KELUARAN 39 - Allah Wene Fano Wene Hupla Inane

Imam inasu kwatukwa wene

¹ It Bezaleel inom, Aholiab inomen he su wene kabogeti logolik labeti logogun mene ekhe yo eil hal-hali warek mene inom, ungu mene inom mep mene inom oba itukwa mene andem he, imam inebe Allah Awi Wuri'mo mondok hore'ma a'nogo kuluk yabu hilingiti logolik labeti logogun mene faget kwatukwa. Su Imam en labetu mene at Harun faget he Tuhan nen wene melalek Musa yagatikhe higithogo kwatukwa.

² No efod he kain lenan sakhorek mene inom, yo eil hal-hali warek mene inom, ungu mene inom, mep mene inom, yo emas mene inom, oba selebenetukwa.

³ Iren he emas mene al sagalhunemen enek mondok uan pilingisogo hilingfesukwasik libik-lebekhogo re yo eil serameakhogo hilingfesukwasik he, kain lenan sakhorek mene inom, yo eil hal-hali warek mene inom ungu mene inom mep mene inom oba seberogo itukwa.

⁴ Andi mondogat hilingfuluk he, no efod a'nogo inomoloba kelhuba faget pire inabel fikhit selebenet fesukwa.

⁵ Ban ogore yo eil fanorogo lalek mene ebe ero misik meneba lalek mene hilingitukwasik he, no efod a'nogoba selebenet fesukwama re, Tuhan nen wene melalek Musa yagatikhe mene higithogo misik meneba hundik welagaikhe.

⁶ Iren he helep delima mene matukwasik he emas unggut hilingisogo hilingik meneba henatukwa. Iren he inenggi we mondok pugun-paganhogo helep aremnogo ebene re hun Yakub againafuri inebe 12 nen aremnogo inenu hesesengge waganogo fesukwa.

⁷ A'nogo hilingfuluk he, Tuhan nen wene melalogo Musaba yagatikhe mene higithogo re, it afuni inunggulenu 12 nen andi inendawimo ebetikhi logouwageluk he, helep omanogo inomoloba hele efod pugetarek mene a'nogoba to'mot fesukwa.

Amik sebelek mene faget kwatukwa wene

⁸ Bezaleel inom, Aholiab inomen he ami'mo sebelek mene faget he su efod meneba itukwa, a'nogoba nen yo su inenggi nen ugu mene ogore, ero misik andi menebaat itukwa.

⁹ Ebe obabut he unggut 4 en hilingik mene tulem pire sirogo, sabiarogo inom uanhogo inom amu-amu re 22 sentimeter en higik itukwa.

¹⁰ Amik oba sebelek mene andiba re, helep permata mene asiok 4 en hilingfesukwa. Asiok attak meneba re helep delima, topas, baiduri sepah inom to'mot fesukwa.

¹¹ Asiok pirenek menebare helep zamrud, nilam, intan inom to'mot fesukwa.

¹² Nen asiok henaganek menebare helep lazuardi, akhik inom, helep kecubung inom.

¹³ Asiok enggaminogo nek meneba re helep pirus, yakut, ratna cempaka inom. Helep 12 nen andem he no emas oba nek fanorogo puget fesukwa.

¹⁴ Helep permata andem ebe lombok oba re, hun Yakub againafuri inebe 12 nen aremnogo misik mene inenu ekhe it afuni inunggulenu Israel mene inendawimo ebethikhi logouwageluk palfesukwa.

¹⁵ A'nogo nen posiemanggen emas mondok fano meneba lambelek mene pire elanget fesukwa.

¹⁶ Andi nen he senggan emas mene amik sebelek mene aremnogo ambisangma eiselek mene faget ambolkwe pire hilingitukwa.

¹⁷ Andi nen posiemanggen emas mene pirenerengge aremnogo senggan elelekwe kwelakfesukwa,

¹⁸ nen ambisang fena fikhit he, amik sebelek mene unggut hilingik engge aremnogo wurep fena fikhit kwelakfesukwama re, no efod a'nogo hele mene inom hundik welagaikhe.

¹⁹ A'nogo hilingfesukwasik he, senggan emas mene pire igisogo re amik sebelek mene a'nogoba puget fesukwa, nen wurep maikwe elonggokwe fikhit andoma re no efod a'nogo sen hikhi lagaikhe.

²⁰ Andi mondogat hilingfuluk he senggan emas mene pire ekhe igisogo re efod a'nogo a'le pirerogo elokhe fikhiren, a'ma fikhit hakhogo ugu mene sep hundik oba nen, ban yo mondok sakhorek mene a'nogoba ugungge poikwe fikhit andoma puget fesukwa.

²¹ Tuhan nen wene melalek Musa yagatikhe mene omanogo higithogo senggan amik sebelek mene andi re, yo pogot eil hak meneba senggan efod andi oba hundik welagaikhe, andiba re amik sebelek mene andi re ban a'nogo ambolkwe were'ma re lologo la re elo'lek welagaikhe.

