IMAMAT 24 - Allah Wene Fano Wene Hupla Inane

Lampu halhi logogun mene faget yagaisasikhe wene

^1-2 Tuhan nen it afuni Israel mene wene melalek yi yagaisoageluk Musa yagati logolik, ”An Nawi Sabu salek oba omanogo esage ibil fugunem ombak-bageti logogin oba iluk zaitun amusu mondok eil wurik mondok fano mene An Nawi sabumo faget waluk waga logoino.

³ Waluk wagunem at Harun en lampu omanogo fanorogo halogo Tuhan ebe weinam asi waguba iluk su kain kologo pelabe'ma a'nogo abel endakwe fikhit O Senggelek Mondok Hore'ma a'nogo Allah nen yi'nogo hilinghinobagagin iluk Wene Warogo wo'nisasikhe mene a'nogo kwalek werek oba andoma hubet inom hu'mokwe inom halogo fikhi logogun. Wene melalek andi re hundik-handik a'nogo nek hilingitu mondok logogun.

⁴ At Harun nen lampu andoma An Nawi Sabu salek oba hundik-handik ombak-bagetu mondok logouwageluk lampu eisok emas mondok fano meneba halogo fikhi logogin,” iluk isikhe.

Roti Tuhan Aiba fikhi logogun mene faget yagaisasikhe wene

⁵ Ekhe inom ikhi logolik, ”Tepung mondok fano mene 12 kilo nen waluk he, kilo misik mene andiba amu-amu roti hombonu mene ebe 12 nen hilingi'no.

⁶ Hilingisogo wera'luk he meja emas oba seberogo hilingik engge An Nawi sabu elonggoma werek mene andi amboloba roti werago a'nogo sap pire erarogo fuluk, sap erarek misik ekhe oba re roti ebe 6 en feino, nen ekheba re 6 en at feino.

⁷ A'nogo fuluk he roti andi Tuhan faget nolugun mene enek sek logouwageluk he kemenyan elokhe mondok fano mene roti sap erarek aremnogo bene higithogo feino.

⁸ Hinenggi sabit sambul andi hundik-hundik he roti ekhe An Nawi Sabu salek oba andoma ket werago mene fei kwikhi logogun. Wene melalek andi re, it afuni Israel mene nen hundik-hundik hilingiti logogun.

⁹ Roti andoma re naiba fei wagu mene it imam mene inobaget oba nen Tuhan wogosi wagu mene mondok horek mene hilingi'more roti andi re at Harun eisok erokwe mene faget, iren obalik mondok horek oba omanogo nen ninggi logogun,” iluk isikhe.

Afuni nen Allah homan fugunem, Aren onggo enggin mene inoba fikherek wene

^10-11 It afuni Israel mene inawi sabu salek oba omanogo re, ap misik ekhe eisena re o Mesir mene nen agaisa re it Israel mene enu Selomit hun Dibri amlogo it inunggulenu Dan mene welagaukwa. Linggene misik oba re, ap a'nogo nen ap ekhe Israel mene o sabu sale'ma omanogo nen inom yei yafi logolik he, ap a'nogo nen Allah homan fesikhe. A'nogo homan fesikhemo it afuni Israel mene nen waluk Musa ambit fei wagaukwasik,

¹² Tuhan nen ap a'nogoba wene ningginik mene oba feni yaganisagain iluk nenangot hikhi logolik welagaukwa.

¹³ A'nogo were'ma Tuhan nen Musa yagati logolik,

¹⁴ ”Ap andi waluk O Sabu Salek oba nen endakwe fikhit wulibi laluk he, it afuni nen Allah homan fugunem inesanggo holha mene halok he, ap andi eberogo weak hilingite iluk inelu asuageluk he, inebe lombogen inenggi ap andi unggul oba sebel fogoin. A'nogo sebel foumo it afuni Israel mene mondogaren helep hugoba nek wasumo wa'lasuak.

¹⁵ A'nogo hilingi'luk afuni Israel mene mondogat inoba wene yagaisikhi logolik, ap ekhe An Allah homan nobagagu halok he ambisangma re,

¹⁶ wene oba fuluk watfikhi logogun. Ap sa nen ekhe Tuhan homan fugu halok he, it afuni Israel mene nen helep oba wasugun. Wene melalek lisu palek mene andi re, it afuni Israel mene faget inom, nen it afuni endakwe mene faget inomen hilingitu mondok logogun.

¹⁷ Ap ekhe nen ap watu halok he, arogo wene oba fuluk wasugunat.

¹⁸ Areagun werek mene inom halok he, areagun werek mene inomat wut-wut aga logogun iluk awene melalek were'ma, ap sa en ap ekhe anggo wate halok he, anggo obali'mo higithogo wogeti logogun.

¹⁹ Ap misik ekhe nen are inom wene palhi logolik agambut palfikhe halok he, at agailak a'nogo oba ogo agambut palfeinoat.

²⁰ Aren ambi oak sombologo wate halok he, arogo oak sombologo watfeinoat, nen aren agailak eilenggen fena tugul fikhe halok he, arogo eilenggen fana fikhit tugul feinoat. Nen aren ambi ap watunemen aik langgorogo wate halok he, arogo aik langgorogo wasugunat. Aren ambi ap amu mene inoba ninggi'nogo mene hilingfisikhemo inebeba ou mene ekhe aga halok he, at andi oba ogo aren hilingite mene aremnogo onggo higithogoat hiling feino.

²¹ Ap ekhe nen wam watu halok he, wam at obali'mo fikhi logogin oba nen he, ap watu halok enek he, arogo wene oba fuluk ebe pinggiat wasugun.

²² Hineisena Tuhan nebe Anat hilingi'mo, wene melalek andi afuni mondogat faget inom, it ap pok hit hinanggelekwe femhogo welagaikharek mene inom inobaget ikhe o, iluk yagaisano,” yagatikhe.

²³ Yagatikhemo, at Musa nen wene omanogo it afuni Israel mene inoba mondogat yagaisasikhesik, ap Allah homan fesikhe mene a'nogo waluk O Sabu Salek oba nen endakwe fikhit wulibi lagaukwasik, helep huk oba nek watukwama pinggi wa'lagaikhe. A'nogo hilingitikhe andiba Tuhan nen Musa yagatikhe mene a'nogo higithogoat hilingitikhe andi.