IBRANI 2 - Allah Wene Fano Wene Hupla Inane

”Ninebe telninafikhe wene andi, esin mondok,” iluk yagaisasukwa wene

¹ Andi nenat, afuni i soba lagunem i nen woginarek lagarek andi hak, nit ebe wene andi herakfisamo ekhema wo'ninarek lanogo iluk, wene ninesanggo holhugu mene andi ninghogo fisogo logouwogo.

² Wene andi, nit ninambu ninombalak yagaisoageluk, Allah nen it malaikat inayonggo fuluk lakfisa wagaikhemo yagaisasukwa mene eberogoat hilinglagaikhe. Nen, it ekhe wene andi hologo higithogo hilingiti'lek mene, inebe lombok wene higithogoat inoba fuluk weagerinafi lagaikhe andi.

³ Andi hak he, nit yogondak telninabigin wene esin mene andi ninabit iluk herakfisogoin halok, weagetninabigin aro. Omanggum he, wene at ninoe Enupogot ebe nenat afuni ekhe yagaisasikhemo inesanggo holhukwa mene nen furogo yaganisasukwa mene eberogoat hilinglagaikhe.

⁴ Wene andi yagaisilik nugunem he, it afuni ekhe nen, ”Wene andi eberogoat,” iluk futfouwageluk, Allah nen inane legeisogo yi mene ti mene hilingisu lek mene elalinat omamerogo hilingitik, at endawinggen amolo meneat higithogo inobabut lombok Areagun sumburogo wogisigik, isikhe mene andi, niren ninabit iluk herakfisogoin halok he, herakhinobagagin anggegeba? Weagetninabigin aro.

Yesus ebe afuni telninabigeluk, attak kwe wanhikhe wene

⁵ Niren, ”Hobuk kweang ket meneba logogun,” iluk ikhi lago andi logolik, Allah nen it malaikat mene inane hologo logouwageluk kain menfisasikhe fuk. Lego.

⁶ Wene afuni faget Allah aneba ap ekhe nen lisu yi'nogo palhikhemo werek: ”Eige! Allah neisena. Nit ninebe afuni mene ta'lagagu meneat he, haren ninoba eberek welagik, helokhoma ninobagagik, ikhi lagen andi ninggi'nogo nen.

⁷ Inenggi endebat oba elama faget it malaikat mene inenuwerek esin hangge werek kwelek, nit ninenu lek hangge hilingisogo ninobagagin meneat he,

⁸ yi mene ti mene mondogat nit ninane hologo logolik, fogetninafik, agaugwetninafik, ikhi logouwageluk menninobagasigin andi,” iluk lisu palogo fesukwa. Yi mene ti mene ekhe pelakfigi'lek mondogat nit ninane hologo logouwageluk isikhe meneat he, yogondak yi mene ti mene mondogat ninane holhi'lek oan werek hikhi lago.

⁹ Meneat he, at Yesus enek he, arat kain menfesikhemo werek hikhi lago. Allah obabut fano nen, Yesus afuni mondogat faget wa'lasuageluk malaikat inenuwerek esin hangge werek kwelek, at enu lek hangge hilingisogo fesikhemo, ebe yi enggin ti enggin hilik-hilik wa'lagaikhe andiba, Allah nen at enuwerek kain menfesikhemo werek andi.

¹⁰ At Allah andi re, yi mene ti mene at onggwarek faget, onggwaregenat elalhikhe mene nen, afuni at againafuri hokhorogoat fogerinafi logogun oba woginarek loageluk, kwe wanhikhe mene ebe Yesus aro. Arenat afuni elok telinabimbik woginarek laga logouwageluk yi enggin ti enggin hilik-hilik wa'lasuageluk anggasikhe andi re, elok angga hagat higithogo anggasikhe.

¹¹ Yesus ebe, nit afuni weak hilingitorek mene hotninafikhe mene inom, nit aren horogo ninobagaikhemo welago mene inom, ninom lambukhogo re, nineisena misigat. Andi nen he, at Yesus nen enggali legat, ”It afuni andi an nerugwi nagaila'lago,” iluk ikherek andi.

¹² Aren Allah yagati logolik: ”An nen Hat hebe faget nerugwi nagaila'lak yagaisigik, againafuri andogotarek mene omanogo inanggele'ma logolik, fogethafik, ikhi logogin o,” iluk yagatikhesik,

¹³ ekhe inom ap ekhe yagati logolik he: ”An nendawinggen Allah oba himbiret fuluk logogin o,” iluk yagatikhesik he: ”Allah nen againafuri wo'netikhe mene omanogo ninom welago yi han,” iluk yagatikhe.

¹⁴ Aren he, ”Afuni andi an nagainafuri,” iluk isikhe andi re, nit afuni wa'lagorek mene faget isikhe andi nen he, at ebe wa'laga logolik, nit afuni wa'lagorek mene ero at Iblis enggiba welagarek mene andi, at Yesus nen at Iblis ebe mabenet fisigik,

¹⁵ nit afuni ninebe ta'lagoresik nineluk logolik, wa'lasugun ninailo nen ninenggi hele warek hangge welagagu mene fikhalogo ninobagagik, igeluk, nit wa'lagorek mene ninobabut waganogo wa'lagaikhe andi.

¹⁶ A'nogo hilingitikhe andi re, eberogoat malaikat mene elokhoma fisaluk endawirinafikhe fuk. Lego. Allah aneba lisu palek werek higithogoat, nit ap Abraham en tagongge mene yi elokhoma ninobagaluk ninebe endawitninafikhe andi.

¹⁷ A'nogo hilingitikhe andi re, yi'nogo iluk. Nit afuni weak hilingitorek mene, aren legetfisageluk, at ebe Allah eisewerek kain logolik, obabut Allah faget hombunhogo hilingitik, nit afuni endawitninafik, higirat ikhi logoigeluk, at ebe nit afuni erugwi agaila'lak hanggeat agaikhesik, nit hilingitorek mene mondogat ninobabut wanu hagat wanhikhe andi.

¹⁸ A'nogo wanhikhemo re, at weak hilingisuageluk endawimo kagalhunem, yi enggin ti enggin arat hasikhemo andi nen he, nit afuni weak hilingisuageluk ninendawimo kagaligeluk wagunem, aren elogat lebetnisagain werego.