KELUARAN 23 - Allah Wene Fano Wene Hupla Inane

Heirogo hilingiti logolik, higithogo hilingiti logogun wene

¹ ”Wene ineranhogo wene andi wialhi logou fuk, ap inobabut weak mene nen wene ineranhogo wene fagesugun mene andi leberisa fuk.

² Afuni hokhorogo nen wene melalek sagalogo fuluk ineranen weneba fagerik nikho mene inom, nen iren weak aple nek hilingirik nikho mene inom, andoma re hit hinom seberogo hilingirik nikhi lagou fuk.

³ Hiren unggum heirogo hilingiti logolik, ap inenggi lek mene inawene oba nen he, latfal isigik, inelokhe penetik, u fuk.

⁴ Hiren ogo sapi ogo, keledai ogo, it hinom minggilik mene inanggo longgoluk were'ma hea'luk halok he, inanggo eisewerek inonggwarek wogisa wesugun.

⁵ It hinom minggilik mene inanggo keledai ebe enggin nen tam-tamsek logolik werek halok he, hiren legeisogo feino, herakfisa fuk.

⁶ Ap enggi lek mene ekhe awene higithogo tegetnesuageluk waluk wagu halok he, hiren it andi inawene heirogo nek hilingfisikhi logoino.

⁷ Ap ekhe weak hilingisigin lek oba nen, hinendawi menenei en oba hikhibet haluk ebe pinggi watuaple andi re, An nen ap weak ariginik mene nen hilingitu mene faget mondogat nabit welagimo re, hiren agaiserati logoino.

⁸ Uang weak hilingi'lugen agap telogo fugu mene andi helikhi lagou fuk. Uang inagap telogo iluk fugu mene helogoin mene andi nen he, wene eberogo mene oba nen ap ineil mumet fisugunem he, ap weak hilingiri'lago lek oba nen, alomarogo fisili'logo andi.

⁹ Hit attak he, ap pok mene hakhogo hilinglagagipsik o Mesir welagipmo re, ap pok mene a'luk logolik hagarek aple andem he hit mondogat hinelurek, enggere ap pok mene inoba hit hinendawimo anggikhi lagep Mene nek hesangge hilingfisa fuk,” iluk yagaisasikhe.

Tahun sabit mene oba inom, linggene inenggi sabiren oba inom, hilingiti logogun mene faget isikhe wene

¹⁰ ”Tahun falfaligen logolik he hiren hineabu waganek mene awi yatik, enggen eluk mene paligik, ikhi logoino.

¹¹ Oba nen he tahun sabit meneba re, kweang andi yabu wanhi'lek herakfisamo logogin. Tahun andem hit a'nogo logolik he yi mene ti mene hineabumo andoma nen amu wulifi logogin enggere hiren andogorogo helikhi logou fuk, it afuni inenggi lek mene nen andogorikhi logouwak, nen alinlan he, wam maro faget herakfisugu nogo. Hit hinangge anggur yabu yago mene oba inom, nen hinagaiyo zaitun wulibik mene oba inom ogo, a'nogoat hilingitunogo.

¹² Samban misik oba hinenggi falfaligen andem obare yabu hit mene faget hilingiti logoino. Oba nen hinenggi sabirengge andi re, set walogo weat logogun. Andi nen he, hit hinamingmingengge inom, hinambok yabu lebethisili'lagwi mene inom, hinanggo inom, mondogat set walogo weat logogun.

¹³ Yi wene ti wene An nen hit yagahisigi mene andoma mondogat fut feino. Hiren kembu ilah alek mene apne wanhi logou fuk, nen enu ugu aple ogore mondok wesa,” iluk yagaisasikhe.

Linggene henagan esin mene faget hilingiti logogun mene

¹⁴ ”Hiren An nalong anggaluk legeisogo nobagakhi logolik, tahun misik oba hinenggi henagan logolik An nobaget fogetnafi logogun.

¹⁵ Tugi Abib andi oba re, huli warek werek higithogo hiren Roti Fiterek Lek mene, Linggene Esin mene An nen hilingiti logouwageluk melalhinobagasigi higithogo seni isati logogun andi, ero re tugi andiba hit o Mesir herakfuluk wulibi wagagip andiba re a'nogo hilingiti logogun. Hiren hinenggi sabiren andem oba An napne wanhi logolik roti fiterek meneba weragongge ninggi lagou fuk. Nen hiren An were'ma andogosi waga logolik he, hundik-handik andoma An nobaget fugu meneet waluk waga logoino.

¹⁶ Hit hineabumo nen Enggen Palogo erosugun andi faget hinagaiyekhogo fogerati logolik isati logoino. Tahun wurep kobokhogo hiren yi agayonggen ti agayonggen inom, anggur yabumo nen enggen taganek mene inom, kabogetu sambul andem oba re hiren Seni O Sabu wuto mene andi faget isati logogun.

