KELUARAN 15 - Allah Wene Fano Wene Hupla Inane

Musa nen wuni felalogo watikhe mene

¹ Afuni Israel mene inomen Allah fogerasuogeluk he, Musa nen wuni yi'nogo isikhe: ”Tuhan nineisena homame fogethafarek mene a'nogoba, Arat mabenetfisegen andi nen, An hat faget wuni wasigin o, Afuni Mesir mene mondogat inanggo kuda oba lagagasik wagaikha omanogo, Mondogat i yenggelek a'nogo ima lakfisegen.

² Tuhan nineisena homame hokho mene a'nogoba, An elele wo'nafen o, Harenat an telnafen. An neisena Allah harat ma, an harat fogethabigin, An nombalagen Allah fogethati lagaukwa hak, An nen hat henu esinet habigin.

³ Neisena Tuhan hebe re, weim mene hanini weagat welagen, Neisena, Henu re Tuhan.

⁴ It ap tentara Mesir mene inanggekereta mondogat inom, I yenggelek a'nogo ima lakfisegen. It ap tentara mene inogogwi weim ina'mage weak mene, I Gelagah yenggelek a'nogo ima pelaginafen.

⁵ A'nogo pelaginafenma re, helep enggen ima pelakfugunem nanumukhogo ial oba ma'lima pikherek andi hak, It inebe i yenggelek a'nogo nen haumhogo ningge.

⁶ Henupogot neisena, homameba elalin hilingiten, Homameba, selei mene wulil tagalogo inoaten.

⁷ Homame hokho fogethafarek mene a'nogoba, Hat hoasuogeluk agarek mene mondogat legetfisegen. Hat ha'mage re, endu amuilok yelang-melang ninggerek andi hanggema re, It andi engga lei ninggerek hangge inebe hali ningge.

⁸ I yenggelek a'nogo heleage futhegenmare, I habunarogo kat senghogo hilinglagasik, Kat senghogo helage palogo menlagama re, Ial oba elok wulibi wago.

⁹ Nit ninaselei mene nen ikhi logolik he, An nen muginarek lambik fakfisagain, Nenggarok lisogo wanimbik inebe legetfisagain. Inebe legetfisambik inangge mondogat telogo helagain, It ekhe sumburogo wogisikhi logolik, An nalawi engginet fakhambik, nalong pi-pe ikhi logogin,

¹⁰ iluk ikhe meneat he, Nineisena Tuhan nen heleage misigamat futhegenma, It Mesir mene ima pelaginafen. It inebe helep enggen enggin mene ima nanimukhogo pikherek andi hangge, I ha'labu inailo meneba nanimukhogo pelakfisegen.

¹¹ Afuni ekhe inawesa meneba himbirik welagaikharek andi hangge, Hat he andi hinom he higitsek lek, Hat hamunek tegelek mondok were'ma fogethafarek. Hebe futfagauwageluk elalin mene hokho hilingiten andi hak, Sa hagen a'nogo hilingisu hak nogo?

¹² Henggi ebekwe ninaselei mene inoba higit lakfegenma re, Inebe kweangen arat haumhogo ningge.

¹³ Haren wene wa'nisasigin mene higithogo hilingiten andi nen, Nit telninafendik wo'ninarek waga lagen, Homame hokho a'nogoba fetninarek welagen, Hat honggwarek hanggweang hore'ma wo'ninarek lageluk waga lagen.

¹⁴ Afuni inunggulenu lombok ekhe inesanggo holimbik, ina'manggen hokho mene lagain, Afuni Filistin mene inom, Afuni Edom mene inogogwi inom, Inesanggo holimbik, inoagelekwe lei'leik ugun.

¹⁵ Ap Moab mene weim inaniniweak mene a'nogo, inailo nen inoagelekwe abolok igin. Afuni Kanaan mene re inendawinggen legasigin.

¹⁶ Neisena Henupogoren hilingiten mene andi. It ekhe nen yagaisamo, inailo hokho asigin, Hat hagainafuri ninaselei mene inailokwe lagunem, inalpouweak hilingisugun lek, Hagainafuri telninafen mene andi re inanggwe selegat logoin.

