KELUARAN 14 - Allah Wene Fano Wene Hupla Inane

Afuni Israel mene i laut Gelagah yenggelek a'nogo palogo wulibi wagaukwa wene

¹ Hobuk At nineisena Tuhan Musa mel yagatikhe:

² ”Afuni Israel mene inambotkwe lambik o sabu tenda mene o kota Baal-Zefon era'lu o kota Migdol honggolek, i laut enu Gelagah honggolek o kota enu Pi-Hahirot elokhoma higit andoma wusi loagen yagaisano o.

³ At raja Firaun endawimo nen he, afuni Israel mene omanogo o leimo afuni le'ma kwe nong agaikhasik horok yoma nikho, iluk anggagain o.

⁴ A'nogo anggikhe halok, An nen he, at endawinggen mondok helep hilingisogo foumo re, hit mukhinarek wesigin o. A'nogo meneat he, An nen at raja agoromi tentara mene inom An nomame inugisamo re, iren he, At Tuhan ebe Araro, iluk futfanimbik inelu asugun o,” iluk yagatikhemo, it afuni Israel mene nen he, at Tuhan yagaisasikhe higithogoat hilingitukwa.

⁵ A'nogo hilingitukwama, it afuni ekhe nen he, afuni Israel mene arat hela lagaikha, iluk isukwama at raja a'nogo esanggo holhikhesik he, at agoromi inomen he, ninggi'nogo hilingito he, ninabire, iluk inendawimo weak agaukwasik he, mel isukwa, ”Niren ninggi'nogo hilingisugun anggegep. Nit ninamingmingengge mondok legasuageluk, it afuni Israel mene andi lani iluk yagaisogo andi nenahalok,” iluk isukwa.

⁶ A'nogo isukwasik at raja nen agoromi weim yabugun mene logalogo fisigik, kereta weim yafarek mene fologo figik, isikhe.

⁷ A'nogo fologo fisasikhesik, at ebe inom, nen kereta ebe 600 mene at agoromi tentara kaindek mene nen waluk inom, it ekhe kereta waluk mene mondogat inom, inom wagaukwa.

⁸ At nineisena Tuhan en raja endawinggen helep mondok hilingisogo fesikhemo nogo nen he, afuni Israel mene nineisena Tuhan nen woginarek o Mesir en wulibi wagaikhesik wagunem muginarek wagaikhe andi.

⁹ Waga logolik, tentara Mesir mene wam kuda waluk mene mondogat inom, afuni kereta waluk mene inom, inomen afuni Israel mene muginarek i yenggelek a'nogo esanggoma o Pi-Hahirot andoma o sabu tenda mene wutukwasik were'ma inombo'ne wagaukwa.

¹⁰ A'nogo wagunem, afuni Israel mene nen at raja Mesir mene agoromi tentara inom wagunem ineilenggen yerisasukwasik he, inailo hokho agaikhesik, ”Tuhan Nineisena, telninabin o,” iluk inane hokhorogo yagatukwa.

¹¹ A'nogo yagatukwasik, Musa mel yagatukwa: ”O Mesir afuni salinafarek oba re, legen o yoma wa'lasuageluk wo'ninarek wagen nogo a? Hat hilingiten oba re, yi hilinglasugun yi yethan.

¹² Niren wene hilinglasigin yi faget attagat o Mesir en yagaheti logolik he, nit afuni Mesir mene inamingmingengge mondok logogun more, a'nogo yaganisagun o, iluk arat yagahetugu anggigi. A'nogo yagahetugu meneat he, afuni Mesir mene inamingmingengge a'limaat logouwem o leimo afuni le'ma yoma wo'ninarek wagenma re, wa'lasugun yoma ri?” iluk yagatukwa.

¹³ A'nogo yagatukwama, at Musa nen he, ”Hinailo anggagubo. Hinendawinggen hambukhogo logoni o. Nineisena Tuhan nen telninabigiluk ekhe hilingitunem hineilenggen hogoin o. Afuni Mesir mene hineilenggen yerisegep ari hobuk hineilenggen isogoin mondok lego.

¹⁴ Hiren ekhe hilingisugun mondok lego. We, nineisena Tuhan ebe ninebikhit asimbik inoasigiluk hilingisigin werek o,” iluk yagaisasikhe.

¹⁵ A'nogo yagaisasikhemo Tuhan nen he, Musa mel yagatikhe: ”Telhinabuageluk hane hokhorogo yaganeti lagen andi nenahalok? Afuni Israel mene pikhirat loageluk yagaisan o.

¹⁶ Haren, harige tomuk ari lekhambik i yenggelek ari agum oba higit lakfugunem he, i healogo poikwe, maikwe habuna ugunem he, afuni Israel mene i firokse'ma ial enek pililirekwe wulibubagaigen lakfein o.

