IMAMAT 23 - Allah Wene Fano Wene Hupla Inane

Seni Allah faget inendawimo ebeti logolik isati logogun wene

¹ Tuhan nen Musa mel yagatikhe:

² ”Hinendawimo eberek logolik, hari hokho mene, ekhe sambul-ekhe sambul, An fogetnabuogeluk hinenggi weat logolik hinebe andoget fuluk yi'nogo hilingirik laga logoino, iluk yagahesigin mene yi, afuni Israel mene yagaisano o.

³ Hinenggi 6 en pelabek andi re, hiren yi mene ti mene wanhi logombik, hinenggi sabit meneba re, An hineisena Tuhan nonggwarek faget weat set walogo logoino o. O andi sambul he, hinebe we o koma ogo, logogun lombok logolik, hinenggi ekhe wanhi'lek hinebe misi'mo andogorogo An nobaget enek hilingiti logoino o.

⁴ Yi'nogo hilingiti logoino, iluk hari hokho mene wenagaisogo figi mene andiba An hineisena Tuhan faget hilingisugun oba arat asi wagu halok, hilingiti logogun mene wene palek higithogoat yagaisikhi logoino o,” iluk yagatikhe.

Seni Paskah inom, roti fiterek lek meneba weragongge ninggi logolik hilingiti logogun wene

⁵ Allah nen a'nogo yagatikhesik, ekhe mel yagatikhe: ”An nen Telhinafigi mene andi hinendawimo eberek logolik hineisena Tuhan fogetnabuogoluk,” tugi attak meneba tanggal 14 o mo korokhogo kugu kwelek andem oba erora'luk hilingiti logoino.

⁶ A'nogo hilingiti logolik, ohealekwe tanggal 15 oba re, Linggene Roti Fiterek Lek Meneba werago mene a'nogo erora'luk, hinenggi 7 huli nen pelabek andi re roti fiterek lek mene a'nogoba nek weragongge ninggi logogun.

^7-8 Hinenggi 7 nen pelabek andem oba logolik, hiren sumburu inom yi mene ti mene inom An Tuhan nobaget fuluk nolneti logogun o. Nen hinenggi attak erorasugun sambul andi inom, nen hinenggi obokhogo 7 sambul andi inom, halok he An hineisena Tuhan nobaget hilingiti logolik, hinenggingge hokhorogo wanugun mondok lego.

^9-10 Hit o An hineisena Tuhan nen wokhisasigiba andoma lagep halok, yi mene ti mene awi ya'luk enggen palugun mene andi, gandum awi yasugun mene enggen attak-attak palugun mene hele keralogo ap imam inoba waluk waga logoino o.

¹¹ Hit hinenggi sabit oba An faget weat wela'luk, ohealekwe re An hineisena Tuhan hit hinoba nendawit hinabigen he, ap imam en gandum enggen palek hele yelik andi enggim wanimbik lakfigik, wakfigik, fulugen wo'neti logouwago.

¹² Hiren gandum enggen palek andi An faget nobagakhi logolik he, wam domba eak ai mene tahun misik oba mene agap oba agambut palek lek fano mene halok warogo endu nolnesugun mene inom nobagakhi logoino o.

¹³ Yi mene ti mene nenggarek mene An nobagakhi logolik he, tepung 2 kilo mene e zaitun amusu inom misi'mo mulelogo nen nolnesugun o. A'nogo nolnesugun halok, An hineisena Tuhan nendawimo fano asigin o. A'nogo nolneti logolik he, i anggur enggen amusu 1 liter nobagakhi logogun.

¹⁴ Yi mene ti mene andi An hineisena Tuhan faget oan figi'lek logolik, gandum enggen ket palek mene ekhe eluk ninggik, weat weragaisogo ninggik, roti hilingisogo werago ninggik, ugun mondok lego. An nen hit hilingiti logogun mene wene yagahisigi mene andi re, hit hinagainafuri tagomangge mene inebe mondogaren hologo hilingirik laga logouwageluk igi o,” iluk yagatikhe.

Yi mene ti mene enggen paluk seni isati logouwageluk yagaisasikhe wene

¹⁵ A'nogo yagatikhesik, ekhe mel yagatikhe: ”Hinenggi An faget weat logolik he, gandum enggen attak palugun mene hele yelogo An hineisena Tuhan faget nobagambik he, hinenggi 7 minggu higithogo wenati logogun.

¹⁶ Wenati logolik, 7 minggu ba o ebe lombok 49 hari wela'luk, ohealekwe inenggi 50 mene andiba re, An hineisena Tuhan nobaget sumburu yi mene ti mene ket mene andogorogo nobagai waga logogun o.

