IMAMAT 16 - Allah Wene Fano Wene Hupla Inane

Afuni nen inaweak leget fisoageluk hilingiti lagaukwa wene

¹ Ap Harun amlogomi inebe pire nen he, endu nineisena Tuhan wogosu lek mene wogoti lagaukwama, inebe wa'lagaukwasik oba nen hobuk At Tuhan nen Musa mel yagatikhe:

² ”Hat hoe Harun nen yi'nogo hilingiti logouwagen yaga'no: O An nonggwarek nawi hulu mondok wesama hangge hilingi'mo andoma Peti Wene Warogo wokhinafigi iluk hilingik werek mene a'nogo sebelogo nebe ohena anggele'ma logolik, hinelokhoma menlagirek andi nen he, at Harun nen An Nonggwarek nawi hulu su kain nen hulirogo senggele'ma andoma inenggi ti sambul kwikhi logogun iluk wene palek higithogo andi sambul enek kwikhi logogun en yaga'no o. Aren wene andi herakfisambik amukwe kigin halok, at ebe wa'lasigin o.

³ Wene palek werek andi higithogo at Harun nen An Nonggwarek nawi hulu senggele'ma hore'ma andoma kwigiluk halok he, wam sapi ai mene it weak hilingita mene An nen horogo legetfisoageluk, wa'netik, nen domba ai mene lolnetik, imbik halok enek kwikhi logouwago.”

⁴ Aren yabu a'nogo hilingiti logolik, wene palek werek yi higit hogoat hilingiti logouwak. At ebe An Nonggwarek nawi hulumo hore'ma a'nogo oan kwigi'lek logolik, kume fanorogo wa'luk he, su An nebe eisewerek logolik laberagarek asu andi labeti logouwago. Su andi inebema mene inom, ineiso'ma mene inom, laberaluk he, ban pugetik, unggulasu salhik, ikhi logogun andi ebe mondogat yo linen mene ugu halok labeti logogun o.

⁵ Ma re, it afuni Israel mene nen weak hilingita mene An nen horogo legetfisoageluk, wam kambing ai mene ebe pire nobagalugen, nolneti logogun mene wam domba ai mene misigat halok wanhik, waluk he, at Harun wogosi waga logouwago.

⁶ Nen, at Harun onggwarek weak hilingite mene faget inom, againafuri weak hilingita mene faget inom, An nen horogo legetfisoageluk, wam sapi ai mene misigat halok warogo An nolneti logouwago.

⁷ Wam kambing ai mene ebe pire a'nogo An nawi su mene wuri'mo andi kweba fei waga logouwago.

⁸ Fei wagunem andoma nen, aren he oagengge helep pire mene, ekhe Tuhan faget iluk, oba lisu palek mene, nen ekhe re inoba nonggologo wulakfagarek mene faget u hak, Azazel faget iluk oba lisu palek mene, hukhikhi logouwago o.

⁹ A'nogo lakfugunem, wam nineisena Tuhan faget, iluk oagengge oba asigin mene andi, afuni weak hilingita mene An nen horogo leget fisoageluk warogo nobagagun o.

¹⁰ Nen, Azazel faget iluk oagengge oba asigin mene andi, elugengge An Hineisena Tuhan neilhanem fembik, An nen afuni Israel mene weak hilingita mene andi horogo leget fisoageluk hele fikhalogo re, o leimo afuni le'ma a'lima inoba nonggologo wulakfisagarek hak, Azazel faget lakfisikhi logouwago.

¹¹ At Harun nen wam sapi ai mene at onggwarek weak hilingite mene faget inom, againafuri weak hilingita mene faget inom, An nen horogo leget fisoageluk warogo nobagambik senggelogo fuluk,

¹² endu re, yi mene ti mene An faget warogo nolnetarek oba andoma mene lemesak oba endu enggen earogo hokhorogo wanimbik he, amben fano mene waluk fanorogo sagalogo wul hakhogo hilingfuluk inenggi pireba yinggilogo waluk he, An Nonggwarek Nawi hulumo hore'ma andoma kwikhi logouwago.

