KELUARAN 21 - Allah Wene Fano Wene Hupla Inane

Ibrani mene inamingmingengge nen hilingiti logogun mene faget isikhe wene

¹ It afuni miminginafu mene andi faget Tuhan nen Musa oba ikhi logolik, ”Afuni Israel mene inoba wene melalek yi yagaisan:

² Hiren hinamingmingengge hit hinunggulenu misik mene onggo huninapluk halok he, 6 tahun oba hineabu hilingiti logogin oba nen, tahun 7 meneba re lologo wulakfikhi logolik, onggo iluk ekhe figi'legengge wulak feino.

³ At ebe yau logolik, hit hinamingmingengge aga halok he, at ebe wulibi laga logolik andi re, amuat wulibi lagain. Oba nen he, at ebe agwe helikhesigen hit hinamingmingengge aga halok he, at agwe inomat ambine wulibi logoin.

⁴ Nen hun eisena a'nogo nen amingmingengge a'nogo agwe ekhe wogosumo omalik tasigin halok, at ap a'nogo wulibi lagunem andi re he a'nogo eagwi inom hun eisena a'nogo mene asigin, nen at amingmingengge andi inom wulibi logoin lek.

⁵ Meneat he, amingmingengge a'nogo nen ambi agwe omalik inom, eisena andi inom endawinggen hundigen hilinginafi logolik lologo wulibi lago aple andi abit anggili'lago halok he,

⁶ at eisena a'nogo nen ap wene kabogetunem omanogo waluk lagain. Andoma nen amingmingengge a'nogo o wene kabogetuba a'nogo kwe sou oba ogo, nen e lang oak telik meneba ogo, menlasin iluk yagasimbik, eisena andi nen amingmingengge a'nogo esanggomangge fo'lokhogo wat fagain. A'nogo hilingfoumore at amingmingengge andi ebe eluk logogin oba re eisena a'nogo amingmingengge mondok-mondok asigin.

⁷ Hele Ibrani a'logo ekhe eisena nen amimgingengge faget iluk onggo wanigin halok he, hele andi 6 tahun hilingfuluk lologo wulak fogoin mondok lek. Andi re inamingmingengge ap mene inom he higitsek lek andi nen.

⁸ At eisena a'nogo nen hele andi nen agweap eragain iluk he, hun a'nogo nen endawimo anggili'lago lek mene nek anggugu halok he, hele andi re nekhengge onggwarek eisena tate mene oba onggo wanugun. Hele andi re at eisena onggo wanhe agun a'nogo nen wene waretikhe mene higithogo hilingiti'legengge we yugunat hilingfikhemore, he andi ap pok mene inoba onggo wanigin mondok lego.

⁹ Ap ekhe nen amlogo agweap eragain mene faget iluk, hele ekhe onggo palimbik halok he, hun a'nogo hele andi re at onggwaregen tago mene hakhogo hilingfikhi logogin.

¹⁰ Nen amlogo a'nogo nen ambi, he amu mene helikhi logolik halok he, aren fili'lagongge inom, su inom, yi mene ti mene inom ap andi nen agwe attak ikhikhe meneba hilingiri'lago higithogoat fikhi logogin.

¹¹ Nen aren a'nogo hilingiti'legengge hilingitu halok he, aren he andi faget onggo iluk, uang lolek onggo heligi'legengge lologo herakfisikhi logogino,” iluk yagatikhe.

Ina'mage lagaluk hilingitunem hilingiti logogun mene faget isikhe wene

¹² ”Ap ekhe nen ap amu mene yei wasumo wa'lagu halok he, ap wasigin mene a'nogo ebe pinggi wasugun.

¹³ Meneat he, ap andi nen wasigin iluk endawinggen wenggelek le'ma nen ferekhogo watfuluk halok he, humusek o obalik An nen yagahesigin oba andoma lagunem at ebe along pale'ma asigin.

¹⁴ Oba nen he, ap misik ekhe nen endawimo heren ailo asimek eranen ap ekhe watfembik oba nen, ebe telagain iluk mezbah An faget hilingiri'lagwi mene a'nogoba lagain oba nen he, andoma nen lisogo wulak fembik ebe pinggi wasugun fano.

¹⁵ Ap ekhe nen eisena ogo, agaisa ogo, inoatu halok he, ap andi ebe pinggi wa'no.

¹⁶ Ap ekhe nen onggo helagain iluk ap amu mene ekhe senfisambik onggo arat wanhe halok ogo, aiba werek halok ogo, ap andi pinggi wasugun.

¹⁷ Ap ekhe nen eisena ogo, agaisa ogo homan fisikhe halok he, pinggi wasugun.

¹⁸ It ekhe nen yei yafi logolik, ap ekhe it amu mene ekhe helep oba ogo, enggi yinggilogo ogo wasigin oba nen he, ebe pinggi wasigin lek halok he, ap andi wene oba fogoin lek. Nen ap watfaga mene a'nogo ambi at ebe waregengge a'nogo nen wengik logogin,

¹⁹ oba nen hobugen menla'luk sige tomuk oba lagu halok he, ap ebe wate mene a'nogo nen fano asuageluk lebethugunemen ap andi fano asigin. Nen at ou wanhunem andem he aren hilingisu mene andoma mondogat he at watfikhe mene andi nen onggo figik, lebethigik ikhi logogin.

