IMAMAT 25 - Allah Wene Fano Wene Hupla Inane

Tahun 7 meneba hilingiti logogun mene faget yagaisasikhe wene

¹ Tom Sinai ungguloba nen Tuhan nen Musa wene yagatikhesik ebe mimingiti logolik:

² ”Afuni Israel mene o An nen wogisagain oba andoma kwi lambik hiren hinobabut yi'nogo Tuhan legeisogo fikhi logogun iluk wene melalek yi'nogo yagaisa lan. Hundik-hundik tahun 7 meneba asi wagu halok he, hiren yi mene ti mene yasugun iluk, yabu wanhi logogun lek.

³ Tahun 6 meneba re, hiren hineabukwe awingge awi yatik, anggur yago mene enggi tekhogo yogolhik, hinanggweang oba nen enggen palogo kabogetik hilingiti logogun.

⁴ Oba nen he tahun 7 meneba nek he, Tuhan obaget enogo fikhi logogun. Tahun andiba re kweang ekhe seneti'lek weat logogun.

⁵ Tahun andiba re kweang yabu esap fugu mene hilingi'more gandum amu wulifu mene inom, e anggur palugun lek mene inom iluk ogore hiren palogo kabogesugun lek.

⁶ Ariginik oba nen he, kweang andi nen hit inom, hit mene hinamingmingengge inom, hiren ap yabu wokhinafi logouwageluk onggo palogo woginafi lagep mene inom, ap pok meneba nen hit hinanggelekwe welagaikharek mene inom, faget enggen ikhinafi logogin.

⁷ Andi nen hinanggo takhikhi lagep mene faget inom, hit hinaiba wam maro mene inom faget kweang andiba nen enggen itunem ninggi logogun o,” iluk isikhe.

Tahun inonggwarek oak wogisikhi logogun oba faget isikhe wene

⁸ Ekhe inom ikhi logolik, ”Tahun hinenggi 7 nen a'nogo nek wenatunem lambukhogo 49 tahun aga logogin.

⁹ A'nogo wenatunem en enek tugi 7 nen tanggal 10 ba aga halok afuni inaweak legaphogo fugu sambul a'nogo higithogo agu halok, hinailokwe andoma mondogat trompet tombouwe hak mene a'nogo ane fut hoageluk yagaisano.

¹⁰ Tahun 50 mene andi re enogo fuluk afuni inoba wene warogo wulafi logolik, tahun yire afuni yi mene ti mene fikhalogo fugu mene o, iluk tahun andiba re kweang yi mene ti mene onggo hunita halok he, it inonggwarek mene inoba ogo nen iren tagomangge mene inoba ogo, hobuk inambotkwe inonggwarek wogisigik, ap sa nen inamingmingengge logouwageluk onggo palikhe halok ogo eisena agaisa inonggwarek inambotkwe wogisigik hilingiti logogun.

¹¹ Hit hineabu waganogo awi yasu fuk. gandum hit hineabumo enggen hesangge wulifu mene halok inom, hit hineabumo nen anggur enggi tegetu lek mene halok inom he andorogo fakhikhi logou fugat.

¹² Tahun andi re mondok horek mene hilingi'mo re, hit we yi mene ti mene yabukwe amu wulibik mene nek ninggi logogun.

¹³ Tahun andiba kweang onggo palugun mene halok he onggwarek eisewerek meneba wogeti logogun.

¹⁴ A'nogo hilingi'mo re kweang hit afuni Israel mene hinanggweang oba hunirogoin halok ogo, hiren onggo palogoin halok ogo, onggo paligik hunirigik ugun mene andi re henarogo ekhe hilingisu fuk.

¹⁵ Kweang andi onggo re tahun aremnogo wenagaisogo enggen itunem helikhi lagep aremnogo higithogo wenagaisogo fuluk he, Tahun Hobuk Inambotkwe oak wogisagarek sambul a'nogo wogisikhi logogun.

¹⁶ Nen, tahun a'nogoba enggen hokhorogo iti logogin halok he onggo ogo hokhorogoat fikhi logogun. Oba nen he, enggen ituba re enggi endep engge welaga halok he, onggo re we enggen itu mene aremnogo faget enek hilingi'mo onggo ogo we sebelogo fikhi logogun.

¹⁷ Hiren hinagaila'lak Israel mene inoba hineranen wene lalogo yagaisa fuk. Oba nen he An hineisena Tuhan Allah Noba nek hinailo anggikhi logoni, iluk yagaisano,” isikhe.

Tahun 7 meneba wene hilinglagu halok hilingiti logogun wene

¹⁸ ”Hiren ap pok mene inaiba yoma logolik hinailo lekhogo fano logobagaigen iluk, Tuhan awene palek inom, awene melalek inom, higithogo hilingiti logoni o.

¹⁹ O andoma hinanggweang oba enggen fanorogo ikhinafunem hinangge nunggu mene higithogo helikhi logolik hinebe mondok fani fanorogo logogun.

