KELUARAN 18 - Allah Wene Fano Wene Hupla Inane

Yitro Musa oba lagaikhe mene

¹ At Yitro Musa eamal awi Midian mene ebe imam welagaikhe agun a'nogo esanggo holhugunemen he Tuhan nen it Israel mene o Mesir en woginarek wulibi waga logolik Allah nen at Musaba inom, it Israel mene inoba inom hilingfisikhe lagaikhe mene faget ugunem holhikhe.

² A'nogo holhikhe andiba re at Yitro a'nogo Musa ha lagain iluk laga logolik he, he Zipora Musa agwe o Midian welagaikhe mene a'nogo inom,

³ amlogomi inebe pirenerengge Gersom inom, Eliezer inom aremnogo emberegat woginarek lagaikhe. Nen, at amlogo attak mene enu Gersom salhikhe andi re, Musa nen ikhi logolik, ”An he o yoma ap pok wagarik welagi,” iluk salhikhe.

⁴ Nen, amlogo pirenek mene enu Eliezer salhikhe andi re, at Musa nen ikhi logolik, ”Allah an nambu-nombalagen apne wanhi lagaukwa mene a'nogo nen an lebetnafik, nagap telnafik ikhemo at raja Mesir mene nen noati'lek hera'nobagaikhe,” iluk salhikhe.

⁵ At Yitro a'nogo Musa agwe inom amlogomi pire inom wagaukwasik he, o leimo tom wesa andom iluk tegelek welagaikhe mene era'lu horokhogo andoma at Musa o tenda ba salfesikhesik were'ma wagaukwa.

⁶ Wagaukwama it a'nogo wagaikhasik werek iluk Musaba yagasi lagaukwama,

⁷ at Musa wulifikhesik he, it inelokhoma eindep awi yagaisogo inelokhe saluk hai wat-wat agaukwa. Ariginhukwasik he, iren inebe hilingik aple heinok wok-wok agaukwasik he, tenda salek welagaikhe mene a'nogoba kwisukwa.

⁸ Kwisukwasik he, at Musa nen eamal oba Tuhan nen it afuni Israel mene inagap teligiluk yi wene ti wene at raja oba inom, it afuni Mesir mene inoba inom, hilingfisasikhe aple omanogo tindelhikhe. Andi nen aren ogore it afuni Israel mene ebekhalem waga logolik enggin-fenggin hasukwa aple inom, nen it a'nogo hugunem Tuhan nen inagap telinafikhe aple inom tindelhikheat.

⁹ Andoma mondogat tindelhikhemo holhikhesik he, Yitro agaiyek hokho mene agaikhesik he,

¹⁰ aren ikhi logolik, ”Tuhan hit hun raja enggiba nen inom, it Mesir inap inenggiba nen inom, telhinafe mene andi nek fogerati logouwak!

¹¹ It afuni Mesir mene nen wonoget fakhikhi logolik hilingitu kwelek At Tuhan nen a'nogo hilingiti laga andiba re, it mene inanggembu ilahi omanogo mondok sebelek werek kwelek At Tuhan enek he mondok hokho mene werek iluk an yogondak futfikhi lagi o,” isikhe.

¹² A'nogo isikhesik he, at Yitro nen Allah obaget fugu mene iluk inom, warogo noletu mene iluk inom, wam miren mene hakhogo waluk wagaikhe. A'nogo waluk wagaikhemo re, it Harun inom Israel mene inogogwi kaindek lenggalinafarek mene omanogo inom, at Yitro ebe inom at he, Allah ebe weinam agarek oba elokhoma omanogo wagaukwasik inom seberogo nasukwa.

Musa nen afuni inawene pilingisogo ayo wurinafu mene menfisasikhe wene

¹³ Ohealekwe weirogo re at Musa nen afuni Israel mene inagaila'lak inom minggilik logolik werek mene omanogo ayo wurogo pilingisogo leget figik, isikhe. Wene andi o huberen eroratikhesik pilingitu werek kwelek enek he, o mondok hubagaikhe.

