KELUARAN 30 - Allah Wene Fano Wene Hupla Inane

Mezbah amben fano mene nolhuba faget, isikhe wene

¹ Tuhan ane ekhe inom Musa yagati logolik he, ”Amben fano mene nolhuba obalik mezbah ekhe e akasia meneba wu'no.

² Mezbah andi obabut he unggut 4 en hilingisogo wu'no, nen, nunggulik uan fikhit inom horok fikhit inom he 45 sentimeter en, liabek mene uanhogore 90 sentimeter hogo wu'no. Unggut 4 andem oba ilirenggerogo re andimuk higithogo mezbah inom hundik logouwageluk hilingfeino.

³ Amboloba sebelogo inom unggut uwan fikhit andoma inom he, emas mondok fano mene alik waganogo wu'no. A'nogo wutfembik he, wurep perelengge re emas meneba maserogo hilingfeino.

⁴ Unggut sebelogo a'ma re, e mezbah andi pia'luk lagu mene e agorek logouwageluk wurep fena-fena senggan emas mene pire sirogo feino.

⁵ E pia andi re, e akasia mene nek emas inom saplirogo wu'no.

⁶ Wut fuluk he mezbah andi re ebe e Peti Wene Warek mene a'nogo elokhoma kain werek mene andi takwe fikhit obalik An nebe hat ninom ambi aga logogun oba andem hutfeino.

⁷ A'nogo foumo re, hubet hundik-handik at Harun nen esage ibiligiluk waga logolik he, amben fano mene andi mezbah amboloba nol fulugenek hilingiti logogin.

⁸ Andi higithogo nekhengge hu'mokwe esage ibiligiluk waga logolik ogore, amben fano mene a'nogo mezbah amboloba andoma nol fulugenek hilingiti logogin. Amben fano mene andi re yi sambul ti sambul andoma hundik-handik a'nogo nek hilingiti logogun.

⁹ Mezbah andi amboloba nolhi logou fuk, wam warek inom yi mene ti mene amep werek lek mene inom, andoma nolhi logou fuk, nen ekhe re i anggur amusu iluk ogo amboloba andoma kweisalhi logou fuk.

¹⁰ Tahun misik oba re misigam at Harun nen he mezbah andi fanotninabuageluk wam inaweak legapesuageluk fugu mene omanogo amep oba re andimuk 4 en aremnogobene hoti logogun. A'nogo hilingiti logogun andi re, tahun hundik-handik yi sambul ti sambul andoma a'nogo nek hilingitu mondok logogun. Mezbah andi abirengge mondok hore'ma re, An nobaget enogo logogin,” iluk yagatikhe.

Tuhan Awi sabu tenda faget onggo fikhi logogun wene.

¹¹ Tuhan nen Musaba yagati logolik he,

¹² ”Haren it afuni inunggulenu Israel mene inebe lombok wenagaisogo inenu lisu palhu sambul andi re, it ap mene inebe lombok he it inenu palhu sambul andem enggin-fenggin inoba asinogoluk he, onggo palogo uang An wo'neti logogun.

¹³ It ap inenu palhu sambul andi wenaginabugun mene halok he inamu lombok uang ebe ti huli fikhi logogun iluk An Nawi sabumo fugu aple higithogo An nobaget tomokhogo kabogeti logogun.

¹⁴ Ap mene inebe lombok wenatu sambul andem oba inenu palogo wenaginabugun mene it ap inebe umur dua puluh tahun taganhogo ambolkwe aga mene halok ogo re, wenagaisogo iren An nobaget fugu mene andi kabogeti logogun.

¹⁵ Iren inonggwarek inaweak faget legasuageluk onggo uang oba palogo kabogeti logolik he, ap enggi werek mene nen legeisogo fogoin lek. Andi nen ap enggi lek mene nen ogo sebelogo iluk ogo fogoin legat, meneat he, emberek higithogo nek fikhi logogun.

¹⁶ Haren he uang andi it afuni Israel mene inoba kaboge'luk he uang andi mene re An Nawi sabumo tenda wuri'mo andoma tegelhi logouwageluk hilingi'no. Mondogat andi re, it inonggwarek inebe faget onggo palogo hilingiti logogun, nen An nen he it inebe hundik-handik ferinarek logolik tegelinafi logogin,” iluk yagatikhe.

I yenggelhuba obalik perunggu meneba wutikhe wene

¹⁷ Tuhan nen Musa oba yagati logolik he,

¹⁸ ”I yenggelhuba faget obalik perunggu meneba misik ekhe hilingiti logolik he, o'lu earek menere, perunggu meneba nek pugun e'no. Pugunhogo re obalik hilingik andi, o sabu honggolek mezbah honggolek tulem andoma i keralogo feino.

