IMAMAT 27 - Allah Wene Fano Wene Hupla Inane

Tuhan faget fikhi logolik hilingiti logogun wene

^1-2 Tuhan nen wene melalek yi it afuni Israel mene faget yagaisikhi logolik, ap ekhe nen ane yi'nogo hilingisigin iluk igin mene faget onggo palogo iluk ebe An wo'neti logolik halok he, ap andi nen onggo uang Tuhan Awi wuri'mo fagarek higithogo onggo fulugenek he lolek mene logogin.

^3-7 It inebe umur 60 tahun ambol kwe mene nen: – ap halok uang perak 15 nen figik, hemi halok uang perak 10 nen figik, – It inebe umur 20-60 tahun huli mene nen: ap halok uang perak 50 nen figik, hemi halok uang perak 30 nen figik, – It inebe umur 5-20 tahun huli mene nen: ap halok uang perak 20 nen figik, hemi halok uang perak 10 nen figik, – It inebe umur 5 a'ma fikhit mene halok: ap halok uang perak 5 nen figik, hemi halok uang perak 3 nen figik fikhi logogun.

⁸ Nen, ap yi'nogo hilingisugun iluk ane fugu mene andi ambi onggo yi'nogo fikhi logogun iluk werek mene fugu aple elo'lek agu halok he, aren ap Tuhan obaget fugu mene a'nogo waluk it imam inambit waga logogun. Waluk wagunem it imam en kwelakhaluk onggo enggi hilingisu higithogo pelakfei wagunem he higithogo fikhi logogin.

^9-10 Aren yi'nogo hilingisigin iluk ugu mene andi ambi wam Tuhan wokhesigin iluk ane fuluk halok wam amu mene inom agam esi nogo. Yi mene ti mene Tuhan obaget iluk fugu mene andoma re Tuhan angge horek mene asiginmo re aren agam esigin oba nen ogore wam ebe pirenet he Tuhan mene asigin.

¹¹ Oba nen he wam andi ambi saliogengge mene Tuhan obaget fou elo'lek mene ap a'nogo nen ane fuluk halok he, at ane fagain agun a'nogo nen he wam a'nogo waluk it imam inambit waga logogin.

¹² Waluk wagunem it imam en wam a'nogo obabut hilingik aple kwelakhaluk onggo yi'nogo iluk aren huli fikhi logogin. Nen, aren onggo huli fagain mene andi mondok-mondok logogin.

¹³ Nen, ap a'nogo nen ambi wam a'nogo nekhengge onggwarek onggo palagain iluk anggugu halok he, aren wam a'nogo onggo hilingik aple higithogo fuluk fena dua puluh persen ekhe inom to'morogo fikhi logogin.

¹⁴ Nen, Ap ekhe at awi wurik Tuhan faget iluk fugu halok it imam en o a'nogo hilingik aple obabut kwelakhaluk onggo yi'nogo iluk tekhogo ikhi logogun. Nen, onggo iren yi huli iluk fikhi logogun mene andi re mondok-mondogat logogin.

¹⁵ Nen, ap a'nogo nen ambi o wurik a'nogo onggwarek onggo palagain iluk anggugu halok he, aren o a'nogo onggo hilingik aple higithogo fuluk he ekhe dua puluh persen inom seberogo fikhi logogin.

¹⁶ Nen, ap ekhe anggweang fena Tuhan faget iluk fugu halok, onggo re kweang andiba awi miren hakhogo yasugun iluk ineil halfulugen fikhi logogun. Nen, gandum 20 kilo faget onggo re uang perak mene 10 nen fikhi logogun.

¹⁷ Nen, kweang andi ambi Tahun Inonggwarek Oak wogisugu mene a'nogoba fugu halok, onggore abirengge higithogo fikhi logogun.

¹⁸ Oba nen he kweang andi Tahun Inonggwarek Oak wogisugu mene huli a'nogo mondogat agunem, hobuk halok he it imam en Tahun Inonggwarek Oak wogisugu mene hobuk mene a'nogo oan wagi'lek werek kwelek tahun miren logogin iluk onggo yi'nogo fou hak iluk wenak haluk onggo sebelogo fouwageluk yagaisikhi logogin.

