KELUARAN 24 - Allah Wene Fano Wene Hupla Inane

Wene warek a'nogo enekhogo iluk mep warogo fisasikhe wene

¹ Hobuk he, At Tuhan nen Musa mel yagatikhe: ”An noba lagai we'nogen he, hat inom, Harun inom, Natap inom, Abihu inom, afuni Israel mene inogogwi inebe 70 nen inom, hinom lagai wesimbik, it inebe yatmaat andem logolik ineindep awi yagaisogo An fogetnabino.

² A'nogo werek kwelek, hat hamunek he, An noba horokhogo we'no o. A'nogo meneat he, it andi An noba horokhogo wagik, it afuni ekhe mondogat tom yiba lagai wagik, ugun mondok lego,” iluk yagatikhe.

³ A'nogo yagatikhemo, at Musa wagaikhesik he, Tuhan nen yi'nogo ti'nogo hilingiti logogun mene yagatikhe mene inom, wene palek oba loukhogo hilingiti logogun mene inom, yagaisasikhe. Yagaisasikhemo, it afuni Israel mene inebe mondogat inane ambine lambulogoat, mel isukwa: ”Niren nineisena Tuhan nen wene yaganisikhe mene andi mondogat higithogoat hilingiti logogun o,” iluk isukwa.

⁴ A'nogo isukwama re, at Musa nen nineisena Tuhan nen, ”Yi'nogo hilingiti logoino, ti'nogo hilingiti logoino,” iluk yagatikhe mene andi mondogat lisu palhikhe. Palhikhesik ohealek hubet he, tom a'ma andoma wam yi mene ti mene Allah faget warogo endu noleti logogun oba obuluk ebe hilingiti logolik, eisok helep mene 12 nen hilingisogo menegeisogo fesikhe. Eisok andi ebe lombok he, afuni Israel mene inunggulenu werek higithogo hilingisogo fesikhe.

⁵ A'nogo hilingisogo fesikhesik, ap alage Israel mene ekhe nen yi mene ti mene nineisena Tuhan endawimo agaiyekhogo warogo noleti logolik, Allah ninom lambuluogeluk wam sapi ekhe warogo senggelogo fouwageluk inayonggo fesikhesik, lakfisasikhe. Lakfisasikhemo a'nogoat hilingitukwa.

⁶ Wam sapi andi warogo senggelhukwama, amep at Musa nen keralhikhesik he, fenakwe loyang elema kwalfigik, fenakwe wam yi mene ti mene Allah faget warogo endu nolesugun oba amboloba kweisalhik, isikhe.

⁷ A'nogo hilingitikhesik, Tuhan nen wene, yi'nogo hilingiti logoino, ti'nogo hilingiti logoino, iluk komorinafikhe mene Musa nen lisu palogo fesikhe mene a'nogo wanhikhesik he, ane hokhorogo afuni Israel mene holuageluk enu salhikhemo, iren he, mel isukwa: ”Niren he, nineisena Tuhan nen wene komotninafe mene andi mondogat hologo higithogo hilingiti logogun o,” iluk yagatukwa.

⁸ A'nogo isukwama, at Musa nen he, mep loyang elema kwalhigik fesikhe mene omanogo wanhikhesik, it afuni Israel mene inebene wat fisikhi logolik mel isikhe: ”Nineisena Tuhan nen wene komorogo, yi'nogo hilingiti logoino, ti'nogo hilingiti logoino, iluk yaganisikhe mene andi higithogoat, Allah nen mep yiba wene warogo wokhinafe o,” iluk yagaisasikhe.

⁹ A'nogo yagaisaluk he, Musa ebe inom, Harun inom, Nadab inom, Abihu inom, Israel mene inogogwi inebe 70 nen omanogo inom, inom tom oba lagasukwa.

¹⁰ Lagasukwasik he, afuni Israel mene ineisena Allah ebe o hulu helep enu nilam hangge mene elokhenggen pogot muli mene mondok lia-fiarek mene hangge talek oba mendek were'ma ineilenggen hasukwa.

¹¹ Afuni Israel mene inogogwi andi Allah ebe ineilenggen hasukwa meneat he, inebe inoati'lek. A'nogo arat ineilenggen hasukwasik he, sumburu inom, i inom, nasukwa.

Musa tom Sinai oba lagasikhesik hilingitikhe wene

¹² Hobuk At Tuhan nen Musa mel yagatikhe: ”An noba tom oba lagaime o. Lagai wagunem yoma nen he, wene komothinafi mene mondogat helep ebe pireba lisu palhi mene yi afuni Israel mene yagaisanogen wokhesigin o,” iluk yagatikhe.

¹³ A'nogo yagatikhemo, Musa ebe inom, lebethikhi lagaikhe mene Yosua inom, emberegen tegelogo fesukwasik he, at Musa tom Allah ebe welagarek oba a'nogo lagasikhe.

¹⁴ Oan lagaigiluk afuni Israel mene inogogwi omanogo inoba yi'nogo yagaisaluk lagasikhe: ”Hit he, o sabu tenda mene wuri'mo yomaat yetninarek logoino o. Were'ma nit ninambotkwe hinoba wesugun. Meneat he, Harun inom, Hut inom, emberek he hinom yoma logogun. Andi nen, hit wene ekhe hinoba agu halok, iren pilingisogo leget fisikhi logouwageluk inoba waga logoino o,” iluk yagaisaluk lagasikhe.

¹⁵ At Musa a'nogo yagaisaluk, tom Sinai oba lagasikhemo, ohena misigat palek mene nen salhikhe.

^16-17 Salhikhemo At Tuhan ebe ombak-bak hokho meneba werek mene a'nogo tom oba pi wagunem he, afuni Israel mene nen he, endu tom punu ebeba nen amuilok ibilik werek mene hangge ineilenggen liakhasukwa. Inenggi falfaligen he ohena tom punu andi salek mondok welagaikhesik, inenggi ekhe sabit meneba re Tuhan ebe ohena a'nogo elonggoma nen Musa woletikhe.

¹⁸ Woletikhemo, Musa ebe ohena welagaikheba unggul oba higit lagasikhesik ohena elema kwi lagaikhe. Kwi lagaikhesik linggene hubanggo mondok andoma enggi 40 nen welagaikhe.