¹⁴ A'nogo hilingitunem, at Yitro eilenggen hasikhesik heinok wokhikhi logolik he mel isikhe, ”It afuni yi faget haren wene ningginik mene nek hilingiti lagen? Yi wene ti wene andoma hat hamu nen enek hilingitunem, it afuni nen wene komotninabuageluk andi faget o huberen mendek werek kwelek enek hup agu aple andi re fano a?” iluk heinok wokhasikhemo,

¹⁵ At Musa nen onggo yagati logolik, ”Afuni andoma re At Allah endawimo ninggi'nogo anggili'lago iluk inelu asuageluk an noba weri'lagwi o.

¹⁶ Nen, iren minggil-manggal a'luk halok he it inawene pilingisogo tegetnisoageluk nambit waluk weri'lagwiat. Nen, At Allah wene melalek inom, yi'nogo ti'nogo hilingiti logoino iluk inom, werek mene omanogo inomat yagaisikhi lagi,” iluk yagatikhe.

¹⁷ A'nogo yagatikhemo at Yitro nen ikhi logolik he, ”A'nogo hilingiti lagen andi re weago.

¹⁸ Haren a'nogo hilingiti lagen andiba re hat honggwarek homame leget fakhigik, it afuni oma inomame leget fisigik ikhi lagen o. Yabu ariginik mene andi re ap misigen he enggin mondok hokho o.

¹⁹ Andi nen he, an nen komothabigin mene yi holin, Allah nen lebethabigin. Nen haren afuni yi inenuba it inane waluk Allah elokhoma laga lagen mene andi re mondok fano o.

²⁰ Haren he Allah ane palek andi it yagaisigik, it inobabut fano logouwageluk yagaisigik, nen iren hilingiti logogun mene inom yagaisigik, ikhi logogin.

²¹ Oba nen he, andi hilingiti logolik he haren ap inebe hebelek mene enogo fisambik iren ap inebe 1.000 nen mene faget inom, 100 nen mene faget inom, 50 nen mene faget inom, 10 nen mene faget inom, inobaget menla'luk lenggalinafi logouwakhogo yagaisano. It inebe re Allahba inailorogo logolik, ane hologo nek hilingitu mene, nen afuni nen at andi elok hilingisu hak iluk anggagarek mene, nen uang inendawimo fanorogo iluk wogisugun helagarek lek mene halok menfisano.

²² It andi yagaisikhi logolik he, it afuni inebe lombok omanogo faget inawene pilingitu mene asugun. Yabu andi re, iren higithogo mondok hilingiti logogun. Wene esin mene werek halok he, hat hoba waluk waga logogun, oba nen he wene endep-endebengge minggilik awene halok he it inamu nen tekhogo legabeti logogun. Iren yabu a'nogo hilingiti logogun andiba re hat hoba yabu enggin werek mene omanogo seet fikhi logogun.

²³ Haren a'nogo hilingisigin halok he, wene ariginik mene andoma At Allah nen hilingisuageluk melalhobagagunem he, haren yabu mondok higithogo nek hilingitik, afuni inawene ogo weak-weakhogo nek pilingisogo leget fisigik ugunem it inailokwe wulifi logolik inoba homorogo wulifi logogun o,” iluk yagatikhe.

²⁴ A'nogo komotikhemo at Musa nen he, Yitro nen komotikhe Mene a'nogo higithogo re,

²⁵ it afuni Israel mene inanggelekwe omanogo nen ap inobabut hebelek mene nek heragaisogo fisilik lagaikhe. A'nogo hilingitikhesik he afuni inebe 1.000 mene faget inom, 100 mene faget inom, 50 mene faget inom, 10 mene faget inom, lenggalinafi logouwageluk yagaisilik lagaikhe.

²⁶ A'nogo yagatikhemo re iren ap wene pilingitarek mene it afuni Israel mene faget mendek logolik yabu higithogo nek hilingiti lagaukwa. Iren wene enggin mene halok he, at Musa ambit waluk kwikhi lagaukwa, nen wene endep-endebengge minggilik awene halok he it inamu nen tekhogo leget fisikhi lagaukwa.

²⁷ A'nogo hilingfuluk he, at Musa nen Yitro aiba loageluk lakfesikhemo, at Yitro a'nogo awi eroma omanogo lagaikhe.