²⁰ Ariginik oba nen he, hit fenakwe nen ikhi logolik, tahun 7 nen hunugusogo yabu waganogo awi yati legengge, enggen inom palhi'legengge logogun sambul andem he, nena mene ninggi logogun he, iluk ikhi logogun.

²¹ A'nogo hilingi'mo tahun 6 meneba re At Tuhan nen hinanggweang oba fanot foumo re, 3 tahun he enggen itu mondok logogin.

²² Nen, hiren tahun 8 meneba awi yatu sambul ogore enggen ugu tahun 6 meneba nen omanogo hit ninggi logouwageluk logogin. Attak mene were'ma hobuk oba saluk i waga logogin,” iluk isikhe.

O inom, kweang inom oak waganogo inonggwarek mene inoba wogisikhi logogun aple iluk yagaisasikhe

²³ Ekhe inom ikhi logolik, ”Kweang andoma Allah onggwarek mene hilingi'mo re, hit he ap pok mene higit logolik kweang amboloba nek yagaisogo ninggi logouwageluk yagahisikhe. Nen kweang andoma hit hinanggweang logouwageluk mondok-mondok onggo palegep hanogo.

²⁴ Nen, kweang huli misik ekhe onggo palugun anggaluk halok he, kweang andi onggo arat paluk halok oak wanhu mene ap yi iluk attak-attak fakhogo ugun fano.

²⁵ Nen, Israel mene ekhe enggi lek elagaik a'luk logolik ninggi'nogo hilingisigin iluk kweang aren mene a'nogo onggo wanigin anggaluk halok he, at erugwi agaila'lak at werekwe mene inoba onggo wanigin fano.

²⁶ Oba nen he hobugen ap ekhe nen onggo palhi'le'ma nen at onggwarek agun a'nogo auang werek agama anggweang a'nogo onggo palikhe halok he,

²⁷ aren ap onggo hunite mene a'nogo oba tahun kweang obogisugu mene ekhe oan wagi'lek kwelek kweang andi misik oba nen enggen ugu palhu mene mondogat onggo wogeti logogin. A'nogo hilingisugun oba re kweang a'nogo at onggwarek agun a'nogo mene aga logogin.

²⁸ Oba nen he kweang a'nogo onggwarek onggo palogo helugu aple enggin agu halok he, ap onggo palagain agun a'nogo enggimo eise a'luk were'ma nen tahun lologo oak wanhu mene a'nogoba waga logogin. Andiba nek he kweang a'nogo at onggwarek agun angge aga logogin.

²⁹ Ap misik ekhe nen o kota elonggoma leget haningisogo kwelabek mene onggo huniragain iluk hilingitu halok he, at aiba andi re aren onggo hunisigin mene tahun andiba tanggal onggo hunite mene a'nogo higithogo nen wenagaisogo nek he aren onggo palagain fano.

³⁰ Oba nen he o a'nogo tahun misik a'nogoba onggo hunitu lek halok he aren eise asigin iluk mene a'nogo re lek aga andi nen, an nawi iluk ekhe inogo. At eise welagaba aremnogo re tahun arat tagan ikhemo, o andi re at hunirikhe agun andi agwe againafuri inom inawi asigin. Nen Tahun Inonggwarek Wogisagarek Oba andire wogisagain mondok lek.

³¹ Nen o kota endep kwe leget waganogo kwelabek lek mene ogore awene melalek kweang faget hilingik andi higithogo nek hilingiti logogun. Arigini'mo re at onggwarek agun a'nogo nen Tahun Inonggwarek Wogisagarek oba a'nogo higithogo onggo hunirikhe halok he, o a'nogo ap awi eisewerek a'nogo mene aga logogin.

³² Ariginik oba nen he it Lewi inap halok he, we nenangge halok ogo it inangge o kota welagarek mene omanogo eiserogo hunirikhi logogun fano.

³³ Ap Lewi mene ekhe nen o kota misik oba awi wurik mene it ekhe inoba onggo palalugen onggwarek hobuk onggo hunira elo'lek agu halok he, o andi re Tahun Inonggwarek Wogisugu mene a'nogoba onggwarek wogosugun. A'nogo hilingisugun andi ero o kota afuni Israel mene inanggelekwe andoma mondok-mondogat he it Lewi inap faget werek andi nen.

³⁴ Oba nen he, o leikwe it afuni Lewi mene inawi kota era'lukwe andoma mondok-mondok he it inangge mene hilingi'mo onggo waninogo,” iluk isikhe.

Afuni inenggi lek mene inoba elama faget iluk wogisikhi logogun wene.

³⁵ Ekhe inom ikhi logolik, ”Ap hit hinunggulenu mene hit hinanggelekwe werek mene ekhe enggi lek elagaik a'luk onggwarek eluk werek mene faget lebeta elo'lek mene halok, at ebe eluk logouwageluk hiren afuni pok meneba inom hinonggot meneba inom hilingfisikhi lagep hakhogoat lebethikhi logoino.

