IMAMAT 1 - Allah Wene Fano Wene Hupla Inane

Allah faget warogo nolhi lagaukwa mene a'nogo

^1-2 At Tuhan Awi sabu tenda mene salogo werek oba omanogo nen, it afuni Israel mene nen wene melalek fik-foukhogo hilingfuluk hilingiti logogun mene faget iluk Musa woletikhesik wene melalek oba fikhi logolik yi'nogo yagatikhe: ”Ap misik ekhe nen Tuhan faget warogo nolhu mene fei waga logolik halok he, aren domba inom sapi inom kambing inom waluk wogosi waga logogin fano.

³ Nen, aren waluk wogosi waga logogin mene andoma ebe wam sapi misik halok he, wam ebe ai meneba nen oba agambut palek lek mene halok wogeti logogin. Aren waluk we'luk Tuhan Awi sabu wuri'mo solombonma andoma fei wagunem he, Tuhan endawimo ap andi oba endawimo agaiyek fikhi logogin.

⁴ A'nogo fei we'luk he, at a'nogo nen enggi wam a'nogo unggul sebel fugunem, at Tuhan nen he ap andi nen fugu mene andiba aweak legaphogo fugu mene iluk wanhi logogin.

⁵ A'nogo hilingfuluk he sapi a'nogo re, o Sabu solombonma andemen watfuluk amep he at Harun nen tagomangge mene it imam omanogo nen waganogo Tuhan obaget fuluk he, o sabu solombonma omanogo nen Mezbah a'nogo unggut enggaminogo omanogobene kweisal hilik laga logogin.

⁶ Andi hilingfuluk he, ap a'nogo nen wam a'nogo agap nonggol fuluk senggelogo kuthigik fikhi logogin.

⁷ A'nogo hilingfugunem it imam omanogo nen he mezbah a'nogoba endu amuiloget fuluk he, e wurik amboloba nolik lagakhi logogun.

⁸ Nol fuluk he wam a'nogo unggul palek inom asei inom he, endu amboloba nol fikhi logogun.

⁹ A'nogo hilingfuluk he, ap a'nogo nen wam a'nogo elonggomangge inom enggi eisok sanoksek inom i sobal fugunem he, imam andem oba yabu hilingiti logogun mene omanogo nen he abirengge nol fikhi logogun. Nen, warogo nol fikhi logogun mene nen he Tuhan endawimo agaiyegerati logogin.

¹⁰ Nen warogo fei wagu mene andi domba inom kambing inom halok he, wam andoma re ai mene nek agambut palek lek mene nek fei waga logogun.

¹¹ Fei we'luk ap a'nogo nen wam a'nogo mezbah abel poikwe fikhit andoma nen watfuluk he, it imam omanogo nen amep waganogo mezbah unggut higithogo omanogo ebene kweisalhi logogun.

¹² Wam a'nogo mondogat kurogo hilingfugunem, it imam omanogo nen he wam kurik omanogo inom, unggul palek inom, asei inom waluk he mezbah a'nogo amboloba nol fikhi logogun.

¹³ A'nogo hilingfuluk ap a'nogo nen he elonggomangge inom, eisok sanoksek inom sobalhi logogin. A'nogo nek hilingfilik laluk he, it imam omanogo nen abirengge Tuhan obaget, mezbah amboloba nolfikhi logogun. Nol fugunem amben nen he Tuhan endawimo agaiyeget fikhi logogun.

¹⁴ Nen, warogo waluk fei waga logogun mene andoma re sue muluk halok ogo nen sue abiang eak halok ogo we misik-misik fei waga logogun.

¹⁵ Fei wagunem it imam en sue a'nogo waluk mezbah were'ma wagunem he, alonggobak perelogo watfuluk unggul enek mezbah amboloba nol fikhi logogun. Nen, sue a'nogo amep he mezbah a'nogo era'lukwe andoma kweterisikhi logogun.

¹⁶ Sue a'nogo alonggop oa'ma kip a'nogo wulakfei we'luk he, elonggoma mene inom mondogat wul fuguba mezbah a'nogo abel timur fikhit andoma hugisikhi logogun.

¹⁷ A'nogo hilingfuluk he sue a'nogo ogolabi tegeti'legengge amik fendel higik fuluk he, fendelek omanogo mezbah amboloba nolfikhi logogun. A'nogo nol fugunem he amben nen Tuhan endawimo agaiyeget fikhi logogun o,” iluk yagatikhe.