IBRANI 11 - Allah Wene Fano Wene Hupla Inane

Attak afuni ekhe inendawinggen Allah oba eberogo himbirik logolik, hilingiti lagaukwa wene

¹ Inendawinggen Allah oba himbirik welagaikharek andi ebe re, yi'nogo. ”Fano asigin,” iluk eberogoat anggigik, ”Yi mene ti mene nineilenggen higi'lek meneat he, eberogoat werego,” iluk futfigik, agarek andi aro.

² It afuni attagat inendawinggen a'nogo Allah oba himbirik welagaukwa andiba, Allah nen, ”It fano,” iluk inebe oba lioksek welagaikhe.

³ Allah aneba nen pogot kweang yi mene ti mene mondogat nineilenggen hikhi lago yoma re, niren he, ”Nineilenggen hogorek lek meneba elalhikhemo werek,” iluk, ninendawinggen at oba himbiret fembik futfogoin o.

⁴ At ap enu Kain en, we mene Allah wogetikhe meneat he, at Habel andi nek he, endawinggen Allah oba himbiret fuluk fano mene Allah wogetikhemo, aren he, ”Habel enek he, obabut higit fano higi,” iluk isikhe. A'nogo isikhesi'mo nen, at Habel ebe wa'lagaikhe meneat he, endawinggen Allah oba himbirik logolik hilingitikhe andi, aren, ”An yi'nogo hilingiti,” iluk yaganisili'logo hangge mondok werego.

⁵ At ap Henokh endawinggen Allah oba himbirik welagaikhe andiba, ebe wa'lagi'lek. We, Allah nen elugat wanhikhemo, it afuni ekhe nen ebe heratukwa meneat he, ineilenggen higi'lek. At ebe a'nogo oan wanhi'lek werek kwelek, ”At Henokh Allah endawimo fanorogo nek hilingiti lagaikhe,” iluk isukwama Allah aneba lisu palek werek.

⁶ Afuni inendawinggen Allah oba himbiret figi'lek halok he, at endawimo fanorogo hilingisugun mondok elo'lego. Nen, at oba wesuogeluk halok, iren he, ”Allah eberogoat werek,” iluk anggigik, ”At ebe inelu asuogeluk hilingisugun halok, aren onggo ebe mene wogisikheregat,” iluk anggigik, ugun andi.

⁷ At Nuh ogo re, endawinggen Allah oba himbiret fuluk, yi wene ti wene hobuk hilinglasigin mene Allah nen husumbi yagatikhemo ebe eilenggen higi'lek meneat he, ”Eberogoat hilinglasigin mene yaganete higi,” iluk Allah ane hologo logolik, e so ekhe at againafuri inom telinabigin mene faget wutikhe. A'nogo wutikhemo, Allah nen afuni wene inoba fesikhesik inebe inoatikhe meneat he, at Nuh alegat enek he, endawinggen eberogo nen Allah oba himbiret fesikhe andiba, Allah nen, ”At fano,” iluk telhikhe.

⁸ At Abraham ogo re, Allah nen ayonggo fesikhesik, ”Hat o ekhe eise logoinogeluk wokhesigen he, lano,” iluk abok yagatikhemo, aren he, ”Wene andi eberogoat,” iluk endawinggen Allah oba himbiret fuluk o koma lagain heat onggot logoligat wagaikhe.

^9-10 Wagaikhesik, o abok yagatikhe mene andi arat wagaikhesik logoligat he, ”O yi lego. O hunogoat ekhe Allah nen ilirengge walhigik ningsek meneba wutikhe mene ekhe werego,” iluk nenangorogo mondok logolik, o su meneba ya wutik, ta wutik, ap pok higit nogolik nikhi lagaikhe. Andi hagat, ap Ishak inom, Yakub inom, inendawimo nen he, ”Allah nen, yi'nogo wokhisagain, iluk abok isikhe andi, nit ninomat yaganisasikhemo eise asugun,” iluk a'nogoat nikhi lagaukwa.

¹¹ Nen, at Abraham ebe yaman agaikhesik agwe Sara abili welagaikhe meneat he, at Abraham endawimo nen he, ”Allah nen abok yaganisasikhe a'nogo eberogoat wo'nisagain aro,” iluk endawinggen Allah oba eberogo nen himbiret fuluk welagaikhe andiba, amlogo he Sara eak takhagain elok agaikhemo, takhasikhe.

¹² A'nogo takhasikhe andi nen, agun Abraham ebe yaman agaikhesik wa'lasu hak welagaikhe meneat he, at ebe misigat mene nen tago mene inebe hesagal pogoroba hokhorogo welagarek andi hak inom, ial i laut yenggelek esanggokwe welagarek andi hak inom, hokhorogo inenggi wenasu mondok elo'lekhogo wialagaukwa andi.