¹⁷ Hit ap hinebe lombok hinagainafuri hinomen sumburu roti pirendek higik weragaisogo An hineisena Tuhan nobaget neilhanem fei waga logogun o. Sumburu roti andi ebe lombok he, tepung enggin 2 kilo mene enggen roti fiterek mene inom pelagaisogo werago mene An faget nobagaluk he, Yi enggen attak palho mene, iluk An hineisena Tuhan nobaget fikhi logogun o.

¹⁸ Roti andi inom mangorogo re, afuni Israel mene nen wam domba eak umur satu tahun mene ebe 7 nen, sapi ai mene ebe oan mene misigat inom, nen, kambing ai mene pire inom, An nobaget nobagakhi logogun o. Wam andoma ebe lombok he, agap oba agambut pale'lek mene halok, An hineisena Tuhan nobaget nolnesuageluk nobagakhi logolik, yi mene ti mene nunggu mene ekhe nobagagik, i anggur amusu ekhe nobagagik, ugun o. A'nogo nobagaluk nolnetunem amben nen he nendawimo nagaiyeget fikhi logogin.

¹⁹ Nen, hit weak hilingitep mene An nen horogo legetfisoageluk kambing ai mene ebe misigat inom, nen An ninom lambuluogeluk domba ai mene umur satu tahun oba mene ebe pire inom, wa'neti logogun aro.

²⁰ Sumburu roti werago mene inom, domba eak ebe pire andem inom, it ap imam mene ekhe nen nobagaluk, inenggi lakfigik, wakfigik ilugen, wo'nesugun o. Wo'nesimbik he, at ap imam andi nen ninggi logogun. Nobagagun mene andi mondogat he horek mene hilingi'mo, An nonggwarek mene o.

²¹ Yi mene ti mene An nobagakhi logogun sambul andi re, hinenggingge hokhorogo wanhi'lek, An nobaget hilingisuogeluk hinebe andogoti logoino o. A'nogo andogoti logouwageluk igi andi re, hiren tagomangge mene inebe, we, o koma it logogun kwe lombogen, andoma mondok higithogo hilingirik laga logouwago.

²² Hineisena Tuhan Anat andi nen he, hiren gandum awi yago mene enggen palhi logolik halok he, esanggokwe fuleligin mene andi palhik, nen, attak-attak palhi logolik ando herakfogoin mene andi hobuk palogo andogotik, ugun mondok lego. We, andi afuni inangge lek mene inom, ap pok mene inom, helikhi logouwagaluk herakfisikhi logoino o,” iluk yagatikhe.

Tahun ket mene kwi lagunem seni isati logogun wene

^23-24 At Allah nen a'nogo yagatikhesik, ekhe mel yagatikhe: ”Tugi inenggi wenatarek a'nogo higithogo 7 mene tanggal 1 ba kwi lagu halok hinenggi set walogo weat logoino. Andi sambul he, inendawi wenggelogo re, pinggong ane hokho mene anethugunem andogosi we'luk An nobaget hilingiti logoino o.

²⁵ A'nogo hilingiti logolik, yi mene ti mene nenggarek mene An hineisena Tuhan nobaget nolneti logolik andi re, hinenggingge alonghogo hilingiti logogun lego,” iluk yagatikhe.

Inenggi ekheba weak hilingitarek mene sagalogo legetfisaluk horinabigin mene faget hilingiti logouwageluk yagaisasikhe wene

^26-27 At Allah nen Musa a'nogo yagatikhesik, ekhe mel yagatikhe: ”Yi tahun ti tahun tugi 7 meneba asi lagunem tanggal 10 ba hit afuni Israel weak hilingiti lagep mene, An nen sagalogo legetfisambik horogo legethinobagauwageluk he, yi'nogo hilingiti logoino. Sumburu hinambe heang welagik, hinebe andoget fuluk An faget nolnetik ikhi logolik, yi mene ti mene nenggarek mene An hineisena Tuhan faget nobagakhi logogun o.

²⁸ An hineisena Tuhan nen, hit weak hilingiti lagep mene sagalogo legetfisambik hothinabumo An neilhanem fano logobagaigeluk, o andi lingge hit weak hilingiti lagep mene sagalogo legetfisambik hothinabigin andi nen he, hinenggi ekhe wanugun mondok lego.

²⁹ Sa nen o andi sambul sumburu yi mene ti mene ekhe nagain halok, at ebe An nagainafuri mene werek iluk anggagain mondok lego.

