KELUARAN 36 - Allah Wene Fano Wene Hupla Inane

¹ Hun Bezaleel inom, Aholiab inom, it fena yabu o wutu aple inelu mene Tuhan en hebelek mene wogisigik, yi mene ti mene hilingitu aple faget ineluet fisigik, isikhe mene omanogo re, O Tuhan Awi Sabu a'nogo faget wusugun mene faget mondogat inelu agaikhe. Iren he Tuhan en yi'nogo ti'nogo hilingisugun iluk wene melalogo yagaisikhe higithogo nek hilingisugun,” iluk yagaisasikhe.

It afuni Israel mene nen yi mene ti mene hokhorogo kabogesi wagaukwa wene

² At Musa nen he, hun Bezaleel inom Aholiab inom, ap fena Tuhan nen At awi wusuageluk ineluet fisasikhe mene omanogo inom, it inendawi fano nen leberinafi lagaukwa mene omanogo inom, wolinafukwasik erora'ni iluk yagaisasukwa.

³ A'nogo yagaisasukwasik at Musa nen he, ap Israel mene nen O Sabu Tuhan faget andi wusuageluk kabogesi wagaukwa mene omanogo wogisasikhe. Oba nen he, afuni Israel mene nen yi mene ti mene omanogo hubet-habet hundik-handik Musa ambit kabogesi waga lagaukwa.

⁴ Kabogesi wagunem he, it yabu hilingitarek inap omanogo nen Musaba yagasi laga logolik he,

⁵ ”Yi mene ti mene afuni nen waluk kabogesi weri'lagwi mene oma re, niren O Tuhan Awi sabu wusuageluk yaganisikhe mene higit werek oba nen, iren ekhe inom oba loukhogoat kabogesi wagaikha o,” iluk yagatukwa.

⁶ Yagatukwama at Musa nen o sabu wurikwe omanogo ebe lombok wene menfikhi logolik he, ”O Tuhan Awi Sabu wutu mene faget he, huli yiba arat kabogesi wagebo,” iluk yagaisasikhemo re, it afuni omanogo nen waluk waga lagaukwa mene a'nogo arat teget fesukwa.

⁷ Yi mene ti mene o wusuageluk kabogesi wagaukwa mene omanogo re, oba heilarogo andogotukwama fena tindu u hagat hilinglagaikhe.

It ap inafe hebelek mene omanogo nen Tuhan Awi Sabu a'nogo wutukwa wene

⁸ A'nogo hilingitukwasik it ap yabu hilingitu aple inafe hebelek inap omanogo inanggle'ma mene ap ekhe mondogat elu mene a'nogo nen he, Tuhan Awi Sabu andi wutikhe. O Sabu andi re kain lenan sakhorek mene 10 nen lebeksek mene inom, yo eil pogot hak mene inom, eil ungu mene inom, eil mep mene inom, seberogo ugu meneba wutfesikhesik he, kerub mene ilirenggerogo mene inom seberogo itikhe.

⁹ Sikhipsek mene andoma re, wurep uankwe re 12 meter en, horok fikhit he 2 meter en hilingfesukwa.

¹⁰ Palek 5 nen oba re misi'mo sep hunhigik su wurulik mene misik hilingfesukwa, nen fena 5 nen ekhe aremnogo a'nogoat hilingfesukwa.

¹¹ Su kain eil pogot higit mene wurilik pire andem esanggokwe re, kolhigik fugu mene iluk hilingfilik lagaukwa.

¹² Su ebe lombok eiselhukwe obalik andi re 50 nen higik hilingfesukwama re, misik seberek mene hak hilingik welagaikhe.

¹³ A'nogo hilingfesukwasik he, kolhu mene misik asuageluk su andem pirenet selebenet fugu mene iluk emas mene 50 nen hilingitukwa.

¹⁴ Andi mondogat hilingfuluk engga faget he, kambing esi meneba kain ebe 11 nen itukwa

¹⁵ Palek mondogat he higithogo nek pale'ma, uankwe re 13 meter, nen horokwe re 2 meter hilingfesukwa.

¹⁶ Palek mene andem 5 nen he su wurilik mene misik agundibet figik, nen ekhe 6 en aremnogo ogo a'nogo agundibet figik hilingfesukwa.

