KELUARAN 34 - Allah Wene Fano Wene Hupla Inane

Allah nen he, helep sabia pire ket mene fanorogo hilingisuogeluk Musa yagatikhe wene

¹ Hobuk nineisena Tuhan nen Musa mel yagatikhe: ”Helep sabia pire attak welaga a'nogo hangge ekhe hilingi'no. A'nogo pugunesumo re, an nane attak helep sabia andiba lisu palhi mene haren sirik-serekhogo lakfisegen a'nogo hakhogo ambotkwe palino.

² A'nogo palogo fegen halok, hat hebe ohealek hubet tom Sinaiba lagai wesimbik, An noba punu ebeba lagai we'nogen he, yi mene ti mene inom, hat hebe inom, tegelino.

³ Hat a'nogo lagai wagunem afuni ekhe hombo'ne lagai wesimbik, tom andiba ekhe welagik, wam sapi inom, domba inom, tom andi a'ma kwe engga nunggu logouwageluk herakfisigik, ugun mondok lego,” iluk yagatikhe.

⁴ A'nogo yagatikhemo, at Musa nen helep sabia pire mene hilingisogo wanhikhesik he, nineisena Tuhan nen, ”Yi'nogo hilingi'no,” iluk yagatikhe hagat waluk o hobit hak hubet siakhogo re, tom Sinai ba lagasikhe.

⁵ A'nogo lagasikhemo, Tuhan ebe ohena elonggoma pi wagaikhesik, Musa emberek tom andiba mendek logolik, ”An he, hineisena Tuhan o,” iluk yagatikhe.

⁶ A'nogo yagatikhesik, hobuk Tuhan ebe Musa elokhoma asi lagaikhesik mel yagatikhe: ”An he Tuhan, hineisena Allah nendawinggen lek lebekhogo wogisigik, inebe nendawirinafik, igirek mene a'nogo Anaro. An nobabut he, oba heilarogo nendawirinafi logolik, hombunhogo welagik, na'mage weak-weak inoba figi'lek hilingitik, igirek mene o.

⁷ An nen he, afuni hobuk alep yi teng ti teng ta'larik laga logogun mene nendawirinafuat logolik, kwanirogo hilingiti logogun mene inom, weak hilingiti logogun mene inom, sagalogo legetfisikhi logogin o. A'nogo meneat he, it afuni andi ekhe kwanirogo hilingitarek mene andi unggum inoba figi'lek herakfisagain lego. We, unggum inoba fembik, iren taginabik laga logogun mene, huli henagan oba he a? enggaminogoba he a, it inagainafuri inom, it inagainafuri nen tagomangge mene inombawilak inom, it inombawi andi nen ta'lasugun mene inom, inomat, it ineisugwi weak hilingita andiba unggum inoba fugu mondok logogin o,” iluk yagatikhe.

⁸ A'nogo yagatu kwelek andemat, at Musa nen eindep awi yagaisogo fogerati logolik,

⁹ mel yagatikhe: ”Tuhan neisena, hat eberogo nenat, an nebe hoba liok ili'lago halok, hat hebe nit fetninarek logoinogen iluk hayonggo figi andi nane hesanggo holin o. Afuni Israel mene andi inendawinggen mondok helep meneat he, niren yi weak ti weak hokhorogo hilingitorek mene andi, haren sagalogo legetfisambik he, ninebe hat honggwarek hagainafuri meneatma wo'ninabino o, neisena,” iluk ayonggo fesikhe.

Allah nen wene warogo hobuk kerabenggerogo woginafikhe wene

¹⁰ A'nogo yagatikhemo, at nineisena Tuhan nen Musa mel yagatikhe: ”An yogondak afuni Israel mene wene warogo woginabigin o. An nen afuni kweangma welagaikharek mene ekhe futfouwageluk elalin mene ekhe hilingiti'lek mene, it afuni Israel mene ineilhanem hilingisigin o. An hineisena Tuhan nen elalin inailo mene ekhe hit faget hilingisigin andi nen he, afuni mondogaren An nen elalin hilingisigin mene andi ineilenggen hogoin o.

¹¹ Hit hilingiti logogun mene faget, yi'nogo hilingiti logoino, ti'nogo hilingiti logoino, iluk yogondak yagahisigi mene andi, hologo higithogo hilingiti logoino o. An nen hit lagunem he, afuni inunggulenu Amori mene inom, Kanaan mene inom, Het mene inom, Feris mene inom, Hewi mene inom, Yebus mene inom, mugusogo wulakfisagain o.