Su amu mene imam we mene faget kwatukwa wene

²² Su jubah efod ambolkwe labeti lagaukwa mene andi re abirengge yo eil pogot hak meneba nek seleben sek welagaikhe.

²³ Inalonggop ele re selanget lasinogoluk he, su eragaik hakhogo inenggi nen ninghogo selebenet fesukwa.

^24-26 Ebene a'ma fikhit andoma maserogo re, alilingge e delima enggen kain lenan sakhorek mene inom yo eil pogot hak mene inom, ungu men inom, mep mene inom oba selebenet fesukwasik he, anggelekwe emas mene abolok kolondok-kolondogengge At Tuhan nen wene melalogo Musa yagatikhe higithogo hilingitukwa.

²⁷ Iren he kain lenan eil sakhorek meneba su kemeja Harun faget inom, againafuri faget inom selebenetukwa,

²⁸ inunggulmo salhu mene inom, inunggulkwe pugetu mene inom, su celana horok mene inom,

²⁹ inalinggin faget inom, andoma mondogat he kain eil sakhorek menebaat selebenetukwasik, yo eil pogot hak mene inom, ungu mene inom, mep mene inom, oba ilirenggerogo re, Tuhan awene melalek Musa yagatikhe aple higithogo alilingge yo inenggi nen lalek meneba hilingitukwa.

³⁰ Andi nen it inebe Tuhan nen enogo fisikhe iluk hore'mene logouwageluk he alilingge emas mene hilingitukwa. Inalilingge andiba re ane yi'nogo palek welagaikhe, ”Tuhan onggwarek faget enekhogo fakhikhe,” iluk palek welagaikhe.

³¹ Inalilingge andi re, At Tuhan nen wene melalek Musa yagatikhe mene higithogo, inunggulasu a'nogo esanggokwe haningisogo andoma te'met filik lagaukwa.

Yabu a'nogo mondogat hilingitukwa wene

³² A'nogo hilingitukwasik he, yabu At Tuhan Awi Sabu a'nogo mondogat wutukwa. Nen it afuni Israel mene re, at Tuhan nen wene yi'nogo hilingi'no ti'nogo hilingi'no iluk Musabene nen wene melalogo yagaisasikhe mene a'nogo higithogo nek hilingitukwa.

³³ Iren he O Sabu a'nogo inom o andiba hilingiti logogun engge inom, enggi senfugu mene inom, e nunggulik mene inom, e liabek mene inom, talek mene inom,

³⁴ tum sebelek mene domba ai mene agap eil mep meneba yugulogo hilingitikhe mene a'nogo inom, agap sakhorek meneba igisogo salhu mene a'nogo inom, kain kolhu mene omanogo inom, waluk Musa ambit wagaukwa.

³⁵ E Peti Wene Warek helep pireba palek mene kwalegengge a'nogo inom, e pia inom, amboloba sebelek mene inom,

³⁶ e meja inom, yi mene ti mene amboloba andoma nen hilingiti logogun mene mondogat inom, nen roti Allah faget werati logogum mene inom,

³⁷ lampu eisok emas wurik meneba hilingik mene a'nogo inom, lampu ebe abirengge inom, andi hilingitu mene mondogat inom, minyak lampu andi faget mene inom,

³⁸ mezbah emas oba pugunsek mene a'nogo inom, ap menfisikhi logolik amusu kweisalinafu mene a'nogo inom, amben-ambenengge omanogo inom, O Tuhan Awi Sabumo kweba hulirogo su kologo pelabek mene a'nogo inom,

³⁹ mezbah perunggu meneba hilingik engge no perunggu meneba hilingik mene inom, e pia legetu mene inom, ekhe mene-ekhe mene andoma faget hilingitu mene inom, i inenggi ineisok sobalhuba obalik i yenggelhu mene talengge inom,

⁴⁰ kain wurilik mene afuni andogotarek oba a'nogo faget inom, e liabek mene inom, talek mene inom, su wurilik mene kwe ambe pale'ma kwi waguba a'nogo faget mene inom, inom kolhu mene faget inom, O Sabu faget pebuk telhu mene inom, yi mene ti mene O Sabu andi faget hilingitu mene inom,

⁴¹ su it imam O Tuhan Awi Sabumo senggelek hore'ma a'nogo hilingiti logolik labetu mene inom, nen su at Harun inom at againafuri inom inobaget penogo ugu mene inom, waluk Musa were'ma wagaukwa.

⁴² Tuhan nen wene melalogo Musa yagatikhe mene higithogo it afuni Israel mene nen yabu andoma mondogat hilingitukwa.

⁴³ Musa nen he iren yabu hilingitukwa mene a'nogo eil hilik lagaikhesigen, Tuhan nen hilingi'no iluk yagatikhe mene aremnogo higithogo nek hilingitukwa. A'nogo hilingitukwama at Musa nen it afuni a'nogo inoba fanoabet fisasikhe.