IMAMAT 12 - Allah Wene Fano Wene Hupla Inane

Hemi ineagwi takhugunem inenggi sabul horogo hilingiti logogun wene.

¹ Tuhan nen wene melalek Musa oba fesikhe mene re yi.

² Afuni inunggulenu Israel mene nen halok, he misik ekhe nen omalik abengge takhugu halok he, linggene 7 nen andi re he andi amep lagunem werek higithogoat at ebe emerek logogin.

³ Linggene inenggi 8 meneba nek he, omalik a'nogo agap enggalimo mene palhi logogun.

⁴ At ebe nek he inenggi 33 hari ba wela'lugen mene ogore amep a'nogo laguat werek halok he, at ebe emerek logogin. Aren yi mene ti mene wene kabogeti logolik hilingitarek meneba iluk ogo ekhe sen hagain mondok lek, nen Tuhan Awi Sabu sale'ma ogo kwi lagi'lek werek kwelek he, mo arat ubuk ikhi logogin.

⁵ Nen, he ekhe nen at omalik helengge takhagain halok he at enggi 14 harinen at amep laga logolik logogin andem enggi higithogo logogin.

⁶ Nen, he andi aren omalik abengge ogo helengge ogo takhagain halok ogo at emerek logogin mene a'nogo re mondogat lek asi lagu halogen, he a'nogo nen Tuhan faget wogetungge waluk it imam inambit o Tuhan Awi solombonma omanogo waga logogin. Nen aren Tuhan faget waluk waga logogin mene andi re nolengge noletu mene iluk domba eak tahun misik oba mene inom, nen aweak leget fisoageluk he sue merpati ket souge mene ogo, abiang ogo waluk waga logogin.

⁷ Waluk wagunem it imam en he a'nogo ebe emerek werek mene a'nogo faget enggi sabul horogo iluk Tuhan wogetunem at ebe horek mene aga logogin. It hemi nen ineagwi takhaluk halok hilingiti logogun menere andi.

⁸ Nen, at he andi nen he domba fougetu aple elo'lek agu halok he, aren sue merpati ket alue agu mene pirerogo hea, athe sue tekukur ket alue agu mene pirerogo hea, inom waluk waga logogin, andi mene misik ekhe re Tuhan endawimo agaiyeget fugu mene, misik ekhe re aweak legabesuageluk mene, faget waluk wagunem he it imam en he, he a'nogo enggi sabul hosuageluk hilingitunem at he a'nogo ebe pugunsek mene aga logogin.