¹⁷ Nen kain attak mene andi wurep oba re anggwe kolhu mene 50 nen eisel figik 50 fena re kain pirenek meneba eiselfigik isukwa.

¹⁸ A'nogo hilingfesukwasik he, su wurilik mene pire aremnogo misik pisarogo O Sabu a'nogo engga salasuageluk he, no perunggu mene agundibet fugu mene 50 nen hilingitukwa.

¹⁹ Andi mondogat hilingfuluk he, O sabu a'nogo pire seberogo salek mene faget he ekhe re domba ai mene agap eil mep meneba kwago mane inom, nen ekhe re agap sakhorek meneba kwago mane inom selebenetukwa.

²⁰ Andi mondogat hilingfuluk he, iren o Sabu a'nogo langowak pikhitkwe mene nek he, e akasia meneba menerik lagaukwa.

²¹ E langowak liabek mene andem misik he 4 meter, nen nunggulik mene re 66 sentimeter higik fesukwa.

²² E liabek mene andoma ebe lombok he, e agundibengge pire meneba wuthogo hilingisogo fesukwama re, e liabek mene andoma ekheba nen he ekheba senek welagaikhe.

²³ O Sabu andi selatan fikhit faget he, oak 20 nen hilingfesukwa,

²⁴ nen eare no perak meneba 40 nen hilingfesukwa, nen o oak andoma a'makwe wurep fogoin oba re e ea pirendek higik fesukwa.

²⁵ O Sabu a'nogo utara fikhit faget he, o oak 20 nen fesukwa.

²⁶ nen eare 40 nen no perak meneba saplirogo fesukwa, nen o oak andoma ebe lombok a'makwe re pirendek higik fesukwa.

²⁷ O sabu fena abel barat fikhit andoma re o oak 6 en hilingfesukwa,

²⁸ nen unggutmo faget he e pirendek higik liafukwa.

²⁹ Tiang unggut-unggut liabik lagaukwa mene andoma re, tik warek mene oba nen warogo pikhit e nunggulik mene pomaba hunfesukwa. Nen e oak pire mene unggut hilingik mene andem ogo re a'nogo nek hilingitukwa.

³⁰ E oak andem abirengge re, 8 en, nen a'makwe earek mene re no perak oba hilingik engge 16 nen hilingi'mo re, ea misik a'nogoba re pirendek higik fesukwa.

³¹ A'nogo hilingfesukwasik he, iren e akasia meneba e nunggulik mene faget he 15 nen fesukwa, nen 5 nen he o Sabu andi abel fena fikhit agorek mene faget,

³² nen, 5 nen ekhe re, abel amukwe agorek logogin mene faget, nen 5 nen ekhe re O Sabu a'nogo abel barat fikhit agorek mene faget fesukwa.

³³ E oak tulem nunggulik handogaletu mene andi re, e oak liabek mene a'nogo a'ma hakhogo o Sabu a'nogo wurep fena nen he fenaba tibet fesukwa.

³⁴ O Sabu andi faget e oak andoma inom nen e nunggulik lakfugu mene oba re emas meneba saplirogo hilingfesukwasik, e ebe hambukhogo senek logouwageluk he senggan emas mene igisogo oba kwelafukwa.

³⁵ Iren he kwe sou faget he, kain lenan eil sakhorek mene inom, yo eil pogot hak mene inom, eil ungu meneba inom, eil mep meneba inom saplirogo ugumo re, ambolkwe no kerub ilirenggerogo itukwa.

³⁶ Kain ugu mene andiba eiselogo pelafu mene faget he, e akasia mene emas oba saplirogo hilingik mene 4 en, a'makwe re perak mene 4 en ambol oba talogo hilingitukwa.

³⁷ A'nogo hilingfesukwasik he, O Sabu andi kwebalengge faget he kain lenan eil sakhorek mene inom, yo pogot eil hak mene inom, eil ungu mene inom, nen, eil mep mene inom oba ugungge ebene alilingge yo lalek eil yinik-hunik meneba kologo fesukwa.

³⁸ Kwe palengge su kain andi faget he, e kolek mene 5 nen hambot fugu mene hilingitukwa. E 5 nen liabek mene andem ayogouk oba inom, sep hunitukwe inom he emas oba saplirogo hilingfesukwa, nen a'makwe ea 5 nen lakfesukwa mene andem enek he perunggu meneba hilingitukwa.