KELUARAN 32 - Allah Wene Fano Wene Hupla Inane

Sapi emas mene hilingisogo fogeratukwa wene

¹ Afuni Israel mene Musa ebe pi wagi'lek tom oba andoma aninurogoat weregen he, Harun oba andogosi wagaukwasik, mel yagatukwa: ”At Musa o Mesir en wo'ninarek wulibi wagasik waga mene a'nogo oba ninggi'nogo hilinglagama he, nit ninonggoro. Ma re, nit wo'ninarek loagen Allah higit tugwi kembu ekhe wu'nisan o,” iluk yagatukwa.

² A'nogo yagatukwama, at Harun nen he, mel yagaisasikhe: ”Hinagagwi inom, hinagainafuri inom, inalilingge emas mene inesanggomangge kelik mene palhigik andogorogo re, an wo'nesi we'no o,” iluk yagaisasikhe.

³ A'nogo yagaisasikhemo re, inebe lombogen emas mene inesanggomangge kelik mene andi palhigik Harun wogosi wagaukwa.

⁴ Wogosi wagaukwama, wanhikhesik he, weragaisogo lebelek agaikhemo obalik ekhe anggwe folele'ma kweisalogo kwelakfesikhemo re, tugwi kembu ebe sapi hangge hilingitikhe. A'nogo hilingitikhemo, it afuni Israel mene nen he, mel isukwa: ”Kwelakhani, nineisena allah o Mesir en nit wo'ninarek waga mene re, ebe yi o,” iluk isukwa.

⁵ A'nogo isukwama, at Harun nenat yi mene ti mene Allah faget warogo endu noleti logogun oba obuluk ekhe tugwi kembu sapi mene andi era'lu wutikhesik he, mel yagaisasikhe: ”Ohealek Allah fogerasuogeluk he, pesta ekhe hilingisugun o,” iluk yagaisasikhe.

⁶ A'nogo yagaisasikhemo, it afuni Israel mene ohealek huberat siakhogo re, wam Allah faget warogo endu nolesugun mene inom, nen Allah inom lambuluogeluk waresugun mene inom, waluk wagaukwa. Wagaukwasik enggen amusu ninggik, sumburu ninggik, ikhi lagaukwasik he, inebe menlagaukwasik inendawimo hai en, we, lugulugwi higit palogo yugunat hilingiti lagaukwa.

⁷ A'nogo hilingiti lagaukwama, At nineisena Tuhan nen Musa mel yagatikhe: ”Afuni hat mene o Mesir en woginarek wulibi wagen mene omanogo nen weak mondok hilingita andi nen, hat hebe weak-weak pin o.

⁸ Iren An nane sagalogo herakfisagasik, hunogoat mene ekhe hilingita o. Inalilingge emas mene lebelekhogo weragaisogo tugwi kembu sapi hangge ekhe hilingitasik he, anggo warogo endu noletasik fogerata o. A'nogo fogerati logolik, mel aga: Tugwi kembu Allah hangge o Mesir en wo'ninarek waga mene ebe yi o, iluk aga.

⁹ Afuni andi inendawinggen mondok helep hangge andi An nelu o.

¹⁰ An na'mage inoba figirik arat inoasigin andi nen he, haren hulit ninabigiluk ugun o. A'nogo meneat he, harenek he, herakhobagambik, haren tagomangge mene inunggulenu hokho asuageluk hilinghabigin o,” iluk yagatikhe.

¹¹ A'nogo yagatikhemo, at Musa nen eisena Tuhan Allah oba kino yi'nogo yagatikhe, ”Haren a'nogo hilinginabigin andi nenahalok? Hat homame mondok hokho andiba it telinafendik, o Mesir en woginarek wulibi wagen a'nogo lek nogo?

¹² Haren a'nogo inoasigin halok, afuni Mesir mene nen ikhi logolik, Allah nen afuni Israel mene a'nogo re, o tom oba a'lima nen inebe warogo mondogat legetfisageluk woginarek wulifesik lagama higi, iluk ugun o. Halok a'nogo hilingitun, andi nen neisena. Hat ha'mage lagaluk afuni andi weagetfisagun.

