KELUARAN 16 - Allah Wene Fano Wene Hupla Inane

Sumburu Manna mene inom, sue yomamal hangge mene inom, wogisasikhe wene

¹ Afuni Israel mene o Mesir herakfisaluk wulibi wagaukwasik oba re, tugi ekhe mum agaikhesik he, hobuk ekhe folokhogo tanggal 15 oba, o Elim en waga lagaukwasik he, o andoma nen honggolek, tom Sinai nen honggolek, tulem o leimo afuni le'ma enu Sin andoma wagaukwa.

² O leimo afuni le'ma andoma logolik, afuni Israel mene inebe mondogaren Musa Harun emberek inoba inane mul-mul inoba fesukwa.

³ A'nogo inoba fesukwasik, mel yagaisasukwa: ”Nineisena Tuhan nit ninebe o Mesir a'lima nen ninoasuageluk herakninobagauwem o. Nit o Mesir logolik he, wam ninggik, sumburu roti mene ninggik, ninalabut ninghogo ninggi lagagu meneat he, o yoma yi mene ti mene le'ma nele nen ninebe mondogat wa'lasuageluk wo'ninarek wagep yoma ri!” iluk yagaisasukwa.

⁴ A'nogo yagaisasukwama, At Tuhan nen Musa mel yagatikhe: ”An nen hit mondogat faget sumburu hokhorogo oba heilarogo ninggi logobagaik iluk pogoroba nen meiso higit pelakhisa wesigin o. A'nogo pelakhisa wagi halok, o hinenggi linggene misik oba nogoin mene higithogoat andogoti logoino o. A'nogo pelakhisa wagunem hilingiti logogun andiba, iren he, an nen komorogo, yi'nogo hilingi'no, ti'nogo hilingi'no, iluk yagaisagain mene andi higithogo hilingisugun a? Lega, iluk inobabut paligin o.

⁵ Inenggi fuap mene wela'luk ekhe falfalik meneba re, hinamburu mene wokhisagain mene andi hinenggi pireba andogosu hak, ekhe inomat andogoti logoino o,” iluk yagatikhe.

⁶ A'nogo yagatikhemo, at Musa Harun emberegen afuni Israel mene inebe mondogat mel yagaisasukwa: ”O yogondak hu'mokwe yaat he, nit ninebe nineisena Tuhan o Mesir en wo'ninarek wulibi waga, iluk hinelu asugun o.

⁷ Hobit hubet siakhogo, At nineisena Tuhan ebe ninom welago andi ombak-bak ineilenggen silik-pabuk igin mene hogoin o. Wene niren hit yagahisikhi lago andi re, nineisena Tuhan komotninafi logolik, yi'nogo hilingi'no, ti'nogo hilingi'no, iluk yaganisikherek mene nek yagahisikhi lago andi nen he, hiren hina'mage lagaluk wene palhi lagep andi, nit ninoba palhi lagep fuk. We, nineisena Tuhan oba palhi lagep mene esanggo arat holhe o.

⁸ Hit hina'mage lagaluk ninoba wene fikhi lagep andi, eberogoat he, nineisena Tuhan oba wene fikhi lagebo. Wene ikhi lagep mene andi re, nineisena Tuhan esanggo arat holhe andi nen he, aren hit nogoin mene faget hu'mokwe re, sue wokhisigik, ohealekwe re, sumburu roti hangge mene wokhisigik, ugunem hinalabut ninghogo ninggi logogun o, iluk eberogoat yagahisogo,” iluk yagaisasukwa.

⁹ A'nogo yagaisasukwasik, hobuk at Musa nen Harun mel yagatikhe: ”Iren wene pali'lagwi mene Tuhan arat esanggo holhe andi nen he, it inebe mondogat nineisena Tuhan oba wesuagen he yagaisano o,” iluk yagatikhe.

¹⁰ A'nogo yagatikhemo, at Harun nen it inebe mondogat yagaisugu kwelek, it ineilenggen o leimo afuni le'ma higit yethasukwa re, nineisena Tuhan ebe ombak-bak ineilenggen silik-pabuk igin mene ohena elonggoma nen weinam agunem ineilenggen yethasukwa.

