KELUARAN 13 - Allah Wene Fano Wene Hupla Inane

Omalik manggusa tago Tuhan faget fesukwa wene

¹ Tuhan nen Musa yagati logolik he,

² ”Hiren hinomalik abengge manggusa tago mene mondogat An nobaget feni. It afuni Israel mene inomalik, abengge manggusa tago inom, yi wam ti wam eak attak-attak tatu mene halok ebe ai mene andi re, An nonggwarek mene o,” iluk yagatikhe.

Roti fiterek lek meneba weragongge nasukwa wene

³ Musa nen it inggulenu israel mene a'nogo inoba yagaisikhi logolik he, ”Linggene yi sambul Tuhan omame hokho meneba hit o Mesir mene nen enggin-fenggin hinoba fikhi logolik sebelhinarek were'ma omanogo nen lologo hinobagaikhemo wulibi wagep. Andi halok he, lingge andi sambul he, ebeti logolik logoino roti fitu meneba hilingik menere nafuk.

⁴ Yogondak linggene yi tanggal 1 tugi Abib athe tugi misik oba hit o Mesir en herakfuluk wulibugun andi.

⁵ At Tuhan nen afuni inunggulenu o Kanaan mene inom, Het mene inom, Amori mene inom, Hewi mene inom, Yebus mene inom, inaiba andoma wokhisagain iluk hinombawi inoba hombuk palogo wene warisasukwama andoma o kweang mondok muli fano yi mene ti mene mondok weregenek hilingi'mo wokhinarek o andoma hinobagai lagain enggere, hit mondogat lambik halok he, tahun ekhe wagunem tugi Abib andiba hiren wene yi faget kabogeti logogun.

⁶ Linggene sabiren hunugisogo andi re, hiren roti fiterek lek mene nek ninggi lagoino, nen hinenggi sabiren andi halok enek he Tuhan faget fogerati logolik wene kabogeti logogun.

⁷ Hinenggi sabiren andem oba re roti fitungge werek mene ekhe nenggep hanogo nen he, hit hinawilokwe yi awi ti awi mondogat he roti fitungge mene inom, amu mene ekhe fitungge oba werek mene inom, fisogo logogun mondok lego.

⁸ Nen hiren seni andi eroratu sambul he, hit hinagainafuri ap mene inoba tindelisikhi logolik he, ”Niren mondogat a'nogo hilingiti lago andi re, nit o Mesir herakfuluk wulibi wagunem Tuhan nen yi'nogo ti'nogo wo'ninarek wagaikhe,” iluk tindelisikhi logogun.

⁹ Niren seni isati lago mene andi re, inendawinggen wenggelogo iluk inenggi falfalik oba pugetik, inelhaba pugetik u hak he, nineisena Tuhan omame hokho mene a'nogoba hit o Mesir en waganogo wulak hinobagai wagaikhe andi. Andiba re, hiren seni yi mene hilingiti logogun oba re, wene melalek yi'nogo hilingi'no ti'nogo hilingi'no iluk werek mene a'nogo hinambeba nen igik, ebe furogo pilingitik, ikhi logogun.

¹⁰ Seni yi faget tahun ekhe wagunem hundik-handik ninenggi wenagaisogo fogo mene andiba higirasi wagunem isati logogun o,” iluk yagaisasikhe.

Omalik manggusa mene faget isikhe wene

¹¹ Musa nen it afuni inunggulenu Israel mene a'nogoba yagaisikhi logolik, ”Tuhan nen he o Kanaan hit hinombawi inoba hombuk palogo wene warisasikhe andoma hondoginarek lagain. Hondogaisogo hinobagai lamo hiren, kweang andi hit mondogat hinanggweang mene asigin mo re,

¹² hiren hinomalik ap manggusa mene inom, nen yi wam ti wam eak attak ta'lasigin mene inom, Tuhan faget fisikhi logogun. Mondogat andoma re Tuhan onggwarek mene.