³⁰ Nen, sa nen o andi sambul enggingge ekhe wanhe halok, An hineisena Tuhan nebe nen wene oba fembik ebe pinggi wasigin o.

³¹ An nen he, hiren yi'nogo hilingiti logoino, iluk wene yagahisigi andi re, hiren tagomangge mene inebe we o koma, it logogun kwe lombogen logolik hilingiti logogun mene faget inomat yagahisigi o.

³² Tugi andi mene tanggal 9 oba o mo eil ubukhogo kwi lagain huli nen he, tanggal 10 mene o mo eil ubukhogo kwi lagain huli andi re, An faget weat set walogo welagep andi higithogoat logolik, hinendawimo sebel fakhaluk sumburu hinambe heang mondok logoino o,” iluk yagatikhe.

O Sabu e Engga Palogo Salfuluk Pesta hilingiti logouwagaluk yagatikhe wene

^33-34 At Allah nen Musa a'nogo yagatikhesik ekhe mel yagatikhe: ”O Sabu e Engga Palogo salfuluk Pesta nouwogeluk, tugi 7 mene tanggal 15 oba attak mene nambik, huli 7 hari nen ninggi logoino o.

^35-36 O hinenggi 7 hari andem oba logolik, hinenggi logogun ebe lombok sumburu yi mene ti mene An nobaget hilingiti logogun. Nen, hari 8 meneba re hinebe andoget fuluk, An hineisena Tuhan nobaget hilingitik, yi mene ti mene nenggarek mene wo'netik, ikhi logolik, andi sambul hinenggingge ekhe wanhi logogun mondok lego.

³⁷ An hineisena Tuhan nen he, hiren an nobagaget hilingiti logogun mene wenagaisogo figi mene andi yagaisikhi logoino o. A'nogo hilingiti logolik, An hineisena Tuhan fogetnabuogeluk hinebe andoget fuluk, An faget hilingitik, sumburu yi mene ti mene nobagagik, yi mene ti mene nolnetik, ekhe inenggi lakfigik wakfigik ulugen wo'netik, hinanggo ekhe wa'netik, anggur enggen amusu ekhe nobagagik ikhi logogun mene andi re, hinenggi ekhe sambul-ekhe sambul higithogo nek nobagakhi logoino o.

³⁸ Hari hokho meneba hilingiti logogun andoma re, yi minggu ti minggu hilingitarek andi higithogo oba mangorogo hilingiti logogun. Andi nen he, yi mene ti mene hiren An wo'neti lagep hak wo'netik, ekhe abok yagane'luk ebe wo'netik, ekhe hinendawinggen nenat wo'netik, ikhi logolik, ekhe oba mangorogoat wo'netik. ikhi logogun.

³⁹ Yi mene ti mene enggen arat palhep halok, tugi hinenggi 7 meneba tanggal 15 asi lagu halok, hiren hari hokho mene andi faget hinenggi 7 hari mondok hilingiti logoino. Hinenggi attak logogun andi inom, 8 mene andi inom he enogo fuluk, An nobaget weat set walogo logoino o.

⁴⁰ Hinenggi attak-attak yi mene ti mene hineabumo yago mene enggen fano mene nek wendeberogo palino o. Palhi logolik, sel engga inom, e enggi engga hokhorogo werek mene ekhe inom, palogo re, An hineisena Tuhan Allah fogetnabuogoluk hinendawimo hinagayegeti logolik, An Nobaget eroba a'nogo hilingiti logoino o.

⁴¹ Hari Hokho mene andi hilingisuogeluk he, hinenggi 7 nen andi inukhogo hilingiti logoino. Nen yi'nogo hilingiti logoino ti'nogo hilingiti logoino iluk yagahisigi mene andi hit hinagainafuri tagomangge mene nen ogo a'nogo nek hilingirik laga logogun.

^42-43 Hit hinagainafuri tagomangge mene nen he, Nineisena Tuhan nen nit ninombalak o Mesir en woginarek wulibi waga logolik o sabu engga mene elama faget wuri'mo logouwageluk yagaisasikhemo welagaukwa, iluk inelu logouwageluk, hit afuni Israel mene hinebe mondogat o sabu e engga meneba salogo hinenggi 7 nen logogun o. Hineisena Tuhan Allah Anaro, iluk ikhe yagaisano,” iluk yagatikhemo yagaisasikhe.

⁴⁴ At Tuhan nen, ”An fogetnabuogeluk, nobaget yi'nogo hilingirik laga logoino o,” iluk isikhe mene wene palek andi at Musa nen it afuni Israel mene yagaisoagaluk yagatikhe higithogoat yagaisasikhe.