KELUARAN 20 - Allah Wene Fano Wene Hupla Inane

Wene Allah nen, yi'nogo hilingiti logoino, ti'nogo hilingiti logoino, iluk 10 nen komorinafikhe wene

^1-2 Allah nen komo wene, ebe yi'nogo isikhe: ”Hit afuni Mesir mene nen inamingmingengge fethinarek were'ma wokhinarek wulibi wagagi mene, hineisena Tuhan Allah nebere Anaro.

³ Hiren hineisena allah hunogoat mene ekhe fogerati'lek, An namunek foge'nafi logoino.

⁴ Hiren hinonggwarek faget tugwi kembu pogoroba mene inom, kweangma mene inom, kweang abel manggwe i elema welagarek mene inom, ekhe alik waganogo wusugun mondok lego.

⁵ An hineisena Tuhan Allah nebe Anatma re, hiren he, yi mene ti mene ekhe at emberek higit, iluk anggogoin mondok nabit andi nen he, tugwi kembu a'nogo ekhe alik waganogo wurogo fembik fogerasugun mondok lego. Afuni an nebe inapsiri mene andi, An nen it inebe inom, iren tagongge mene attak ta'lagik, ombo'ne ta'lagik, hobuk ekhe ta'lagik, huli 4 oba ta'lasugun mene inomat unggum inoba fugu mondok logogin o.

⁶ A'nogo meneat he, afuni ekhe An nebe inendawirogo logolik, An nen komothinafirek wene yi hologo hilingiti logogun mene andi nek he, it inebe inom, nen, iren tagongge mene inombalak yi teng ti teng mondok hokhorogo ta'larik laga logogun mene inom, nendawirinafu mondok logogin aro.

⁷ An he hit hineisena Tuhan Allah welagi andi nen, afuni ekhe An nenu we tulemat ikhi logogun mene andi unggum inoba fagain enggere, An nenu alomarogo ikhi logogun mondok lego.

⁸ Hinenggi sabit oba re, An hineisena Tuhan nonggwarek nawi andi nen he, o andiba tegelogo fuluk An nobaget agaukhogo hilingiti logogun o.

⁹ Hit mene hinangge yi mene ti mene wanhi logouwageluk hinenggi falfaligen wokhisigi o.

¹⁰ A'nogo meneat he, o hinenggi misik sabit oba andi nek he, An hineisena Tuhan nonggwarek nawi hilingi'mo re, set walogo weat logoino o. O andi sambul he, hit hinebe nen inom, hinagainafuri nen inom, hinamingmingengge mene nen inom, afuni ap pok mene hit hinaiba welagaikharek mene nen inom, hinanggo nen inom, hinenggingge ekhe wanugun mondok lego.

¹¹ An hineisena Tuhan nen kweang inom, pogot inom, laut yenggelek inom, yi mene ti mene pogot, kweang oba welagarek inom, mondogat walhilik waga lagarik, huli nenggi falfalik huliba walhasigi meneat he, nenggi ekhe sabit mene andiba re, set walogo weat welagagi. Andi nen An hineisena Tuhan nen o inenggi sabit oba welagaikharek andi ebe fanotfigirik, nonggwarek faget fakhasigi andi.

¹² Hit o an nen wokhisagain oba andoma fano mondok logolik, hinebe umur uanhogo logobagaigen he, hineisugwi hinagaisawi agaugwerinafi logoino o.

¹³ Afuni inoatubo.

¹⁴ Pailak fakfisagubo.

¹⁵ Yogot wanhubo.

¹⁶ Hineranen wene afuni ekhe inabok palhubo.

¹⁷ Afuni ekhe inawi wurik inom, inagagwi inom, inamingmingengge inom, inanggo inom, inangge yi mene ti mene inom, namolo e, iluk hinendawimo anggagubo,” iluk yagaisasikhe.

Afuni Israel mene inailo mondok hokho agaikhe wene

¹⁸ At nineisena Tuhan nen a'nogo yagaisasikhe andi re, tom a'nogoba eilabut pakhogo so'le hokhorogo lagagunem, ineilenggen higik, unggunggu pak igik, pinggong anethigik, ugunem ane inesanggo holhi logolik inailo nen inoak lei'leik inebe yatmaat hekhogo mendek welagaukwa.

¹⁹ A'nogo mendek logolik iren he, Musa mel yagatukwa: ”Wene haren yaganisugunem nit ninesanggo holhi logogun. Mene athe, nit hobuk ninebe wa'lago hanogo re, Allah nen ane nit ninoba yaganisagain mondok lego,” iluk yagatukwa.

²⁰ A'nogo yagatukwama at Musa nen onggo ikhi logolik he, ”Hinailorogo hilingitu lek. At Allah ebe weri'lago andi re, hiren weak hilingiti'legengge, At oba nek tiphogo logouwageluk hit hinobabut paligiluk weri'lago o,” iluk yagaisasikhe.

²¹ Yagaisasikhesik, it afuni omanogo inebe yatkwe mendek werek kwelek, at Musa a'nogo nek he, o hena eil mondok mum hik-hak se'ma At Allah ebe werek higit asi lagaikhe.

Mezbah hilingitu Mene faget wene melalogo fesikhe wene

²² At Tuhan nen Musa oba it afuni Israel mene faget yagaisoagaluk yagati logolik he mel yagatikhe: ”An Tuhan nebe pogoroba nen nane ugunem hiren hineilenggen mondogat hegep andi.

²³ Halok he hiren, emas mene ogo, perak mene ogo, An Tuhan nebe werek kwelek, amu mene hit hinonggwarek faget alik-alik hilingfuluk, apne wanhik, fogeratik, hilingisu fuk.

²⁴ An nobaget mezbah kweang tangge meneba misik ekhe wutfuluk he, andoma hinanggo domba inom sapi inom waluk he, warogo nolhu mene inom, hinagap telogo iluk wam anggerang anggo fogoin mene inom, fei wagunogo. Obalik ebe lombok wenagaisogo fagain kwe andoma hiren An nobaget hilingiti logogun oba iluk seleget foumo, andoma an nebe we'luk fanot hinobagakhi logogin.

²⁵ Hiren An nobaget mezbah misik ekhe helep oba wusugun halok he, helep aben serelharek meneba wusu fuk, nen hiren helep ap en serelharek meneba louk wanimbik serelugun halok he, Mezbah horek mene andi weaget fegep hanogo.

²⁶ Hiren Mezbah An nobaget wurik meneba, kwe pelarogo lagagunem hinagap hinenggalimo mene weinam asu hak andi re fuk.