IBRANI 6 - Allah Wene Fano Wene Hupla Inane

¹ Andi nen he, Kristus agoromi a'luk hilingiti logogun mene wene attak yagaisagarek andi mene yagaisasugu andi werek kwelek, inalue asimbik hilingiti logogun mene yagaisikhi logouwogo. O tik fano watfuluk inenggi endenharek lek andi hak, nit attak weak hilingiti lagagu mene fakhogo herakfisaluk ninobabut hebelhugusik ninendawinggen Allah oba himbiret fesugu mene andi hobuk hebelugun lego.

² Ima pagarek wene andi yagaisigik, inunggul sebelharek wene andi yagaisigik, wa'lagunem Allah nen ninelugetninabigin wene andi yagaisigik, wurep oba wene ninoba figik, kotik, ugunem mondok-mondok logogun wene andi yagaisigik, isugu mene andi ninane hebelogo hobuk yagaisogoin legaro.

³ We, Allah nen fano anggikhe halok, hobuk yagaisogoin mene andiat yagaisilik laga logouwogo.

^4-6 It afuni ekhe, Allah nen inendawimo selegerinafu kwelek, yi mene ti mene enduk mikhaluk fano mene wanharek andi hak, Allah pogoroba nen onggo lek weat wo'nisikherek mene andi wanhik, Areagun sumbu'nisikherek mene andi ekhe wanhik, Allah ane andi fano mondok iluk ineluat welagik, Allah obabut fano nen hobuk omamerogo fano mondok hilingninabigin andi oan hilingninafi'lek werek kwelek, yogondak ya yi mene ti mene lilu nenggarek hak, wogisugunem heligik, agaresigenat he, hobuk iren he, ”Allah ninabit,” iluk ane herakfisaluk inambotkwe wulibi laluk logolik, Yesus Allah amlogo ebe eba menfesukwasik wati logolik inane asegen wokhasukwa andi hagat hobuk hilingiri'lagwi andi. A'nogo mondok hilingirik laga logolik, hobuk iren he, ”Nit weak hilingito,” iluk inobabut hebeluageluk inambotkwe ninggi'nogo woginarek wesu he, elo'lego.

⁷ Allah nen hundik-handik o meiso kweangma pelabi wagunem he, kweang fano sakho ugunem afuni nen yabu waganogo yi mene ti mene awi yatarek mene nen ebe fano nunggunem he, Allah nen, ”Kweang andi fano,” iluk fanot fikheregaro.

⁸ A'nogo meneat he, kweang andi yi engga ti engga weak mene inom, panggi alok mene inom, fulelhe halok he, ”Kweang yi, we tulemat alemarogo werek andi weak,” iluk homan fembik he, hobuk endu nolumo felelenghogo nagain o.

⁹ A'nogo igi meneat he, nerugwi nagaila'lak. Hinebe nendawi e. Allah nen weagethinabigin iluk ninendawimo anggikhi lago lek. Athe, fanothinabigin iluk futfikhi lago o.

¹⁰ At Allah obabut he, weak hilingiterek mene fuk. At higithogo nek hilingiterek andi nen he, hiren at faget hilingiti logolik hinerugwi hinagaila'lak Allah againafuri mene ekhe hinendawi nen attak leberisigik, hobuk leberisigik, ikhi lagep mene andi, aren hit hinoba onggot asigin lego.

¹¹ Nerugwi nagaila'lak. Nit ninendawimo ninamolo re, hit hinendawimo nen he, ”Allah nen nit fanotninabigin,” iluk hinendawimo hinagaiyek anggikhi lagep mene andiat anggikhi logombik, huli wurep oba eise asubagaigen he, hilingiti lagep andi hagat hinebe lombok hinomamerogo hilingitu mondok logogun ninamolo anggikhi lago o.

¹² Hit hinaberali weak hilingiti logogun he, ninabiro. It afuni attak inendawinggen Allah oba himbiret fuluk inaberali agi'lek, iren he, ”Eberogoat wanugun,” iluk anggikhi lagaukwaba, Allah nen he, ”Hit wokhisagain,” iluk abok yagaisasikhe mene ebe wanhukwa andi hak, hit a'nogoat it inobabut waganogo hilingiti logoino o.

”Allah nen abok yagaisikherek mene lek agarek lek,” iluk yagaisasukwa wene

^13-14 At Allah nen he, Abraham yagati logolik, ”Hat hobuk yi'nogo hilinghabigin,” iluk abok yagati logolik: ”Hat hebe fani-fanorogo hilinghafik, hagainafuri nen tagongge mene mondok hokhorogo sik-pikhogo wokhetik, igin o,” iluk, ap hunogoat mene enupogot le'ma re, Allah onggwarek enuba hombuk palogo yagatikhe.

¹⁵ A'nogo yagatikhemo, Abraham endawimo puk agi'lek nenangorogo welagaikhe andiba, wene abok yagatikhe mene andi, arat ebe agaikhe andi.

¹⁶ Mene re, it afuni nen hombuk paluogeluk halok he, inonggwarek inenu elo'lek hagen he, inonggwarek inenuba hombuk palhi'lek. We, it ekhe inenuwerek esin mene inenuba hombuk palharek andi. A'nogo palhunem he, it ekhe nen wene palhi logogun mene inane lek agaikherego.

¹⁷ A'nogo hilinglagarek andi hak, Allah nen he, ”Afuni an nendawimo anggaluk abok yagaisigirek mene halok, nane hebelogo hobuk hunogoat mene ekhe yagaisigirek lego,” iluk, it abok yagaisasikhe mene halok enek eberogoat anggoageluk he, hombuk palogo yagaisasikhe andi.

¹⁸ Wene hombuk palogo yagaisasikhe andi re, nit Allah awe a'ma kwi wago mene halok ninendawimo nen, ”Fanotninabigin,” iluk eberek welago mene ninendawinggen hambukhogo logouwageluk nirat yaganisasikhe. Abok igik, hombuk palhik, wene pire isikhe andem, niren he, Allah eranen ikherek mondok lek, iluk ninendawinggen hambukhogo logouwageluk yaganisasikhe andi.

¹⁹ Aren he, ”Fanothinabigin,” iluk isikhe andi lek asigin lek. ”Ebe asigin,” iluk anggikhi lago mene halok, e so i nen waluk lanogoluk ninghogo yakfuluk welagaikharek andi hak, ninendawinggen pogoroba o senggelek hulu ti'mo meneba Allah were'ma andoma tibetfembik hambukhogo logouwogo.

²⁰ At Yesus nit faget kwe ebekwe yatikhesik o andoma kwisikhesik, ap Melkisedek Allah eisewerek logolik hilingiti lagaikhe andi hak, mondok-mondok hilingiti logogin mene Allah eisewerek kain agaikhesik welagarek andi.