¹³ Waluk kuluk he, amben fano mene andi, Peti An nen Wene Warogo wokhinafigi iluk hilingik mene andi elokhoma nolhunem he, endu hule re, peti andi ambe sebelek mene sebelogo fugunem he, Harun nen eilenggen hikhi logogin mondok lego. Eilenggen hagain halok he ebe wa'lasigin o.

¹⁴ A'nogo hilingiti logolik, wam sapi andi amep endebat halok ekhe enggi tum oba wanimbik he, peti An nen wene warogo wokhinafigi, iluk hilingik mene andi ambe sa'lip ebene kwetet higik, watfembik he, elokhokwe higit enggi 7 ba kwetet higik, watfikhi logouwago.

¹⁵ A'nogo arat hilingfuluk he, afuni Israel mene mondogat weak hilingita mene An nen horogo legetfisoagaluk kambing warogo senggelino o. Senggelimbik, amep he, An nonggwarek nawi hulu hore'ma a'nogo waluk kwimbik, wam sapi ai mene amep waluk kwimbik hilingisigin andi higithogoat, peti An nen wene warogo wokhinafigi iluk hilingik werek andi ambe sa'lip ebene kwetet higik, watfuluk he, elokhekwe figit kwetet higik, watfikhi logouwago.

¹⁶ Aren a'nogo hilingisigin andiba, afuni Israel mene nen o An nonggwarek nawi hulumo a'nogo weak hilingisogo figik, it weak mondogat hilingitik, agarek mene andi hosigin o. An nonggwarek nawi su mene andi, it afuni Israel mene inawi su mene anggele'ma wurik were'ma nogo nen he, it weak hilingitarek andi nen, O Allah awi su mene wurik andi, o hulu andoma emetfaga iluk hoti logogun o.

¹⁷ At Harun nen yabu hilingisigiluk An nonggwarek nawi hulumo hore'ma andoma kwimbik afuni weak hilingita mene An nen horinabuagaluk hilingiti logombik wulibi wesigin huli, afuni An Nawi Su mene wurik o hulu hore'ma senggelekwe andoma mondogat inebe ekhe logogun mondok lego. At Harun onggwarek weak hilingite mene faget inom, againafuri weak hilingita faget inom, afuni Israel mene mondogat weak hilingita mene faget inom, An nen horinabuagaluk arat hilingfuluk,

¹⁸ at ebe wulibi wesimbik he, wam sue An faget warogo nolnetarek oba andi hosigiluk wesigin o. Wesimbik, sapi inom, kambing inom, amep endebat halok ekhe wanimbik he, mezbah oba andimuk fena-fena nganoksek andoma ebene wati logouwago.

¹⁹ Hat enggi tum en mep andi endebat halok ekhe wanimbik he, wam sue An faget warogo nolnetarek andi ebene enggi 7 nen kwetet higik wasuago. A'nogo hilingisigin andiba, afuni Israel mene nen An wam warogo nolneti logogun kwe andi weak hilingisogo fagarek mene andi, An nonggwarek faget mondok logouwagaluk fanotfagain o iluk ikhe, iluk yaga'no,” iluk yagatikhe.

Wam kambing esi sing mene silogo lakfikhi logouwagaluk yagatikhe wene

²⁰ At Allah nen a'nogo yagatikhesik ekhe mel yaga'no isikhe: ”At Harun nen, An Nonggarek Nawi Hulu Hore'ma a'nogo arat hotik, o hulu fena kwe mondogat hotik, wam An faget warogo nolnetarek oba andoma hotik, uluk he, wam kambing ekhe eluk logogin mene andi, wanuago.

²¹ A'nogo waluk he, Harun enggi pirenet kambing andi unggul oba sebel fuluk, afuni Israel mene nen weak hilingitik, kwanirogo hilingitik, nane sagologo hilingitik horog hilingitik, aga mene andi mondogat fakhogo fikhi logouwak. A'nogo hilingisigin andiba afuni Israel mene weak hilingita mene andi mondogat felelenghogo kambing andi ungguloba fagain o. A'nogo fembik, ap ekhe ayonggo fogoin mene nen kambing andi silogo o leimo afuni le'ma andoma waluk lakfisa laga logouwak.