¹⁷ O hat logoigeluk wenatigin oba andoma woginarek lamo, It hat honggwarek handom oba andoma logogun, O hat honggwaregen wusigin oba andoma logogun.

¹⁸ Andoma werek kwelek, Hat nit nineisena Henupogot kain logolik, Fetninarek mondok logogin, iluk wuni felalogo watukwa.

He Miryam en wuni felalogo watikhe mene

¹⁹ Afuni Israel mene i yenggelek a'nogo palogo wulibi waga logolik, i firokse'ma ial oba wulibi wagaukwa. A'nogo meneat he, afuni Mesir mene inangge kereta inom, inanggo kuda inom, inebe kereta ba lagaluk waluk nikharek mene inom, i yenggelek a'nogo palogo wulibi wagunem nineisena Tuhan nen i lambugetfesikhemo nabung-habunghogo sebelinafikhe.

²⁰ A'nogo sebelinafikhemo, at he Miryam Harun oe ebe Allah ane yagaisikhi lagaikhe mene nen angge e anggwe folelek mene fothugunem ane ikherek mene wanhikhemo, hemi ekhe mondogat inangge e anggwe folelek mene wanhukwasik fothikhi logolik, inom wuni lagik-wagik watukwa.

²¹ Wuni wati logolik, at Miryam en wuni anggup yi'nogo isikhe: ”Nineisena Henupogot homame fogethafarek mene a'nogoba, arat mabenetfisegen andi nen, hat faget wuni wasuok. Afuni Mesir mene mondogat inanggo kuda oba lagagasik wagaikha omanogo, mondogat i yenggelek a'nogoba pelaginafen o,” iluk wuni watukwa.

I arik weagen hilingitukwa wene

²² Hobuk at Musa nen afuni Israel mene i enu Gelagah yenggelek a'nogoba nen woginarek o leimo afuni le'ma enu Syer wagaikhe. Inenggi henagan oba waga logolik i mondok le'ma waga lagaukwa.

²³ A'nogo waga lagaukwasik, o enu Mara andoma i mondok arik weagen na mondok elo'lek oba andoma wagaukwa. I enduk arik weak andi nen, o andoma enu nit ninaneba, i arik weak u hak, it inaneba, Mara iluk agarek oba wagaukwa andi.

²⁴ Andi nen it afuni omanogo inane mul-mul Musa oba fesukwasik mel yagatukwa: ”Nit i koma mene nogoin nogo,” iluk heinok wokhasukwa.

²⁵ A'nogo yagatukwama, at Musa samban endawimo nen nineisena Tuhan kino yagatikhemo, aren e falelek mene ekhe inukhasikhemo, at Musa nen e andi ima woukhogo lakfesikhemo re, i a'nogo min fano afuni higit na hak hilinglagaikhe. O andoma nineisena Tuhan nen afuni Israel mene nen hilingiti logogun mene wene palogo wogisigik, inobabut paligiluk hilinginafik, isikhe.

²⁶ A'nogo ikhi logolik, mel yagaisasikhe: ”Hiren eberogoat mondok an nane hologo hilingitik, an nen andi fano iluk anggigirek mene andiat hilingitik, an nen, yi'nogo hilingiti logoino, ti'nogo hilingiti logoino, iluk komorogo yagahisigi mene andiat higithogo hilingiti logoino o. A'nogo hilingiti logogun halok he, an nen yi ou ti ou afuni Mesir mene inoba figi a'nogo hangge ekhe hinoba fagain lego. Hit hinebe se asuageluk hinoba fano hilinghinafirek mene hineisena Tuhan nebere Anaro,” iluk yagaisasikhe.

²⁷ A'nogo arat hilingi'luk he, it o enu Elim andoma wagaukwa. O andoma i elesi ebe 12 nen wulifi lagaikhe. Nen, wurama hangge mene enu kurma ero 70 nen welagaikheat. A'nogo were'ma it a'nogo o sabu tenda mene i era'lu andoma wutukwa.