¹¹ A'nogo yethasukwama, At nineisena Tuhan nen Musa mel yagatikhe:

¹² ”Afuni Israel mene nen wene pali'lagwi andi an arat nesanggo holhi o. An nen wogisugunem, hu'mokwe re sue ninggik, ohealekwe re sumburu roti hangge mene ninggik, inalabut ninghogo ninggi logogun o. A'nogo wogisugunem, An it ineisena Tuhan Allah nebe futnobagagun o,” iluk yagatikhe.

¹³ A'nogo yagatikhesik oba nen, hu'mokhokwe re, sue yomamal hangge enu puyuh andi mene mondok hokhorogo it afuni Israel mene o sabu tenda mene wutukwaba omanogo mondogat sebelogo labok i wagik, nen, ohealek he, lilengge pogoroba nen o sabu tenda mene wutukwa mene era'lukwe pi wagik, isikhe.

¹⁴ Lilengge andi o aganhan nen age wulifikhesik he, werama asinagap serameak andi hangge eil kurengge were'ma o leikwe andoma ineilenggen yethasukwa.

¹⁵ A'nogo hilinglagaikhesik were'ma, afuni Israel mene ineilenggen yethasukwasik he, nena mene he inobakhe palagaikhe. Inobakhe a'nogo palagaikhesik, ekhe nen ekhe yagaisikhi logolik mel isukwa: ”Aroma nena mene anggikhi lagep,” iluk heinok wok-wok agaukwa. Heinok wanhukwama, at Musa nen he, mel yagaisasikhe: ”Aroma re, nineisena Tuhan nen hit noageluk wokhisikhe mene o.

¹⁶ Ap inebe lombok inagainafuri inom nogoin higithogo nek inebe lombok faget iwak elema 2 liter mene keraluageluk wokhisikhe mene o,” iluk yagaisasikhe.

¹⁷ A'nogo yagaisasikhemo, it afuni Israel mene a'nogo andogotukwa meneat he, it ekhe inamunek faget 2 liter kwalhi logolik ekhe inomat kwalfigik, it ekhe endebat andogorogo kwalfigik, isukwa.

¹⁸ A'nogo andogotukwasik iwak elema kwalhigik walhasukwa mene re, it ekhe hokhorogo ekhe inom oba loukhogo legat, nen it ekhe endebengge, we, higithogo nek kwalogo fesukwa. Inebe lombok mondogat it nogoin higithogoat andogorogo kwalhukwa andi.

¹⁹ A'nogo hilingitukwama, at Musa nen he, it mel yagaisasikhe: ”Kwalhep mene andi hit ekhe nen ohealek mene faget ekhe fogoin mondok lego. We, felelenghogo nano o,” iluk yagaisasikhe.

²⁰ A'nogo yagaisasikhe meneat he, it ekhe nen Musa ane hologo hilingiti'lek sagalogo herakfisaluk ohealek nogoin mene faget ekhe fakhasukwaat. Fakhasukwa mene andi ohealekwe kwelakhasukwa re, soborenggen fisikhesik amben agaikhemo hasukwa. A'nogo hilingitukwama, at Musa a'mage lagasikhesik wenagisasikhe.

²¹ Iren, hundik-handik hubet siakhogo sumburu a'nogo mene andogorogo kwalhi lagaukwa. Nen, sumburu ando kweangma herakfisikhi lagaukwa mene andi o aganhan agunem he, amusu hilingla'luk legaga lagaikhe

²² O inenggi sabit oba nek he, inebe lombok faget sumburu andogorogo inenggi o pire mene faget iwak elema 4 liter kwalhi lagaukwa. A'nogo kwalhigik fuluk he, it afuni Israel mene inogogwi nen wene Musa yagasi waga lagaukwa.

²³ Yagasi waga lagaukwama, at Musa nen he, mel yagaisasikhe: ”Nineisena Tuhan nen komotninafi logolik yi'nogo hilingiti logoino ikhe: Ohealek hinenggi sabit mene andi re, An hineisena Tuhan nawi. Halok he, An faget set walogo logoino o. Hit yogondak werakhogoin mene halok he, werakhigik, isakhogoin mene halok he, isakhigik, ikhi logolik he, hobuk nogoin mene halok, ohealek faget ale'ma fikhi logoino o, iluk ikhe,” iluk yagaisasikhe.