¹³ Hat hamingmingengge Abraham inom, Ishak inom, Yakub inom, wene hombuk palogo warisikhi logolik he, hiren tagomangge mene hesagal pogoroba hokhorogo andi hangge hilinglasugun. Nen, o wokhisagain iluk abok yagahisigimo andoma mondogat hiren tagomangge mene eise asimbik mondok-mondok logogun, iluk wene warisasigin andi hendawimo ebesin o,” iluk yagatikhe.

¹⁴ A'nogo yagatikhemo At Tuhan nen afuni andi unggum inoba fembik mondok-mondok inoasigiluk isikhe mene andi kamo isikhesik he, inoati'lek herakfisasikhe.

¹⁵ A'nogo herakfisasikhemo, at Musa nen wene Allah nen komorogo, yi'nogo hilingiti logoino, ti'nogo hilingiti logoino, iluk helep ebe pire meneba palek abel fena-fena wanhikhe mene andi waluk tom oba nen ambotkwe pi wagaikhe.

¹⁶ Allah onggwaregen helep andi hilingisogo fesikhesik wene komorogo, yi'nogo hilingiti logoino, ti'nogo hilingiti logoino, iluk helep ebe pire andiba lisu palogo fesikhemo waluk pi wagaikhe andi.

¹⁷ Oan pi waga logolik, afuni Israel mene inane hokhorogo sagalhunem Yosua esanggo holhikhesik he, Musa mel yagatikhe: ”O sabu tenda mene wuri'mo omanogo nen weim yafi logolik hakhogo inane hokhorogo sup ili'lagwi o,” iluk yagatikhe.

¹⁸ A'nogo yagatikhemo, at Musa nen he, ”Inane andi re, inomame a'luk wuni watarek andi hangge inom, maben agaikharesik inane hangge inom he, lego. We, wuni kelem lakfigik-wakfigik watarek mene inane hangge o,” iluk yagatikhe.

¹⁹ Yagatikhesik, o sabu tenda mene wuri'mo horokhogo wagaikhe re, sapi emas mene a'nogo were'ma re, afuni wuni lagik-wagik watunem eilenggen isasikhesik he, a'mage hokho mene lagasikhe. A'nogo isasikhesik, tom a'ma aremnogo nenat helep waluk pi wagaikhe mene a'nogo woukhogo hugisasikhemo re, sirik-serekhogo taik isikhe.

²⁰ A'nogo hilingitikhesik hobuk he, tugwi kembu sapi hangge afuni Israel mene inenggi nen wutukwa mene a'nogo wanhikhesik he, sirik-serekhogo pot fisasikhesik, i inom misikwe nanggelek-hanggelek hilingisogo fesikhe. A'nogo hilingisogo fesikhesik, afuni Israel mene, nani, iluk yagaisasikhemo nasukwa.

²¹ A'nogo hilingitikhesik, Harun mel yagatikhe: ”It afuni yi ninggi'nogo hilingitu nen, haren it weak hokhorog o hilingisuageluk herakfisegen ma,” iluk yagatikhe.

²² A'nogo yagatikhemo, at Harun nen he, ”An wena'netuno. Afuni yi inendawinggen mondok helep logolik weak mondok hilingitarek a'nogo, hat honggot nogo? It inobabut heluaro.

²³ Iren he mel yaganeta: ’At Musa o Mesir en wo'ninarek wulibi wagasik waga mene a'nogo ninggi'nogo hilinglagama he, nit ninonggoro. Ma re, nit wo'ninarek loagen Allah hangge tugwi kembu ekhe wu'nisan o,’ iluk yaganeta.

