KELUARAN 35 - Allah Wene Fano Wene Hupla Inane

Ninenggi Sabat oba weat logolik hilingiti logogun mene faget isikhe wene

¹ Musa nen afuni Israel mene mondogat kaboget fisaluk yagaisikhi logolik, ”Tuhan nen wene hit faget melalogo fikhe mene re yi:

² Hinenggi falfaligen andi re yabu hilingiti logogun mene faget werek, oba nen he, hinenggi sabit mene andiba re set walogo weat logogun oba hilingi'mo lingge andi re Tuhan faget horek mene logogin. Afuni ekhe nen inenggi Sabit mene andiba yabu hilingitu halok he ebe pinggi wasugun.

³ Linggene andi sambul he hinaiba endu ogo nonggwalu fuk.” ikhe iluk yagaisasikhe.

Tuhan Awi wuri'mo hilingisugun mene faget yagaisasikhe wene.

⁴ Musa nen afuni Israel mene inebe mondogat inoba yagaisikhi logolik, ”Tuhan nen wene melalek ikhe mene re yi:

⁵ Tuhan faget fugu mene waluk fei waga logoni. Fei waga logolik he, ap ekhe endawinggenma lebetunem emas, perak, perunggu;

⁶ kain lenan sakhorek mene inom, kain wol eil hal-hali warek mene inom, ungu mene inom, eil mep mene inom, kain kambing esiba ugu mene inom;

⁷ Domba ai mene agap polu palek mene inom, agap sakhorek mene inom, e akasia,

⁸ amusu lampu ibilhu mene faget inom, amben-amben engge amusu wene kabogeti logolik hilingitu mene faget inom, dupa amben fano mene faget inom;

⁹ permata delima inom, permata ekhe mene inom, andoma su ap Imam Agung inasu efod su labeti logogun mene faget inom, inamikmo peisabirogo iti logogun mene faget inom hilingisuageluk waluk fei wesugun” ikhe iluk yagaisasikhe.

Tuhan Awi sabu wuri'mo yi mene ti mene tugesugun mene faget isikhe wene

¹⁰ ”It ap yi mene ti mene hilingisuageluk futfuluk higithogo hilingiti logolik inenggi pugunsek mene ekhe hinaggele'ma nen heragaisogo fisambik Tuhan nen yagaisasikhe mene higithogo wusugun mene re yi:

¹¹ O sabu inom, engga salek mene enggi senengge fesengge hakhogo esin liabek mene inom e nunggulik senggelhu mene inom, talhu mene inom,

¹² Peti Wene Warek mene a'nogo piatu mene inom, ambe sebelek mene inom, kain sebelek mene inom,

¹³ meja inom, piagayo abirengge mene inom, roti weragaisogo fugu mene inom,

¹⁴ lampu ibil fikhi logogun oba eisok inom, andi faget halhi logogun mene faget inom, lampu ebe inom, minyak keralhu mene faget inom,

¹⁵ mezbah ebeba amben fano mene nolhu mene faget inom, e pia'luk lagu mene faget inom, amusu wene kabogeti logolik hilingitu mene faget inom, dupa amben mondok fano mene inom, o Sabu a'nogoba su hulirogo porek logogin mene faget inom,

¹⁶ Mezbah yi mene ti mene warogo endu nolhuba inom, yi mene ti mene andi faget hilingitu mene perunggu ba hilingik mene inom, e piagayo abirengge mene mondogat andoma inom, i yenggel fuluk sobalhuba talek mene inom,

¹⁷ kain o senggelek ebekhalem afuni andogotuba a'nogo faget mene inom, e menfugu mene talhu mene inom, kwe ambe hokho mene o senggelek ebekhalem a'nogoba kain kolhu mene inom,

¹⁸ e pebuk telhu mene inom, hele O Sabu andi homatu mene inom, o senggelek afuni andogotuba andi homatu mene faget inom;

¹⁹ It imam O Senggelek mondok Hore'ma a'nogo yabu hilingisuogeluk kwikhi logolik inasu tegelek mene labeti logogun mene inom, nen su ekhe enekhogo at imam Harun ebe inom, at againafuri inom, faget hilingisugun,” iluk yagaisasikhe.

