IBRANI 5 - Allah Wene Fano Wene Hupla Inane

¹ It ap Allah eisewerek inogogwi kaindek inebe lombok andi re, afuni Allah againafuri nen, ap it mene ekhe Allah faget hilingiti logolik, it mene yi mene ti mene fugunem, Allah wogetik, weak hilingitarek mene faget inanggo waluk wagunem waretik, ikhi logouwageluk wenagaisogo menfisagarek.

² A'nogo menfisugunem it inomame mondok lek meneat andi nen he, it afuni ekhe a'nogoat wene inonggot logolik nong-honghogo hilingitarek andi futfuluk he, inebe inendawirinapluk it faget inoba heanerogo elok hilingitarek andi.

³ It inonggwaregen weagat hilingitaresik andi nen he, it afuni ekhe weak hilingitarek mene faget inanggo helaluk wagunem, iren Allah waretarek andi hak, a'nogoat it inonggwarek faget inanggo Allah waresugun higithogoat waretarek andi.

⁴ It a'nogo hilingiti logouwogeluk, ”An nebe Allah eisewerek kain logogin,” iluk inonggwaregen menfakhagarek lego. We, at Allah nenat, ap Harun ayonggo fesikhemo menfesukwa andi hak, Allah nen inayonggo fugu halogat menfisagarek.

⁵ At Kristus a'nogoat, ”An Allah eisewerek kain logogin,” iluk onggwaregen wenagaisogo menfakhigi'lek. We, at Allah nenat wenagaisogo menfesikhesik wene mel yagatikhe: ”Hat An namlogo o. Hebe yogondak takhafi,” iluk yagatikhe andi.

⁶ Nen, ekhe re, Allah ane lisu palek ekheba yi'nogo isikhemo weregat: ”Ap Melkisedek An Allah eisewerek kain welagaikhe andi hak, hat An eisewerek kain mondok-mondok logoinogeluk menhobagagi o,” iluk yagatikhemo lisu palek werek.

⁷ At Yesus ebe kweangma yoma were'ma afuni nen wasinogo iluk, Allah nen elok teligin andi nen he, le aga logolik, ane hokhorogo Allah enu hombuk palogo ayonggo fikhi logolik, eisena ane ailorogo hologo welagaikhe andi nen, ane esanggo holhikhe.

⁸ A'nogo yagatikhe andi re, at Yesus Allah ebe amlogo meneat he, yi enggin ti enggin hikhi logolik, Allah ane hologo hilingisigin mene faget yanggulhikhe andi.

⁹ A'nogo yanggulhi logolik, wurep kobokhogo hilingitikhemo nit at ane hologo logogun mene halok ninebe mondogat nineluk mondok-mondok logouwageluk at ebe telninaferek mene ero hilingisogo fesikhe andi.

¹⁰ A'nogo hilingisogo fesikhesik, aren he, ”At Melkisedek hilingiti lagaikhe andi hak, hat hebe an eisewerek kain logoino,” iluk menfesikhe andi.

Afuni nen Allah ane herakfisaluk, inambotkwe wulibinogo iluk, inendawimo eberogo yagaisasukwa wene

¹¹ Wene andi faget he, niren hit yagahisogoin mene hokhorogoat werek meneat he, hit hinobabut, wene weak-weak futfou elo'lek andi nen, niren furogo yagahisogoin elo'lego.

¹² Hit he, Allah ane attagat wanhigipmo re, hiren it afuni ekhe yagaisa elok meneat he, elo'lek andi nen, wene attak yagaisagarek mene andi, it afuni ekhe nen inoba yagahisogoin o. It yenggerugwi sumburu haro mene nogoin elo'legen, inagaisa ineilak enek nunggu welagaikharek andi hak, hit he, wene wurik mene yagaisogoin elo'legen he, wene attak yagaisagarek andi mene nek yagaisikhi logogun hinobabut hisikhi lagi o.

¹³ Yenggerugwi inagaisalak ineilak enek nenggarek andi re, inebe yenggerugwi atma, wene yi fano, yi weak, iluk penesu inonggot welagaikharek andi nen aro.

¹⁴ Mene re, it inaluendek enek he, inendawinggen arat wurik agaikha andi nen he, wene yi weak, yi fano, iluk penesu inelu andi nen sumburu haro mene andi re it inamburu o.