¹³ Oba nen he, wam keledai omanggumet tago mene re ai mene andoma Tuhan obaget fugu mene a'nogo agamhogo obali'mo re, domba eagwi fikhi logogun. Nen hiren keledai a'nogo agaumetu aple hinabit halok he, keledai a'nogoat alonggop komukhogo wati logogun. Hit hinamlogomi abengge manggusa tago mene elama faget inonggo palinafi logogun.

¹⁴ Hobuk andoma, hit hinamlogomi nen heinok wokhinafi logolik, mondogat andoma re ninggi'nogo faget? Iluk heinok wokhinafu halok, onggo yi'nogo yagaisikhi logoin o, ’Tuhan omame hokho meneba nit o Mesir kweang oba andoma helewarek were'ma lologo wulakninabi wagaikhe mene faget hilingiti lago o.

¹⁵ Wene andi re, at raja Mesir mene ungguloak mondok haro hilingi'mo, nit loageluk oboget nisigi'legengge fetninarek were'ma, At Tuhan en afuni Mesir mene inagainafuri ap manggusa mene nek folhigik, inanggo yi wam ti wam eagwi mondogat inom pinggi inoatikhe. Andi faget he, niren wam eak attak ta'lagu menere Tuhan obaget warogo fisikhi lago, andiba re, nit ninagainafuri manggusa mene obali'mo telogo fisikhi lago,’ iluk yagaisikhi logogun.

¹⁶ Niren a'nogo ninetokhogo hilingiti lago andiba re, ninendawinggen wenggelogo ninenggiba inom, ninelhaba inom, pugetunem eberek welago a'nogo hak, niren a'nogo hilingiti logogun oba re, At Tuhan nen he omame hokho meneba o Mesir en woginarek wulibi wagaikhe iluk ebethikhi logogun.” iluk yagaisasikhe.

Linggene ohena mene elonggoma menlagik, nen, hubanggo endu mene elonggoma menlagik, inelokhoma waga lagaikhe wene

¹⁷ At raja Firaun nen afuni Israel mene wulibuageluk arat yagaisasikhemo, Allah nen, ”Kwe horokhogo afuni Filistin mene inailokwe woginarek lamo it Israel mene inendawimo nen he, afuni Filistin mene ninom weim yabugun yoma ninabit. Ninambotkwe ninaiba Mesir louwok, iluk inendawi mo angganogo,” iluk endawimo ebetikhesik he, afuni Filistin mene inaiba re, kwe horogat meneat he, andi kwe woginarek wagaikhe lek andi.

¹⁸ We, kwe lagokhogo o leimo afuni le'kwe nen i enu Gelagah mogo yenggelek fikhit andoma nen lagokhogo woginarek wagaikhe. Andi sambul he, afuni Israel mene o Mesir herakfuluk weim yabuogeluk hangge inasikhe inarige lik-loukhogo wulibi wagaukwa.

¹⁹ A'nogo wulibi wagi'lek werek kwelek, attak at Yusuf ebe eluk logolik oba, afuni Israel mene hombuk paluageluk yi'nogo yagaisasikhe: ”At nineisena Enupogoren telogo wokhinarek wulife halok he, an noak o yoma nen wo'narek lano o,” iluk yagaisasikhe andi nen, at Musa nen Yusuf oak waluk wulibi wagaikhe.

²⁰ It afuni Israel mene a'nogo o Sukot herakfuluk he, o leimo afuni le'ma o kota Etam esanggoma andoma o su mene wusi wagaukwa.

²¹ At nineisena Tuhan ebere, it afuni Israel mene kwe wogisageluk, linggene re, ohena anggele'ma agik, nen, hubanggo re, endu anggele'ma agik, menlarik inelokhoma attagat menlarik waga lagaikhe. A'nogo wagunem nogo nen he, afuni Israel mene re hup hundik, lingge hundik, waga lagaukwa.

²² O lingge hundik ohena anggele'ma menlagik, nen, hubanggo hundik endu anggele'ma menlagik, kamo igi'lek hundik-handik inelokhoma waga lagaikhe.