IMAMAT 14 - Allah Wene Fano Wene Hupla Inane

Ou purak henanggo enggin mene inoba a'luk fano agunem, inobaget hilingiti logogun wene

^1-2 Tuhan nen ap ekhe ou henanggo hokho mene waluk fano agunem ebe pugunerikhi logolik hilingiti logogin mene faget iluk wene melalek Musaba fesikhe mene re yi: Ap a'nogo ebe emerek lek iluk ugun sambul a'nogo re at ebe waluk it imam were'ma waga logogun.

³ Waluk wagunem it imam omanogo nen o sabu salek oba nen endakwe fikhit wulibi laluk, ap a'nogo mondogat fano aga hea iluk kwelakhikhi logogun. Kwelakhugunemen, ap a'nogo ebe mondogat fano aga halok,

⁴ at andi nen sue pire wesa werek lek mene inom, yo enggi segelet misik ekhe inom, e laik enggi misik teksek ekhe inom, yo sikhipsek eil mep mene misik ekhe inom, hisop enggi misik inom waluk wesuageluk it imam omanogo nen yagati logogun.

⁵ Waluk wagunem sue misik ekhere belanga kweang meneba hilingik engge i elesimo nen eil wurik weak mene wulibi wagarek mene hinagaisogo weregengge a'nogo amboloba nen wati logogun.

⁶ Sue ekhe a'nogo inom, e laik enggi teksek a'nogo inom, yo eil mep mene a'nogo inom, hisop enggi misik a'nogo inom he sue warek a'nogo amep oba yugul haluk,

⁷ it imam en sue a'nogo amep enggi 7 nen ap ou meneba nen fano agu mene a'nogo at ebe mondogat fano aga iluk inelu asuageluk at a'nogo ebene kweterisikhi logogun. A'nogo hilingi'luk sue ekhe eluk werek mene a'nogo re, o leik fikhit obogisikhi logogun.

⁸ A'nogo hiling fuluk ap a'nogo asu i sobalaluk, esi mondogat palogo kume warikhi logogin. A'nogo hilingitunem at a'nogo ebe mondok pugunsek mene aga iluk o sabu wuri'mo omanogo kwi laga logogin. A'nogo kwi lagain oba nen he, o sabu sale'ma elonggoma a'nogo kwigi'lek enda'ma andoma werek kwelek enek he linggene enggi 7 nen logogin.

⁹ Linggene enggi 7 nen aremnogoba re, at a'nogo esi inom, omboro inom, eil age inom, ebene omosi wulibik mene mondogat inom, palaluk, asu sobalogo kume fanorogo warugunem halok enek he, at mondogat ebeba pugunsek mene aga logogin.

¹⁰ Linggene inenggi 8 meneba re, ap a'nogo nen domba ai mene pire inom nen he mene misik umur satu tahun oba mene ebeba agambut palek lek mene halok waluk wesigin. Andi nen fena re zaitun amusu sepertiga liter inom, tepung zaitun amusu inom munenek engge 3 kilogram inom waluk wesigin.

¹¹ Waluk wagunem it imam en ap ebe inom, angge helaluk wesigin mene omanogo inom, waluk o Tuhan Awi Sabu sale'ma solombonma omanogo fei waga logogin.

¹² Fei wagunem it imam omanogo nen domba ai mene aremnogo misik ekhe inom zaitun amusu mene sepertiga liter ekhe inom waganogo obali'mo warogo noligin iluk Tuhan faget enggi tum warogo nolhi logogin.

¹³ Domba andi re inaweak lek hilingisogo fouwageluk inom, Tuhan endawimo agaiyeget fouwogeluk nolesugun mene inom omanogo re, obalik wam watuba tegele'ma omanogo nen wati logogun. Wam warogo obali'mo iluk watu mene inom afuni inaweak leget fisugu mene inom andem he, mondok horek mene it imam omanogo nen helugu mene hilingi'mo, domba andi re andemenat wati logogun.

¹⁴ Wat fuluk it imam omanogo nen domba eak mene a'nogo amep endephogo waluk, ap ebe pugunet laga iluk yagasugun mene a'nogoba, esanggo alimuk ebekwe inom, enggi fuap ebekwe inom, eisok fuap ebekwe inom, yugul fikhi logogun.

¹⁵ A'nogo hilingfuluk at imam a'nogo nen zaitun amusu endephogo ekhe waluk onggwarek enggi agut harekwe meneba pelak fikhi logogin.

¹⁶ Mondogat pelak fuluk he at enggi ebekwe nen amusu a'nogo yugul haluk he, Tuhan Awi Sabu sale'ma omanogo enggi 7 nen oba kweterisikhi logogin.

