KELUARAN 19 - Allah Wene Fano Wene Hupla Inane

Afuni Israel mene tom Sinaiba wagaukwa wene

^1-2 Afuni Israel mene o Mesir herakfisaluk wulibi wagaukwasik oba nen, tugi pirenek meneba waga lagaukwasigen, o Rafidim andoma herakfuluk wagaukwasik he, tugi ekhe tanggal 1 ba re, o leimo tom Sinaiba wagaukwasik o sabu tenda mene tom a'ma andoma wutukwa.

³ It o a'nogo wutukwasik werek kwelek, at Musa Allah emberek ambi asuogeluk tom andiba lagasikhe. Lagasikhemo At Tuhan ebe tom andiba nen Musa oba afuni Israel Yakub en tagongge mene andi yagaisa pi wesuageluk mel yagatikhe:

⁴ ”Hit he, An nen afuni Mesir mene inoba hilingfigirik, hit hinebe sue rajawali nen eagwi ogolabi amboloba woginarek lagarek andi hak, An nomame hokho meneba An noba yoma hinobagai wagi andi hineilenggen arat hegebo.

⁵ Hit yogondak an nane hologo wene wathisasigi mene andi higithogo hilingitep halok he, hit he, an nagainafuri hinale'ma kenghogo wokhinabigin o. Afuni kweangma mene mondogat he, inebe an mene. Meneat he, hirenek he, hinebe an nendawinggen hundik mene hilinglasimbik

⁶ hinebe an nonggwarek faget eisewerek logolik an faget hilingiti logogun o. Wene mondogat yagaheti mene andi afuni Israel mene yagaisano o,” iluk yagatikhe.

⁷ A'nogo yagatikhemo at Musa pi wagaikhesik he, afuni Israel mene inogogwi andogosi wesuagaluk wolisasikhemo andogosi wagaukwama re, nineisena Tuhan yi wene ti wene yagatikhe mene omanogo mondogat yagaisasikhe.

^8-9 A'nogo yagaisasikhemo, it inebe mondogaren inane lambulogo ikhi logolik, mel isukwa: ”Niren he, nineisena Tuhan nen yi wene ti wene yaganisikhe mene andiat hilingisugun o,” iluk yagatukwa. Wene iren isukwa mene andi at Musa nen Tuhan oba yagatikhemo, Aren he mel yagatikhe: ”An nebe ohena mumeak mene laberogo hoba pi wesigin. A'nogo pi wesimbik wene hat holhen mene yagahetunem afuni inesanggo holimbik he, huli andem sambulen, Aren eberogoat wene oba fikhemo yaganisili'logo iluk, futfikhi logogun.

¹⁰ Hat yogondak he, it inoba pin o. Pimbik he, it An fogetnabuogeluk o yogondak inom, ohealek inom, tegelogo fakhambik logouwagen yagaisano. Tegelogo filik logolik, inasu fanorogo sobalogo fakhambik logouwak.

¹¹ Nen, age halok he, mondok tegelek oba logouwago. O andi sambul he, An nebe tom Sinai oba pi wagunem he, afuni mondogaren ineilenggen neogoin o.

¹² It andi inebe wesimbik tom oba horokhogo lagai wesinogo iluk, inendawi wenggelogo tom oba huli yiling-waling warogo silo feino. Sa nen huli warek mene afane waga halok he, ebe mondok wasuogeluk unggum oba feino.

¹³ Unggum a'nogo oba fembik he, ebe inenggi fakfigi'lek, helep oba hea? Sikheba hea wasino. Afuni ogo, wam ogo, huli warek mene andi afane wagu halok, unggum inoba fembik inoa'no nek. A'nogo meneat he, pinggong ane hundik ugu mondok werek halok enek he, afuni andi inebe tom oba weak-weagat lagai wesuago,” iluk yagatikhe.

^14-15 A'nogo yagatikhemo, at Musa tom oba nen pi wagaikhesik he, afuni omanogo Allah fogerasugun mene faget tegeluageluk mel yagaisasikhe: ”O age halok he, tegelogo mondok fakhambik logobagaigen he, hemi hinom nogo ugubo,” iluk yagaisasikhemo, it afuni a'nogo nen inebe inoba tegelhik, inasu fanorogo sobalhik, isukwa.

¹⁶ O inenggi henaganek mene weirogo hubet-habet he, unggunggu hokho mene ane pak igik, eilabut kulung higik hilingitikhe. A'nogo hilingiti logolik, ohena mumweak mene tom oba weinam agaikhesik he, pinggong ane hokho mene isikhe. A'nogo ugunem afuni hokhorogo o sabu wurikwe welagaukwa mene omanogo inesanggo holhukwasik he inailo hokho mene agaukwasik inoak lei'leik hilingitukwa.

¹⁷ A'nogo hilingitukwama, at Musa nen Allah inom ambi asuogeluk it woginarek wulifikhesik he, tom a'ma andoma mendek welagaukwa.

¹⁸ Were'ma, Tuhan ebe endu amuilok elema tom Sinai oba pi wagaikhe andi nen, tom Sinai oba mondogat he endu so'le nen salogo fesikhe. Endu so'le andi lei fatunem so'le mondok hokhorogo mon-mon lagaikherek andi hak lagakhi logolik, tom ebeet lang-fanget hasikhe.

¹⁹ Pinggong ane ilik-ilik elugun oba mondok hokhorogoat isikhe. Ugunem at Musa nen Allah yagatunem he, aren wene onggo unggunggu aneba yagatikhe.

²⁰ At Tuhan ebe tom Sinai oba pi wagaikhesik, Musa punu ebeba lagauwageluk woletikhemo, oba lagasikhe.

²¹ Lagasikhemo, Tuhan nen Musaba mel yagatikhe: ”Hebe pimbik he, afuni andi inebe mondogat An ineilenggen neowogeluk huli warek mene afane lagai wesinogo. It inesanggo holhi'lek lagai wesugun halok, inebe ekhe hokhorogoat wa'lasugun.

²² Nen, it ap An nebe eisewerek mene ogo re, inebe mondok sobalogo nen noba horokhogo wesuago. A'nogo sobalhi'lek wesugun halok, unggum inoba fagain o,” iluk yagatikhe.

²³ A'nogo yagatikhemo, at Musa nen nineisena Tuhan oba mel yagatikhe: ”Haren he, hit hinendawimo nen, tom andi At onggwarek andom tegelek mene, iluk futfembik, era'lu yiling-waling huli warogo afane lagai wagi'lek hilingiti logoino, iluk yaganisegen andi nen he, afuni andi tom oba lagai wesugun mondok lego,” iluk yagatikhe.

²⁴ Yagatikhemo, at nineisena Tuhan nen he, ”Hat hambotkwe pin o. Pimbik he, Harun hemberek lagai we'no. A'nogo meneat he, ap An nebe eisewerek mene inom, afuni mondogat inom, huli warek mene andi afane An noba lagai wesugun mondok lego. Huli warek mene afane lagai wagaikha halok, unggum inoba fagain o,” iluk yagatikhe.

²⁵ A'nogo yagatikhemo, at Musa ebe pi wagaikhesik it afuni a'nogo nineisena Tuhan wene yagaisoageluk yagatikhe mene andi yagaisasikhe.