IBRANI 4 - Allah Wene Fano Wene Hupla Inane

¹ Andi halok he, Allah nen againafuri set waloageluk abok yagaisasikhe mene andi lek agi'lek werek kwelek hobuk nit set waloageluk wo'nisagain oba andoma hit ekhe kwigi'lek kamo inogo iluk hinailorogo logolik higithogo hilingiti logoino o.

² Wene fano wene andi it attak yagaisasikhe andi hagat, nit a'nogo yaganisasikheat. Mene re, wene yagaisasikhe mene andi, it inesanggo holhukwasigat he, futfigi'lek hilingiti lagaukwa andiba, wene andi it faget he, elo'lek agaikhe andi.

³ It faget a'nogo elo'lek agaikhe meneat he, nit ninendawinggen Allah oba eberogoat himbiret fikhi lago mene halok, aren he, ”Hit set walogoin,” iluk isikhe a'nogo nirat set walogoin o. Wene andi faget he, Allah nen yi'nogo isikhe anggigi: ”An na'mage lagagirik hombuk palogo wenagisikhi logolik, An set walogo welagirek andi hak, it set walogoin mondok lego,” iluk isikhe andi re, pogot kweang arat elalhikhesik set walogo logolik isikhe.

⁴ O inenggi sabit oba welagaikharek a'nogo mene faget, Allah aneba yi'nogo lisu palek werek: ”Allah nen yi mene ti mene mondogat elalhi lagaikhesik he, enggi sabit oba set walasikhe,” iluk lisu palogo fesukwama werek.

⁵ Wene andi faget, Allah nen yi'nogo isikhemo lisu palek weregat: ”An set walogo welagirek andi hak, it set walogoin mondok lego,” iluk isikhemo lisu palogo fesukwa.

⁶ Omanggum he, iren fano wene andi inesanggo holhukwasigat he, hologo higithogo hilingiti'lek andi nen, Allah nen he, ”It set walogoin,” isikhe andi, set ebe waligi'lek. Andi halok he, it afuni hunogoat mene ekhe elok set walogoin, iluk futfogoin o.

⁷ Wene andi abok yagaisasikhesik oba nen, o mo lagagik, pigik, ugu kwelek tahun hokhorogoat welagaikhesigen, hobuk, ”Yiba,” logogun iluk at Daud yagati logolik, ”Yogondak yaba,” iluk yagatikhe mene attak igi hak lisu yi'nogo palek werek: ”Yogondak yaba Allah ane hinesanggo holhep halok he, hinendawinggen omame agubo,” iluk isikhemo lisu palogo fesukwa andi.

⁸ Allah nen, ”Hit set walogoin,” iluk abok yagaisasikhe andi, at Yosua nen woginarek kwi wagaikhe andiba, arat ebe asile'ma re, it kwi wagaukwasi'mo nen hobuk Allah nen, ”Yiba set walogoin,” iluk isikhe andi, ilep legaro.

^9-10 Allah nen yi mene ti mene elalhi lagaikhesigen, hobuk katokhogo enggi sabit oba set walasikhe andi hak, nit at againafuri set walogoin mene halok ninebe lombok yi mene ti mene ninonggwarek faget hilingiti lago mene arat katokhogo set walogoin mene weregaro.

¹¹ It attak Allah ane hologo higithogo hilingiti'legen, set waligi'lek andi hak, nit ekhe it inobali'mo set walogo lek hanogoluk, ninomamerogo hilingiti logouwogo.

¹² At Allah ane ikherek andi re, karok enggat abel fena-fena mago andi hangge re, lego. We, at ane andi re, eluk mene omame hokho enggat mondok melangsek logolik, inoak enggalim elema kwigik, inamonggok elema kwigik, u hak he, inendawimo inendawinggen oba fakha lagaresik he, inendawimo anggagarek mene inom, inendawinggen en inamolo anggagarek mene inom, eilenggen elok peneterek.

¹³ Allah eilhanem he, yi mene ti mene aren elalhikhe mene ekhe hinago werek nogo? Mondok lego. We, at eilhanem yi mene ti mene mondogat he weinamhogo selek mondok welagarek andi nen, nit hilingiti lago mene at elumo re ninoba lombogat wene ninom ugun o.

Yesus ebe Imam Agung welagarek wene

¹⁴ Nit ninoe kain Allah eisewerek Allah amlogo Yesus pogot pelakha wagik, pogot abel ponggwe Allah were'ma lagasikhesik nit faget werek andi nen he, nit ninendawinggen at oba himbiret fuluk ninane fakhogo ikhi lago mene andi, ninenggi ninghogo fisogo logouwogo.

¹⁵ Nit ninoe kain Allah eisewerek welagarek andi re, nit ninomame mondok lek welago andi re, at onggot lego. At nit ninobabut wanhikhesik were'ma, weak mene a'nogo nen, nit weak hilingisuageluk ninendawinggen kagalherek andi hak, at Yesus a'nogoat yi mene ti mene faget endawimo kagali waga lagaikhe meneat he, at weak ekhe hilingiti'lek logolik ninobabut elu welagarego.

¹⁶ Andi nen he, nit weak asu hak were'ma, fanoasuak, nineisena Allah obabut fano nen endawitninafik, lebetnisigik, uageluk, at Allah kain welagarek oba logolik obabut fanoba heanerogo hilingiterek andi nen, ninailo legat oba horokhogo kwikhi logouwogo.