IMAMAT 26 - Allah Wene Fano Wene Hupla Inane

Afuni nen Tuhan ane hologo hilingitunem fanotfisikherek wene

¹ Tuhan nen ikhi logolik, ”Hineisena Tuhan Allah re An namuat welagimo re, hiren kembu wutik, e meneba inom, helep meneba inom alik waganogo menfuluk apne wanhik, hilingisu fuk.

² Hineisena Tuhan Allah Anat welagimo re, hiren hinenggi sabit meneba inom, hinenggi ekhe esin mene An nobaget enekhogo hilingiti logogun oba inom, omanogo legeisogo fikhi logolik, An nebe fogetnafuba obalik hore'ma andoma inom esinet fikhi logoino.

³ Nen, hiren ambi An nen Nawene melalek yagahisikhi lagi mene furogo hilingitik, An nen yi'nogo hilingi'no ti'nogo hilingi'no iluk yagahisikhi lagi mene andi tiphogo hilingitik ikhi logogun halok,

⁴ An nen hari higithogo meiso pelakhisa wagunem hinanggweang oba nen hokhorogo fulelhik, hit hinagayo enggen itik ikhi logogin.

⁵ Hinanggweang oba nen enggen sik-pikhogo ikhinafunem hiren anggur enggen awi yatu sambul horok aga logogin oba nen he. anggur enggen palhuba aremnogo horogasi wagunem he, hiren gandum enggen oan palhi logogunat. A'nogo hilingiti logolik hit hinaiba hinanggweang oba andoma nunggu mene hokhorogo were'ma hinoba fanorogo logogun.

⁶ An nen mene olomene anini weak mene hit hinanggweang oba nen legetfisamo re, hit hinoba weim yafu mene ekhe logogin lek. An nen hit hinoba hinamel-mel lekhogo hilinghinobagaumo re, hiren hinaiba andoma amu meneba ekhe hinailo lekhogo nogokhi logogun.

⁷ Hiren ap hinaselei mene inomame elok mabenet fisikhi logogun.

⁸ Nen, hit hinebe fuaben oba nen he ap hinaselei mene inebe 100 nen mene inomame elok mabenet fisa hak logogin. Nen hit mene ap hinebe 100 nen oba nen he it inaselei mene inebe 10.000 nen mene elok mabenet fisa hak logogin.

⁹ An nen hinagainafuri hinombawi hokhorogo wokhisigik, hinebe fanoabet hinobagagik, hilingisigin. An nen a'nogo hilinghinobagagin iluk Wene Warogo abok yagahisigi mene yi re ibi-eberogo nenat hilinghinobagagin.

¹⁰ Hit hinanggweang oba nen enggen mondok hokho-bokhorogo ik hinafunem tahun misik nunggu wela'luk tindelogo fikhi logogunat. Nen, enggen palikhi logogun mene omanogo attak mene wulak fikhi logolik ket mene faget obalik selekhogo fikhi logogun.

¹¹ An nebe hit hinanggele'ma Nawi Sabu salek oba ninom logogun, nen hit nabit iluk oboget hisagain mondok lek.

¹² An nen hit fethinarek mondok logogin, hit hineisena Allah re Anat asimbik hit hinebe An Nonggwarek nagainafuri mene asugun.

¹³ Hit ap inamingmingengge logogun lek iluk, inomameba sebelhinarek welaga mene a'nogo omame leget fuluk, fikhalogo hinobagagirik o Mesir en wokhinarek wulibi wagagi mene, hineisena Tuhan Allah a'nogo Nebe Anaro,” iluk yagaisasikhe.

Afuni tiphogo hilingitarek lek mene wene inoba fikhi logogin wene

¹⁴ Tuhan nen ikhi logolik, ”Hiren An nane holhi'lek Nawene melalek inom higithogo hilingiti'lek halok inom,

¹⁵ nen hit inom An ninom wene watugu mene a'nogo taganet fugu halok inom nen hiren nawene melalek yi'nogo hilingi'no ti'nogo hilingi'no iluk yagahisigi mene furogo hilingitu lek halok inom,

¹⁶ An nen enggin mene hit hinoba asuageluk hilingfigik, hinebeba ou aganhan engge mene andi nen hineilenggen puk agik, nen hinoba fano asu elo'lek mene andi nen hutet hisugunem inebe mondok weak agik ugun. Hit hineabu wokfakhaluk awi yasugun oba nen he enggen oan ninggi'le'ma, it hinaselei mene nen sebela kwi we'luk ninggi logogun.

