IMAMAT 22 - Allah Wene Fano Wene Hupla Inane

Horek logogun iluk warogo wogeti logogun wene

^1-2 Tuhan nen yi'nogo ti'nogo hilingiti logogun mene faget it Harun inom at againafuri inom yagaisoageluk Musa mimingiti logolik, ”Hineisena Tuhan nebe Anat hilingi'mo, An nenu mondok fano horek welagirek mene a'nogo weagerogo fegep hanogore, it afuni Israel mene nen nobaget enogo fei weri'lagwi mene andoma re, fifurogo nek hilingfikhi logogun.

³ Hineisena Tuhan nebe An aro. Andi halok he ap ekhe hit hinambisangma mene ebe emerek logoligen it afuni Israel mene nen enogo fuluk warogo wo'nesi wagu mene omanogoba horokhogo laluk aren mezbah oba andoma warogo noligin lek. Wene melalek yire hundik-hundik hilingiti logogun.

⁴ It Harun ambisangma mene ekhe ou agap oba purak hangge inoba were'ma halok ogo, agap enggalimo mene ou logolik kurele wulibi wagu halok ogore, at ebe oan pugunsek yagati'lek werek kwelek aren yi mene ti mene An nobaget fei wagu mene andoma ekhe nanogo. Ap imam misik ekhe nen ap warek meneba fakhikhe halok inom, agap enggalimo meneba nen kurele wulibi wagu halok inom,

⁵ wam ogo ap ogo emerek werek kwelek fakhugu halok he, at ebe emerek logogin.

⁶ Ap imam misik ekhe ero kiba nen at emerek werek halok, hilingik kwelek at emerek were'ma nen enek mo ubuk ikhi logogin. Nen, mo mondogat ubuk ugunemen at ebe kume warek lek halok he, aren wam An nobaget fugu mene andoma nagain mondok lek.

⁷ Athe, mo ubuk umo at ebe mondogat pugunet era'luk enek he, at andi ninggi logouwageluk mene hilingi'mo nagain fano.

⁸ Hineisena Tuhan Anat ma re, ap andi nen wam amu wa'lagu mene inom, olomene nen senggelhu mene inom andi eino iluk ogo endep ekhe nanogo. Nen, at nagain halok he at ebe emerek mene asigin.

⁹ Hineisena Tuhan nebe Anaro, nen it andi re An nonggwarek faget enogo fakhasigimo re, it imam mondogaren he An nen wene melalek enogo fuluk yi'nogo hilingiti logogun iluk yagaisikhi lagi mene andi futfuluk hilingiti logouwak. Nen, iren a'nogo hilingiti'lek An Tuhan nawene melalek mondok horek mene andi sagalogo fogoin halok he, inebe wa'lasugun.

¹⁰ Afuni nen An nobaget fuluk wo'nesi weri'lagwi mene andi re ap amu mene it imam inom inawi misi'mo mene halok ogo, nen iren yabu yonggo palek waganogo fisugu mene halok ogo, ekhe ninggi logogun lek. We, it imam mene ineisok erokwe mene halok enek ninggi logogun fano.

¹¹ Oba nen he, it inamingmingengge it imam mene nen inonggwarek inauang oba onggo palha mene halok inom, nen it inaiba ta'lagaikha mene halok inom enek he, imam mene nen ninggi logouwageluk werek mene andi nogoin fano.

¹² It imam ina'logomi ap yabu imam hilingiri'lagwi lek mene we hesangge mene inom helugu halok he, An nobaget fugu mene andi re ninggi logogun lek.

¹³ Oba nen he, it imam mene ina'logomi sogwe werek mene halok inom, athe lologo herakfisugu halok inom, emberegat inomalik legengge ineisena inagaisa inaiba we'luk were'ma eisena nen halhu mene halok enek he, at eisena fikhit agu mene andoma ninggi logogin. We, imam ineisok erokwe mene nek An nobaget fugu mene andoma ninggi logogun fano.

¹⁴ Nen at imam ekhe eisok erokwe mene lek we ap amu meneba nen onggothogo nunggu mene An Tuhan nobaget fei wagu mene omanogo ekhe nagain halok, aren obali'mo it imam inoba dua puluh persen ekhe inom mangorogo wogisagain fano.