¹⁷ Tahun hundik-hundik oba hiren seni ero henagan mene andem faget isati logolik he, ap mene nek inebe mondogat he, An ineisena Tuhan Allah nambit andogosi waga logogun.

¹⁸ Hiren An nobaget wam warogo fei waga logolik he roti fitungge werek mene re, An nobaget fei waga logou fuk. Wam An nobaget hiren seni henagan aremnogoba isati logolik warogo fei wesugun mene asei andoma re foumo o hubet asinogo.

¹⁹ Tahun hundik-handik obare hiren hinangge gandum enggen ket palugun mene mondok fano mene hineisena Tuhan Allah awi wuri'mo andoma fei waga logogun. Domba eagwi eino palek inom, nen kambing eagwi eino palek inom he, i agaisa eilak oba isati logou fuk,” iluk yagaisasikhe.

Wene warisigik, wenagisigik isikhe wene

²⁰ ”An nen malaikat misik ekhe hit ebekhalem lagunem hinelokhoma wokhinarek lagik, kweang An nen fouget fesigiba andoma wokhinarek lagik, uageluk ayonggo figirik eberogo nen lakfei wesigin.

²¹ At ebe An nen yonggo lakfei wesigin mene hilingi'mo re, hiren at a'mage lagau hak mene hilingisu fuk, athe, at ebe futfigik, ane hologo hilingitik, hilingi'no. Nen hiren a'nogo hilingisugun lek halok he, ane sagalugun andi faget aren korogo wokhagain lek.

²² Hit at oba tipsek logolik An nawene melalek a'nogo furogo hilingiti logogun halok he, hit hinaselei mene andoma An ninomat weim yabugun.

²³ Andi re, An nagot malaikat hit hinelokhoma ebekhalem wokhinarek laga logolik, hit it afuni Amori, Het, Feris, Kanaan, Hewi, Yebus, mene inawilokwe andoma wokhinarek lamo, An nen mondogat legetfisagain.

²⁴ Hiren it inanggembu inalong palogo hilingiri'lagwi mene andoma fogerati logou fuk, nen iren kembu oba fogerati logolik obaget hilingiri'lagwi mene andoma alik-alik wuthigik hilingisu fuk. Iren kembu elele waganogo iluk werek mene andoma mondogat tukhumhogo lakfisambik wolelenggen tagalogo legetfisano.

²⁵ Hiren An Hineisena Tuhan Allah fogetnafi logogun halok he, An nen hit ninggi logogun mene wokhisigik, hinagai wokhisigik, hilinghinafi logolik, Ou ero hit hinoba mene yatma hugisa laga logogin.

²⁶ O hit hinaiba hinanggweang oba andoma hemi omalik ina'ma mene weageti logogun lek, it inebe abili aga logogun legat. An nen hit hineluk uan logouwageluk wokhisikhi logogin.

²⁷ Afuni inunggulenu lombok were'ma hit logoin oba andoma, it hinaselei mene andoma inoba An faget inailo hokho mene asuageluk hilingfisagain. An nen hit hinom weim palek mene andoma inafe nong-honget fisagain, An nen a'nogo hilingitunem it hinaselei mene andoma inambotkwe sugulogo heise logoin.

²⁸ Hinaselei mene andoma An nen inendawinggen nong-honget fisagain. An nen hit hinaselei mene inanggele'ma andoma eluk-elugengge aik palinafarek mene inendawinggen nong-honget isoageluk lakfei wesigin. Hit loageluk he, An nen afuni inunggulenu Lewi mene inom, Kanaan mene inom, Het mene inom, andoma hit hinelokhoma nen mugisogo wulak fisagain.

²⁹ Kweang andiba we alomarogo were'ma yi mene ti mene maro mene hokhorogo sik-pik inogo re, it andi An nen inebe tahun we misik oba nek ambine mugisogo wulaginabigin lek.

³⁰ An nen it inebe minggilhigik endep-endep wulaginafunem he, hit hinebe kweang andiba higithogo logogun.

³¹ O andoma hit hinanggweang eise asumo logobagaigeluk An nen huli-huli watfesigi menere; I Laut Teberau nen pikhit I Laut Filistin oba nen o leimo afuni le'ma andoma nen i Efrat huliba andoma. Afuni kweang andiba werek mene andoma hiren mugisogo wulak fisoageluk An nen hit hinomame wokhisamo, hit hinebe kweang andi helikhi logolik andoma hiren it mugisogo wulaginabugun.

³² Hiren afuni andoma mene hinom ogo, inanggembu andoma hinom ogo, wene wasu fuk.

³³ Hiren it inanggembu ilah andoma fogeratik, An neilhanem weak hilingitik, hilingitep hanogo re afuni andoma hit hinanggweang oba andoma logouwageluk ekhe herakfisa fuk. Nen hiren ambi it inanggembu andoma oba apne wanhi logogun halok he, hit hinebe warugu mene a'nogo webse'ma ke'nok ikhi logogun,” iluk yagaisasikhe.