¹⁷ An nen hit wene hinoba foumo, ap hinaselei mene nen hit hinomame leget fuluk it hinabit anggikhi lagep mene nen hit sebelhinarek logogun. Ap mukhinarek wagu mene lek kwelek oba nen hinailo nek a'luk heise wulifi logogun.

¹⁸ An nen wene hinoba fugu mene hikhi logoligen hit An noba hinendawinggen tukhumet figi'legat halok, An nen wene nenggi wenagaisogo 7 nen oba inoba fagain.

¹⁹ Hiren legeisogo fakhikhi lagep oba nen he An nen sebelogo hinobagagin o. Meiso hokho mene pogoroba pi wagi'le'ma hinanggweang mondogat kelok imbik haroweak asigin.

²⁰ Hiren enggin-fenggin hogo hilingisugun oba nen he hinanggweang oba nen enggen iti logogin le'ma we alomarogo hakhogo nek hilingiti logogun.

²¹ Nen hiren An ninom weim palek logolik nane sagalogo hilingiti lagep menere, hit hinawene re nenggi 7 nen wenagaisogo ekhe 7 mene inomat to'mo uageluk agam esigin.

²² An nen maro aik anini mene hit hinanggelekwe lakfei wesumo maro andoma nen hinagainafuri senggelogo pilisigik, hinanggo senggelinafik, hilingitunem hit hinebe endebengge were'ma hinaiba ebekhe kwe andoma mondogat tiring tereng ikhi logogin.

²³ A'nogo enggin hokho mene andoma hambigen oba nen hit An noba futfigi'lek ninom seleirogo nek hilingitu halok he,

²⁴ An nen hit hinoba yei hinoasimbik wene re attak aburugwi hasigip a'nogo we endep hak oba nen he nenggi wenagaisogo 7 nen ekhe inomat hinoba fagain o.

²⁵ Hiren An ninom wene katokhogo wato mene a'nogo sagalfuluk hilingitu halok he, An nen hit hinawi kota hinanggele'ma andoma weim liabigin. Nen, hiren o kota ba andoma kaboge'luk koma hina'lasu iluk obalik herasugun oba nen he An nen ou mondok weak mene fano hilinglasu elo'lek mene lakfei wesumo re, hiren ninggi'nogo hilingisugun iluk elo'legen hinaselei mene inenggiba aga logogun.

²⁶ An nen hit nunggu mene lek hilingisogo foumo re, it hemi inebe 10 mene nen roti it inoba werek mene aremnogo nek obuluk misi'mo werati logogin. Werakfuluk higithogo sumburogo ninggi logogun oba nen he nekhengge nele aga logogin.

²⁷ A'nogo enggin hokhorogo andoma hambik oba nen An nane sagalogo nek hilingiti logolik furogo hilingiti logogun lek halok he,

²⁸ An nen naniniba yei hinoasigin. Nen enggin mene hinoba fagain mene andi re attak hasigip mene we endebengge hak oba nen he hobuk mene nenggi wenagaisogo 7 nen oba hinoba fagain.

²⁹ Hit hinamburu ouwak hokho mene lagaumo re hinonggwarek hinomalik ninggi logogun.

³⁰ An nendawimo hebak naferogo, hiren punu kwe fogerasi laga-lagep kwe andoma inom, dupa amben fano mene nolhi lagep mene obuluk wurik andi inom. wolelenggen tagalogo fembik, hit hinebe warek he tugwi kembu hiren mene wolelenggen hogo fagain mene omanogo ambolebene hukhisagain.

³¹ Hit hinawi kota mondogat he An nen meisalogo foumo o meisalek enek kabok lagakhi logogin, hiren fogerasi laga-lagep kwe andoma re An nen halik halokhogo fagain, nen hinanggo warogo noli waga lagep mene re An nen wanigin lek.