¹³ It afuni inenu ilik waga lagi andi mondogaren, ”At Allah eberogoat,” iluk inendawinggen at oba himbiret fuluk welagaukwa andiba, Allah nen abok yagaisasikhe andi ebe wanhi'lek meneat he, afuni nen yi mene ti mene yatma were'ma ineilenggen yethaluk, inendawimo inagaiyek anggagarek andi hak, it inendawinggen oba nen, ”Eberogoat wanugun mene werego, iluk anggikhi lago andi nen, kweangma yoma it ekhe mene inawilokwe pugulogo laluk ap pok hak welago,” iluk fakhogo ikhi logolik inebe wa'larik lagaukwa.

¹⁴ A'nogo ikhi lagaukwa andiba, nit ninendawimo nen he, ”It inawi eise asimbik logoun oba herati lagaukwa,” iluk enegat futfikhi lago andi.

¹⁵ It inawi attak welagaukwaba herakfisaluk wulifukwaba andoma faget oba ebeti logoilepma re, inambotkwe elok we'lep andi nen he, o it welagaukwaba andi faget oba ebeti lagaukwa lego.

¹⁶ We, it ebeti lagaukwa andi re, inawi ebe fano mondok pogoroba mene faget inamolo anggikhi lagaukwa andi nen he, Allah nen it faget inawi arat tegelogo fisasikhemo andi nen he, aren, ”An it ineisena,” iluk, enggali legat ikherek andi.

^17-19 Attagat Allah nen Abraham yagati logolik, ”Haren tagongge mene wialasugun iluk yagahetigi a'nogo ebe re, hamlogo Ishak yi nen tagongge mene nen wialasugun mene faget yagahetigi o,” iluk, yagatikhe meneat he, hobuk obabut paligeluk, ”Hamlogo ebe yi an faget wa'nom,” iluk yagatikhe. A'nogo yagatikhemo, at Abraham endawinggen Allah oba eberogoat himbiret fuluk welagaikhe andiba, ”Ishak wa'lasumo Allah nen hobuk elok elugerasigin,” iluk ebe warogo Allah wogosigeluk isikhe andi nen he, inane lagokhogo re, Ishak warek mene eluk agama Abraham wanhe iluk ikhi logogun o.

²⁰ Nen, at Ishak andi re, endawinggen Allah oba eberogoat himbiret fuluk welagaikhe andiba, againafuri Yakub inom, Esau inom, yagaisikhi logolik, ”Hobuk Allah nen fanothinafi logouwago,” iluk yagaisasikhe.

²¹ At Yakub endawinggen Allah oba himbiret fuluk welagaikhe andiba, wa'lasigiluk ikhi logolik, ebe arige tomuk wurep oba himbiret fuluk Allah hai wati logolik, afuni nen it ekhe munggwarengge inoba fagarek andi hak, Yusuf againafuri ap inebe pire aremnogo inoba yagaisikhi logolik, ”Allah nen fanothinafi logouwago,” iluk yagaisasikheat.

²² At Yusuf ogo re, endawinggen Allah oba himbiret fuluk welagaikhe andiba, ebe horogat wa'lasigiluk ikhi logolik, againafuri Israel mene o Mesir en wulibugun mene faget yagaisigik, nen, ”An noak kololoksek mene andi yi'nogo hilingi'no,” iluk yagaisigik, isikhe.

²³ At Musa ogo re, eisena agaisa inendawinggen Allah oba himbiret fuluk welagaukwa andiba, Musa ebe tatukwasik kumuthasukwa re, omalik ebe fano mondogen, at ap kain andoma mene nen wene wulafikhe mene inailo legat omalik tago andi hinakfesukwasik werek kwelek he, tugi henagan folelhikhe.

²⁴ Nen, at Musa andi ebe arat alage hokho agaikhesigen, endawinggen Allah oba himbiret fesikkhe, yi'nogo anggasikhe: ”An ap kain Firaun a'logo eak hangge logogin he, mondok nabiro.

²⁵ An nebe fano logolik, we elama faget meneat he, anggilukhogo weak hilingiti logogin andi nabit. We, it Allah againafuri ninom yi enggin ti enggin hilingninafi logogun fano o,” iluk, endawimo anggasikhesik,

²⁶ ”Hobuk Allah nen onggo wo'nesigin mene werego,” iluk anggasikhesik he, ”Yi mene ti mene fano mene afuni o Mesir inenggimo mene yi esin lego,” iluk, herakfisaluk, ”Kristus faget ninebe weak-beakhogo ninobagakhi logogun andiat fano o,” iluk anggasikhe.

²⁷ A'nogo anggaluk wulifikhesik he, endawinggen Allah oba himbiret fuluk, ”Ap kain Piraun andi a'mage lagagin andi nailo e,” iluk endawimo anggigi'legat, Allah ebe nineilenggen hogorek lek mene andi eilenggen hikhi logolik hangge, ”Nendawinggen at oba lakfigiri'mo re, wulibigin aro,” iluk o Mesir herakfisaluk wulibi wagaikhe andi.

