IMAMAT 10 - Allah Wene Fano Wene Hupla Inane

Nadap inom Abihu inom weak hilingitukwa wene

¹ Lingge misik sambul it Harun amlogomi Nadap inom Abihu inom aremnogo nen endu hunduk palogo waluk logoin mene obalik inamu-inamu wanhukwasik endu enggen kwalhukwa. Kwalhukwasik iren amben fano mene dupa endu hunduk a'nogoba Tuhan obaget iluk nolhukwa. Oba nen he Tuhan nen, hit a'nogo hilingi'no iluk yagaisasikhe le'ma, iren endu nolhukwa mene andi re ebe agandou nolhukwa lek.

² A'nogo hilingitukwama Tuhan nen ferekhogo it inebe noageluk lakfei wagaikhemo it aremnogo o Tuhan Awi Sabu sale'ma aremnogo nen wa'lagaukwa.

³ Wa'lagaukwama at Musa nen Harun yagati logolik, ”Tuhan nen Afuni An nobaget hilingiti logogun mene halok he, An Nebe horek welagi mene a'nogo legeisogo nobagakhi logolik fogetnafi logogun, nen An nebe nanggiluk welagi mene a'nogo afuni An nagainafuri inunggulenu mene inoba inugisikhi logogin, iluk, Tuhan nen ikhe,” iluk Harun yagatikheba nen he, at ane igi'lek wamborek welagaikhe.

⁴ A'nogo yagatikhemo, at Musa nen Harun eisena agot it hun Uziel againafuri Misael inom Elsafan inom aremnogo wolinafikhesik yagaisikhi logolik he, ”Ya we'ni, hit hemberek hinebe hinombalo misik mene nen tago mene welagepma re, hinombalo ebe warek he yoma werek enggere, o Tuhan Awi Sabu sale'ma yoma nen waluk wulibi lambik he o abel endakwe fikhit fei lani o,” iluk yagaisasikhe.

⁵ A'nogo yagaisasikhe higithogo, it aremnogo wagaukwasik inombalo warek a'nogo asu laberek mene inenggi nen fagaisogo waluk o Sabu sale'ma nen abel endakwe fikhit fei lagaukwa.

⁶ A'nogo hilingitukwasik at Musa nen Harun inom amlogomi inebe pire inenu Eleazar inom Itamar inom inoba yagaisikhi logolik, ”Hit hinendawi ou en hinesi salogo hinasu pelagi su igisogo fong wasu fuk. Hit a'nogo hilingisugun halok he hit hinomat wa'lasugun, nen it afuni Israel mene mondogat ogo Tuhan nen a'mage inoba fagainat. Oba nen he, it afuni Israel mene fenakwe nek he it andi Tuhan agandou en inoate mene andi faget fong wasuak.

⁷ Hit he Tuhan obaget hilingiti logouwageluk a'nogo menhinobakhi logolik amusu hinunggul oba kweisalogo menhinobagagimo welagep enggere, Tuhan Awi Sabu sale'ma yoma herakfuluk wulibi la fuk,” iluk yagaisasikhemo, at Musa nen yagaisasikhe mene a'nogo higithogo nek hilingitukwa.

Ap Imam en hilingiti logogun mene faget yagaisasikhe wene

⁸ Tuhan nen Harun yagati logolik,

⁹ ”Hat inom, hamlogomi inomen i anggur amusu naluk ogo, athe i lugul-lugwi palharek mene naluk ogo, An Nawi Sabu sale'ma kwi waga logogun lek Nen, hiren wene melalek yi sagal fogoin halok he hit hinebe wa'lasugun. Wene melalek yire hat hambisangma nen tagomangge mene nen ogo mondok tiphogo nek hilingiti logogun.

¹⁰ Nen, hiren Allah faget enekhogo werek mene inom, hesangge werek mene inom, weak mene inom, fano mene inom, andi furogo penhaluk hilingiti logogun.

¹¹ Yi'nogo ti'nogo hilingiti logogun mene wene melalogo Musa bene nen yagati mene andi re, haren it afuni inunggulenu Israel mene mondogat yagaisikhi logoino,” iluk yagatikhe.

¹² A'nogo yagatikhemo, at Musa nen Harun inom amlogomi inebe pire Eleazar inom Itamar inom yagaisikhi logolik, ”Nunggu mene Tuhan faget fugu mene gandum andoma waluk he, tepung andi mene oba nen he roti fiterek lek meneba wera'luk, werago fugu mene andi re ebe mondok horek mene hilingi'mo mezbah era'lu horokhogo andemen nano.

¹³ Roti andi Tuhan obaget fugu mene hilingi'more nunggu mene ogore obalik hore'ma nen nano. Tuhan nen an noba wene melalnobagakhi logolik he roti andi re hat inom hat hamlogomi inom hinobaget mene iluk yaganete.

¹⁴ Oba nen he. hit inom hit hinagainafuri inom he wam elonggo palek inom, ago palek inom inane menfuluk enekhoogo fugu andoma ninggi logogun fano. Andi re it afuni inunggulenu Israel mene nen lambulogo ninobagauwageluk mene warogo nolhu mene andoma hit imam mene hinobaget he andi hilingi'mo re, hiren we hesanggema obalik wesa le'ma andoma nen nogoin halok fano.

¹⁵ Nen, wam ogo enekhogo fei wagu mene inom, elonggo palek inenggi tum warogo fei wagu mene wam sei nolengge nolhu mene inom waluk we'luk Tuhan obaget fei waga logogun. Tuhan nen wene melalek oba ikhe hakhogore andoma mene andi re hat inom nen hat againafuri inom hinangge mondok-mondok aga logogin,” iluk yagaisasikhe.

¹⁶ Andi nen at Musa nen kambing inaweak legaphogo fouwageluk mene a'nogo faget heinok wogisasikhemo iren yagati logolik, ”Kambing a'nogo re mondogat warogo nolha o,” iluk yagatukwama, at Musa a'mage lagasikhesik it Eliazar inom Itamar inom inoba wenagisikhi logolik,

¹⁷ ”Warogo nolhu mene andi re mondok horek mene werek. Nen, andi re it afuni Israel mene inaweak lek hilingisogo fouwageluk he, Tuhan nen hit wokhisikheba nen nenahalok wam inaweak lek hilingisogo fouwageluk mene andi hit obalik hore'ma nen nenggep lek?

¹⁸ Kambing andi amep he Tuhan Awi Sabu sale'ma waluk wesuageluk he lego. Athe an nen melalhinobagagi hakhogo warek engge andi re hit andoma nen nanggwe hilingitep?” iluk yagaisasikhe.

¹⁹ A'nogo heinok wogisasikhemo at Harun nen onggo yagati logolik, ”Eberogo, yogondak yi sambul he it afuni Israel mene nen it inaweak lek hilingisogo fouwageluk inom, Tuhan faget nolengge nolhu mene inom fei wagaikha, ariginik oba nen he enggin mene yi an noba asi waga. Wam inaweak lek asuak iluk fei wagaikha andi yogondak yi sambul an nen nele halok ogo, Tuhan nen agaiyek an noba feileba?”

²⁰ Iluk yagatikhemo at ane onggo a'nogo yagatikhe andiba Musa endawimo fano anggasikhe.