KELUARAN 12 - Allah Wene Fano Wene Hupla Inane

Pesta Paskah hilingiti logogun mene a'nogo attak-attak eroratukwa wene

¹ A'nogo hilinglagaikhemo, hobuk At Tuhan en Musa Harun emberek o Mesir were'ma mel yagaisasikhe:

² ”Tahun ebe lombok tugi hinenggi wenati logolik he, tugi yi attak wenasugun mene hilinglasuago. Hinenggi a'nogo wenati logoino, iluk yagahisigi mene andi, hiren afuni Israel mene mondogat inoba yi'nogo yagaisano:

³ Tugi yi mene tanggal 10 oba hit ap hinebe lombogen domba misiktek hinagainafuri hinom nogoin mene warogo senggelik lano o.

⁴ Wam domba andi warogo re afuni inebe wam andi nogoin mene inebe lombok inenggi wenagaisogo palugun fano. Meneat he, ap ekhe againafuri inebe endebat hilingi'mo, wam domba eak misik mene andi warogo felelenghogo na re, elo'lek asigin halok, ap ekhe inagainafuri inebe hokhorogo werek mene inom, wam andi felelenghogo nouwogeluk he, hinom lambukhogo nano.

⁵ Hiren he, wam domba a, athe kambing a, ekhe wendeberogo fogoin higit mene at he, ebe ai mene umur satu tahun mene esi ebe mondok fano mene halok wendeberogo fogoin o.

⁶ A'nogo arat wendeberogo hinakfuluk were'ma nen, tanggal 14 oba hu'mokwe asi lagu halok he, o andi sambulat hit afuni Israel mene mondogat wam domba andi warogo senggelik logoin o.

⁷ A'nogo warogo senggelhi logolik he, amep endebat ekhe wanimbik, o it inebe logolik wam nogoin oba andoma, kwe ebekhalem e fena-fena telogo liabek mene andem ebene watik, e kwe ambe ambolkwe meneba watik, ino o.

⁸ A'nogo hilingi'luk he, o hubanggo andibaat wam andi endu enggen oba weragaisogo re, wundat arik weak mene isago inom, sumburu roti enggen fitungge mene inom werago lek mene inom nano.

⁹ Wam domba eak andi ebe inom, unggul palek inom, oagengge inom, al inom, mondogat endu enggen oba wera'no o. A'nogo arat weratep halok ninggi logolik, elonggoma mep oan werek halok inom, iba isago mene halok inom, nogoin mondok lego.

¹⁰ A'nogo ninggi logolik tindelagu halok, kop fuluk ohealekwe nogoin mondok lego. We, kop figi'lek mondok felelenghogo endu nolugun fano.

¹¹ Hit wam andi ninggi logolik he, hinasu kwe louwogeluk labetarek andi hagat labetik, sandal hineiso'ma itik, iluk he, hinenggimo sige tomuk fisogo mondok logolik nano o. Ninggi logolik he, weak-weakhogo nek nunggunogo. A'nogo nogoin andi re, An hineisena Tuhan fogetnabuogeluk Pesta Paskah nogoin he a'nogo andi.

¹² A'nogo nogoin andi sambulat hubanggo An o Mesir yi awi ti awi mondogat neilenggen kogolik waga logolik, inagainafuri manggusa tago ap mene nek inom, it inanggo ai mene attagat tago mene inom mondogat inoasigin. Nen, afuni Mesir mene nen yi mene ti mene oba himbirik logolik fogeratarek mene andi mondogat weaget fisagain. An Nebere Hineisena Tuhan.

¹³ A'nogo weaget fisambik waga logolik, hit hinailokwe wam mep warek logogin andi nen enegat hilinglasigin o. A'nogo enegat were'ma, An nen afuni Mesir mene legetfisilik waga logolik, hit ogalhinobagaluk lagain o.