¹⁷ A'nogo hilingfuluk amusu enggi agut oba endebat logogin mene aremnogoba re, attak-attak ap ebe pugunet laga iluk yagasugun mene a'nogoba ebene yugulfogoin kwe aremnogo nek, esanggo alimuk ebekwe inom, enggi fuap ebekwe inom, eisok fuap ebekwe inom, yugul fikhi logogin.

¹⁸ A'nogo hilingfuluk amusu fena werek mene omanogo abirengge re, ap a'nogo ungguloba kweisal isikhi logogun. A'nogo hilingisugun andiba it imam en Tuhan eilhanem ap a'nogo ebeba fano horek mene logouwageluk hilingisugun.

¹⁹ A'nogo hilingfuluk it imam en ap emerek werek mene a'nogo aweak legaphogo pugunet laga iluk wam warogo wogeti logogin. Woge'luk he, wam Tuhan endawimo agaiyeget fugu mene a'nogo warogo noleti logogin.

²⁰ Wat fuluk, amep lek mene noluageluk fei wagu mene omanogo inom mezbah amboloba nolhi logogin. A'nogo hilingisigin oba at imam en ap a'nogo ebe fano horek logouwageluk hilingisogo fagain andi.

²¹ Nen, ap andi re enggi lek elagaik mene logolik halok he, obali'mo fagain mene re aren domba eak ai mene misik ekhe Tuhan faget enggi tum wat fugu mene iluk waluk waga logogin fano. Andi inom mangorogore amep lek mene fagain iluk, we satu kilo tepung fano mene zaitun amusu inom munenegengge inom, sepertiga liter zaitun amusu inom seberogo waluk waga logogin fano.

²² Ekhe ap andi nen sue merpati a, athe sue abiang a, pire waluk we'luk he, misik ekhere inaweak leget fisoageluk faget, nen ekhere Tuhan endawimo agaiyeget fugu mene faget waluk waga logogin.

²³ Abirengge warogo noletu mene andi re ap a'nogo nen enggi 8 mene a'nogoba re, at onggwarek ebe pugunet fakhagain mene aremnogo waluk he, it imam inambit Tuhan Awi Sabu sale'ma solombonma aremnogo fei waga logogin.

²⁴ Fei wagunem it imam omanogo nen domba eak a'nogo inom, zaitun amusu a'nogo inom, Tuhan obaget enggi tum warogo fugu mene andi it imam inangge aga logogin.

²⁵ A'nogo hilingfuluk it imam en domba eak a'nogo warogo amep endebengge waluk he, ap pugunsek mene a'nogo asigin iluk anggugu mene a'nogo esanggo alimuk oba inom, enggi fuap ebekwe meneba inom, eisok fuap ebekwe meneba inom yugul fikhi logogun.

²⁶ It imam omanogo nen amusu enggi agut harekwe meneba pelak fuluk he

²⁷ enggi ebekwe nen he amusu a'nogo enggi 7 nen oba Tuhan Awi sabu wurik a'nogobene kweterisilik laga logogin.

²⁸ A'nogo hilingfilik laluk, amusu fena at enggimo werek mene aremnogoba re, attak ap a'nogo ebene wam amep oba hilingfugukwe omanogo esanggo alimuk ebekwe meneba inom, enggi fuap ebekwe meneba inom, eisok fuap ebekwe meneba inom, at ebe pugunsek mene hilinglasuageluk werek mene a'nogoba yugul fikhi logogun.

²⁹ Nen, amusu fena aremnogo mondogat he, Tuhan eilhanem ap a'nogo ebe pugunhogo iluk unggul oba kweisal isikhi logogun.

³⁰ A'nogo hilingfuluk abirengge it imam omanogo nen sue merpati ogo, abiang ogo,

³¹ misik ekhere aweak leget fouwageluk, nen ekhere Tuhan endawimo agaiyeget fugu mene faget iluk, inom seberogo inenggi tum wat fugu mene iluk fikhi logogun. A'nogo fagain andiba re, it imam omanogo nen ap a'nogo Tuhan eilhanem pugunhogo fikhi logogun.

³² Ap enggi lek mene ekhe ou purak henanggo hokho mene oba were'ma pugunhogo fisikhi logogun mene iluk wene melalek yagaisasikhe mene re andi.

O wurik mene fili agu halok hilingiti logogun wene

³³ Tuhan nen Musa inom Harun inom wene melalek yi inoba fikhi logolik,

³⁴ it afuni Israel mene o Kanaan Tuhan nen wokhisasikheba omanogo mondogat kwi lambik o wurik oba fili agu halok hilingiti logogun mene iluk wene melalek yi inoba fesikhe.

³⁵ Wene melalek inoba fikhi logolik he, ”Ap ekhe nen awi wuri'mo fili agu mene eilenggen haluk halok he, weak-weak it imam yagaisa laga logogun.

