisambik, hiren ugun mene inom, hilingisugun mene inom, yagahisagain o.

¹⁶ Aren he, hat henuba it afuni ineilhanem yagaisoago. Hat he, Allah higit a'luk, At igin mene at yagatu kwelek aren hebelogo afuni yagaisikhi logouwago.

¹⁷ Haren sige tomuk andiba afuni futfoageluk elalin mene hilingiti logogin mene ari waluk lan o,” iluk yagatikhe.

Musa ambotkwe o Mesir lagaikhe wene

¹⁸ A'nogo mondogat yagatikhemo re, at Musa a'nogo ambotkwe eamal Yitro aiba lagaikhesik, mel yagatikhe: ”An nambotkwe o Mesir lambik, an nagaila'lak omanogo ineluk werega, lega iluk neilenggen isa lageluk yagaheti lagi o, neisena. Higit lagain a? Lega?” iluk yagatikhemo, at Yitro nen he, mel yagatikhe: ”Lagain fano. Nagot,” iluk yagatikhe.

¹⁹ At Musa o Mesir lagi'lek oan logolik o Midian were'ma, Tuhan nen yagati logolik: ”Afuni hat hoasuogeluk ikhi lagaukwa mene omanogo arat wa'lagaikha o. Halok he, hambotkwe o Mesir lan o,” iluk yagatikhe.

²⁰ Andi yagatikhemo, at Musa agwe inom, againafuri inom, yagaisasikhesik he, inebe wam keledai amboloba liakfisasikhesik inom o Mesir lagaukwa. Laga logolik, Tuhan en yagatikhe higithogoat sige tomuk a'nogo walugat lagaikhe.

²¹ Tuhan en he, Musa mel yagatikhe: ”Haren afuni futfugungge elalin mene hilingiti logoinogen iluk An nen nomame wokheti andi mondogat raja Firaun andi eilhanem hilingisi lano o. A'nogo hilingisi lagain meneat he, An nen at endawinggen haro mene hilingfagain andi nen, aren futfuluk afuni Israel mene lani iluk yagaisagain lego.

²² Andi nen he, haren at raja andi yi'nogo yaga'no: Tuhan nen he, mel ikhe: Afuni Israel mene andi An nagainafuri manggusa tago mene o.

²³ Andi nen he, an nagainafuri mene andi an fogetnabi loageluk lakfisan o, iluk yagahesuageluk igi meneat he, haren, I o. Lani, iluk ikhi lagen lek. Andi nen yogondak an nen hat hagainafuri manggusa mene nek mondogat inoasigin o, iluk ikhe yaga'no,” iluk yagatikhe.

²⁴ A'nogo yagatikhesigat he, at Musa a'nogo ebekhalem laga logolik ekhema o sabu su meneba salogo nogo ugunemen he, Tuhan wagaikhesik he, Musa ebe wasigiluk isikhe.

²⁵ A'nogo hilingitikhemo, at Musa agwe Sipora nen he, weim pisau helep mene ekhe wanhikhesik, eak agap enggalimo mene palhikhesik he, Musa eisok oba tiphogo fikhi logolik mel yagatikhe: ”Hat he an nagun, mep yiba nemberek hunogo ninobagaikhe o” iluk yagatikhe.

²⁶ A'nogo hilingitikhe andi re, Tuhan nen he, ”Inagap inenggalimo mene a'nogo palinafi logoino,” iluk isikhe a'nogo higithogo hilingitikhe andi. A'nogo hilingitikhemo, At Tuhan en Musa ebe wati'lek herakfesikhe.

²⁷ A'nogo arigin hikhesik, Tuhan nen he, Harun mel yagatikhe: ”Musa o leimo afuni le'ma werek a'naga oba lan o,” iluk yagatikhemo, at Harun wagaikhesik, agot Musa Allah onggwarek andom oba a'nogo were'ma wagaikhesik hai ambe saluk watikhe.

²⁸ Hai a'nogo watikhemo, at Musa nen he, Tuhan nen o Mesir ambotkwe loageluk ayonggo fikhi logolik yagatikhe mene omanogo mondogat tindelogo yagatik, afuni futfoageluk elalin mene hilingisuageluk yagatikhe mene omanogo mondogat yagatik, isikhe.

²⁹ A'nogo yagatikhesik, Musa Harun emberek o Mesir lagaukwasik, afuni Israel mene inogogwi mondogat andogerinafukwa.

³⁰ A'nogo andogerinafukwasik, Harun nen he, Tuhan nen wene Musa yagatikhe mene omanogo mondogat tindelogo yagaisasikhe, at Musa nen it futfoageluk elalin mene mondogat it ineilhanem hilingitikhe.

³¹ A'nogo hilingitukwama, it ap omanogo nen, eberogoat, iluk futfesukwa. It Musa Harun emberegen, ”Tuhan nen hit afuni Israel mene eilenggen wokhinafik, yi enggin ti enggin hugunem eilenggen hisigik, ikhemo o,” iluk yagaisasukwama inesanggo holhukwasik he, ineindep awi yagaisogo Allah fogeratukwa.