¹² Afuni o hit logoin oba andoma mene hinom wene watunem he, paik hele fugunem alonggop ke'nok ikherek andi hak ke'nok imbik hinebe wa'lasugun andi nen he, o afuni andoma mene were'ma laga logolik hinom wene ekhe watubo.

¹³ Ma re, hiren he, iren yi mene ti mene inangge tugwi kembu faget warogo noleti logogun kwe obuluk hilingik mene andoma langguk-langgakhogo potfisigik, afuni-afuni alik waganogo menogo fuluk oba fenatarek mene andoma sanokhogo lakfisigik, it afuni andoma nen, inasunggan eba kologo fagarek mene andoma tekhogo lakfisigik, ilik lano o.

¹⁴ An hineisena Tuhan Allah re, it afuni nen he, yi mene ti mene faget, Allah emberek higit, iluk fogeratarek mene andi mondok napsiri welagirek andi nen he, hiren afuni ekhe nen fogeratarek mene andi fogeratubo.

¹⁵ It afuni andoma nen, inandugwi kembu anggo waresimbik fogerasugun andi sambul he, iren yagahisikhi logolik, hit ninom fogerasuogo, iluk hinendawimo kagalumo, hinom a'nogo hilingisugun andi nen he, hiren he, ninom yi'nogo hilingiti logouwok, iluk hinom wene ekhe watubo.

¹⁶ Hiren hinagainafuri inagagwi afuni endakwe mene ina'logomi mene igisogoin halok he, it hemi andi nen he, hit Allah obokhogo herakfisaluk nit ninandugwi kembu mene fogerati logogun o, iluk inendawimo kagalumo An obokhogo heraknobagaluk wulibugun andi nen he, a'nogo igisikhi logogubo.

¹⁷ Hiren he, tugwi kembu posie mene hilingitik, emas mene hilingitik, perak mene hilingitik, hilingisogo fuluk fogeratubo.

¹⁸ Hit o attak o Mesir herakfuluk wulibi wagagipsik aremnogo tugi Abip oba seni roti fiterek lek mene isati logolik fogetnafi lagagip andi. A'nogo fogetnafunem wene An nen hit yagahisasigi andi mene higithogo, linggene sabiren andem oba logolik tugi Abip andiba An fogetnafi logolik tahun hundik-handik roti fiterek lek mene andi ninggi logoino.

¹⁹ Hinagainafuri ap manggusa ta'lasugun mene inebe lombok inom, hinanggo holou oba eak ai mene tasigin mene andi inom, ebe An mene o.

²⁰ A'nogo meneat he, hinanggo keledai holou mene nen eak tasigin mene andi hit hinonggwarek helikhi logolik he, obulu'mo domba eak halok An nobaget nobagagu nogo o. A'nogo meneat he, hit hinonggwarek helogoin hinabit halok he, keledai andi ot komukhogo wasugun o. Nen, hinagainafuri ap manggusa mene inebe lombok inobali'mo ekhe mene kwelafi logolik hinonggwarek hinambotkwe helogoin aro. Nen, sa nen yi mene ti mene An wo'nesigin mene ekhe waluk wesigin lek halok he, An noba wesinogo.

²¹ Hit hinenggi falfaligen andi re yabu wanhi logogun. Mene athe, hinenggi sabit mene andi re, hinenggingge ekhe wanugun mondok lego. Yabu hokho lak fuluk inom, enggen palhu sambul inom, hinenggi sabit mene andiba re, wanhi'lek weat mondok logoino o.

²² Hiren, gandum enggen attak-attak palugun mene andi faget fogerati logolik seni isati logoino o. Nen, hiren tahun attak mene wela'luk hobuk meneba kwikhi logolik, yi agayo ti agayo enggen palhi logolik he, o sabu e enggaba wuthigik welagagu, iluk hinendawimo ebeti logolik seni isati logoino aro.

²³ Tahun misigat oba logolik he, hinenggi henagan oba hit ap hinebe lombok An hit afuni Israel mene hineisena Tuhan fogetnabuogeluk noba waga logoino o.

