IBRANI 12 - Allah Wene Fano Wene Hupla Inane

Inendawinggen Allah oba himbiret fuluk inafe morogo logouwageluk komorinafukwa wene

¹ It afuni attak hilingirik wagaukwa mene inabok ilik wago andi, inebe esa hokhorogo ninera'lukwe yiling-waling ineilenggen kwelakninarek werek andi nen he, sa awewerek-sa awewerek louwogeluk yi mene ti mene inoba enggin mene korogo fuluk lagaikharek andi hak, nit ninoba enggin-fenggin welagarek mene andi inom, ninobabut weak hilingitorek mene ninoba laberek mondok welagarek mene andi inom, mondogat korogo herakfisaluk, Allah nen, ”Huli yi huli lano,” iluk yaganisasikhe andi, ninendawimo nen he, ”Ninelokhoma pikhit huli andibaat louwok,” iluk, ninomamerogo laga logouwogo.

² A'nogo laga logolik, omanggum ninendawinggen Yesus oba himbiret fouwageluk, arenat ninendawimo kagalhik, huli wurep oba fano katokhogo mondok asi loageluk, arenat kwelakninarek welagik, ikherek andi nen he, arat nit nineilenggen en waluk murok laga logouwogo. At endawimo nen he, ”Inenggali warogo inebe eba menfisaluk inoatarek andi hak, an a'nogo noasugun nenggali,” iluk anggigi'lek, we, ”An hobuk nendawimo nagaiyek anggagain,” iluk at ebe watu kwelek afe morogo wa'lagaikhesigen, hobuk eluk agaikhesik yogondak Allah kain welagarek oba andoma era'lu kainat werek.

³ Hit hinendawimo puk a'luk hinomame lek asinogo iluk, it afuni weak hilingitarek mene nen at Yesus inendawimo nen sebelfuluk ebe weagetfugu kwelek halolot fisaluk afe morogo welagaikhe mene andi hiren he, ”At ninggi'nogo hilingitikhe nogo,” iluk hinendawimo nen futfikhi logoino o.

⁴ Hit enek he, weak hilingisu hinabiren, weim inomamerogo yafarek andi hak hilingitunem, hinamep wulagaisogo hinoati'lek mene welagebo.

^5-6 Ineisenalagen inagainafuri komorinafarek andi hak, hit Allah againafuri mene, aren komorinaferek wene andi hinonggot ageba? Aren ikhi logolik: ”Afuni an nendawinggen hundik mene halok inebe lombok komorinafik it an nagainafuri mene iluk, fakhogo igirek mene halok inebe lombok yei inoatik, igirek andi nen he, namlogo e. Haren he, neisena Enupogot Allah nen komotnafe, iluk hendawimo nen serametfuluk herakfisagun o. An nen, weak hilingiten, iluk yagaheti halok, hendawimo puk agi'lek logoino,” iluk isikhemo lisu palogo fesukwa.

⁷ It yenggerugwi ineisugwi komorinafi'lek ekhe welagaikharek nogo? Komorinafarek enek andi nen he, Allah nen komothinafunem hiren he, ”Nit at againafuri welago andi nen komotninafe,” iluk hinafe morogo logoino o.

⁸ Yenggerugwi inebe mondogat komorinafarek enek andi hak, hit ekhe komothinafi'lek halok he, hit at againafuri ebe mene fugo. We, hesanggemalik tago mene welagebo o.

⁹ Nen, nit nineisugwi ninebe ta'ninafa mene nen komotninafunem, inane hologo agaukhogo hilinginaforek andi hak, nineluk logouwageluk nineisena nen ninendawimo ket ta'ninabi'logo mene ane hologo agaukhogo hilingisugun lek nogo? At ane hologo hilingisugun aro.

¹⁰ Iren he, ”Fano hilingisugun mene yi higi,” iluk elama faget we endebat komorinafarek meneat he, nineisena Allah nek he, at weak hilingiti'lek tegelek welagarek andi hak, nit ninom a'nogoat tegelek logouwageluk komotninaferek.

¹¹ Komotninafu kwelek andemat ninendawimo fano agarek lek. We, ninendawimo weak agarek meneat he, hobuk komotninafarek andiba, komotninafunem welagorek mene halok, yi mene ti mene enggen iterek andi hak, ninobabut fano lioksek logolik higithogo nek hilingiti logogun andi.

Inendawimo eberek logolik hilingiti logouwageluk yagaisasukwa wene

¹² Andi nen he, hinenggi omame lek mene omamet figik, hineindep abolok ili'logo mene hambuget figik, ino o.

¹³ A'nogo fanot fuluk, hineisok abel endenek mene hobuk hinomanggen huniti'lek fano asuageluk, kwe higithogo yagaisogo laga logoino o.

¹⁴ Hit hinebe tegelogo Allah mene fisigi'lek logogun halok he, at ebe hineilenggen hogoin mondok lek andi nen he, afuni mondogat hinom fano lambukhogo logolik, hinebe at faget fisaluk weak hilingiti'lek fano tegelek mondok logouwogeluk hinomamerogo hilingiti logoino o.