²⁴ A'nogo yaganetama, an nen he, ’Hinalilingge emas mene andi an wo'nesi we'no,’ iluk yagaisigimo re, wo'nesi wagaikha. Inalilingge mondogat wo'nesi wagaikha mene andi an nen endumo kelakfigimo re, sapi yi hilinglaga o,” iluk yagatikhe.

²⁵ A'nogo yagatikhemo, at Musa endawimo nen he, ”Harun nen he, wam kuda aiba nen hele fikhalogo wulakfisagarek andi hak, afuni Israel mene herakfisikhemo inaselei mene nen inaendo aga logogun mene hilinglagaikhama higi,” iluk futfisasikhe.

²⁶ Futfisasikhesik, at Musa ebe o sabu su mene wuri'mo kwe ambe palek kwagarek oba andoma menlagaikhesik he, ”Sa nen ebe nineisena Tuhan werekwe asigin anggikhe halok he, yoma we'ni o,” iluk ane hokhorogo wolisasikhemo re, afuni inunggul enu Lewi mene at Musa era'lu andogosi wagaukwa.

²⁷ A'nogo andogosi wagaukwama, at Musa nen he, mel yagaisasikhe: ”Nit afuni Israel mene nineisena Tuhan nen he, hit hinebe lombok hinenggarok lisogo wanimbik he, o sabu su mene wuri'mo kwe ambe pale'ma yoma nen kwe ambe palek ekhema laga logolik, hinerugwi hinagaila'lak inom, hinom hundik mene inom, o hinom horokhogo welagep mene inom, inebe inoarik lano, iluk yagahisikhe,” iluk yagaisasikhe.

²⁸ Allah nen a'nogo hilingi'no, iluk isikhe andiba, it ap inunggulenu Lewi mene nen he, o andi sambul afuni inebe 3.000 hangge inoatukwa.

²⁹ Inoatukwama, at Musa nen ap inunggulenu Lewi mene inom yagaisasikhe: ”O yogondak yibaat, hit hinebe nineisena Tuhan eisewerek asimbik at faget hilingiti logouwogeluk hinagainafuri inom, hinerugwi hinagaila'lak inom, inoatebo. Ma re, At Tuhan nen hinebe fanothinabuago,” iluk yagaisasikhe.

³⁰ Ohealekwe re, at Musa nen it afuni Israel mene mel yagaisasikhe: ”Hiren weak hokho mene hilingitep meneat he, an neisena Tuhan were'ma tom oba lagagin aro. Lagaumo, Aren he, it weak hilingita mene andi An nendawimo fano agarik sagalogo legetfisigi, iluk yaganesigin a? Lega. A'nogo yaganete halok yagahisa pi wesigin o,” iluk yagaisasikhe.

³¹ A'nogo yagaisaluk at ebe Tuhan oba lagasikhesik he, mel yagatikhe: ”Afuni andi nen he, weak hokho mene ekhe hilingitama o. Iren he, hat higit ekhe emas mene ekhe fogerasuogeluk wutama o.

³² Neisena, it weak hilingita mene andi haren sagalogo herakfisambik hendawimo fano ame o. A'nogo hilingiti'lek halok, an nenu afuni ineluk mondok logogun mene inenu buku ba lisu palek welagarek oba palek mene andi terogo lakfisano o,” iluk yagatikhe.

³³ A'nogo yagatikhemo, At Tuhan nen he, ”A'nogo hilingisigin lego. We, afuni ekhe An neilhanem weak hilingita mene inenu nek he, buku andiba lisu palek mene terogo lakfisagain o.

³⁴ It andi o An nen yagahetiba omanogo woginarek lanogen he, pin o. An nagot malaikat mene nen wokhinarek lagain o. A'nogo meneat he, it afuni weak hilingita mene andi unggum inoba fagain weregaro,” iluk yagatikhe.

³⁵ It afuni Harun nen emas mene tugwi kembu sapi ilirenggerogo wusuageluk inane ninghogo yagatukwa andiba Tuhan nen he enggin-fenggin hokhorogo it inoba lakfei waga lagaikhe.