KELUARAN 29 - Allah Wene Fano Wene Hupla Inane

Harun againafuri inom imam logouwageluk menfisikhi logolik, hilingiti logogun mene faget wene melalek yagatikhe wene

¹ Wene yagaisikhi logolik he, ”It Harun inom at againafuri inom inebe imam An nobaget yabu hilingiti logouwageluk inunggul sebelogo menfisogoin he yi'nogo: Sapi ai mene ket kotorek mene misik ekhe inom, domba ai mene agambut palek lek mene pire inom waluk he,

² tepung terigu mondok fano mene fiterek lek meneba inom mulelino. Mulelek engge omanogoba re roti zaitun amusuba wera'no, nen fena re amusu legengge wera'no, nen tindelasigin mene re kue amusu yugulhigik wera'no.

³ Weragaisogo re, si ugu mene elema kwalogo fuluk An nobaget fugu mene sapi ai mene inom, domba ai mene pire aremnogo inom waluk wo'nesi waga logogun oba andoma fikhi logogun.

⁴ At Harun againafuri inom he An nawi sabu salek mene tenda a'nogo solombonma andoma asi we'luk he inebe sobaloak iluk yagaisano.

⁵ Harun oba re su imam mene a'nogo labet fikhi logolik: su kemeja inom, su efod inom, su endakwe mene jubah efod salogo labetu mene a'nogo inom amik sebelek mene inom ik fembik he ban inobakheba puget feino.

⁶ Andi nen unggul oba kware-kware alilingge emas meneba, ’Tuhan obaget enegenggerogo werek,’ iluk palegengge a'nogo puget feino.

⁷ A'nogo hilingfuluk he amusu ap menfisikhi logolik hilingiri'lagwi mene a'nogo onggo palimbik he, ungguloba kweisalogo nen amusu watfeino.

⁸ Andi mondok hilingfuluk he, at againafuri wolisamo wagunem he, inebeba su labet fisigik,

⁹ ban it inebeba puget fisigik, imbik he inunggulasu ogo inunggulmo puget fisagaino. A'nogo nek haren at Harun inom at againafuri inom menfisagain. A'nogo menfisamo re, it Harun ambisangma mene andoma re inebe An nobaget imam mendek logolik mondok-mondok hilingiti logogun.

¹⁰ Andi nen sapi ai mene andi waluk An nawi sabumo lelunggulmo wagunem Harun againafuri inom inenggi inunggoloba sebelfuluk were'ma,

¹¹ sapi ai mene andi An neilhanem o sabu lelunggulmo andoma nen wat feino.

¹² Sapi andi amep henggi nen waluk he mezbah andi andimuk ebene andoma yugul feino, tindel asigin mene re mezbah a'ma fikhit ma'lima kweisal feino.

¹³ Andi hilingfuluk he, sapi andi amian sei inom, elonggomangge huli'lip sek mene inom, amuanggo enggen pire mondok fanongge andoma inom, waganogo mezbah amboloba fuluk endu nologo An wo'nesigin.

¹⁴ Wam sapi andi eino inom, alabut inom, agap inom, enggi, eisok abirengge andoma waganogo endakwe fikhit nol feino. A'nogo noligin mene andi re, it imam inaweak legap esuageluk hilingisigin.

¹⁵ Andi hilingfuluk he domba ai mene aremnogo mene misigenek ekhe waganogo waluk he it Harun againafuri inom inenggi unggul oba sebel fuluk werek kwelek,

¹⁶ domba andi warogo amep waganogo re mezbah unggut higithogo andoma kweisal feino.

¹⁷ Domba ai mene andi senggelogo re elonggomangge inom, enggi eisok abirengge inom he fanorogo sobalogo fuluk unggul inom amu anggo mene teksek omanogo inom, amboloba liak feino.

¹⁸ Domba senggelek mene abirengge andi waganogo mezbah amboloba liak fuluk An nobaget endu nologo wo'nesumo, nolugun mene amben andiba An nendawimo healigin.

¹⁹ Andi nen he, domba ai mene ekhe ap menogo fisikhi logolik hilingitu mene faget waluk he at Harun againafuri inomen inenggi wam andi ungguloba sebel fouwageluk yagaisano.

²⁰ A'nogo hilingfuluk he domba ai mene a'nogo warogo senggelogo fuluk, amep endebengge waganogo re Harun againafuri inom inesanggo alimuk ebekwe inom, inenggi fuap ebekwe inom, ineisok fuap ebekwe inom oba yugul feino. Mep tindel asigin mene andoma re mezbah unggut higithogo andoma kwelsal feino.

²¹ Mep inom, amusu ap menfisikhi logolik yugulfisugu mene faget inom, endebat waluk Harun againafuri inebene inom, inasubene inom kweterisilik lano. A'nogo hilingisigin andiba re Harun againafuri inebe inom inasu inom andi re, An nobaget enogo logogun.

²² Domba ai mene a'nogo asei inom, ageba asei werek mene a'nogo inom, elonggomanggeba asei huli'lipsek mene a'nogo inom, wam amuanggo oba nen mondok fano fikhit mene halok ogo, amuanggo pire aremnogo asei et engge inom, enggi eisok ebekwe mene inom, wanino.

²³ Andi nen he, si elema roti An nobaget iluk fogoin mene a'nogo nen ebe amu-amu menere misiktek higik wanino. Wanhi logolik he zaitun amusuba werago mene re misik, nen amusu lek mene werago mene re misik, nen kue misik inom wanino.