³² Hit hinawi sili An nen mondogat leget foumo re, it hinaselei mene nen a'nogo hilingik logogin mene andi ineilenggen hambik he youk logoin.

³³ Hineabu helikhi legep kwe andoma hesangge linisikhi logogun, nen hinawi wurik he we meisalegenek kabok lagakhi logogin. An nen hit hinaiba eroma andoma weim liabumo hit hinailo nen linggi longgo ugun.

^34-35 Andem sambul hit ap hinaselei mene inaiba hukhisa lamo omanogo werek kwelek hit hinebe logolik hinanggweang we logouwageluk herakfigi'lek wanhu mondok welagep mene omanogore engga wuti logouwageluk logogin.

³⁶ Nen, It hinagaila'lak ap hinaselei mene nen hugisa lamo logogun mene andoma re, An nen inailo mondok hokho mene hilingfisamo e engga sogoi en fun hugunem abolok lelok ugungge faget he inailo nen heise wulifi logogun. It afuni inaselei mene hinera'lu horokhogo werek lek oba nen ogore, it inaselei mene nen weim oba mukhinarek wagunem hak hit hinailo nen yawarilik laga logolik longgo ikhi logogun.

³⁷ Hiren hinaselei mene inom weim yabu elo'lek agu nen hinailo nen laga logolik, aben sige enggaren talukhogo ninoasinogo iluk ogalogo lagaikharek hak yelugu-felugu lagunem tunghogo warigik, ekhe amboloba nen ekhe amboloba warigik, hilingirik laga logogun.

³⁸ Hit hinebe ap hinaselei mene inaiba hukhinabi lamo. it hinaselei mene inanggele'ma andoma nen wa'lasugun.

³⁹ Hit mene hinebe endebengge ekhe it hinaselei mene inaiba andoma inanggele'ma hineluk logogun mene re, hit hinombawi inaweak faget inom hit hinonggwarek hinaweak faget inom hinoba ou pou hikhi logolik mondok logogun.

⁴⁰ Oba nen he it hinombawi nen inom, nen hiren inom, An nane sagalogo fuluk hilingiti lagep mene andoma hiren inom, nen hiren tagomangge mene nen inom hinaweak fagetu halok,

⁴¹ Andiba An nen nomameba mugusogo it afuni hinaselei mene inanggweangma hukhisa lagagi. Ariginhigi andiba re, hiren tagomangge mene nen inaweak hilingitik, nane sagalhik hilingita mene An nobaget inendawinggen sebel fakhaluk hilingisugun halok he,

⁴² An nen wene warogo it Abraham inom Ishak inom Yakub inom yagaisigi mene a'nogo ebet haluk, An nen kweang andoma afuni inunggulenu An nagainafuri mene andoma wogisagain isigi mene a'nogo kerabenggerogo fagain.

⁴³ Ariginik oba nen he, kweang andi eberogo nen set waroageluk attak he afuni werek mene andomaba nen seleget fesigi. Nen, An nagainafuri mene andi re An nawene melalek inom yi'nogo hilingi'no ti'nogo hilingi'no iluk yagahisasigi mene a'nogo tiphogo hilingiti lagep le'ma re, An nen it inoba wene enggin mene fikhi lagi mene andi tak enek hogoinat.

⁴⁴ Oba nen he An yire hit hineisena Tuhan Allah welagimo re, it afuni inaselei mene inaiba werek kwelek ogore hit hinebe oboget isaluk lagain lek, nen it inebe inom leget fisagain legat. Nen, An nen it inebe leget fisagain halok he, yi'nogo hilinghinobagagin iluk wene warogo yagahisigi mene a'nogo leget fisigi hanogo.

⁴⁵ An it ineisena Tuhan Allah asigiluk, yi afuni ti afuni inunggulenu lombok welagaikharek mene inoba An nomame hilingik welagi mene a'nogo enek hoageluk, nagainafuri o Mesir en woginarek wulibi wagagimo re An nen it inombawi inoba wene warisigi mene a'nogo kerabenggerogo fagain o,” iluk isikhe.

⁴⁶ Tom Sinaiba nen Tuhan nen awene melalek inom yi'nogo hilingiti logoino ti'nogo hilingiti logoino iluk it afuni Israel mene faget Musa ba yagatikhe mene re andi.