It inunggulenu Israel mene a'nogo nen inangge fugu mene waluk kabogesi wagaukwa wene

²⁰ Andi hilingfuluk he it afuni Israel mene mondogat kabogetukwa mene a'nogo pugulhukwasik,

²¹ ap sa nen ekhe endawimo abologet hugunem halok, Tuhan Awi Sabu andi faget wusugun mene iluk yi mene ti mene waluk fei wagaukwa. Andi fena iren wene kabogeti logolik hilingitu mene faget iluk inom, imam inasu kwatu mene faget inom, waluk kabogesi wagaukwaat.

²² Aben ogo. hemi nen ogo, inendawimo nen anggaluk inalilingge wanhuba anggwe folelhu mene peneti inom, inesanggo mangge inom, senggan inom, siong inom, inalilingge amu mene hokhorogo emas meneba hilingik mene Tuhan obaget fugu mene iluk inom, kabogetukwa.

²³ Nen it afuni fena nen su lenan eil sakhorek mene werek halok inom, kain wol mene inom, eil hal-hali warek mene inom, eil ungu mene inom, eil mep mene inom, su kambing esiba ugu mene inom, domba ai mene agap oba ugu mene eil mep meneba warek mene inom, agap sakhorek mene inom mondogat andoma fei wagaukwa.

²⁴ Nen it afuni ekhe nen he perak ogo, perunggu ogo werek mene Tuhan obaget waluk wagaukwa. Andi higithogo re, it afuni fena nen inagayo akasia werek halok he, yabu andi faget hilingitu mene iluk waluk wagaukwa.

²⁵ It hemi su selebenetu aple inafe hebelek mene nen he yo lenan eil sakhorek mene inom, wol pogot eil hak mene inom, eil ungu mene inom mep mene inom, iren selebenetukwa.

²⁶ Fena re, iren wam kambing esi meneba yo lalogo itukwa.

²⁷ It inogogwi ferinarek mene nen he, no permata delima inom, permata amu mene ekhe inom. su efod faget inom, inami'mo peisabirogo ugu mene faget inom waluk fei wagaukwa.

²⁸ Iren ogo re amben-amben engge yi mene ti mene inom, amusu lampu wialhu mene faget inom, amusu amben mondok fano mene inom waluk wagaukwaat.

²⁹ Afuni Israel mene, hemi ogo ap ogo, inendawimo fogoin anggugu mene inebe mondogaren yi mene ti mene Tuhan nen wene melalek Musa bene nen yagaisasikhe mene a'nogo higithogo Tuhan faget kabogesi waga lagaukwa.

Tuhan Awi Sabu andi wusuageluk ap o wutu inelu mene penogo fisasikhe wene

³⁰ Hobuk a'nogo hilingi'luk at Musa nen afuni Israel mene inoba ikhi logolik he, ”Tuhan nen he ap Bezaleel hun Uri amlogo Hur omba unggulenu Yehuda mene a'nogo wenagaisogo fesikhesik he,

³¹ Allah Areagun a'nogo at oba louget fesikhe. A'nogo louget fesikhesik, At Allah nen wenggelogo hilingitu mene wogetik, yi aple ti aple enggi pugunhogo wutu mene wogetik, yi mene ti mene walhaluk pugunetu mene wogetik,

³² yi aple ti aple higithogo wenggel fuluk hilingisuageluk awene lenggalhu mene wogetik, nen yi mene ti mene emas, perak, perunggu meneba nen hilingfuluk wutu mene wogetik;

³³ helep permata makfuluk unggut halogo wusuageluk hilingfigik, e hesesengge wokhigik inom yi mene ti mene amu mene amu mene mondogat hesesengge wokhigik wusuageluk inom, wogetik, isikhe.

³⁴ It hun Bezaleel inom, Aholiab hun Ahisamakh amlogo unggulenu Dan mene a'nogo inom inoba re, Tuhan nen inungguloak kagalek mene o yabu andi hilingitu mene faget aren ap amu mene yanggulinafi logouwuageluk inafe mondok hebelek mene wogisasikhe.

³⁵ It inoba re, helep pugetu aple inom, e tilong folelhu aple inelu mene inom, it su kain eil sakhorek mene inom, wol eil pogot hak mene inom, eil ungu mene inom, eil mep mene inom, su kain amu mene inom oba su kwasuageluk wene lenggalhik, ebe kwatik, hilingitu mene wogisigik isikhe. It inebe re, ekhe mene ekhe mene hilingisu hagenek logolik, yi yabu ti yabu elok hilingisu hagenek welagaukwa.