IBRANI 3 - Allah Wene Fano Wene Hupla Inane

”At Musa ebe sebelek hangge meneat he, Yesus enek he, ebe esin,” iluk yagaisasukwa wene

¹ Andi nen, Allah againafuri at onggwarek faget fakhasikhe mene nerugwi nagaila'lak. At Allah pogoroba nenat hit ninomat ninayonggo fesikhemo wene wanhugusik fakhogo ikhi lago andi faget, at Yesus ebe Imam Agung logouwageluk, Allah nenat lakfei wagaikhemo werek andi nen he, hit hinendawinggen oba nenat futfikhi logoino o.

² At Musa nen he, Allah againafuri inebe re, Allah awi wurik hangge, iluk it faget obabut hombunhogo hilingiti lagaikhe andi hak, Allah nen Yesus a'nogoat hilingisuageluk menfesikhemo obabut hombunhogo hilingiterek andi.

³ It afuni ekhe nen o wurik mene endebat hangge fogerati logolik, it ap o wutarek mene andi nek he, hokhorogo fogerinafarek andi hak, at Musa endebat hangge fogerati logolik, at Yesus enek he, hokhorogo fogerati logogun o.

⁴ O wurik ebe lombok he, it ap o wutarek mene inebe werek meneat he, yi mene ti mene mondogat he, Allah amu negen elalhikhe o.

⁵ At Musa ebe Allah amingmingengge logolik, Allah againafuri inebe at awi wurik hangge iluk, it faget obabut hombunhogo hilingiti logolik, mel ikhi lagaikhe: ”Allah nen yi wene ti wene hobuk yi'nogo yaganisagain mene werek,” iluk abok yagaisikhi lagaikhe.

⁶ Meneat he, at Yesus enek he, Allah ebe amlogo andi nen he, at eiseweregenat hilingiterek. Nit fanotninabigin wene andi faget ninendawinggen ninghogo oba himbirik mondok logogun halok he, Allah awi wurik andi, nit ninebe aro.

”Afuni Allah againafuri mene halok, hobuk set walogoin,” iluk yagaisasukwa wene

⁷ Andi nen he, Allah Areagun en mel yaganisikherek: ”O yogondak yaba Allah ane hinesanggo holhep halok he,

⁸ hinambu hinombalak o leimo afuni le'ma nikhi logolik, inendawinggen omame a'luk, iren he, Allah ninabit, iluk, Omame werega? Lega, iluk obabut palik nikhi lagaukwa andi hak, hit a'nogo hilingitubo.

^9-10 Allah nen he, O andoma nen o mo lagagik, pigik, ugu kwelek 40 tahun logolik, an nen hit hinombalak hilinginafunem ineilenggen en tomok hikhi lagaukwa meneat he, At omame werega? Lega, iluk lalnafik, nobabut palhik, ikhi lagaukwa. A'nogo hilingiti lagaukwa andi nen, an na'mage inoba fikhi logolik he, mel yagaisasigi: Hinobabut nong-hongsek logolik nane furogo wanugun hinabit andi nen,

¹¹ an na'mage lagaikhesik hombuk palogo wenagisikhi logolik, An nen, Hit set walogoin, iluk abok yagahisasigi a'nogo, set ebe walogoin mondok lego, iluk yagaisasigi,” iluk isikhemo Allah Areagun en yagaisasikhemo lisu palogo fesukwa.

¹² Halok he, nerugwi nagaila'lak. Hit ekhe hinobabut weak a'luk, hinendawinggen Allah eluk mondok welagarek mene oba himbiret figi'lek logolik, at ebe herakfisaluk hinambotkwe wulibi lanogo iluk, hinobabut hebelogo logoino o.

¹³ Hit ekhe weak hilingiti logolik hinonggwarek lalogo hinendawinggen omame asinogo iluk Allah aneba, ”O yogondak yaba,” iluk isikhe andi lek agi'lek werek kwelek, hit-hit hundik-handik hinendawinggen ago wat-wat ikhi logoino o.

¹⁴ A'nogo ikhi logolik, omanggum ninendawinggen at oba himbiret fesugu mene andiat ninenggi pukhogo huli wurep oba fisogo logogun halok he, nit Kristus erugwi agaila'lak agosik welago o.

¹⁵ Allah aneba lisu yi'nogo palek werek: ”O yogondak yaba, hit Allah ane hinesanggo holhep halok he, hinambu hinombalagen, Allah ebe ninabit, iluk ikhi lagaukwa andi hak, hiren, At ninabit, iluk hinendawinggen omame agubo,” iluk lisu palogo fesukwa.

¹⁶ Afuni Allah ane inesanggo holhi lagaukwasigenat he, ”At ebe ninabit,” iluk ikhi lagaukwa andi sani nogo. It andi re, at Musa nen o Mesir en woginarek wulibi wagaikhe mene inebe mondogat omanogo anggigi.

¹⁷ Nen, o mo lagagik, pigik, ugu kwelek, 40 tahun oba logolik, Allah a'mage sani inoba fikhi lagaikhe nogo? It andi re, weak hilingiti lagaukwama, o leimo afuni le'ma mondok wa'larik wagaukwa omanogoat anggigi.

¹⁸ Allah nen wenagisikhi logolik hombuk yi'nogo palhikhe: ”An nen, hit set walogoin, iluk abok yagahisasigi a'nogo, set walogoin mondok lego,” iluk yagaisasikhe andi sani nogo. Andi re, it afuni Allah ane hologo higithogo hilingiti'lek herakfisikhi lagaukwa mene omanogoat anggigi.

¹⁹ It andi inendawinggen Allah oba himbiret figi'lek hilingiti lagaukwa andi nen, set wala kugun mondok elo'lek agaikhe, iluk nit yogondak futfikhi lago o.