IBRANI 7 - Allah Wene Fano Wene Hupla Inane

Ap Melkisedek Allah eisewerek logolik hilingiti lagaikhe wene

^1-3 Ap Melkisedek andi ebe re, afuni o Salem mene inoe kain logolik, Allah Enupogot eisewerek welagaikhe. Ap Melkisedek andi enu nit ninaneba re, ”Kain enupogot obabut higithogo nek hilingiterek mene,” iluk u hak, enu Melkisedek sale'ma ikhi lagaukwa andi. Nen, ekhe re, ”Kain enupogot fogeratarek mene,” iluk u hak, afuni o Salem mene inoe kain enupogot iluk ikhi lagaukwaat. At Melkisedek andi faget he, at agaisa eisena yi nen tago mene igik, omba ambu yi nen tagongge mene igik, at yi huli ta'lagaikhe igik, ti huli wa'lagaikhe igik, furogo ekhe igi'legat. Andi nen he, at Allah ebe amlogo emberek higit logolik, at ebe Allah eisewerek mondok welagarek hangge aro. Were'ma, ap Abraham ap kaindek mene inoa'luk ambotkwe wagunem he, at Melkisedek andi nen eilenggen ha wulifikhesik aren he, ”Allah nen hebe fanothabuak,” iluk ane agaukhogo yagatikhe. A'nogo yagatikhemo, at Abraham en, weim andi yafi logolik, yi mene ti mene hugul wanhikhe mene mondogat enggi wenagaisogo fenakwe minggilogo 10 ba lagai wagaikhe mene, Allah faget fisaluk, at Melkisedek wogetikhe.

⁴ Nit afuni Israel mene ninambu Abraham en weim andi yafi logolik, yi mene ti mene hugul wanhikhe mene enggi wenagaisogo fenakwe minggilogo 10 nen lagai wagaikhe mene, Allah faget fisasikhesik, at Melkisedek wogetikhe andi nen he, nit ninendawimo nen, ”At Melkisedek andi ebe kain mondok,” iluk anggogoin andi hani!

⁵ Nit afuni Israel mene wene Allah nen komotninafikhe wene a'nogoba yaganisikhi logolik, ekhe mel isikhe: ”Yi mene ti mene inenggi wenagaisogo fenakwe minggilogo 10 ba lagai wesigin mene an nobagagunem he, ap an eisewerek it Lewi nen tagongge mene nek wanhi logouwago,” iluk komorinafikhemo lisu palek werek. It inebe misigat mene ap Abraham en tagongge mene inerugwi inagaila'lagenat fugunem wanhi logouwago, iluk isikhe andi.

⁶ A'nogo isikhe meneat he, at Melkisedek andi, ebe ap Lewi nen tagongge mene fuk. At ebe alek mene logoligat he, at Abraham Allah nen, ”Fanothabigin,” iluk abok yagatikhe mene a'nogo nen, yi mene ti mene enggi wenagaisogo fenakwe minggilogo 10 nen lagai wagaikhe mene Allah faget fisaluk Melkisedek wogetikhemo wanhikhesik he, aren he, ”Allah nen fanothabuak,” iluk ane agaukhogo yagatikhe andi.

⁷ A'nogo yagatikhe andi re, it afuni inebe kaindegenat inagoromi inawe a'ma mene inane agaukhogo yagaisagarek andi, a'nogo hilingitarek mene nit mondogat ninelu andi nen he, wene andi faget inane sagalugun lek.

⁸ It ap Allah eisewerek logolik, it afuni ekhe nen yi mene ti mene inenggi wenagaisogo fenakwe minggilogo 10 ba lagai wagunem, Allah faget fisugunem inebe afuni wa'lagaikharek mene nen wanhi lagaukwa meneat he, ap Melkisedek andi nek he, eluk welagarek mene nen a'nogo wanhikhe, iluk Allah aneba lisu palek werego.

^9-10 At wanhikhe andi faget he, it afuni Israel mene nen yi mene ti mene inenggi wenagaisogo fenakwe minggilogo 10 ba lagai wagunem Allah faget fisugunem he, ap Lewi nen tagongge mene wanhi logouwageluk isikhe a'nogo meneat he, at Abraham en at Melkisedek emberek ambi agaukwasik, yi mene ti mene enggi wenagaisogo fenakwe minggilogo 10 ba lagai wagaikhe mene Allah faget fisaluk, at Lewi oan ta'lagi'lek werek kwelek Melkisedek wogetikhe andi. At Abraham en wogetikhe meneat he, it ap inunggulenu Lewi mene Abraham en tagongge mene andi nen he, iren wogetukwa umo re, elogaro.

¹¹ It ap inunggulenu Lewi nen tagongge mene Allah eisewerek esin were'ma, wene Allah nen komotninafikhe wene a'nogo wogisasikhe. A'nogo wogisasikhe meneat he, iren afuni Israel mene katokhogo fano hilinginafi logoilepma re, Allah nen he, ”Ap Harun nen tagongge mene lek. We, an eisewerek Melkisedek hilingiti lagaikhe andi hak, ap hunogoat mene ekhe menfagain,” iluk ilep legaro.