¹⁴ A'nogo hinoati'lek herakhinobagagin andi nen, hiren he, Nineisena Tuhan nen he o yi sambulat ninoati'lek herakninobagasikhe iluk, An noba ebetnafi logolik, ninggi logogun mene attak-attak erora'no. A'nogo naluk he, hobuk tahun ebe lombok oba, hiren Pesta Paskah andi hakhogoat ninggi logoino ikhe, iluk yagaisano,” iluk Musa Harun emberek inoba yagaisasikhe.

Sumburu roti enggen fiterek meneba weragongge ninggi logogun lek iluk yagaisasikhe wene

¹⁵ Nineisena Tuhan nen a'nogo yagaisasikhesik, ekhe mel yagaisasikhe: ”Hinenggi 7 nen logolik, sumburu roti enggen fitungge mene inom werago mene halok nagubo. Hinenggi 7 nen andiba logolik, afuni ekhe nen sumburu roti enggen fitungge mene andi inom werago mene nogoin halok, it inebe An nagainafuri, iluk igin mondok lek andi nen he, hinenggi 7 nen andi mene ninggi logouwogeluk he, hinenggi attak meneba logolik, hit hinaiba enggen sumburu roti fitungge mene andi ekhe werek halok, felelenghogo wulak fisogoin o.

¹⁶ Hinenggi 7 nen logouwogeluk attak logogun andiba inom, hinenggi 6 en wela'luk ekhe andiba inom, hinebe misi'mo andoget fuluk, An fogetnafi logoguno o. Hinenggi andem oba logolik he, hinenggingge ekhe wanhi'lek, we, sumburu nogoin mene nek werakhigik, tegelogo fikhi logoino o.

¹⁷ O andem higithogoat, An nen hit afuni hit mene mondogat o Mesir en wokhinarek wulibi wagi o. Andi nen he, tahun ebe lombok, o andem oba higit asi wagu halok, An faget roti fiterek lek mene ninggi logolik a'nogo hilingiti logoino.

¹⁸ Tahun ebe lombok, a'nogo hilingiti logolik, o andem oba higit asi we'luk, tugi attak mene foleligin andiba tanggal 14 oba hubanggo nen huli tanggal 21 hubanggo logolik, sumburu roti enggen fitungge mene andi inom werago mene hit ekhe nogoin mondok lego.

^19-20 O hinenggi 7 nen andi logolik, enggen sumburu roti fitungge andi mene hinaiba nen mondok felelenghogo wulakfisano o. Afuni Israel mene ogo, athe, afuni ap pok mene ogo, sumburu roti enggen fitungge mene andi inom werago mene nunggu halok, it inebe an nagainafuri re lek u hago,” iluk yagaisasikhe.

Seni Paskah attak-attak nasukwa wene

²¹ Nineisena Tuhan nen a'nogo yagaisasikhemo, at Musa nen afuni Israel mene inogogwi wesuageluk inayonggo fesikhemo wagaukwama re, mel yagaisasikhe: ”Hinagainafuri hinom Pesta Paskah nobagaigen he, wam domba eak misigat mene ekhe wani lani o.

²² Wani laluk warogo re, amep loyang elema keralogo fuluk he, musan hangge mene enu hisop engga misigenek keralek mene mep andiba yugul haluk he, kwe esanggo fena-fena e telogo liabek meneba watik, e nunggulik mene kwe ambe ambolkwe meneba watik, ino o. A'nogo hilingfuluk hubanggo o wei igi'lek werek kwelek hit ekhe hinaiba andoma nen wulibugun mondok lego.

²³ A'nogo watfuluk were'ma, nineisena Tuhan afuni Mesir mene inoasigiluk eilenggen kogolik waga logolik, domba amep hit hinaiba kwe ambe fana-fena e liabek meneba inom, e kwe ambe ambolkwe meneba inom, warek were'ma eilenggen haluk he, hit hinaiba ogalhisaluk pikhit laga logolik, malaikat afuni inoaterek mene hit hinaiba hinoasi kwigi'lek pikhit loageluk yagasigin o.

²⁴ Hit hinagainafuri hinomen wene Allah nen, yi'nogo hilingiti logoino, iluk komothinafikhe wene andi hologo hilingitu mondok logoino.

