IBRANI 9 - Allah Wene Fano Wene Hupla Inane

Afuni kweangma mene nen inanggo warogo amep Allah wogeti lagaukwa andi hak, Yesus ebe amep Allah wogetikhe wene

¹ Attak he, Allah nen wene warogo againafuri woginafikhe wene andi higithogo, iren at endawimo fanorogo hilingiti logouwageluk yagaisasikhemo. ”Yi'nogo hilingiti logogun, ti'nogo hilingiti logogun,” iluk wene inelu welagaukwa. Nen, o su mene elama faget hilingiti logogun oba afuni nen wutukwama welagaikheat.

² O andi hulu endakwe senggelek enu re, o hulu wesama u hak, Allah awi wurik ikhi lagaukwa. Andoma esage ibilogo fagarek mene inom, e meja talek sumburu Allah faget fisagarek oba mene inom, welagaikhe.

³ Nen, o hulu ti'mo suba huli warek andi enu re, o hulu mondok ebe wesama u hak, Allah onggwarek awi ikhi lagaukwa.

⁴ O andoma amusu amben fano mene Allah noleti lagaukwa oba emas mene hilingik mene inom, peti Allah ninom hundik welago iluk agap mondogat emas mene laberek mene inom, welagaikhe. Peti andi elonggoma re, sumburu manna ninggi lagaukwa mene iwak emas mene elonggoma kwalek andi inom, ap Harun arige tomuk asimit wulifi lagaikhe mene andi inom, wene Allah nen komotninafikhe wene lisu helep oba palek andi inom, welagaikhe.

⁵ Peti andi ambol oba it malaikat hangge inebe pire, inogolabi werek mene Allah ebe werek iluk alik waganogo hilingitukwa mene welagaukwa. It andi, afuni weak hilingitarek mene Allah nen sebelogo legetfisaluk, at inom fano lambulogo fisikhi lagaikheba, inogolabi nen sebelogo fesukwasik welagaukwa. A'nogo welagaukwa meneat he, wene andi mondogat faget yogondak ya misik-misik piling-palanghogo ugun mondok elo'lego.

⁶ Yi mene ti mene andi mondogat obuluk lombok tegelek were'ma, it ap Allah eisewerek inebe mondogat hundik-handik Allah endawimo fanorogo hilingisuogeluk o ebekhalem senggelek andiba, kwikhi lagaukwa.

⁷ A'nogo kwikhi lagaukwa meneat he, o senggelek ti'mo mene andi nek he, at Allah eisewerek inoe kain mene andi nek onggwarek weak hilingiti lagaikhe mene faget inom, againafuri Israel mene inobabut hebele'lek nong-hongsek weak hilingiti lagaukwa mene faget inom, inanggo warogo amep waluk, o mo lagagik, pigik, ugu kwelek tahun ebe lombok enggi misik faget kwikhi lagaikhe.

⁸ A'nogo hilingiti logogun iluk wene komorogo welagaikhe andi oba lirogo, nit furogo futfouwageluk Allah Areagun en, mel yaganisikherek: ”O hulu kweba senggelek andi werek kwelek, Allah onggwarek awi ebe mene kwe huti'lek yagarek welagaikhe,” iluk yaganisili'logo.

^9-10 Wene andi, ebe yogondak hilingiri'logo mene faget alik waganek welagaikhe. Wene alik waganek mene andi higithogo hilingiti logouwageluk, sumburu inom, i inom, yi'nogo ninggi logolik, yi mene ti mene oba yi'nogo horati logogun, iluk Allah nen yagaisasikhe mene higithogo hilingiti logolik, inanggo Allah faget wareti lagaukwa andi, Allah nen wene ket ebe mene oan hilingiti'lek werek kwelek, kweangma elama faget logolik, alik waganogo hilingiti lagaukwa andi nen he, wene inoba lek iluk inendawimo katokhogo selegetfogoin elo'lek welagaikhe.

^11-12 It a'nogo hilingiti lagaukwa meneat he, Allah nen, ”Yi mene ti mene hobuk yi'nogo fano hilinglasigin,” iluk abok isikhe andi ebe re, at Kristus Allah eisewerek inoe kain asi wagaikhe andi. A'nogo wagaikhesik he, it attak yi mene ti mene Allah nen elalhikhe mene kigilogo o wutukwaba andi kwisikhe fuk. Lego. We, o ebe mene hokho fano wuri'mo enggi misigam faget kwisikhesik, o hulu kweba herakfisaluk pikhit o senggelek ti'mo mene obalik mondok hore'ma Allah onggwarek aiba andoma kwisikhe. A'nogo kwisikhe andi re, kambing inom, sapi inom, amep waluk kwisikhe fuk. Lego. We, nit hele warek hangge were'ma fikhalek mondok logouwageluk, ninonggo palogo wa'lagaikhesik, onggwarek amep waluk andoma kwisikhesik, nit faget werego.

¹³ Nen, it afuni attak hilingiti lagaukwa andiba hilingiti logolik, afuni nen wesa mene inenggi fakhaluk, inenggi sabul horinafarek andi hak, it ap Yahudi mene nen wesa mene inenggi fakhagarek lek mene fakhugu halok, fano asuageluk kambing amep inom, sapi amep inom, sapi ebe warogo Allah faget endu noletarek mene oak endu naluk, wul agarek mene inom, waganogo inagap endakwe mene faget horinafi lagaukwa andi.