¹⁵ An nobaget enogo fei wagu mene andoma hit imam mene nen ekhe emerogo fegep hanogo.

¹⁶ Hineisena Tuhan nebe Anat, An enek wo'nesi wagu mene andoma enogo figimo re ap we hesangge mene nen noageluk herak fisa fuk. Herak fisikhi logogin halok he wene at oba hilinglaga logogin,” isikhe.

^17-19 Tuhan nen it Harun inom, againafuri inom wene melalek yi'nogo hilingiti logouwageluk Musa yagati logolik, ”Ap Israel mene nen halok ogo, it pok mene oba nen femhogo werek mene inom halok ogo, at ane yi'nogo logogin iluk ugu mene faget wam warogo An nol nesigiluk halok inom, nen we endawi fano nen warogo nolnesigin iluk halok inom, hilingiti logolik andi re, iren fei wagu mene andi An wanuageluk halok he wam ebe ai mene agambut palek lek mene halok wo'nesi waga logogun.

²⁰ Wam agambut palek mene re An hineisena Tuhan wanhi logogin mondok lek enggere, warogo wo'nesi waga logou fuk.

²¹ Nen ap misik ekhe nen An nobaget ane yi'nogo hilingisigin iluk ikhe mene higithogo lambulugun mene wo'nesi wagu halok inom, nen endawi fano nen warogo wo'nesigin iluk hilingiti logolik halok inom he, iren fugu mene andi An nen wanuageluk halok he, wam agambut palek lek mene nek wo'nesi waga logogun.

²² An Tuhan nobaget fei waga logolik halok he eil humunik mene halok inom, agap oumo werek mene inom, oak sombolek mene inom, pot kurele werek mene halok inom, agap oba senggelkel mene halok inom, pukha werek mene halok inom, wam ariginik mene andoma re mezbah oba andoma warogo nolnesi wesugun lek.

²³ Hit hinendawimo hinagaiyek oba wo'nesi wesugun mene andi re, we wam ebe tanggok-tanggok sirek mene inom, etogame werek mene inom andi re, hiren wene we mene hilingitunem andoma higit waluk waga logogun oba nen, wam obabut ariginik mene andi re, An wo'nesi wesugun halok An wanigin lego.

²⁴ An Tuhan nobaget fei waga logolik halok he, wam ouwali sagalhunem weak aga mene inom, teksek mene inom, elonggoma nen fili a'luk oumo aga mene inom, waganogo hugisaga mene halok inom, wo'nesi waga logogun lek. Obabut ariginik mene andi re hit hinanggweang oba ekhe hilinglasinogo.

²⁵ Wam ap pok mene nen kulharek mene wokhisugu mene halok he wam andi agap palek mene hak hilingi'mo, An nen wanigin lek enggere nunggu mene iluk An wo'nesi wesu fuk.

^26-27 Wam sapi eak inom domba eak inom kambing eak inom ket ta'lagu mene halok he, agaisa inom enggi 7 wela'lugen enek he, wam andi nunggu mene faget iluk wo'nesi wagunem wanhi logogin.

²⁸ Linggene misik oba wam sapi isa inom, domba isa inom eagwi inom seberogo warogo fei wagep hanogo.

²⁹ Hiren ambi Tuhan hai warogo wogosugun iluk wo'nesi waga logolik halok, hiren wo'nesi wesugun mene andi wanuageluk he, wene melalek werek higithogo hilingiti logoino.

³⁰ Andi sambul watu mene andi re, we hinenggi andi sambulat felelenghogo nano. Ohealekwe faget ekhe endephogo fikhi logou fuk,” iluk isikhe.

³¹ Tuhan nen ikhi logolik, ”Hineisena Tuhan nebe Anat hilingi'mo re, An nen nawene melalek yi'nogo hilingi'no iluk ikhi lagi mene andi, futfuluk higithogo hilingiti logoino.

³² Hineisena Tuhan he Anaro. Annenat hit enogo horogo hinobagasigimo, hit afuni Israel mene mondogaren he, An Hineisena Nobabut Mondok fano horek mene iluk anggikhi logolik Nenu weagerogo fugubo.

³³ Hineisena Tuhan nebe Anaro. An hit hineisena Allah asigiluk o Mesir en wokhinarek wulibi wagagi andi, iluk ikhe yagaisano,” iluk yagaisasikhe.