²⁴ An nen afuni inunggulenu hunogoat mene hit hinelokhoma nen mugusogo wulakfisambik, o hit logogun oba andoma hokhot fugunem, hiren Seni Roti Fiterek Lek meneba werago ninggik, yi mene ti mene awi yasugun mene ebe tatik, palhik iluk seni isago ekhe ninggik, hinendawimo nen, o sabu e engga mene wuthigik, welagagu, iluk seni isago ninggik, ikhi logouwogeluk o andoma kugunem, afuni andoma mene ekhe nen inailo legengge o hit logogun oba andoma sebelugun mondok lego.

²⁵ Seni a'nogo hilingisuogeluk wam An faget nobagagun mene senggelhi logolik, yi mene ti mene sumburu roti enggen fisuageluk pelafarek mene inom pelagaisogo weragongge An faget ekhe nobagagun mondok lego. Nen, linggene wam seni Paskah andi faget nouwogeluk wera'luk he, ekhe ohealek mene faget figi'lek o hubanggo andi sambul felelenghogo ninggi logoino o.

²⁶ Tahun ebe lombok hiren yi mene ti mene ebe attak mene tatik, palhik, ugun mene andi waluk he, An hineisena Tuhan Allah nawi wuri'mo fei waga logoino o. Nen, wam domba eak inom, kambing eak inom, susu onggwarek isa eilak amusuba isasugun mondok lego, iluk yagahisigi o,” iluk yagatikhe.

²⁷ A'nogo yagatikhesik Tuhan nen Musa ekhe mel yagatikhe: ”An nen wene yagahisigi mene yibaat hat hebe inom, afuni Israel mene ekhe inom, wene warogo wokhinafi andi nen he, lisu palogo fein o,” iluk yagatikhe.

²⁸ Wene andoma nineisena Tuhan nen Musa oba yagatu werek kwelek sumburu inom, i inom, ninggi'lek enggi 40 hari nen emberek welagaukwa. Logolik he, wene ebe 10 nen nineisena Allah nen wene warogo wo'ninafikhe mene andi helep sabia meneba lisu palogo fesikhe.

Musa tom Sinai oba nen pi wagaikhe wene

²⁹ At Musa nineisena Tuhan emberek tom Sinai oba logolik wene ebe 10 nen mene komorogo wogetunem emberek inane ikhi lagaukwasik nogo nen he, at Musa elokhonggen oba ombak-bak mondok yararet hugu kwelek wene komotninafikhe mene a'nogo waluk pi wagaikhe. A'nogo meneat he, at Musa onggwarek elokhe oba ombak-bak yararet hikhi lagaikhe andi onggorat pi wagaikhe.

³⁰ A'nogo pi wagaikhemo, at Harun inom, afuni Israel mene ekhe mondogat inom, Musa elokhonggen ombak-bak yararet hilik pi wagunem ineilenggen hasukwasik he, Musa oba horokhogo la inailo agaikhe.

³¹ A'nogo hilingitukwa meneat he, at Musa nen it wolisasikhemo re, at Harun inom, afuni Israel mene inogogwi mondogat inom, Musa oba horokhogo wagaukwama weneane inom isukwa.

³² A'nogo arat isukwama re, it afuni Israel mene mondogat inera'lu andogosi lagaukwama re, wene nineisena Tuhan nen, yi'nogo hilingiti logoino, ti'nogo hilingiti logoino, iluk tom Sinaiba nen komorogo yagatikhe mene a'nogo mondogat it yagaisasikhe.

³³ At Musa nen wene a'nogo arat yagaisasikhesik he, elokhe su pok su meneba salhikhe.

^34-35 A'nogo salhikhesik, at enggi hundik-handik nineisena Tuhan emberek weneane uogeluk o at nineisena Tuhan awi tenda mene wuri'mo a'nogo kwigiluk halok he, su elokhe salek mene a'nogo funggulogo fuluk kuluk he, arat iluk wulibi waga logolik hobuk salhi lagaikhe. A'nogo hilingiti logolik, at Musa nen wene Tuhan nen, Yi'nogo hilingiti logoino, ti'nogo hilingiti logoino, iluk it afuni Israel mene yagaisoageluk yagatunem, aren yagaisugunem he, at Musa elokhonggen ombak-bak yararet hugunem hikhi lagaukwa. A'nogo hugunem at Musa elokhe poksuba salhunem he, salek wela'lugen inenggi ekhe sambul Tuhan emberek weneane uogeluk halok he funggulhikhi lagaikhe.