²⁵ Hit hinebe o nineisena Tuhan nen wokhisageluk wene wathisasikheba andi arat kwi lagep halok he, Allah nen telninafikhe, iluk hilingitep andi hakhogoat andoma hilingiti logoino aro.

²⁶ A'nogo hilingitunem hinagainafuri nen he, yi re ninggi'nogo mene faget hilingiti lago nogo, iluk heinok wanhu halok,

²⁷ hiren he, Nineisena Tuhan nen afuni Mesir mene inagainafuri ap manggusa mene mondok inoarik waga logolik, nit Israel mene ninaiba ninebe ninoasi kwigi'lek nineluk herakninobagaluk lagaikhe andi nen, At fogerati logolik wam domba warogo seni Paskah ninggi lago o, iluk yagaisikhi logoino o,” iluk yagaisasikhemo, it afuni Israel mene omanogo ineindep awi yagaisogo At Allah fogeratukwa.

²⁸ A'nogo fogera'luk lagaukwasik he, nineisena Tuhan nen ”Yi'nogo hilingiti logoino,” iluk Musa Harun emberek yagaisasikhe higithogoat hilingitukwa.

Afuni Mesir mene inagainafuri ap manggusa mene nek malaikat en inoatikhe wene

²⁹ A'nogo hilingitukwama, o hubanggo andi sambul hup enggen tulem nineisena Tuhan nen afuni Mesir mene inagainafuri ap manggusa mene nek, ero at raja Firaun amlogoba nen pikhit ap inenggi hele warek welagaukwa mene huli inagainafuri mondogat inoatikhe. A'nogo inoati logolik, wam eagwi attak tago mene mondogat inoatikheat.

³⁰ A'nogo inoati logolik, o misik meneba omalik misik iluk ekhe ineluk fisigi'lek inoatikhe andi nen he, le mondok hokhorogo agunem, inane inesanggo holhukwasik, at raja inom, at agoromi inom, afuni Mesir mene mondogat inom, hokhorogoat ineluk agaukwa.

³¹ O hubanggo andi sambulat at raja nen Musa Harun emberek wolisasikhemo wagaukwama re, mel yagaisasikhe: ”Hinebe mondogaren he, Nineisena Tuhan fogerasi louwogeluk logoin, iluk kino yaganetep higithogoat he, an naiba yoma herakfuluk lani o.

³² A'nogo laga logolik, hinanggo mondogat sapi inom, domba inom, kambing inom, waluk lambik, hineisena Allah nen an fanotnabuageluk ayonggo feino aro,” iluk yagaisasikhe.

³³ A'nogo yagaisasikhemo, it afuni Mesir mene nen he, afuni Israel mene mel yagaisasukwa: ”Hit weak-weak logoin lek halok he, nit ninebe mondogat wa'lasugun o. Halok hit o yoma herakfuluk weak-weak lani o,” iluk miminginafukwa.

³⁴ A'nogo miminginafukwama, it afuni Israel mene omanogo tepung sagalek mene sumburu roti werasuogoluk enggen fitungge mene figi'lek mene loyang elema hilingisogo wanhukwasik he, su kain oba yinggilhigik wanhukwa.

³⁵ A'nogo wanhi logolik, at Musa nen he, afuni Mesir mene yi'nogo kino yagaisano, iluk yagaisasikhe hagat, inalilingge emas mene inom, perak mene inom, su inom, wogisoageluk kino yagaisasukwa.

³⁶ A'nogo kino yagaisasukwama, at nineisena Tuhan nen afuni Mesir mene inangge it afuni Israel mene inendawirogo wogisoageluk hilingitikhemo, yi mene ti mene mondogat it afuni Israel mene nen, ”Nit ti mene wo'nisobagaigen,” iluk kino yagaisasukwa mene mondogat wogisasukwa. A'nogo hilingitukwa andiba nen, afuni Mesir mene inangge yi mene ti mene onggo hokho mene omanogo re, it afuni Israel mene nen felenghogo helaluk wulibi wagaukwa andi.

Afuni Israel mene o Mesir herakfisaluk wulibi wagaukwa wene.