²² Waluk laluk, kambing andi nen he, afuni Israel mene weak hilingita mene mondogat waluk he, o leimo afuni le'ma andoma logouwakhogo, obogisikhi logouwak.

²³ A'nogo hilingfuluk he, at Harun ebe An Nawi su meneba wuri'mo a'nogo kwi laluk he, su ap An nebe eisewerek logolik inasu laberagarek mene An Nonggwarek Nawi Hulu Hore'ma a'nogo kwigiluk labe'luk kwikherek mene a'nogo nonggologo andoma fouwago.

²⁴ A'nogo hilingi'luk he, i ekhe kume ikhi logogun oba yenggelek oba obalik enekhogo hilingi'mo omanogo nen kume wa'luk he, onggwarek asu we mene labeti logouwak. A'nogo arat hilingi'luk he, at ebe wulibi we'luk, at onggwarek aweak hilingite mene faget inom, afuni Israel mene ekhe weak hilingita mene faget inom, An nen horogo legetfisoageluk, wam warogo nolneti logouwago.

²⁵ A'nogo nolneti logolik, it weak hilingita mene An nen horogo legetfisoageluk wam warogo An nobaget nolnesugun mene andi asei re mezbah oba andoma nolhi logouwago.

²⁶ At ap wam kambing Azazel faget hele fikhalogo o leimo afuni le'ma fuluk wesigin mene andi, ambotkwe at ebe aiba o sabu su mene wuri'mo oan wagi'lek logolik, asu sobaligik, ebe kume watik, ikhi logouwago.

²⁷ Nen, sapi ai mene a'nogo inom, kambing ekhe a'nogo inom afuni weak hilingita mene An nen horogo legetfisoageluk, wa'nesimbik, amep An Nonggwarek Nawi hulu hore'ma a'nogo waluk kwigin mene andi ebe re, leget enda'ma waluk wulibi lambik, wam ebe pire andi mene agap inom, ebe inom, al inom, mondogat endu nolhi logouwago.

²⁸ It ap a'nogo nolugun mene andi, inebe inambotkwe inawi su mene wuri'mo oan wagi'lek logolik, inasu sobaligik, inebe kume watik, ikhi logouwak iluk ikhe yaga'no,” iluk yagatikhe.

Afuni Israel mene inaweak horogo legetfisoageluk hilingiti logogun wene

^29-31 At Allah nen a'nogo yagatikhesik, ekhe mel yaga'no isikhe: ”O tugi hinenggi wenati logolik, tugi 7 mene tanggal andiba re, An nonggwarek nawi andi nen he, afuni Israel mene inom, afuni endakwe mene it inaiba welagaikharek mene inomen he, sumburu ninggi'lek logolik, inenggingge ekhe wanhi logogun mondok lego. O andi sambul he, afuni Israel mene inebe fano inoba horek logouwageluk, it weak hilingita mene mondogat andi An nen horogo legetfisoageluk a'nogo hilingiti logouwak. Hilingiti logogun mene wene palogo figi andi hologo higithogo hilingitu mondok logouwago.

³² Ap An nebe eisewerek mene inoe kain Imam Agung eisena obali'mo logolik, An nonggwarek faget hilingiti logouwageluk, unggul sebelogo menfaga mene halok, aren afuni weak hilingita mene An nen horogo legetfisoageluk hilingiti logouwago. Aren a'nogo hilingiti logolik su labesu meneat labe'luk he,

³³ O An Nonggwarek Nawi hulu mondok Hore'ma a'nogo faget inom, An Nawi hulu andogotuba faget inom, mezbah faget inom, it imam-imam faget inom, afuni Israel mene mondogat faget inom, inoba horek logouwageluk a'nogo hilingiti logoino o.

³⁴ A'nogo hilingiti logogun andi re, afuni Israel mene nen weak hilingitarek mene mondogat An nen horinabuageluk tahun ebe lombok he, inenggi misik sambul hilingiti logogun, iluk wene palogo figi mene yi higithogo hologo hilingitu mondok logoino o, iluk yaga'no,” iluk yagatikhe. A'nogo yagatikhemo, at Harun nen he, Tuhan nen, wene melalek Musaba yagatikhe mene a'nogo higithogoat hilingitikhe.