²⁴ A'nogo yagaisasikhemo, Musa nen, yi'nogo hilingi'no iluk yagaisasikhe higithogoat, tindelagaikhe mene ohealek faget fakhikhi lagaukwa. A'nogo fugunem he, amben a'luk soborenggen figi'legat fano welagaikhe.

²⁵ A'nogo fano were'ma, at Musa nen he, ”O yogondak yi re, nineisena Tuhan awi o, At fogerati logolik set walogo logogun oba. Ma re, hiren sumburu olilu o sabu tenda mene wurikwe era'lu yoma ekhe were'ma hogoin lek andi nen he, hinamburu yogondak nogoin mene re, aroma o.

²⁶ Hinenggi falfalik meneba re, hinamburu nogoin mene andogorikhi logoino o. A'nogo meneat he, hinenggi sabit oba nek he, set walogo werek kwelek, sumburu ekhe pi wesigin mondok lego,” iluk yagaisasikhe.

²⁷ A'nogo yagaisasikhe meneat he, afuni Israel mene ekhe inenggi sabit oba set walogo logolik meneat he, sumburu andogosuogeluk wulifi lagaukwa mene re, ekhe ineilmo aga lagaikhe mondok lek.

²⁸ A'nogo hilingiti lagaukwama, at nineisena Tuhan nen Musa mel yagatikhe: ”Huli ki huliba, an nen komorogo, yi'nogo hilingi'no iluk yagahisigirek mene andi, nane hologo hilingiti'lek logogun nogo?

²⁹ Hinendawimo eberek logoni. An nen he, hinenggi misik oba set walogo logobagaigeluk wokhisigi andi nen, hinenggi sabit oba hinamburu hinenggi pireba nogoin mene faget higithogo wokhisikhi logogin. Nen, hinenggi sabit oba re, hinebe lombok misigat halok ekhe o silikwe wulifi'lek hinaiba mondok logoino o,” iluk yagatikhe.

³⁰ Andi nen, inenggi sabit oba re, inenggingge wanhi'lek weat welagaukwa andi.

³¹ Sumburu andi it afuni Israel mene nen he, enu Manna, iluk ikhi lagaukwa. Ebe re, enggen endeptek mene elokhonggen he, mola mene re, enduk he, kue hombonundek mene kin amusu inom werago mene enduk hangge.

³² At Musa nen he, ”Tuhan nen hinagainafuri tagomangge hinombalagen en he, ninombalak ineisena Tuhan o Mesir en woginarek wulibi wagaikhesik o leimo afuni le'ma waga logolik inamburu Manna wogisasikhemo ninggi lagaukwa ebe yi mene, iluk ineilenggen hikhi logouwageluk sumburu Manna iwak elema 2 liter mene kwalogo feino o,” iluk yagaisasikhe.

³³ A'nogo yagaisasikhesik Harun mel yagatikhe: ”Sumburu Manna ekhe 2 liter hangge nit ninagainafuri nen tagongge ninombalak faget waluk he, belanga misik mene elema kwalogo fuluk nineisena Tuhan eilhanem fei we'no o,” iluk yagatikhe.

³⁴ A'nogo yagatikhemo, at Harun nen sumburu Manna a'nogo mene belanga elema kwelagaisogo re, nineisena Tuhan nen, yi'nogo hilingi'no, iluk isikhe hagat fouwogeluk he, Peti Allah nen wene warogo wo'ninafikhe mene iluk werek mene a'nogo elokhoma fei wagaikhe.

³⁵ Sumburu Manna mene andi it afuni Israel mene inamburu agaikhemo, 40 tahun ninggi lagaukwasik, huli o Kanaan inebe logogun oba kwi wagaukwa huli ninggi lagaukwa.

³⁶ Afuni o omanggum welagaukwa andem sambul he, iwak fano mene ambe mondok hetokhogo kwalhi lagaukwa re, huli 20 liter nen kwalogo fikhi lagaukwa.