²⁰ Ap ekhe nen amingmingengge mene ap mene ogo helime mene ogo yei e payuk oba watfoumo, andi sambul wa'lagu halok he, ap andi unggum wogosugun.

²¹ Oba nen, amingmingengge andi wa'laga lek halok he, hup pire henagan logogun halok eisena unggum oba fogoin lek. Unggum wogosu hak he at onggwarek amingmingengge a'nogo watesik omame legaga andi nek.

²² Nen it alage ekhe yei hambok-hambok arik laga logolik, it aremnogo misik ekhe nen, he ekhe omalik a'marek mene tamagisamo, he andi omalik pereligin oba nen he, at ebene amukwe andoma ou werek lek halok he, ap tamakhagain mene a'nogo nen onggo he a'nogo agun nen kino igin higithogo fagain oba nen, it ap unggum pilingitu inap omanogo nen kwelakhambik fano anggogoin higithogoat fagain.

²³ Oba nen, he andi ou enggin asigin halok he, arigin lasigin mene andi faget unggum he, at ebe wa'laga halok, ap wate mene andi inom wuret fogoin,

²⁴ ap ekhe eilenggen taunget hikhe halok he, onggo eilenggenat taunget fogoin. Ap ekhe nen aik langgot fikhe halok he, onggo at aik langgot fogoin. Nen ap ekhe nen inenggi sombol fikhe halok he, onggo at enggi sombol fogoin. Nen ap ekhe nen ineisok sombol fikhe halok he, onggo at eisok sombol fogoin,

²⁵ ap ekhe nen inebeba inagap palfikhe halok he, onggo arogo ebeba agap palfogoin. Nen, ap ekhe nen it ekhe inoba endu nolfikhe halok he, onggo aroba endu nolfogoin. Nen, ap ekhe nen are ekhe watfoumo ebeba fisigin halok he, onggo arogo watfoumo ebe fisigin.

²⁶ Ap ekhe nen, amingmingengge he ogo, ap ogo eilenggen tugukhogo watfoumo weagasigin halok he, eilenggen weagasigin andi onggo re, at ebe lologo wulak fisogoin.

²⁷ Ap ekhe nen amingmingengge he ogo, ap ogo aik langgorogo watfagain halok he, amingmingengge aik a'nogo onggo re ebe lologo wulak fagain,” iluk yagaisasikhe.

²⁸ ”Wam sapi ai mene ekhe nen ap ogo, he ogo ekhe andimuk oba talogo watemo wa'lagu halok sapi andi helep oba tamukhogo wasugun. Wasimbik he, eino re nogoin lek oba nen, at anggo eisewerek a'nogo re unggum wogosugun lek.

²⁹ Nen wam sapi ai mene ekhe nen ap andimuk oba hundik inoatunem ap anggo eisewerek meneba yagasugun oba nen fanorogo tegelogo fikhe le'ma, ap ogo he ogo ekhe andimugen wasigin halok, sapi andi helep oba tamukhogo warogo fuluk, ap anggo eisewerek andi ogo ebe pinggi wasugun.

³⁰ Oba nen he, sapi eisewerek mene andi oba we onggo fagain iluk kino yagasugun halok he, aren ebe obali'mo onggo yi huli fagain ugun higithogo fikhi logogin.

³¹ Nen wam sapi andi nen alage ogo, helime ogo ekhe inoate halok he, wene melalek andi higithogo nek hilingiti logogun.

³² Wam sapi nen wasigin mene andi ambi, inamingmingengge ogo, he ogo, wasigin halok he, ap anggo eisewerek mene andi nen onggo uang perak mene 30 nen ap inamingmingengge ineisena andi oba onggo wogosigin, nen anggo sapi ai mene andi ogo ebe helep oba pinggi wasugun.

³³ Ap ekhe nen agai mogo ambe sebelek mene wokhagain halok, athe habulimbik ambe sebelfikhe lek halok, sapi ai mene hea, keledai hea, elema pile pigin,

³⁴ andi faget ap agai mogo eisewerek andi nen wam eisewerek mene andi onggo wogosigin oba nen he, aren wam warek andi onggwarek faget iluk helikhi logogin fano.

³⁵ Ap ekhe anggo sapi ai mene nen are ekhe anggo sapi ai meneat watu halok, sapi eisewerek andem inebe pirenet misik sebe iluk sapi eluk mene onggo uang waniluk, uang a'nogo emberek minggilaga logogun. Nen, iren wam warek mene a'nogo emberegat hibirogo helikhi logogun.

³⁶ Meneat he, ap ekhe anggo sapi ai mene andi andimuk oba hundik inoari'lagoba nen, at anggo eisewerek mene a'nogo nen furogo halhu lek halok at anggo eisewerek mene andi nen obali'mo, sapi eluk mene onggo fuluk he, warek mene andi at asigin fano.