²⁸ Wulibi wagaikhesik, endawinggen a'nogoat Allah oba himbirik logolik, at malaikat ekhe afuni inebe inoaterek mene nen, afuni o Mesir mene inagainafuri manggusa tago mene inoati logolik, afuni Israel mene inoasinogo iluk he, wam domba warogo enu paskah ninggi logolik, amep o kwe ebene lombok warik loageluk yagaisasikhe.

²⁹ Afuni Israel mene inendawinggen a'nogoat Allahba himbirik logolik, afuni kweang iringikwe lagaikharek andi hak, i Laut Merah yenggelekwe nen wulibi wagaukwa andi. A'nogo wulibi wagaukwama, it afuni Mesir mene nen, ”Nit a'nogoat wulibuogo,” iluk isukwasik wulibi wagunem, i nen sebelinafikhe andi.

³⁰ It afuni Israel mene inendawinggen Allah oba a'nogo himbirik logolik, o Yerikho sili inenggi 6 hari nen walingethikhi lagaukwasik, ekheba walingetunem he, leget pa'leget waganek mene meisak lambuk isikhe.

³¹ A'nogo meisak lambuk ugunem, at he Rahab yanani nikhi lagaikhe mene andi ogo re, endawinggen eberogoat Allah oba himbiret fesikhesik, it ap Israel mene ineil wani wagaukwa mene inebe fano woginafikhe andi nen he, it afuni ekhe Allah ane wanugun inabit mene inebe mondok inoati logolik, at he andi nek he, wati'lek herakfesukwa andi.

³² An nen ap Gideon inom, Barak inom, Simson inom, Yefta inom, Daud inom, Samuel inom, it ap Allah ane yagaisikhi lagaukwa mene inom, inendawinggen eberogoat Allah oba himbirik logolik hilingiti lagaukwa mene pilingisogo yagahisa meneat he, o arat horok agasi'mo re, elo'lego.

³³ It andi mondogat inendawinggen Allah oba himbirik welagaukwa andiba, it o ekhe inom weim yafi logolik, inogogwi kaindek inenupogot mene sebelfisaluk inawi sebelhi lagaukwa. Inobabut higithogo hilingiti lagaukwama, Allah nen he, ”Hit hobuk fano mene wokhisagain,” iluk abok yagaisasikhe mene andi, ebe wanhi lagaukwaat. Mene olomene hangge singa obabut weak mene andi ambe to'motik,

³⁴ endu amulok inailo mene nagulogo figik, karok oba inoasu mene inonggwaregen inebe teligik, inomame lek meneat he, inomame agik, weim yafi logolik inomame arik he, inom weak mene esa hokhorogoat mugisigik,

³⁵ it hemi ekhe ineagwi warek mene hobuk inelugerinafunem woginafik, hilingirik waga lagaukwa. A'nogo hilingirik wagu kwelek, it ekhe re, inebe hobuk fano logogun mene Allah nen inelugerinabuageluk, afuni ekhe nen inebe wiik-weakhogo hilinginafu kwelek, inagap elele heligi'lek welagaukwa.

³⁶ Nen, ekhe re, afuni inane aik weak asegen wogisigik, yei inoatik, inenggi hele warogo kwelakfisigik,

³⁷ helep oba tamuk-tamakhogo inoatik, gergaji oba inobakhe tegethigik, karok oba inoatik, yi enggin ti enggin hikhi logolik, su re, wam domba inom, kambing inom, agap nonggologo itik, yi mene ti mene legen inelagaik welagik, it afuni ekhe nen wiik-weakhogo hilinginafik, ikhi lagaukwa.

³⁸ It andi mondogat inobabut fano a'nogo hilingiti lagaukwa andi nen, afuni inom kweangma yoma logogun he, elo'lego. It andi inawi wurik hangge le'ma re, pugulogo o leimo afuni le'ma inom, tom ebene inom, nikhi logolik, oumokwe inom, kweang anggwe folelekwe inom, welagaukwa.

^39-40 Allah nen, ”Fanothinabigin,” iluk abok yaganisasikhe mene andi, it inebe mondogat andi ebe wanhi'lek meneat he, inendawinggen eberogo nenat Allahba himbirik logolik fano hilingirik waga lagaukwa andi nen, at Allah nen, ”It fano,” iluk inebe oba liok isikhe. A'nogo ebe wanhi'lek andi re, Allah nen attagat nit faget fano mene wenagaisogo ninobagaikhi logolik, nit lek werek kwelek it inalegenek he, fano katokhogo hilinginafi'lek. We, nit faget, ”It inom ambine katokhogo hilinginabigin,” iluk abok isikhemo andi nen he, iren ebe wanhi'lek welagaukwa andi.