²⁴ A'nogo waluk he, yi mene ti mene nunggungge a'nogo onggo at Harun againafuri inom inenggimo fugunem iren An nobaget wo'neti logolik nenu warogo fikhi logogun.

²⁵ A'nogo hilingfuluk he roti a'nogo it inenggimo nen waluk he, mezbah amboloba An nobaget yi mene ti mene nol fogoin oba andoma nol feino. Noligin mene andi amben he An nendawimo healigin.

²⁶ Domba ai mene a'nogo amik andi re An nenu warek mene iluk wo'ne'no. Nen andi nek he hat hobaget mene asigin.

²⁷ It imam mene menfisugu sambul andiba re, domba andi mene a'nogo amik inom, ago inom nen An wo'netu mene Nenu warek mene iluk wo'ne'luk it imam inobaget wephogo fogoin.

²⁸ An nen wene tekhogo igin halok aben inom agam esugun lek mene re yi: ”It An nagainafuri nen An nobaget anggerang anggo warogo foukhogo waluk waga logolik andoma wam amik inom, enggi eisok inom andoma re, it imam mene inobaget. Andi it An nagainafuri nen An nobaget fikhi logogun.

²⁹ Su at Harun asu An nobaget hilingiti logolik labetu mene andi re, it againafuri inebe menfisikhi logolik iti logogun mene ikfisano.

³⁰ Harun amlogo eisena obali'mo imam a'luk su andi laberogo o An nawi sabumo tenda senggelek hore'ma a'nogo kuluk yabu hilingiti logolik halok he, su andi laberogo nek hilingitunemen he inenggi 7 nen logogun.

³¹ Wam domba at Harun againafuri inom menfisikhi logolik wasugun mene a'nogo eino waluk he, obalik mondok hore'ma andoma isasugun.

³² Isa'luk he, wam andi An nawi lelunggulmo andoma nen, roti alinlan si elema kwalek mene andoma inom ninggi logoino.

³³ Nen, it inebe menogo inunggul sebelinafik nen inaweak lek hilingisogo ninobagauwagiluk wam domba eino inom, roti inom fogoin mene andi mondogat ninggi logogun. Meneat he, Allah faget fogoin mene andi horek mene hilingi'mo re, it afuni we mene nogoin mondok lek.

³⁴ Nambigen ambi, ohealek weirogo eino ogo, nen roti ogo, tindurek werek halok he, fologo fuluk ekhe ninggi'lek endumo mondok nolino.

³⁵ It Harun againafuri inom An nen wene melalek yagahisigi mene andi higithogo hilingitu werek kwelek hinenggi 7 nen hilingisugun.

³⁶ Hinenggi hundik-handik oba re, sapi ai mene misik hinaweak legabesuageluk wati logoino. A'nogo hilingiti logogun andiba re, mezbah a'nogo An nobaget enekhogo logouwageluk, haren zaitun amusuba kweisalogo yugul fikhi logoino.

³⁷ Inenggi 7 andem oba re hundik-handik a'nogo hilingiti logogun. A'nogo hilingitunem he, mezbah andi mondogat andoma horek mene logogin. Nen, amu-amu mene nen mezbah andi ekhe senhikhe halok he, Tuhan enek wogeti logoino, nen ap sa nen mezbah andi senhikhe halok he horek logouwageluk hilingfogoin mene andi re mondok omame hokhore'ma re inebe alomat fakhikhi logogun,” iluk yagatikhe.

Linggene we sambul oba omanogo warogo nolhu mene faget, isikhe wene

³⁸ ”Inenggi ekhe sambul-ekhe sambul linggene hundik-handik andoma re, mezbah andi amboloba andoma domba ai mene pire umur satu tahun oba mene warogo nolhi logogun.

³⁹ Misik ekhe re, hubet warogo nolfuluk, ekhe hu'mokwe warogo nolhi logogun.

⁴⁰ Domba eak hubet warogo nolhu mene andi inom he tepung terigu mondok fano mene satu kilogram inom, zaitun amusu satu liter inom mulelogo fugunogo. Andi nen ekhe anggur agai satu liter inomat fugunogo.

⁴¹ Domba eak hu'mokwe warogo nolhi logogun mene andi ogore, obabut hubet mene hilingisugun andi higithogo tepung inom zaitun amusu inom, anggur amusu inom fuluk nolhunogo. A'nogo nolhunem amben andi nen An nendawinggenma healhi logogin.

⁴² Andi nen hobuk huli hilingirik laga logogun aple andoma ogore, hiren warogo nolnetu mene andoma re waluk An nelokhoma Nawi Sabumo tenda solombonma andoma fei waga logogun. Andoma nen An nebe nagainafuri ninom ambi a'luk, hat hoba nane mati logogin.

⁴³ Andemen An nebe it inunggulenu Israel mene ninom ambi aga logogun, nen An nebe weinam agu mene naselek andi nen he, obalik andem mondogat horek mene hilingfikhi logogin.

⁴⁴ An nen he, o sabu andi inom mezbah andi inom, obalik mondogat hore'ma hilingfagain. Nen Harun inom at againafuri inom he inebe imam logolik An nobaget hilingiti logouwageluk he, An nen inebe enogo fisagain.

⁴⁵ An nebe it inunggulenu Israel mene inanggele'ma logolik he it Ineisena Allah Anat logogin.

⁴⁶ Nen, iren An Tuhan Allah nobaget, nineisena ninanggele'ma logogiluk o Mesir en woginarek wulibi waga mene a'nogo iluk, inelurek logogun. An nebere it ineisena Tuhan Allah a'nogo aro” iluk yagatikhe.