¹⁹ I andi re it Harun againafuri inom oan O Sabumo kwi wagi'lek logolik,

^20-21 yi mene ti mene fugu mene omanogo waluk mezbah horokhogo asi wagi legengge re it inenggi ineisok sobalhi logouwageluk feino. It inebe pinggi inoasinogo iluk he, iren a'nogo hilingiti logogun andi. Wene melalek andi re iren inomen it tagomangge mene nen taginabugun mene nen inom hundik-handik holfuluk hilingitu mondok logogun,” iluk yagatikhe.

Amusu kweisalinafu mene wusuageluk yagatikhe wene

²² Tuhan nen Musa oba yagati logolik,

²³ ”Amben-amben engge mondok fano mene andoma waluk, mur enam kilo lokhorek mene inom, tiga kilo e enduk miksek fano mene inom, tiga kilo eil amben fano sangsek mene inom, e teja mene enam kilo inom, waluk he,

²⁴ abirengge andoma re An Naiba nen enggin walhugu aplerogo meneba enggin walethano. Walhikhi logolik zaitun amusu re empat liter inom to'mot fuluk he,

²⁵ Amusu kweisalinafu mene wuti logolik he, minyak wangi amben sangsek mene inom mulelek mene hakhogo wu'no.

²⁶ Amben fano mene mulelek engge andibare An Nawi sabu wuri'mo andoma hilingitu mene faget inom Peti Wene warek mene a'nogo inom,

²⁷ e meja a'nogo inom andi amboloba nen hilingitu mene werek mene andomaba inom, ibilhungge lampu oak andibene werek engge andomaba inom, amben fano mene nolhuba mezbah a'nogoba inom,

²⁸ mezbah yi mene ti mene warogo endu nolhuba a'nogo inom, andiba hilingitu mene omanogo inom, i yenggel fugungge obalik a'nogo ubuluk faget inom, andoma faget amusu watu mene hilingfeino.

²⁹ Ebe a'nogo yi mene ti mene andoma mondogat andi re, An nobaget enek logouwageluk hilingfoumore, andoma mondogat he tegelek mene logogin. Yi mene ti mene nen inom, afuni nen inom, andiba agap endebat ekhe fakhugu halok he, no andoma mondogat horek mene hilingi'mo, omame mondok logogin andi nen he, it inebe alomat fakhikhi logogun.

³⁰ At Harun againafuri inom andi ogore imam logolik An nobaget hilingiti logouwageluk he, amusu inunggulmo kweisal fuluk enogo fisagain.

³¹ Haren it afuni inunggulenu Israel mene yagaisikhi logolik he, yi sambul ti sambul amusu waluk waga logogun mene andoma re, An nobaget enek logogin iluk yagaisano.

³² Amusu andi re, ap we mene inungguloba hesangge kweisalu fuk, nen amusu andi mene ekhe amu mene faget hilingisu fugat. Amusu andi re mondok fano horek mene logogin.

³³ Amusu andi mene ap ekhe we mene imam mene lek oba nen, amusu andi yugulhu halok ogo, nen andi mene we yugunat hilingitu halok ogo, ap ariginik mene andi re, An nagainafuri iluk anggikhi logogin lek,” iluk yagatikhe.

Amben fano mene nolhu mene faget isikhe wene

³⁴ Tuhan nen Musaba yagati logolik he, ”Haren amben-amben engge elokhe amu-amu andoma ebe higithogo nek, e hendali homo inom, e kami agap inom, e rasamala homo inom, amben mondok fano mene inom, higithogo nek waluk he,

³⁵ abirengge andomaba re dupa nanggelek-hanggelek amben mondok fano mene hilingi'no. Dupa andi eil mondok fano mene were'ma, An nobaget hilingitu mene logouwageluk he mayu inom endep wanino.

^36-37 Amben engge andi mene fena re, sagik-sagokhogo hilingfeino. A'nogo hilingfuluk he, ebe waluk An Nawi sabumo andoma kwi laluk Peti Wene Warek were'ma andoma kweisali laga logoino. Amben-amben engge andi re, mondok wesarogo An nobaget enogo werek mene anggikhi logoino. Hit hinonggwarek mene faget he amben-amben engge andi hakhogo inom higithogo ekhe pugunera fuk.

³⁸ Ap sa nen amben-amben engge andi hakhogo pugun erugu halok he, ap andi An nagainafuri anggikhi logogin lego,” iluk yagatikhe.