KELUARAN 1 - Allah Wene Fano Wene Hupla Inane

Afuni Israel mene o Mesir were'ma yi enggin ti enggin hilinginafi lagaukwa wene

^1-4 At Yakub enu ekhe Israel ikhi lagaukwa mene a'nogo againafuri inebe lombok inagainafuri inom o Mesir lagaukwa. At Yakub againafuri andi inenu re: Ruben, Simeon, Lewi, Yehuda, Isakhar, Zebulon, Benyamin, Dan, Naftali, Gad, Asyer inom wulibi lagaukwa.

⁵ At Yusuf attak o Mesir lagaikhesik were'ma, at Yakub againafuri inom inebe mondogat he 70 nen hobuk lagaukwa.

⁶ Lagaukwasik welagaukwasik oba nen, at Yusuf agaila'lak inom inebe wa'larik lagaukwa. Andi hak, at oe agot at inom ambine mene wa'larik lagaukwaat.

⁷ A'nogo wa'larik lagaukwa meneat he, afuni Israel mene nen taginafukwa mene inombalak inebe mondok hokhorogo ta'larik lagunem he, inebe weak-weagat sik-pik ikhi lagaukwa. Inebe a'nogo hokhorogo hilinglagaukwa andi nen, o Mesir oba andoma it enek saga ikhi logolik inomame agaukwa.

⁸ Hobuk at raja Firaun ekhe Yusuf onggot mene menfesukwama afuni Mesir mene awe a'ma ferinarek welagaikhe.

⁹ Ferinarek logolik aren mel yagaisasikhe: ”Afuni Israel mene andi inebe hokho aga logolik, inomame mondok hokho hilinglagaikhasik nit ninomame it ninom higit mondok le'ma re, nit mabenet ninabu hak ari'lago.

¹⁰ Weim kagalasigin halok, it selei mene inom fano asimbik, nit ninoa'luk o yoma herakfuluk ekhema wulibugun anggikhi lagi o. Halok, it hobuk inebe hokho asinogo iluk niren ekhe hilinginabuogo,” iluk yagaisasikhe.

¹¹ A'nogo yagaisasikhemo, afuni Mesir mene nen it Israel mene inoba enggin-fenggin fikhi logolik, yabu mondok hokhorogo hilingitunem ane ninghogo yagaisikhi logouwageluk menfisilik lagaukwa. Lagaukwama, o Mesir mene kota ekhe enu Pitom inom, Raamses inom, yi mene ti mene at raja Firaun faget fikhi logogun oba o hokhondek mene wutfisoageluk inane ning-nanghogo yagaisikhi lagaukwa.

¹² It afuni Mesir mene nen yi enggin ti enggin a'nogo hilinginafi lagaukwa meneat he, afuni Israel mene inebe mondok hokhorogoat wialarik lagunem, o Mesir yi awi ti awi andoma it mondok saga isukwama, it afuni Mesir mene nen Israel mene faget inailo aga lagaikhe.

¹³ A'nogo inailo aga logolik, afuni Mesir mene nen it Israel mene inomamerogoat yi enggin ti enggin hilinginafi lagaukwa.

¹⁴ Inebe yi enggin ti enggin hikhi logolik, inendawimo mondok weak asuageluk a'nogo hilinginafi lagaukwa. Inebe inendawi isigi'legat, yabu mondok enggin mene o wutik, yabu wanhik, ikhi logouwageluk inane mondok ninghogo yagaisikhi lagaukwa andi.

¹⁵ Hobuk at raja Firaun nen hemi inebe pire mene Ibrani mene ineagwi takhugunem leberisikhi lagaukwa mene inenu Sifra inom, Pua inom mel yagaisasikhe:

¹⁶ ”Hit hemi Ibrani mene ineagwi takhugunem leberisikhi logolik he, yi'nogo hilingiti logoino: Omalik ap ta'lagu halok inoati logolik, hemi ta'lagu halok ineluk herakfisikhi logoino,” iluk yagaisasikhe.

¹⁷ A'nogo yagaisasikhe meneat he, it hemi inebe pire aremnogo nen Allah inailo logolik, at kain nen yagaisasikhe mene a'nogo hologo hilingiti'lek herakfuluk, inomalik takhugunem abet helimeet inoati'lek inanum palogo fisikhi lagaukwa.

¹⁸ A'nogo hilingiti lagaukwa andi nen at kain nen hemi pire omalik taginafunem leberisikhi lagaukwa mene aremnogo wolisasikhesik he, heinok yi'nogo wogisasikhe: ”Hiren omalik ap mene inoati'lek ineluk herakfisikhi lagep andi nenahalok?” iluk yagaisasikhe.

¹⁹ A'nogo yagaisasikhemo, iren yagati logolik, ”Nineisena. Hemi Ibrani mene andi hemi Mesir mene ninom higit le'ma re, it he inomame mondok hokho logolik inomalik serogo takhagarek andi nen, nit leberisogoin iluk lagu kwelek, inomalik arat takhugunem laga lago o,” iluk yagatukwa.

^20-21 It hemi omalik tatunem leberisikhi lagaukwa mene andi, Allah inailorogo hilingiti lagaukwa andi nen, Allah nen inebe fanorinafik, iren tagongge mene wogisigik, ikhi lagaikhe. Nen, afuni Israel mene ogore, inebe mondok hokhorogat aga logolik, inomame hokho aga lagaukwa.

²² A'nogo hilinglagaukwama, at raja Firaun nen he, afuni Mesir mene mondogat inoba yi'nogo yagaisasikhe: ”Afuni Israel mene inomalik ta'lagu halok, abengge halok he, i Nil ima lakfisikhi logolik, helengge ta'lagu halok he, inanum palinafunogo,” iluk yagaisasikhe.