KELUARAN 11 - Allah Wene Fano Wene Hupla Inane

Musa nen, ”Omalik manggusa mene felelenghogo wa'lasugun,” iluk husumbi yagaisasikhe wene

¹ A'nogo hilinglagaikhemo, hobuk At Tuhan nen Musa mel yagatikhe: ”An nen raja Firaun inom, afuni at agoromi mondogat inom, wene misigat wure'ma ekhe inoba fagain o. A'nogo inoba fugunem, aren he, lani imbigen he, hinebe mondogat mugusogo wulakhinabi wesigin o.

² Andi nen he, afuni Israel mene hinom wene fanorogo ino o. Ikhi logolik, iren afuni Mesir mene ekhe o inom horokhogo welagaikharek mene inalilingge emas mene inom, perak mene inom, kino yagaisoageluk yagaisano o,” iluk yagatikhe.

³ A'nogo yagatikhesik, At Tuhan nen he, afuni Mesir mene inangge it afuni Israel mene inendawirogo wogisoageluk hilinginafikhe. Nen at raja a'nogo agoromi pegawai nen inom, afuni Mesir mene ekhe mondogaren inom, Musa mondok agaugwerati lagaukwaat.

⁴ A'nogo hilingitu were'ma, at Musa nen at raja Firaun a'nogo mel yagatikhe: ”At Tuhan nen he, mel ikhe: ’An nebe o yogondak hubanggo o Mesir yi awi ti awi yoma nikhi logogin o.

⁵ A'nogo nugunem afuni Mesir mene hinagainafuri ap manggusa mene inebe lombok mondogat wa'lasugun o. Andi re, hat kain hagainafuri nen pikhit hemi hinamingmingengge sumburu gandum mene enggen sagalharek mene ineagwi inom wa'lasugun o. Nen, hinanggo ebe lombok mondogat eak attak tago mene mondogat wa'larik lagain aro.

⁶ A'nogo wa'lagunem, afuni o Mesir yi awi ti awi mondogat andoma lenggu-lengga ugu mene nek holhi logogun. Le andi hak mene o attak ogo ekhe holha lek mene hobuk ekhe hilinglasigin lek mene.

⁷ A'nogo meneat he, afuni Israel mene inailokwe nek he, afuni inebe inom, wam inom, weagerinafik, inoba sebelhik, igin mondok lego. A'nogo hilingitunem fut fembik, hiren, andi afuni Israel mene ineisena Tuhan nen nit afuni Mesir mene ninoati logolik, afuni Israel mene herakfisikhemo enegat hilinglaga, iluk futfanubagaigeluk a'nogo hilingisigin o, iluk ikhe,’ ” iluk yagatikhe.

⁸ A'nogo yagatikhesik, wurep oba re, mel yagatikhe: ”Noe. Hobuk hat hagoromi pegawai mondogat an nawe a'ma ineindep awi yagaisogo wesimbik he, Hat hebe inom, afuni hat hagoromi inom, o yoma herakfuluk he, lani o, iluk yaganesi wesugun. A'nogo hilingisumo nen he, an lagain o” iluk yagatikhe. A'nogo yagatikhesik a'mage lagasikhesik inoe raja a'nogo herakfuluk wulibi lagaikhe.

⁹ Wulibi lagaikhemo re, At Tuhan nen hobuk Musa mel yagatikhe: ”An nen it afuni Mesir mene futfouwageluk, elalin mene hokhorogo o Mesir yoma yi awi ti awi ekhe hilingisigin anggigi andi nen he, at raja nen he haren yagasigin mene andi hologo hilingiti'lek herakfisagain o,” iluk yagatikhe.

¹⁰ A'nogo yagatikhe hagat, Musa Harun emberegen afuni Mesir mene futfouwageluk, elalin mene andi at raja eilhanem hilingitukwaat meneat he, At Tuhan nen at raja endawinggen haroat hilingisogo fesikhemo re, afuni Israel mene at aiba Mesir andoma herakfuluk loageluk yagaisa abirat agaikhe.