¹⁷ An nen afuni Mesir mene inendawinggen helep hangge hilingisogo fisamo re, mukhinarek mondok wagunem An nomame raja Mesir mene ebe inom, agoromi inom, tentara esa logalek inom, inangge kuda inom, ap kereta waluk wesugun mene inom, inugisikhi logolik ekhe hilinginabigin werego.

¹⁸ A'nogo hilinginafunem afuni Mesir mene nen An faget he, At Tuhan Allah ebearo, iluk futnobagambik inelu asugun o,” iluk yagatikhe.

¹⁹ A'nogo yagatikhesik, Allah agoromi malaikat ekhe afuni Israel mene esa logalek inelokhoma waga lagaikhe mene higilogo inambotma higit asi lagunem he, o hena telik welagaikhe a'nogo higilogo,

²⁰ afuni Mesir mene esa logalek welagaukwa honggolek, afuni Israel mene esa logalek welagaukwa honggolek lagaikhesik he, mondok welagaikhe. A'nogo logolik, at ohena telik welagaikhe a'nogo nen it Israel mene inoba selegerati logolik, it Mesir mene inoba mum hilingisogo fesikhemo re, mum werek kwelek, afuni Israel mene esa logalek it Mesir mene esa logalek inom horokhogo ambi asu mondok elo'lek agaikhe.

²¹ A'nogo werek kwelek, at Musa enggi i yenggelek a'nogo agum oba higit lakfei wagaikhemo, At Tuhan nen sogoi mo liabi wagarek higiren aninirogo lakfei wagaikhemo i yenggelek a'nogo healhikhe. O hup inukhogo sogoi a'nogo funha wagu mondok kamo isikhemo, i yenggelek a'nogo mondok healagaikhesik firokhogo kweang weinam agaikhe.

²² A'nogo hilingiti logolik, i a'nogo pire minggil agaikhemo, afuni Israel mene i yenggelek a'nogo firok isikhesik poikwe maikwe habunarek werek kwelek ial ebene wulibi wagaukwa.

²³ Wagaukwama, afuni Mesir mene wam kuda inom, kereta inom, oba lagasukwasik, afuni Israel mene muginarek inombo'ne mondok i yenggelek a'nogo enggen tulem ki wagaukwa.

²⁴ Ki wagaukwama, o hil mogolhu kwelek nineisena Tuhan ebe endu inom, ohena inom, telik welagaikhe a'nogo nen eilenggen tentara Mesir mene yerisasikhesik he, mondogat weagerinafikhe.

²⁵ Inangge kereta eisok nong-honget fesikhemo inoba wesu re, mondok elo'lek agaikhe. A'nogo hilingfesikhemo, it afuni Mesir mene nen he, mel isukwa: ”Afuni Israel mene ineisena Tuhan it werekwe agasik nit ninoasigiluk hilingiri'lago higi. Halok nit ya nenat heise louwogen we'ni o,” iluk isukwa.

²⁶ A'nogo isukwama At Tuhan nen Musa mel yagatikhe: ”I ambotkwe nabung-habung hikhi logolik afuni Mesir mene inebe inom, inangge kereta inom, sebelinabuagen he, henggi i agum oba higit lakfein o,” iluk yagatikhe.

²⁷ A'nogo yagatikhemo, at Musa enggi i yenggelek a'nogo agum oba higit lakfesikhemo, o hil mogolhu kwelek i ambotkwe welagaikhe hagat hilinglagaikhe. A'nogo hilinglagaikhemo, afuni Mesir mene omanogo inebe teluogeluk walhasukwa meneat he, nineisena Tuhan nen inebe i yenggele'ma mondok pelaginafikhe.

²⁸ Andi nen he, i a'nogo ambotkwe nabung-habunghogo afuni inebe inangge kereta elonggoma welagaukwa mene inom, tentara afuni Israel mene muginarek i yenggelek a'nogo enggen tulem ki wagaukwa mene ekhe mondogat inom, sebelinafikhemo wa'lagaukwa.

²⁹ A'nogo wa'lagaukwa meneat he, afuni Israel mene i yenggelek a'nogo firokhogo ponggwe manggwe habuna isikhemo ial ebene nen wulibi wagaukwa mene omanogo nek he, fano wulibi wagaukwama,

³⁰ At Tuhan nen afuni Israel mene Mesir mene nen inoasuogeluk wagunem telinafikhesik afuni Mesir mene inoatikhe mene omanogo inebe warek hambokhogo i esanggoma wulakfisa wagaikhe.

³¹ A'nogo wulakfisa wagaikhemo afuni Israel mene ineilenggen hasukwasik, Nineisena Tuhan omame hokhore'ma afuni Mesir mene mabenetfisaluk inoate andi nailo e, iluk hokhorogo fogeratukwasik, inendawinggen Allah oba himbiretfigik, At amingmingengge Musa ebe futfigik, isukwa.