¹⁹ Nen, fugu agun a'nogo nen kweang a'nogo onggo palagain iluk anggugu halok he, aren kweang a'nogo onggo higithogo fuluk fena ekhe dua puluh persen seberogo fikhi logogin.

²⁰ Nen, kweang a'nogo ambi aren Tuhan oba oan onggo palek le'ma nen ap amu mene ekhe nen hunitunem halok he, aren kweang andi faget eiserogo welagaba aremnogo arat lek agasi'more hobuk onggo paligin iluk inogo.

²¹ Tahun Inambotkwe Oak wogisagarek mene arat kwi lagunem, hobuk meneba re kweang andi mondok-mondok Tuhan mene asiginmo, it imam omanogo inenggiba fogoin fano.

²² Ap ekhe nen ambi yabu aren onggo palikhe mene Tuhan wogetu halok he,

²³ it imam en onggo werek mene kwelakhaluk yi'nogo fou hak iluk, Tahun Inambotkwe Oak wogisagarek mene a'nogo, oan asi wagi'lek werek kwelek tahun miren mene logogun iluk kwelakhaluk huli fikhi logogun. A'nogo fugunem ap andi onggo lingge a'nogo sambulat foumo re uang a'nogo Tuhan angge asigin.

²⁴ Tahun Inambotkwe Oak wogisogoin mene a'nogoba re, kweang andi re ap onggwarek attak eisewerek welaga mene a'nogoba ogo, nen, it aren tagomangge mene inoba ogo, wogisikhi logogun.

²⁵ Onggo fikhi logogun mene andi mondogat he, o Tuhan Awi Sabu sale'ma hilingik mene higithogo nek fikhi logogun.

²⁶ Wam domba eak inom, kambing eak inom attak-attak ta'lagu mene andi re Tuhan mene aga logogin. Nen, wam eak attak-attak ta'lasigin mene andi re Tuhan mene hilingi'mo re, ninendawinggen fanoba iluk Tuhan faget warogo fei wesu fuk.

²⁷ Oba nen he wam saliogengge mene eak attak-attak ta'lagu mene halok he, onggo palhi logogun fano, nen onggo re Tuhan Awi Sabu salek oba werek higithogo fuluk he dua puluh persen ekhe inom seberogo fikhi logogun. Nen, onggo palhu lek halok he, ap amu mene inoba onggo Tuhan Awi Sabumo werek mene higithogo huniti logogun.

²⁸ Wam inom, kweang inom, afuni inom andi re mondok-mondok Tuhan angge horek mene nek hilinglagama re, ap sa nen halok ogo Tuhan oba yi'nogo hilingisugun iluk awene legengge onggo hunitik, onggo palhik umo re elo'lek.

²⁹ Afuni mene ogo Tuhan oba enogo fuluk halok he onggo palhep hanogo, ap andi re mondogat leget feino.

³⁰ Hinanggweang oba nen enggen ugu mene inom, gandum inom, yi agayo-ti agayo enggen mondogat inom ogo, hiren helaluk misik 10 mene andi re Tuhan faget fikhi logogun.

³¹ Nen, ap ekhe nen ambi enggen ugu mene andoma fena huniragain anggugu halok he, andi faget onggo Tuhan Awi wuri'mo werek mene higithogo inom, ekhe dua puluh persen inom seberogo fikhi logogin.

³² Wam kulharek mene ebe 10 nen mene misik ekhe anggele'ma Tuhan mene logogin. Nen, wam omanogo inenggi wenagaisogo 10 ba aga mene andi re Tuhan mene logogin.

³³ Ap wam eisena agun andi nen he fano mene re ki, nen weak mene re ki iluk enesinogo. Nen, aren ogo agam esinogo. Aren agaum esigin oba nen ogore wam andi ebe pirenet he Tuhan mene asiginmo re, aben ogo ekhe onggo palugun mondoklek.

³⁴ Wene melalek andi Tuhan nen Tom Sinai ba nen it afuni Israel mene faget iluk Musa yagatikhe mene re andi.