^36-37 Hiren at oba hobuk helogoin en iluk wogoti logolik ekhe inom to'morogo iluk kino u fuk. Oba nen hiren hinendawinggen Allah oba hinailo anggikhi logolik ap andi hit hinanggele'ma eluk logouwageluk herak feino. Nen, nunggu mene at oba onggo huni'luk halok ogore, ekhe inom nit ninenggi werek asugun iluk at oba hunitu mene a'nogo kino u fuk.

³⁸ Wene melalek An Tuhan Allah o Kanaan wokhisagain oba andi hineisena Allah Anat asigiluk o Mesir en wokhinarek wulibi wagagi mene re andi o,” iluk isikhe.

Inamingmingengge onggo palinapluk obogisikhi logogun wene

³⁹ Ekhe inom ikhi logolik, ”Afuni hit hinunggulenu mene hinanggelekwe werek mene nen enggi lek mene a'luk hit hinoba ebe onggo palhu halok he, ap andi aren yabu it inamingmingengge mene nen hilingitarek mene hilingisuageluk yagasugun lek.

⁴⁰ We at hit hinom logolik yabu hilingitunem onggo wogotu mene werek kwelek, arat Tahun Inonggwarek oak wogisagarek oba aga logogin.

⁴¹ Andi sambul enek he at againafuri inom o aren a'nogo herakfisaluk at eisok erokwe mene inambit ombawi inanggweang oba omanogo laga logogin.

⁴² It afuni Israel mene halok he, An nen o Mesir en woginarek wulibi wagagimo re hit he An namingmingengge mene. Andi nen he iren inebe inamingmingengge higit onggo palinabugun lego.

⁴³ Hit hinendawinggen Allah oba hinailorogo logolik, it afuni Israel mene nen hit hinoba onggo palinabuak anggugu halok he, hiren hinobabut haferogo hilingfisa fuk.

⁴⁴ Nen, hiren ambi hinamingmingengge ekhe woginabugun hinamolo halok he, ap inunggulenu amu mene hit hinera'lukwe werek mene andoma onggo palogoin fano.

⁴⁵ Athe hiren ap pok mene hit hinanggelekwe werek mene andoma inagainafuri onggo palogoin halok fanoat. It afuni pok mene inagainafuri hit hinanggweang oba nen ta'lagaikha mene halok he hit hinangge aga logogin.

⁴⁶ Nen, hiren hinagainafuri inoba it inamingmingengge mene faget ineluk logolik andi re inamingmingenggeat logouwageluk inalolegengge wogisagarek a'nogo hakhogo inoba fogoin fano. Oba nen he hit-hit afuni Israel mene halok he hiren hina'mageba hilingfisa fuk.

⁴⁷ Ap pok mene hit hinanggelekwe werek mene ekhe at enggi werek agunem ap hit Israel mene ekhe enggi lek a'luk aren at enggi werek mene a'nogoba ogo, nen it at andi eisok erokwe meneba ogo, onggo palinabuageluk hilingitu halok,

⁴⁸ ap Israel mene andi at hobuk onggwaregen hele fikhalek mene logogin. At agaila'lak mene ekhe ap mene nen halok inom,

⁴⁹ agwe werekwe nen halok inom, agailak ambine ta'lagaikha mene nen halok inom, nen it agaila'lak horokhogo mene nen halok inom, onggo palogo lologo fikhi logogun. Athe at onggwaregen onggo higit palogo lologo fakha hak halok he, fikhalogo fakhikhi logogin.

⁵⁰ At amingmingengge a'nogo nen ap at hunisugun mene inom inane mak fuluk, iren at an namingmingengge logogin iluk onggo palikhe huli nen Tahun Hobuk inonggwarek wogisugu mene a'nogoba asi waga logogin higithogo wenak fuluk, onggo re it afuni yabu hilingitu mene inenggi wenagaisogo wogisagarek higithogo fogoin.

^51-52 At inamingmingengge a'nogo nen tahun at inamingmingengge oan kwigi'lek logolik we onggo faget enek hilingiti logolik helugu aremnogo higithogoat ebe onggo palha mene faget obali'mo wogisikhi logogin.

⁵³ A'nogo hilingisigin andiba re, at a'nogo ap tahun misik oba yabu hilingitunem onggo wogisugu mene hakhogo asumo, it inogogwi nen ina'mageba hilingisugun lek.

⁵⁴ Nen, aren ambi ero misik mene ekheba onggo ebe lologo fakhugu mene faget hunira elo'lek agu halok he, at andi ebe inom againafuri inom, Tahun Inambotkwe oak waganogo wogisagarek mene a'nogoba fikhalogo fogoin.

⁵⁵ At Tuhan nenat o Mesir en woginarek wulibi wagaikhemo, it ineisena Tuhan Allah re At amuat werego. It afuni Israel mene halok he An namingmingengge hilingi'mo, it ineluk logogun oba afuni ekhe inamingmingengge a'luk logogun mondok lego, iluk yagaisano,” iluk yagatikhe.