¹⁵ Afuni hit mene ekhe Allah obabut fano nen wo'nisikherek mene andi herakfisaluk wulifunem he, awingge awi ale weak mene fulelek were'ma, fano mene oba a'luk alet fikherek andi hak, at andi nen afuni mondogat weagerinabinogo iluk hineilenggen fanorogo logoino o.

¹⁶ At Esau sumburu nele nen, mel isikhe: ”Manggusa tago re, anatma, an eise asigin mene andi esin he, lek. Nagot eise asuak,” iluk sumburu piring misik earek mene faget, agot oba onggo wanhikhe andi hak, hit ekhe pailak fakfisigik, ebe mene esinet figi'lek hinendawimo seramet figik, ikhi logogubo.

¹⁷ At Esau hilingitikhe andi, hit hinelu o. At endawimo nen he, neisena nen yaganeti logolik, ”Allah nen fanothafi logouwak,” iluk yaganesuageluk le aga logolik kino yagatikhe meneat he, agot arat yagatikhemo andi nen he, hobuk oak waganogo yagasu elo'lek agaikhe andi.

¹⁸ Nerugwi nagaila'lak. Attak it afuni Israel mene tom Sinai inenggi elok fakfou meneba wagaukwa andi hak, hit tom andi hangge meneba wagi'lek. Tom Sinai andiba ebe yi'nogo hilingitunem wagaukwa. Endu amulok lagagik, o mum hikhak iluk mum agik, sogoi aninirogo funha wagik,

^19-20 ane pinggong hokho mene ane hangge igik, ugunem Allah ane hokhorogo ikhi logolik, wene yi'nogo isikhe: ”Afuni inom, wam inom, tom yi inenggi fakha wagu halok he, inebe helep oba pinggi mondok inoa'no o,” iluk komorinafunem holhukwasik, inesanggo hologo logogun elo'lek agaikhemo, iren he, ”At ane andi hobuk ekhe inom yaganisagain lego,” iluk inane ninghogo isukwa.

²¹ Mondok inailo mene ineilenggen hasukwasik inane ninghogo a'nogo Musa yagatukwama re, aren he, mel yagaisasikhe: ”An ogo re, nailo nen noagelekwe abolok ikhe aro,” iluk yagaisasikhe.

²² It andi hangge meneba wagaukwa meneat nen, hit enek he, tom Sion Allah eluk welagarek mene awi sili o kota Yerusalem pogoroba meneba wagep andi. Andoma re, malaikat esa yi esa ti esa hokhorogo inom,

²³ Allah againafuri manggusa mene, inenu pogoroba lisu palek were'ma, andogorek logolik inendawimo inagaiyegetarek mene inom, it afuni fano hilingiti lagaukwama, Allah nen katokhogo fanorinafikhe mene inareagun inom, Allah ebe afuni mondogat wene inoba figik, kotik, ikherek mene a'nogo inom were'ma oba wagebo.

²⁴ Yogondak Allah nen nit ninom hunesuogeluk wene ket mene warogo wo'ninafikhesik, Yesus ebe wo'nisasikhemo hulisanem werek andi inom were'ma wagebo. Andi re, Habel oe nen watikhemo amep wene weak mene hilinglagaikhe mene andi oba wagep fuk. We, Yesus ebe watukwama amep oba legeisogo figik warogo fano wene hilinglagaikhe mene oba wagebo.

²⁵ It afuni Allah ane kweangma yagaisugunem inesanggo holu inabit welagaukwa mene, inebe ineluk herakfisigi'lek inoati lagaikhe andi. Halok he, nit yi ogo re, wene pogoroba nen yaganisugunem ninesanggo holu ninabit logogun halok he, ninoati'lek herakninobagagin anggegeba? Lego. Mondok ninoasigin andi nen he, at ane ugu kwelek hinesanggo holhi'lek, ”Ninabit,” iluk herakfisanogo nen he, hinebe hebelogo logoino o.

²⁶ Andi sambul, at Allah ane isikhe andiba kweang abologet fesikhe meneat he, yogondak, aren he, ”An hobuk yi'nogo hilingisigin,” iluk abok isikhe mene lisu yi'nogo palek werek: ”An hobuk misigam faget kweang yi nek abologet hagain fuk. Lego. Pogot inomat abologet hagain o,” iluk isikhemo lisu palek werek.

²⁷ A'nogo, ”Misigam faget abologet hagain,” iluk isikhe andi re, abolok ugun lek ningsek mene logouwageluk herakfembik he, kweang, pogot aren elalhikhe mene mondogat abologet hageluk isikhe andi.

^28-29 A'nogo abologet hagain meneat he, nit enek he, Allah awe a'ma ninobagaikherek oba abolok igin mondok lek mene wo'nisasikhemo eise agosik welago andi nen he, ”Allah neisena,” iluk hai wati logouwogo. Nen, at Allah ebe re, endu nen yi mene ti mene ninggerek andi hagatma, nit a'nogo weagetninabinogo iluk, at ebe ninailorogo hilingitik, agaukhogo hilingitik, ikhi logolik, at ane hologo endawimo amolo mene hilingiti logolik, fogerati logouwogo.