¹⁴ It inagap endakwe mene faget wam amep elo'lek meneba elok fano horinafi lagaukwa. Halok, nit Kristus amep esin meneba, ”Wene hinoba lek,” iluk ninendawimo selekhogo elok mondok ninobagaikherego. Nit Allah eluk welagarek mene endawimo fanorogo hilingiti logouwageluk, wam esi fano mene Allah wareti lagaukwa andi hak, at Kristus Allah Areagun etok mondok welagarek mene omameba, wa'laga logolik, ebe Allah wogetikhe andiba, nit attagat lek asigin mene tulemat hilingiti lagagu mene, aren, ”Wene hinoba lek,” iluk, at amep oba ninendawimo selekhogo ninobagaikhemo welago.

¹⁵ Andi nen he, wene warogo attak wo'ninafikhe mene andiba logolik, nit komore'lek weak hilingiti lagagu andiba ninebe hele warek hangge welagagu. A'nogo were'ma, at Allah nen Kristus wa'lagaikhe andiba hele fikhalninafikhesik he, nit aren wolnisasikhe mene halok ninom hune'luk, fano mene etok mondok logogin mene wo'nisageluk, wene ket mene warogo wo'ninafikhesik, Kristus ebe hulisanem menfesikhe.

^16-17 Ap ekhe nen, ”An naminingengge yi'nogo sumburogo a'no,” iluk ikherek mene ebe eluk werek kwelek, aminingengge agaikharek fuk. We, at ebe wa'laga halogat, ”At arat wa'laga,” iluk sele'ma ugu halogat, aminingengge it ekhe agaikharego.

¹⁸ A'nogo ugu halok, inaminingengge helagarek andi hak, Allah nen wene attak mene warogo woginafikhe andi re, amep yugulogo nenat ameliba te'merogo isikhe.

¹⁹ Allah nen, ”Yi'nogo hilingisugun, ti'nogo hilingisugun,” iluk, komotninafikhe wene andi mondogat, at Musa nen it afuni Israel mene yagaisasikhesik he, hobuk sapi amep inom, kambing amep inom, i inom mulelogo nanggelek-hanggelek fesukwasigen, domba esi elokhonggen mep hangge mene esunggwat wurep oba folokhogo fesukwasik, musan engga mep watarek andi hak, mep yugulogo Allah nen wene komotninafikhe wene lisu palek andiba watfigik, afuni Israel mene inebene kweisalfigik, watfisigik, isikhe.

²⁰ A'nogo watfisikhi logolik, mel yagaisasikhe: ”Wene Allah nen komotninafikhe mene higithogo hilingiti logouwageluk, aren he, Hit wene arat warogo wokhinafi, iluk, mep watninobagaikhe yi o,” iluk yagaisasikhe.

²¹ A'nogo yagaisasikhesik he, Allah awi su mene wurik andi inom, yi mene ti mene Allah awiba andoma at faget hilingiti lagaukwa mene mondogat inom, ebene mep warik lagaikhe.

²² Allah nen wene komotninafikhe wene andi higithogo hilingiti logolik, yi mene ti mene mondogat mep oba nek hotaresi'mo andi nen he, mep wulafi'lek halok he, afuni weak hilingitarek mene sebelogo legetfisagain elo'lek andi nen he, mep watikhe andi.

”At Kristus wa'lagaikhe andiba nek he, nit afuni weak hilingitorek mene legetfisasikhe,” iluk isukwa wene

²³ Kweangma yi mene ti mene mondogat horasugun mene horati lagaukwa andi, ebe pogoroba werek mene oba lirogo hilingiti lagaukwa. Meneat he, ebe mene pogoroba mene andi, wam warogo amep oba horasugun elo'lek andi nen he,

²⁴ at Kristus o Allah onggwarek awi iluk afuni nen oba lirogo wutukwaba andi kwisikhe fuk. Lego. We, pogot ebeba kwisikhesik Allah were'ma andoma nit faget werego.

²⁵ It ap Yahudi mene Allah eisewerek inoe kain Allah aiba andi kwikhi logolik he, onggwarek amep waluk kwikhi lagaikhe fuk. Lego. We, wam sapi inom, domba inom, amep waluk o mo lagagik, pigik, ugu kwelek tahun ebe lombok enggi misigam faget kwikhi lagaikhe. A'nogo meneat he, at Kristus enek he, onggwarek amep waluk enggi hobugalep lek. We, enggi misigamat faget kwisikhe andi.

²⁶ Aren he, it attak hilingiti lagaukwa andi hak hilingi'lepma re, kweang elalhikhe huli nen pikhit yogondak huli, enggi hobugalep yi enggin ti enggin hikhi logolik wa'laga logoilep. A'nogo meneat he, o wurep oba nit weak hilingitorek mene legetfisageluk enggi misigam fagerat wam Allah faget waresu hak, onggwarek ebe wa'lasi wagaikhe andi.

²⁷ Nit afuni misigam faget wa'lagunem en, hobuk wene ninoba figik, kotik, igin iluk, at Allah nenat isikhe andi hak,

²⁸ at Kristus ogo re, nit afuni weak hilingitorek mene legetfisageluk enggi misigam faget wam Allah wareti lagaukwa andi hak, at ebe wa'lagaikhesik, hobuk wesigin andi, nit weak hilingitorek mene legetfisageluk wesigin fuk. Lego. We, nit afuni, at wagunem elokhoma nenangorogo welagorek mene halok, fanotninabigeluk wesigin o.