³⁷ It afuni Israel mene andi a'nogo wulibi wagaukwasik, inebe hemi inom, yenggerugwi inom, inenggi wenati'lek, we, abenek huli 600.000 nen o kota Raameses nen o kota Sukot ineisok oba mondok wagaukwa.

³⁸ A'nogo waga logolik, inanggo hokhorogo sapi inom, domba inom, kambing inom waluk wagunem, inanggele'ma afuni pok mene inomat inebe hokhorogoat inom wagaukwa.

³⁹ A'nogo wesuogeluk ugunem, afuni nen mondok ninghogo mugisasukwama, sumburu ebekhalem nogoin mene fanorogo tegelogo heligi'lek, we, sumburu roti werasuogeluk enggen fitungge mene inom pelafi'lek mene o Mesir en waluk wagaukwa mene omanogo nek weratukwa.

⁴⁰ It afuni Israel mene wulibi wagaukwa andi 430 tahun o Mesir welagaukwasigen wulibi wagaukwa.

⁴¹ A'nogo welagaukwasik, 430 tahun arat kobokhogo re, At Tuhan nen againafuri Israel mene andi o Mesir arat herakfisaluk wulibi wagaukwa.

⁴² Nineisena Tuhan nen afuni Israel mene o Mesir en woginarek wulibi wesigin sambul andi re, it faget kagalek mondok welagaikhe. Nen o andi sambul faget ogore nineisena Tuhan nen yi'nogo telninafikhe, iluk inendawimo eberek mondok logolik Allah faget hilingitu mondok logogun mene hilingitukwaat andi. Ohealekwe hubanggo andi sambul a'nogo hilingiti logolik afuni Israel mene yi mene ti mene tik-tukhogo fesukwasik, inafe hibil hebelhogo welagaukwa.

Seni Paskah isati logolik hilingiti logogun wene

⁴³ Tuhan nen Musa Harun emberek yagaisikhi logolik he, ”Hiren seni Paskah isati logolik hilingiti logogun he yi'nogo: Ap pok mene halok he linggene Paskah andiba wam domba watu mene andi eino ninggi logogun lek o.

⁴⁴ Oba nen he, hit hinamingmingengge hiren onggoba hunirasigip mene nen at andi agap enggalimo mene arat palek halok enek he, hit hinom seberogo nogoin halok fano.

⁴⁵ Ap o ekhema nen wagaikha mene inom, ap yabu onggo faget hilingitarek mene inom he, hit hinom seberogo negoin lek o.

⁴⁶ Domba eino andoma mondogat he oloba nen enek mondogat nunggunogo, enda'ma ekhe waluk wulibi la fuk. Nen, oak he we misigenek iluk ogo ekhe sombolufugat.

⁴⁷ It afuni Israel mene inebe mondogaren linggene andi sambul esinet fikhi logolik legeisogo fuluk obaget hilingiti logogun.

⁴⁸ Ap inagap inenggalimo mene palek lek mene halok he seni Paskah andi nunggunem hinom ninggi logogun lek. Nen ap pok mene ekhe hit hinom mondogat sebe egepsik welagep mene halok he, at andi eisok erokwe nen ap mene halok attak-attak inagap inenggalimo mene palinabugun halok fano. Andi mondogat hilingfuluk enek he it inebe afuni Israel inonggwarek mene hak hilingfuluk, it hinom seberogo Paskah faget isatunem andi hinom hilingiti logogun.

⁴⁹ Wene lenggalek misik andi re, hit Israel hinonggwarek mene faget inom, nen it pok meneba nen hit hinanggelekwe femhogo werek mene inom faget logogin,” iluk yagaisasikhe.

⁵⁰ A'nogo yagaisasikhemo re, it afuni Israel mene a'nogo Tuhan nen Musa Harun emberek lenggal fisasikhe aple a'nogo ane hologo higithogo nek hilingitukwa.

⁵¹ Linggene andi sambul he, Tuhan nen it afuni Israel mene mondogat o Mesir en woginarek wulibi wagaikhe.