³⁶ Yagasi lagunem at imam a'nogo nen fili aga mene a'nogo kwelakha wagi'le'ma, yi mene ti mene o andi elonggoma werek mene mondogat wulak fisoageluk yagaisikhi logogin. Yagaisugunem wulak fisamo nek he at eilenggen kwelakhikhi logogin, oba nen he a'nogo hilingisigin lek halok he yi mene ti mene o andi elonggoma werek mene andoma mondogat he emetlaga logogin.

³⁷ Oba nen it ap imam omanogo nen kwelakhugunemen elokhe hal-hali warogo mep sagalogo hilingi'mo nen o hobat elonggoma waluk ku hak obabut hilingik halok,

³⁸ it imam omanogo nen o a'nogo herakfisamo inenggi 7 nen kwe yagarogo logogin.

³⁹ Kwe yagarogo logombigen he, inenggi 7 mene andi nek he fili mene a'nogo ekhema inom saga ikhe he a, iluk at a'nogo nen nekhengge eilenggen kwelakha waga logogin. Nen, kwelakha wagunemen fili mene a'nogo mondogat saga ikhe halok,

^40-41 aren helep hobat wurik mene fili andi nen yugulaga mene omanogo senhikhe halok inom, helep andi mene agap endakwe lilibanetha mene serephigik waganogo re, o kota endakwe fikhit obalik emerek oba omanogo hugisikhi logouwageluk, yagaisano.

⁴² Hugisaluk helep waganogo wulak fisugu mene a'nogo obali'mo re helep ket mene wut fuluk o a'nogo hobat abirengge inom, agap endakwe lilibanetu mene inom he mondogat ket meneba nek wusugun.

⁴³ Attak mene omanogo felelenghogo wulak fisaluk helep ket mene obali'mo fuluk agap endakwe fikhit ket meneba nek liliban higik wusumo nen, fili mene a'nogo nekhengge weregat halok he,

⁴⁴ it imam en fili mene a'nogo ekhe inom saga ikhe he a, iluk nekhengge ineil kwelakhikhi logogun. Kwelakhugunemen weregat halok he o andi emerek awi iluk ikhi logogun.

⁴⁵ A'nogo uluk o a'nogo mondogat meisalugun, meisalogo e inom, helep inom, agap endakwe lilibanetu mene omanogo inom, mondogat o kota abel endakwe fikhit hugisa laga logogun.

⁴⁶ A'nogo hilingisugun lek halok he, ap misik ekhe o andi elonggoma kwi lagu halok, ap andi ebe emerek were'ma mo arat ubuk ikhi logogin.

⁴⁷ Ap ekhe o andi elonggoma nogoikhe halok ogo, nen amburu ningge halok ogo, at asu ogo sobalagain fano.

⁴⁸ Oba nen he, o a'nogo hobat endakwe lilibanetha huli nen it imam omanogo we'luk kumut hugunemen fili a'nogo ekhe inom weinam aga lek halok, fili a'nogo mondogat lek agama iluk aren o yi mondogat fano horek werek ikhi logogin.

⁴⁹ O andi pugunesuogeluk it imam omanogo nen he sue pire inom, e laik inom, yo eil mep mene inom, hisof enggi teksek misik inom waluk,

⁵⁰ sue misik ekhere belanga i elesi agai eil wurik weak hinago werek mene a'nogo amboloba nen wati logogun.

⁵¹ Wat fuluk e laik inom, hele mep mene inom, hisop enggi teksek inom, sue eluk werek mene a'nogo inom he sue warek mene a'nogoba inom, yugul haluk he o a'nogo ebene inenggi 7 nen oba kweterisikhi logogun.

^52-53 A'nogo hilingfuluk sue eluk werek mene a'nogo re o kota endakwe fikhit o leimo andoma wulak fisikhi logogun. A'nogo hilingiti logogun oba re, it imam en o a'nogo faget pugunetunem o a'nogo pugunsek mene aga logogin,” iluk yagaisasikhe.

⁵⁴ Afuni inagap oba inoumo purak henanggo faget inom,

^55-56 tuk-tugengge faget inom, inagap oba unggul hilingisogo kurele walek mene faget inom, inebeba fit-firengge hilingik mene faget inom, inasuba ogo athe inaiba ogo, fili a'luk kulumage fugu mene faget inom, hilingiti logogun mene faget wene melalek a'nogo yagaisasikhe.

⁵⁷ Wene melalek a'nogo yagaisasikhe andi re, yi mene ti mene andi mondok fano pugunsek werega, emerek werega, iluk enegenggerogo hilingi'mo futfikhi logouwageluk yagaisasikhe.