IMAMAT 9 - Allah Wene Fano Wene Hupla Inane

Harun nen Tuhan obaget warogo nolhikhe wene

¹ It imam en hilingitu mene faget mondogat kabogetukwasik a'nogo inenggi misik welagaukwasik ohealekwe lingge tulem oba at Musa nen Harun inom, at amlogomi inom, it afuni Israel mene inogogwi kaindek mene inom inayonggo fesikhesik,

² at Musa nen Harun yagati logolik, ”Sapi ket kotorek mene ai mene halok inom, nen domba ai mene ekhe inom pirenet agap oba agambut palek lek mene halok wanimbik he, sapi ai mene andi re hinaweak legaphogo fagain mene nen domba andi re warogo nolhu mene faget iluk ebe pirenet Tuhan wogo'ni.

³ Nen, it afuni Israel mene nen he kambing ai mene misik ekhe re inaweak legaphogo fouwageluk nen sapi eak ekhe inom, domba eak ekhe inom he wam ebe pirenet umur tahun misik oba mene halok, ebene agambut palek lek mene warogo nolesuageluk yagaisano.

⁴ Nen ekhere iren sapi ai mene misik ekhe inom nen domba ai mene misik ekhe inom lambulogo ninobagauwageluk faget warogo wogosuak. Linggene yi sambul he Tuhan it elokhoma weinam asigin iluk he, pirenet engge andem amep lek mene inom, amusu yugulogo seberogo Tuhan hai warogo wogosuakhogo re, yagaisan.

⁵ Yagatikhemo at Musa nen yi'nogo hilingisugun iluk yagaisasikhe mene a'nogo higithogo abirengge waluk o Sabu sale'ma solombonma a'nogo kabogesi wagaukwasik, it afuni omanogo mondogat Tuhan fogerasuogeluk andoma kabogetukwa.

⁶ Kabogetukwama at Musa nen yagaisikhi logolik, ”Tuhan nen a'nogo hilingi'no iluk yagahisikhe andi re, hiren At ombak-bak selek mondogat logolik hinelokhoma weinam ari'lago a'nogo hineilenggen hoageluk yagahisikhe o,” iluk yagaisasikhe.

⁷ A'nogo mondogat yagaisasikhesik at Musa nen Harun yagati logolik, ”Tuhan nen a'nogo hilingi'no ikhe higithogo, wam warogo nolhuba omanogo laluk inaweak leget fisoageluk nolhu mene inom, Tuhan endawimo agaiyeget fugu mene inom, hit hinaweak inom, it afuni mondogat inaweak inom Tuhan nen lek hilingisogo fouwageluk At ane ikhe mene higithogo fik-foukhogo hilingisi lano,” iluk yagatikhe.

⁸ A'nogo yagatikhemo at Harun a'nogo lagaikhesik aren sapi ai mene at onggwarek aweak leget fisoageluk faget fouget fesikhe mene a'nogo mezbah were'ma omanogo waluk lagaikhesik wasi lagaikhe.

⁹ Wat fesikhesik at Harun amlogomi nen wam amep a'nogo at Harun wogetukwama aren enggi tumen mep a'nogoba yugulhasikhesik mep a'nogo mezbah unggut 4 en hilingi'mo aremnogo ebene watfilik lagaikhe. A'nogo hilingfuluk amep fenakwe omanogobare mezbah erokwe kweisal isasikhe.

¹⁰ A'nogo hilingitikhesik Tuhan nen Musa yagatikhe higithogo wam a'nogo asei inom, amuanggo inom, asimogol oba fano mene omanogo inom mondogat he mezbah amboloba omanogo nolhukwa.

¹¹ Oba nen he, wam a'nogo agap inom, eino inom enek he o sabu sale'ma omanogo abel endakwe fikhit andoma nolhikhe.

¹² Andi mene mondogat hilingfesikhesik at Harun onggwarek faget Tuhan endawimo ayaigeget fouwageluk nolesigin iluk mene a'nogo watikhemo, it amlogomi omanogo nen amep a'nogo waganogo at wogetukwama aren wam amep a'nogoba mezbah unggut 4 en aremnogo higithogo ebene kweisal isasikhe.

¹³ A'nogo hilingfesikhemo iren wam unggul inom, wam andi mene fena amungge mene inom, at wogetukwama aren mezbah amboloba omanogo nolhikhe.

¹⁴ Andi nen wam andi mene al hulelek inom, eisok sanoksek inom i sobalogo nolengge nolhu mene inom mezbah amboloba omanogo nolhikhe.

¹⁵ A'nogo mondogat woge'luk aren kambing ekhe afuni inaweak faget warogo wogetikhe. Nen, kambing andi re at onggwarek aweak faget warogo wogetu mene a'nogo inom seberogo wogetikhe.

¹⁶ Andi nen ombo'ne re wam nolengge nolhu mene faget a'nogo waluk he awene melalek werek higithogo wogetikhe.

¹⁷ Andi mondogat hilingfuluk nolengge linggene hundik-handik oba nolhu mene seberogo iluk he tepung inenggi misigen yinggilogo wanu hak wanhikhesik mezbah amboloba amep legengge mene iluk noletikhe.

¹⁸ Andi nen he sapi ai mene misik ekhe inom, domba ai mene misik ekhe inom wanhikhesik it afuni inobaget lambulogo ninobagauwageluk watikhe. Watikhesik, at Harun amlogomi omanogo nen amep waganogo wogetukwama aren mezbah unggut 4 en aremnogo ebene kweisal hilik lagaikhe.

¹⁹ Kambing inom sapi inom andem oba mene asei omanogo waganogo re,

²⁰ wam pire aremnogo amik oba fesikhesik, at Harun nen waganogo mezbah amboloba nolhikhe.

²¹ Nen, wam a'nogo amik inom, eisok ebekwe mene inom, omanogo re Tuhan faget noletungge iluk inenggi tum warogo wogetukwa. Andi re it imam mene faget at Musa nen yagaisasikhe higithogo hilingitukwa.

²² Omanogo at Harun nen mondogat warogo wogetikhesik at Harun enggi it afuni Israel mene inunggul higit liabek logolik fanot fisasikhesik pi wagaikhe.

²³ Andi nen at Musa inom Harun inom Tuhan Awi Sabu sale'ma a'nogo kwisukwasik wulibi waga logolik it afuni Israel mene a'nogo inoba fanot fisugu kwelek, it afuni Israel mene mondogaren a'nogo nen Tuhan ombak-bak selegeraterek mene a'nogo weinam asi wagunem hasukwa.

²⁴ A'nogo hasukwama nen ferekhogo aremnogo At Tuhan nen endu pelabi wagaikhemo, nolengge warogo nolhukwa mene inom fenakwe asei werek mene mezbah amboloba welagaikhe mene omanogo inom mondok endu nunggunem hasukwa. A'nogo nunggunem it afuni Israel mene omanogo nen hasukwasik iren inagaiyek mondok hokhorogo hilingiti logolik ineindep awi yagaisogo fogeratukwa.