¹² It ap Allah eisewerek attak mene herakfisaluk, ket hunogoat mene menfisouwogeluk halok he, wene Allah nen komotninafikhe wene andi hunogo mene obali'mo heragaisogo fogoinaro.

Allah eisewerek at Melkisedek hangge hunogoat mene menfesikhe wene

^13-14 Wene yi ninoe Enupogot Yesus unggulenu Yehuda mene iluk afuni mondogat inelu o. Ma re, at Musa nen it ap Allah eisewerek faget ikhi logolik, it ap Yehuda mene inabok ikhi lagaikhe mondok lek. Andi nen he, it ap inunggulenu Yehuda mene ekhe Allah eisewerek logolik, Allah anggo wareti logouwageluk menfisikhi lagaukwa mondok legaro.

¹⁵ Ap Allah eisewerek at Melkisedek hangge ekhe menlagaikhesik werek andi faget he, wene weinam mondok werego.

^16-17 At andi, Allah eisewerek menlagaikhesik werek andi re, afuni nen, ”Ap inunggulenu yi mene menfisagaresi'mo re, andi meneat fano logouwak,” iluk menfisagarek andi hak, menfesikhemo werek fuk. Lego. We, at faget wene yi'nogo lisu palek werek. Allah nen he, ”Ap Melkisedek an eisewerek welagaikhe andi hak, hat hebe an eisewerek mondok-mondok logoinogeluk menhobagagi o,” iluk isikhemo lisu palogo fesukwa andi hak, at Yesus hobuk wa'lagi'lek etok mondok logouwageluk menfesikhemo werek.

^18-19 A'nogo were'ma, Allah nen wene attak komotninafikhe mene andi elo'legen, katokhogo fano hilinginafi'lek, we, alemarogo logoinogo iluk, legetfisaluk he, hobuk wene wurep ket mene wulafikhemo re, ninebe katokhogo fano hilingninabigin iluk Allah oba horokhogo kwi waga lago.

²⁰ Nen, wene andi Allah nen hombuk palogoat wulafikhe o. It afuni ekhe nen he, it ap Allah eisewerek logouwageluk hombuk palhi'lek menfisagarek meneat he,

²¹ at Yesus enek he, Allah nen hombuk palogo menfikhi logolik he, mel yagatikhe: ”An Nenupogoren hat an eisewerek mondok-mondok logoinogeluk hombuk palogo menhobagagi andi, hobuk nane hebelogo wene hunogoat mene ekhe neranen igin lego,” iluk yagatikhe.

²² Allah nen, ”Yi'nogo katokhogo fano hilinghinabigin,” iluk wene ket mene warogo wo'ninafikhe andi, ebe asigin iluk at Yesus ebeat menfuluk wo'nisasikhe andi aro.

²³ Nen, wene misigat ekhe weregaro. It ap Allah eisewerek logolik higithogo hilingiti'le'ma inebe obakheba wa'lagunem yabu wurepma hilingiti lagaukwa lek, andi nen inobali'mo menfisilik wagunem inebe hokhorogoat welagaikharek andi.

²⁴ A'nogo meneat he, at Yesus enek he, Allah eisewerek eluk mondok logogin andi nen he, Allah nen, it afuni ekhe at obali'mo menfisagain lego. We, at amuat mondok logogin o.

²⁵ A'nogo eluk mondok logolik, nit afuni faget Allah kino yagatu mondok welagarek andi nen he, nit Allah were'ma kuogeluk At oba fa'larik kugunem elok telninabimbik katokhogo fano hilingninabigin andi.

²⁶ Nit ninendawimo nen he, ”Ap ekhe Allah eisewerek nit faget fano katokhogo yi'nogo kain logolik hilingiti logoilebe,” iluk anggogorek mene, Allah nen ninoe Yesus andiat menfesikhemo werego. At obabut he, weak ekhe hilingiti'lek, fano tegelek mondok were'ma, afuni weak hilingitarek mene inendawimo nen tegelogo pogot abel ponggwe po'lima liakfesikhemo nit faget werego.

²⁷ It ap Allah eisewerek kaindek andi re, hundik-handigat inonggwarek weak hilingitarek mene faget tak inanggo Allah faget waretaresigen, hobuk afuni ekhe weak hilingitarek mene faget inanggo Allah faget warogo wogotarek meneat he, at Yesus enek he, nit weak hilingitorek mene faget ninanggo Allah waresu hak, at ebe misigamat faget wa'laga logolik, ebe Allah wogetikhe andi.

²⁸ Attak wene Allah nen komotninafikhe wene andiba re, ap we elo'lek mene Allah eisewerek menfisikhi lagaukwa meneat he, hobuk Allah nen hombuk palhikhe andiba re, at ebe amlogo nit telninaferek mene wurep kobokhogo menfesikhemo, at eisewerek kain mondok werego.